شباب اليومين دوول

[Happy Rose]

إليكم نقل حى للواقع المخزى لشباب اليومين دوول:

• حمادة: شوفت اللى بيحصل للفلسطينيين ...إحنا لازم نعمل حاجة يا ميزو..!
• ميزو: عندك حق بقولك إيه..ماتيجى نِهُب هَبَّة على جامعة عين شمس دى المظاهرات على ودنه.
• حمادة: عين شمس إيه يا قلة..جامعة القاهرة أشد..دى مدعكة هناك أهو نخرج الكبت اللى هيقتلنا ده..
• ميزو: قشطة..كلم شيرى و بيرى و شاهندة و شلتهم..و انا هكلم هوبة و باقى المقاطيع...يااااه...أخيرا حاسس إن بقى فيه قضية مهمة فى حياتى.. هنوريهم احنا نقدر نعمل إيه..(موسيقى تصويرية:أغنية القدس دى أرضنا)
• حمادة: الوو..أيوة يا شيرى..ازيك؟..هاو آر يو دوينج توداى؟..
• شيرى(تبكى): نوت باد..شايف اللى بيحصل للفلستينيين ..حراام..موش معقول العالم ساكت كده..!!
• حمادة: عشان كدة انا بكلمك..لازم نعمل حاجة..احنا هنروح بكرة جامعة القاهرة ..عشان نشارك فى المظاهرات إيه نظامك؟
• شيرى(بتتشحتف): شغالة تبعا( اللى يشوفك وانتى صاحيه من النوم يقول شغالة فعلا)....و هكلم باقى الناس..هتتقابلوا امتى؟
• حمادة: بكرة على تسعة كدة..عند كنتاكى عباس..متتاخريش
• شيرى: تسعة موش هينفع..روحوا انتوا و انا هاخد تاكسى وحصلكوا
• حمادة: تاكسى ايه انتى بتستعبطى..انتى مصاحبة عيال ولا ايه..ماتروحيش فى تاكسى لوحدك طبعا هنعدى عليكى بالعربية و نستناكى..(لأ راجل يله)
• ميزو: قول لها تيجى بالديرتى جينز عشان البهدلة..( لأ نبيه ياه)
• شيرى: أوكيه سى يو تومورو..بون نوِى.( الله يرحم ستك ستوتة)


حوار حول المقاطعة ( يقطعهم):

• حمادة: هتروحوا بكرة المظاهرات؟
• ميزو: لأ فى عرضك ..دنا كتفى واجعنى طحن من العصاية اللى اخدتها امبارح...و بعدين الشيخ سيد بيه على كيفهم قال المظاهرات حرام عشان جيه من التظاهر يعنى الايحاء بغير ما فيك يعنى كدب يعنى حرام ( حرمة عليك عشتك).
• شيرى: لأ مش تالبة ناخد زنب انا كمان سمعت الشيخ المفتى أبو فَتوَى السكرة بيقول ما هو حرام فهو حرام و ما هو حلال فهو حلال وخد فتواك على هواك..! ( وأتمنى لو أنساك)
• حمادة: يعنى إيه نسكت...!!! إحنا لازم ناخد موقف..الناس بتموت هناك و احنا ساكتين هنا..!!..بقول لكم ايه ..إيه نظام المقاطعة؟
• بيرى: صح إحنا لازم نقاطع.... كل المنتجات المصرية عشان الحكومة تسمعنا..!!! ( يا منجى الوحش من الجحش)
• ميزو:قصده المنتجات الامريكية يا قلة.
• بيرى: ماشى أى حاجة مش فارقة..
• حمادة: ياعنى نديها مؤمن و كوك دور و كويك و سمايلز و بلاش بيتزا هت و كنتاكى و ماك دونالدز..
• ميزو: طب و الساقع؟ ( عفريت ياد يابن....تانت فكيهة )
• حمادة: اديها فيروز و شويبس
• شيرى: بيرى ..هو بيجيب الكلام ده منين؟!!
• بيرى: أراهنك بيشرب بيريل.!!!
• شيرى: تب بلاش بيتزا هت..آكل بيتزا فين يعنى..!! مقدرش ابتل البيتزا..آى لايك إت سو ماتش..( رحمكم الله يا فتيات فلسطين)
• ميزو: المهم بكرة التليفزيون هيصورعندنا فى الإيه يو سى..عايزين نحضر اعلام و يوفط و كمان عايزين علم اسرائيل نولع فيه.
• شيرى: ياه انا سخنانة موت... عايزين نسبت للعالم ان احنا مع الفلستينيين ( سخنانة يا حلوة ..اعمليلها كمادات توتى فروتى يا تهانى )
• شاهندة: باى زا واى..احنا عاملين عندنا حفلة لصالح ضحايا فلسطين..هتبقى فى لوس أميجوس و مينيمام تشارج90 ج و الدخول كابلز..
• حمادة: كتير أوى90 ج
• شاهندة: يا أخى بقولك عشان التبرعات..انت إيه ما عندكش دم؟!! ( صحيح انت إيه..!! بتقولك لوس أميجوس و كابِلْز و رقص و هتهيص كله فى سبيل فلسطين...{إنا لله و إ نا إليه راجعون})
• ميزو: كنت هنسى صحيح...الخميس اللى جاى بالليل التليفزيون هيصورنا و احنا بنعبى التبرعات فى العربيات و المخرج قال لى عايز ناس كتير عشان هيبعتوه قناة الجزيرة قولوا لكل اللى تعرفوهم عايزين عدد كبير
• حمادة: و يا ترى التبرعات دى هتوصل؟
• ميزو: و احنا مالنا ياكشى يولعوا فيها احنا بنعمل اللى علينا( هو ميزو ده دلع مزراحى..؟!!!)
• شيري: ايوه انا سمعت الشيخ محمد حكاية بيقول التبرعات أهم من الجهاد و الجهاد موش وقته أساسا.
• ميزو: حد فيكو يعرف مكان نجيب منه الغطرة الفلسطينية؟
• بيرى: هاهاي..أنا عندى خمسة جبتهم من دهب لما كنا مع بعض السنة اللى فاتت. ( دهب و ما أدراك ما دهب..العيب موش عليكى العيب على الاريال اللى رباكى و ظبَّطك و وجِّهك و بيستقبل كل الأقمار الصياعية فى بيته )

بعد 3 أشهر من أحداث الاجتياح الاسرائيلى ( انسى يا عمرو ):

• حمادة: بقول إيه..ماتيجوا نروح سينما النهاردة ؟
• بيرى: ده فيه فيلم حلو قوى بتاع ميل جبسون اسمه كنا جنود..
• شيري: ده عن فايتنام تصويره جامد موت
• حمادة: بس ده أمريكى..احنا موش مقاطعين؟!!
• ميزو: يا عم انت لسه فاكر..ده انته شكلك عايش فى البِخ
• بيرى: وبعدين ده فيلم..وفلوسه رايحه لمصر..وبعدين السينما الامريكية أقوى و أحلى سينما أصلا..
• شيرى: ايوه مامى قالت لى انها سألت الشيخ أبو فتوى و قال لها مادام الفيلم موش خارج عن الحدود يعنى موش أكتر من 10% من وقت الفيلم بوس بس.. يبقى موش حرام.
• بيرى: طب وقت الفيلم ده شامل المقدمة و النهاية و الاستراحة؟
• شيرى: هو قال إن لو السينما جنبك يبقى الوقت يبدأ مع بداية الفيلم..لكن لو بعيد عنها يبقى من أول ما تنوى تروحى السينما. {اللهم لا تؤاخذنا بما فعل السفهاء منا } ( ليس بعيدا أن نسمع هذه الفتاوى عما قريب)
• حمادة: وله يا ميزو ما تعرفش اى أخبار عن التبرعات وصلت للفلسطينيين والا لسه؟
• ميزو: ده انت قديم موت.. يابا توصل و الا ما توصلش.. و بعدين بقى الفلسطينيين اللى انت خايف عليهم قوى كده ما يستهلوش..مش السادات قال لهم سلام و هم رفضوا..!!!! ياما حاربنا علشانهم.. ( بذمة ... أنت تعرف تحارب دبانة..ماهو مش كلامك ده كلام البيه والدك اللى بياخدكم تصيفوا فى الكاريبيانو.. و يوم فرح أختك كان آعد يهز فى وسطه و ينقط الرقاصة بالالافات..ولما تيجى سيرة فلسطين و الجهاد يقول لك..يابنى دول عايزين يدمروا مصر { قال رسول الله صلى الله عليه و سلم: من مات ولم يحدث نفسه بالغزو فقد مات على شعبة من النفاق} ...و المنافقين فى الدرك الاسفل من النار )
• شيرى: حمادة من فضلك بتَّل تبعتلى الإي ميلزاللى فيها الصور الفزيعة بتاعة الفلستينيين..منازر فزيعة..و بعدين مامى قالت لى إن الفرجة على الصور دى حرام عشان بتئزى النفس ( لكن الفرجة عليكى و انتى بالبادى الستوماك و البانتالون البرمودا حلال.!!!..أسكنكم الله فسيح جناته يا أمهات فلسطين )
• بيرى: المهم هتتغدوا فين..آم سووو هانجري
• شيري: بيتزا هت ...او ماك دونالدز
• حمادة: برضه مطاعم أمريكية؟!!
• ميزو: يييييه.. ياعنى احنا لما نقاطعها أمريكا هيحصلها حاجة!!! يابا صلِّى ( نشرت جريدة الحياة مقال عن الخسائر الأمريكية نتيجة المقاطعة و طبقا لمصادر أمريكية بالخليج وصلت الخسائر إلى 200 مليون دولار )
• شيرى: و بعدين فيه ناس بيشتغلوا فى المحلات الامريكية يعنى احنا لازم نشترى منهم عشان نساعدهم ( و حياة خالتك صافيناز!! )
• حمادة: مافيش غير الجهاد عشان نحرر فلسطين
• ميزو: ما ينفعش نجاهد قبل ما نغير نفسنا و بعدين مش الجيل ده اللى هيحرر فلسطين ( كلمة حق أريد بها الباطل ...{و يمكرون و يمكر الله و الله خير الماكرين}...أولا وجب الجهاد ليس لتحرير فلسطين و لكن لنجدة المسلمين هناك فقد أوصى الرسول الكريم بنصرة اخواننا فى أى بقعة من بقاع الأرض أما تحرير بيت المقدس فسيأتى بإذن الله)
• شيرى: ايوه الشيخ محمد حكاية قال كده ( حلاوتك يا سيدنا الشيخ)
• ميزو: ها.. جاى معانا و الا لأ؟
• حمادة (مع نفسه): ياعم رضينا ربنا وعملنلنا كام مظاهرة كوول على كام إى ميل فى الجون...وشوية بيانات مقاطعة...على كام صورة تقطع القلب...إيه ...هو أنا هفضل أقطع فى قلبى على طول!!!....ساعة لقلبك بقى.
• حمادة: الهُبَّة يا ولاد
• ميزو: أيوه كده خليك بِِِِرِنْجِى
• بيرى: هاهاى ..طب و الساقع؟
• الكل فى نفس واحد: بيبساوى على طووووووول على طووول


فى النهاية إذا كنت أو كنتِ أحد هذه الشخصيات فإما أن تسرع بتغيير نفسك أو لتشطب اسمك من سجل مجتمعنا فلا مكان لك عما قريب لأنك ستجد نفسك كائن غريب فى عالم يفر جميعه إلى الله سبحانه و تعالى طبقا لبشرى رسولنا الكريم التى بدأت تلوح و تفرض نفسها .
رغم أنف المنافقين... رغم أنف المنافقين... رغم أنف المنافقين

[شكولاته]

لا حول ولا قوة الا بالله العلي العظيم
حسبي الله ونعم الوكيل

لا اعرف ماذا اقول أتألم مما اقرأ لانه للاسف واقع في محتمعنا بين كثير من الشباب

الغافلون متي سيفيقوا من هذه الغفله ؟؟؟؟؟

اهلا بيكي هابي روز موضوعك خطير تسلمي
ومنورة المجتمع والناس
تحياتي

[hamed mohamed]

الأخت هابي روز...
موضوعك أكثر ما يقال عنه أنه رائع ..... ورغم أنني أقرأه وأنا أضحك إلا أن ضحكتي هذه كانت ضحكة غريبة ضحكة ممزوجة بخيبة الأمل مما وصل إليه تفكير شبابنا اليوم... رغم أن توتو وسوسو لا يمثلون إلى أقلية في مجتمعنا المصري... إلا أنني أعني السواد الأعظم من شبابنا والذي انشغل بقضايا تافهة وانصرف عن قضايا أمته ودينه...
ولا أملك أمام هذا الموضوع المحزن إجمالاً والمضحك تعبيراً إلا أن أقول أنه موضوع جميل وأسلوب أجمل .. وكاتبته أظنها أجمل وأجمل ...
تقبلي تحياتي...