الشارع ده ..

[شاعر شاب]

الشارع ده مشيته
مرة .. و كنتي معايا
و يوميها زعلتي مني .. و حكيتي بقسوة عني
و بعدتي عن خطايا
و في اول حرف أقوله
دار وشك ليا تاني
و الضحكة اللي في عينيكي
رجعت زي البداية
لسه فاكرة الحكاية ؟؟

الشارع ده مشيته
و جيت لك في الميعاد
و يوميها و انتي جنبي .. حسيتك جوا قلبي
حاضناني من الميلاد
مش فاكر أي كلمة
قلناها لبعض يومها
فاكر بس ان دايما
كان فيه بينا معاد
لسه فاكرة الميعاد ؟

الشارع ده مشيته
في الفجر و كنت وحدي
و في بلكونتك وقفتي .. و استنيتي و شفتي
اني وفيت بوعدي
فاكرة الجو اما برّد
ليلتها .. شفت نجمة
حسيت ان انتي هيا
باعتالي دفاكي عندي
لسه فاكرة لي وعدي؟؟

الشارع ده مشيته
علشان في نهايته اشوفك
و يوميها ضحكتي ليا .. و بصيتي في عينيا
تشكي لي من كسوفك
كانت لحظة و عدت
حسيت فيها بكلامك
مهما تداري الشفايف
سامعك من غير حروفك
فاكرة أيام كسوفك ؟

الشارع ده مشيته
و انا باحكي لنفسي سيرتك
و ليلتها ضحك لي عمري .. و حلفت اديكي عمري
و اخدت معايا صورتك !
خبيتها ما بين ايديا
قربتها عند قلبي
نفس اللي باحبه فيها
ضحكة عينك و حيرتك
لسه في عينيكي حيرتك ؟؟

الليل في عينيا مدد .. و الفجر حلف ما راجع
تفتكري ولا تنسي .. ما هتنساني الشوارع !

[Lonely Doc]

الموضوع ده قريته
عشان اسلم على شاعر شاب اللى عمره ما شاب

الموضوع ده قريته
لقيته حكايه كبيره عايزلها ازازه بيره

الموضوع ده قريته
فكرنى بحاجات راحت وبقت ذكريات

الموضوع ده قريته

" تفتكري ولا تنسي .. ما هتنساني الشوارع ! " .....واحنا كمان ما هننساك

منور ابن مصر ياشاعر

تحياتى

[حدوتة]

دكتورنا الجميل سبقنى
اهلا بيك ياشاعر
طبعا مش هنرحب بيك فى بيتك
ومش جديد انك تكتب حاجة حلوة
تحياتى

[شاعر شاب]

المشاركة الأصلية بواسطة Lonely Doc

الموضوع ده قريته
عشان اسلم على شاعر شاب اللى عمره ما شاب

الموضوع ده قريته
لقيته حكايه كبيره عايزلها ازازه بيره

الموضوع ده قريته
فكرنى بحاجات راحت وبقت ذكريات

الموضوع ده قريته

" تفتكري ولا تنسي .. ما هتنساني الشوارع ! " .....واحنا كمان ما هننساك

منور ابن مصر ياشاعر

تحياتى

منور الصفحة يا دكترة .. ليك وحشة !!

[naughty eyes]

منور

ودومت شاعر يا شاعر

[Lonely Doc]

النور نورك ياصيدله....يارب ما تجيى حاجه وحشة ابدا !!