في الناحية الشرقية من مضارب بني عبس...حيث يحدها من الشرق برميل زبالة نسيت البلديه تشيله ..عبلة شايلة ترمس الميه تملاه من جردل القبيلة...وعنتر واقف جنبها على موتوسيكل مركب فيه مسجل...ومشغل اغنية رضى الله وراضيناك
عبلة: حل عني بقى يا اخي ...انا زعلانة
عنتر: ليشه بس يا قلبي انتي زعلانة تأبريني عبولتي
عبلة: فاكرني ما شفتكش مبارح لما كانت بتغمز لك سميرة توفيق في عرس الامير زهير...وانت ضحكتك مالية وشك... يا شبه مايكل جاكسون .
عنتر: وحياتك عبولتي سميرة توفيق دي ماتسواش عندي قشرة بصله..انتي مش مصدقه انها رمتلي الرقم وهي مروحة ..وما خدتوش منها ولا عبرتها...علشان تعرفي غلاوتك عندي يا جاموسه بيضا..
عبلة: بسيطه ..اضحك علي بكلمتين ..وانا اصدقك زي كل مره
عنتر: يلا بقى فكي التكشيرة...خلينا نلحق نحب شويه قبل ماييجي التيس ابوكي
عبلة: يا لهوي0000 تأخرت ولازم امشي
فجأة يطل مالك والد عبلة من بعيد...وعينيه تقدحان شرار...وعندما يقترب من عنتر يوجه اليه بوكس على وشه ...ثم يصرخ قائلا قاعد بتعمل ايه مع عبلة يا اهبل
عنتر: ليه كده يا عمي...انت شارب ايه ع الصبح كده
مالك: لسه ملحقتش اشرب...بس حشرب من دمك ...وانتي يا عبلة..انقلعي على البيت وانا حوريكي شغلك.....تجري عبلة بسرعة الى البيت
عنتر: والله ان مديت ايدك عليها لاروح اسحب سلك الديجيتال اللي موصلينه من خيمتنا لخيمتكم ...يا عمي انا احب عبلة..وطلبتها اكثر من مرة ودفعت مهرها
مالك: مش حاجوز هالك ..وانت دافعلي فيها ترمس ميه من سنه الف وربعميه وخشبه
عنتر: طيب اطلب وتدلل يا عمي وملكش الا اللي يرضيك
مالك: غور من وشي دلوقتي 0.. وحبقى اشوفك في الانترنت كافيه باللليل ..نتكلم بالموضوع
عنتر: انا تحت امرك يا عمي...بس ربنا يكرمك متضربش عبلة لما ترجع البيت
مالك: غور من وشي قلتلك ..
ويرجع مالك الى البيت...ويمسك عبله يرنها علقه مايكلهاش حمار في مطلع ...وقالها لو حتموتي مش حجوزك عنتر المنيل ..يوم الخميس عرسك على عمارة
ويقعد مالك يفكر في طريقة تخلصه من عنتر..وعبلة المسكينة تعيط خايفه ان ابوها ينفذ تهديده ويزوجها عمارة الاقرع ...وقامت بسرعة تلفنت لعنتر على موبايله ..وقالتله الخبر
عنتر ارغى وأزبد..وقال: ماشي يا عمي..بتضحك عليا وانا عنتر...والله ان عملت العمله دي لاهرسنك وادوسن في بطنك...وقام أنشد:
أتاني طيف عبلة في المنام
فقلت يا ربي هذا حرام
مالك يزوجها ابن اللئام
وانا حاقعد اطير حمام
شافه اخوه شبيوب حزين والدمعة بعينه ..سأله مالك يا عنتر
عنتر: اخاف عمي ما يرضاش يجوزني عبلة.. انا حانتحر من برج القاهره
شيبوب: ايه الكلام ده يا عنتر...عمي فين حيلاقي عريس لعبلة احسن منك..شهادة ابتدائية ودبلوم صياعة
عنتر: والله عمي ده يبيعني ويشتريني بلعبه بلاي ستشن...وانا مشكلتي مفلس وفلوسي كلها ضاعت ببنك التوفير الحراميين النصابين
شبيوب: استهدي بالله وااستنى لما ييجي الليل ونكلم عمي
في الليل..دخل عنتر الانترنت كافيه..وكان مالك في التشات يكلم عمارة..عريس عبلة الغني..وبيتفق معاه عشان يجي يوم الخميس يخطب عبلة....ولما شاف عنتر داخل الكوفي...عمل ديليت بسرعة للمسجات وطلع من التشات
عنتر: بتعمل ايه يا عمي
مالك: كنت باكلم اخويا في امريكا...عايزه يجددلي عضويتي بالتشات..لان الكريديت كارد بتاعي منتهي تاريخه
عنتر: اوكي مان ايه رايك بالي اتفقنا عليه...امتى حتجوزني عبلة
مالك: فين مهرها
عنتر: انت تؤمر يا عمي طلباتك ايه
مالك: عايزك تروح اليابان...تجيبلي لاب توب جديد من هناك...زهقت من الانترنت كافيه ده ...زحمة وبستنى كتير عشان اعمل شات…
عنتر: حاضر يا عمي انا حنفذلك كل طلباتك
ورجع عنتر خيمتهم وهو فرحان...اتصل على عبلة وبشرها...وقال لشيبوب..روح جهز الفيات خلينا نطير القاهرة نحجز اول رحلة على اليابان....
وسافر عنتر مع شبيوب لليابان يشتري مهر عبلة...ويوم الخميس راح عمارة بيت مالك وخطب عبلة ..ووافق مالك ودخل عند عبلة يخبرها...لكن عبلة رفضت وبكت وترجت ابوها...فقام ضربها ضربا مبرحا لحد ما وافقت..وتزوجت عمارة الاقرع وهي حزينة وكئيبة
جالها عمارة يتغزل فيها ويقولها : يا عيني على العيون الساحرات..انتي ملاك والا...
عبلة: غور من وشي يا وحش يا اقرع …ربنا ياخدك يا معفن..انت ما يجيش من وراك الا النكد ……
عمارة: تعالي قربي جنبي سليني يا عبلة
عبلة: قادر يا كريم ابليس يونسك طول حياتك..انت وقرعتك المنوره..يا ويلك لما يرجع عنتر
ورجع عنتر من السفر…وراح المضارب يدور عبلاه…لكنه انصدم بخبر زواجها… وسقط على ركبتيه وهو يبكي وينشد:
ولقد بكيتك والدموع نواهل
وكومه برابير تقطر من فمي
قسما لادوسن في بطن عماره
ولو دفعت في عمره دمي
وقعد عنتر يدور على عبلة في كل حتة ..لحد ما شاف شغالتها جاية من بعيد... ناداها
عنتر: ماريا هل عرفتيني..انا عنتر
ماريا: مازا تفأل هنا يا أنتر...اذا رآك يور اونكل هيكسر رأبتك
عنتر: ربنا ياخده...ايه اخبار عبلة
ماريا: في البيت بتأيط من الهزن اليك..
عنتر: قوليلها اني جايلها بالليل اشوفها... وحنط من فوق سور بيتهم
ماريا: أتشا انا لازم اروه فرن اجيب تشباتي ...وراحت الخادمة وعلمت عبلة بالموعد
وعندما اتى الليل..ذهب عنتر الى بيت عبلة..ونط من فوق السور ووجد عبلة بانتظاره في الحديقة ...فامسك يدها والدموع في عينيه …راحت عبلة طلعت كلينكس من شنطتها ومسحت دموعه وقالت له: لا تبكي يا حبيب العمر… قال قسما لا تبيتن الليلة عند وجه الغراب عمارة… ثم خلع نعاله وامسكه بيده واقتحم المنزل على عمارة .…ودخل غرفته فوجده مستخبي تحت اللحفاف وبيشخر …
ضربه على وشه حته قلم وقاله له قوم انا حموتك دلوقتي ...يا اخي حس على دمك لا متبقاش رخم وغتت...طلق عبلة..مش عايزاك ..عافيه هي يعني...امشي غور شوفلك واحده قرعه زيك ترضى بيك
عماره وهو بيرتعش: مش حاطلقها
قوووووووم ما كملش كلامه الا وعنتر رافسه رفسه خلته وقع من فوق السرير ..وقاله وحيات خالتي ان ما طلقتهاش لاخذ فيك اعدام على كرسي الكهربا
خاف عمارة وطلقها …واطلقت ماريا زغروده قوية احتفالا بالطلاق…واخذ عنترة عبلة من يدها وذهب الى بيت عمه…سحبه من رقابته ..واخذه الى اقرب مأذون حيث عقد قرانهما وعاشا في سبات ونبات..وخلفوا عنترات وعبلات
:
r: :
r: :
r: :
r: :
r: :
r: :
r: :
r:
>>> عنتر وعبلة...طبعه مصريه منقحة <<<
النمط الخطي
