ممنوع الدخول بالملابس الرسمية

[نكش]

طبعا لما تروح تقابل شخصية مهمة او حتى نص مهمة بتكون على اخر صيحة واخر شياكة لأن الجواب بيتعرف من عنوانه وطبعا بتكون لابس الحته اللى على الحبل وعامل كل اللى تقدر عليه علشان تنول الرضا والسماح من الشخصية المهمة إياها وطبعا لازم قبل الزيارة تحفظ كام جملة وتتعلم كام كلمة شيك ويكون اسلوبك راقى لحد ما تقدر وفى الاخر يا طلبك يتنفذ ويتوافق عليه وتنول اللى انت عايزه لأما يترفض طلبك وتتحطم تحت حكم القوى وتبدا وتحاول تعيد الكره من اول وجديد
لكن عارف هناك من هو اولى بكل ذلك ومع ذلك ما طلبش منك حاجة من ديه
ما طلبش منك انك تكون اخر شياكه وانت داخل عليه ما طلبش منك تقديم طلب ولازم يمضى عليه 100 موظف وبعدين يمكن تقابله ويمكن لا
بل بالعكس طلب منك إنك تدخل على طول من غير استئذان من غير ملابس رسمية او حتى ملكية هو عايز منك حاجه اكبر من كده هو عايز قلبك عايزك صادق ومخلص عايزك دايما محتاج ليه وبيقولك انا اقدر انفذ طلبك بس انت تعالى
ما طلبش منك إنك تكون واقف وانت بتكلمه
ما طلبش منك اسلوب معين فى الكلام معاه
مش مهم الاسلوب المهم تكون صادق بجد محتاج له بجد
وإن كان هو اولى بكل ذلك هو من يستحق ان تكون بين يديه بافضل الثياب وننتقى افضل اساليب الكلام
لكن لا هو مش كده
فاتح بابه لكل شخص فقير وغنى
رجل وست
حتى كافر ومسلم
تخيل جميع الطبقات والمستويات تقدر تخبط على بابه وتدخل من غير استئذان وفى اى وقت كمان
عارف مين اللى انا بتكلم عليه ؟
إنه إلهى وخالقى انه ربى
يا إلهى كم هذه الكلمة جميلة
يا إلهى كلمة بتدخل القلب على طول
كلمة بتريح القلب بمجرد ذكرها
كلمة تحسسك بالطمانينه وكأن صاحبها بيقولك اطمأن انا جانبك لن اتركك
انا معاك
مش محتاج لوسيط مفيش بنا القاب ورسميات ولكن بنا مناجاة بنا دعاء
بنا حديث طويل اعرفه حتى قبل ان تقوله
وبعد ان تنتهى الجلسة معه تشعر براحة وطمانينه عجيبه وتتمنى جلسة تانيه وتانيه ولكن مشاغل الدنيا تشغلك عنه وتبعدك عنه ومع ذلك هو جانبك فى كل ده ومستنيك
إنه إلهى
يكفيك ان تقول ربى دبرها
بص جمال الكلمة خلاص ارمى كل الهموم إرمى كل الاحزان إرمى اى شئ سئ وقول ليه رب يدبرها
انه إلهى إنه ربى وخالقى
إنه إلهى .

[زهرة]

تبارك الله ..وسعت رحمته الصغييير قبل الكبير
قال رسول الله عليه وسلم عن رب العزة :-

"ما يزال عبدى يتقرب الي بالنوافل حتى كنت سمعه الذي يسمع به وبصره الذي يبصر به ويده التى يبطش بها ورجليه الذي يمش بها فان تقرب الى شبرا تقربت اليه ذراعا وان تقرب الى ذراعا تقربت اليه باعا وان ذكرنى في ملأ ذكرته في ملأ خيرا منه .."

صدق رسول الله صلى الله عليه وسلم

شكرا اختى العزيزة نكش على موضوعك الرائع

[نكش]

جزاك الله الف خير على مرورك زهرتى