شرح برنامج FakeFolder لحماية ملفاتك الخاصة بهيئة كنترول بانل !!

[^DoDo^]

السلام عليكم ورحمة الله وبركاته

هانبدا مع بعض يا جماعة كدة بالبرامج البسيطة والسهلة وبعد كدة نخش فى الغويط هاشنرح النهاردة برنامج بسيط وسهل أوى أسمه FakeFolder
البرنامج دا بيخلى الفولدر بهيئة كنترول بانل ومش حد يقدر يشوف اية اللى جواه الا بالباس ورد الخاصة بالبرنامج واللى هاتحطها أنت وما حدش يعرفها غيرك طبعا يلا نبدأ مع بعض بسم الله الرحمن الرحيم

وصلة التحميل ومش فاكر انا كنت منزله منين فحاطه لكم عندى والبرنامج نضيف ما حدش يقلق ويا ريت لو حد لقى وصلة من على موقع تانى يحطها عشان الناس تبقى مطمنة

نزل البرنامج وصطبه هو حجمه صغير أوى وسهل جداااااا بس ما فيش مانع نوضحه برضه بعد ما تصتب البرنامج هاتحط له باسورد واوعى تنساه هانشغل البرنامج من ستارت مينو هاتطلع لنا الشاشة دى

هانفرض إننا حطينا كل ملفاتنا الخاصة على الدى مثلا فى الفولدر اللى اسمه ^DoD^ نقوم نختار من المكان اللى متعلم بخط أحمر عريض الفولدر وندوس على كلمة برتكت بكدة الفولدر بتاعنا هاياخد شكل الكنترول بانل وما حدش يقدر يشوف اللى جواه غيرنا لأن كل اللى هايجى يفتحه هايدخله على الكنترول بانل وعشان نفك الحماية من عليه نفتح البرنامج تانى من قايمة ستارت ونشتغل من الشاشة دى

هانحدد الفولدر من المكان اللى متعلم بخط أحمر برضه عريض ونعمل عليه دبل كلك وندوس على أن بروتكت وبس
خلص برنامج النهاردة سهل وحلو أوى أزاى

وتقبلوا تحياتى )|f(|
^DoDo^

[ابن مصر]

شكرا على البرنامج الررررائع

و فعلا انا كنت محتاجه جدا
الف شكر عليه
و تحياتى

[7asony]

(y) (y) (y) (y) (y) (y) (y) (y) (y) (y)
لما حاولت احمله طلع لي الماسنج ده :

We're sorry, but this page is currently unavailable for viewing.

(y) (y) (y) (y) (y) (y) (y) (y)

[ابن مصر]

حسونى اضغط كليك يمين على كلمه وصله التحميل
و دوس Save traget as او حفظ بهدف

و ممكن طريقه تانيه
دوس كليك يمين على كلمه وصله التحميل
و دوس Copy shortcut
و الصقه فى المتصفح
و شيل http://
و دوس انتر:r: :r:

[^DoDo^]

السلام عليكم ورحمة الله وبركاته

اى خناقة يا إبن مصر إحنا دايما فى الخدمة

حسونى الفايل موجود والله وعلى العموم حاول جرب الطريقة اللى ابن مصر قال عليها لأنها الصح ولو مش اشتغلت معاكى قول لى وان شاء الله ابقى ابعته لك


وتقبلوا تحياتى )|f(|
^DoDo^

[pepsi_man]

الف شكرااااااااااااااااااا

[tmostafa11]

ياعم لا طريقة نافعة ولا موجود اي شيئ وشكرا علي المقلب الف شكر مع السلامة

[7oOoDa]

المشاركة الأصلية بواسطة tmostafa11

ياعم لا طريقة نافعة ولا موجود اي شيئ وشكرا علي المقلب الف شكر مع السلامة

طبعا لا موضوع ولا عضو ولا لنك ولا برنامج ولا غيره موجود لانك بتراجع على موضوع مكتوب من 4 سنوات.. يعني اكتر من 1460 يوم !! (كل اربع سنين بيتخرج 350 طالب من حاسبات دخلو من اربع سنين برده ) شفت بقى !!
عالعموم, لو لسه محتاج برنامج بيقوم بمهمة مشابهة.. ياريت تفتح موضوع جديد وهتلاقي تجاوب وهيتلبى طلبك (بس المهم ترجعله قبل 4 سنين برده :] )