|
طبيب متهم مجزره بنى مزار يؤكد استحالة قيامه منفردا بالعملية
[size=5]لا يزال الغموض يكتنف مجزرة بني مزار والتي راح ضحيتها عشرة من أهالي إحدى قرى بني مزار بمحافطة المنيا الذين قضوا ذبحا وقد مثل بأجسادهم، والتي زعمت فيها وزارة الداخلية بأن مريضا نفسيا من أهالي القرية هو الذي قام بهذه المجزرة البشعة وهو ما رفضه الرأي العام في حينه، واعتبروه أنه محاولة لغلق ملف القضية وإيجاد كبش فداء للتخفيف من حدة ضغوط الرأي العام لكشف حقيقة ما حدث.
ويوميا يترسخ هذا الاعتقاد كلما انجلت بعض خيوط الحادث ونشر المزيد عن ملابساته.
وفي هذا الصدد نشرت صحيفة أخبار الحوادث تحقيقا صحفيا تضمن مقابلة مطولة مع السفاح المزعوم الشاب محمد على عبد اللطيف، وهو مريض بالفعل وما كان ينبغي التعويل على روايته وقد بدا متخبطا في روايته التي جاءت متتناقضة مع الواقع وشهادة الشهود، وتضمن التحقيق أيضا مقابلة هامة مع الطبيب الاستشاري المعالج له منذ العام الماضي والذي أكد في أقواله للصحيفة والنيابة استحالة قيام المتهم بهذه الجريمة بمفرده، ثم أجرت الصحيفة حوارا مع أسرة المتهم المزعوم والذين فندوا العديد من الأدلة المزعومة على ارتكاب محمد لهذه الجريمة البشعة وأبرزها عدم صحة وجود جلباب للمتهم ملوث بالدم أعطاه المتهم لشقيقته لتقوم بغسله حيث أن أخوات المتهم المعوم متزوجات ولا يعشن معه في المنزل.
ولأهمية هذه الحوارات نعرضها كما نشرتها أخبار الحوادث.
ساعتان كاملتان ناقشنا خلالها المتهم محمد علي الملقب بسفاح بني مزار.. لايمكن ان ننكر ان أثار المرض كانت بادية عليه شكلا وموضوعا.. ولايمكن ان ننكر ان لديه بعض التفاصيل المهمة عن المجزرة التي ارتكبها.. لكن بعض اجاباته كانت تثير الدهشة حينا.. والارتياب حينا آخر.. والسخرية حينا ثالثا!.. قال مثلا انه دخل منزلين آخرين بعد جرائمه في ثلاث بيوت، واكد انه لو وجد في المنزلين سكانا لما كان يتردد في قتلهم!.. قال ان جلبابه لم يكن ملطخا بدماء الضحايا.. وبمنتهي العقل قال انه يتمني اعدامه بدلا من ان يقتله أهل القرية!
سوف نقدم الحوار كما جري بيننا وبين المتهم في مركز شرطة بني مزار.. وسوف نترك للقاريء ان يتخيل ما يشاء بعد ان طرحنا علي المتهم كل التساؤلات التي كانت تدور في اذهان القراء!
سألنا المتهم:
* لماذا قتلت المجني عليهم؟!
- قتلتهم كده وبس!
* هل بينك وبينهم اية خلافات دفعتك للانتقام منهم بهذه البشاعة؟!
- لا.. مفيش بيني وبينهم أي مشاكل.. دول حبايبي.. وسيد ويحيي مشاركينا في الزراعة.
* إذن لماذا قتلتهم؟!
- مش عارف!
* ماذا فعلت قبل ارتكاب المذبحة؟!
- كان يوم عادي زي كل يوم.. بعد صلاة المغرب رجعت من الأرض مع أبويا وقعدت في البيت.. اتعشيت مع الجماعة 'عدس' وبعدين قعدت في البيت.. وبعد الساعة 12 تقريبا لقيت نفسي أمشي في شوارع البلد وحدي.. مش عارف رايح فين.. ولا عند مين.. اخدت الساطور والسكين بتوعي من كوم القش اللي جنب بيتنا.. وطلعت لبيت 'يحيي' عن طريق الحائط الخلفي.. وبعدين نزلت من داخل السلم.. لقيت يحيي وزوجته انعام وأطفاله اسماء والرضيع 'محمد' نايمين علي سرير واحد.. وفي حجرة واحدة.. قتلتهم كلهم.. واخذ يشير محمد بكلتا يديه.. ثم أكمل كلامه: وبعدين تأكدت من موتهم وقطعت الاعضاء التناسلية.. ودورت علي مكان أدفنها فيه.. فوجئت ان الارض 'ناشفة' معمولة خرسانة.. فضلت ادور لحد ما لقيت مكان في 'الحمام'.. دفنتهم فيه وبعدين دورت في الغرف الباقية علي أي حد تاني يكون
* قاطعناه: ليه؟!
- قال محمد: علشان اقتلوا برضه!
* كده من غير سبب؟
- أيوه.. لو لقيت أي حد كنت قتلته!
* وبعدين إيه اللي حصل؟!
- قبل ما اخرج من الباب الرئيسي للبيت وقفت علي صوت الحمام وهو بيرفرف بجناحاته.. رحت اخدت 4 حمامات وذبحتها ورميت رءوسهم!
* رميتهم فين؟!
- مش فاكر! وبعدين مشيت ومعايا السكين والسطور!
سيد كان حبيبي!
* ورحت فين بعد كدة؟
- قال محمد وهو يصدر حركة غريبة عبرت عنها ملامحه وهو يضغط علي أسنانه ثم يضحك قليلا:
رحت بيت سيد.. برضه دخلت عن طريق السطوح من عند الجيران بعدما طلعت علي الحائط الخلفي بايدي ورجلي.. نزلت من السلم الداخلي في البيت.. لقيت سيد وزوجته صباح وأطفاله فاطمة وأحمد نايمين كلهم علي فراش واحد علي الأرض.. رحت ساحب السكين والساطور وبدأت اقتلهم كلهم في لحظة واحدة!
* فيه حد فيهم شعر بوجودك وحاول الاستغاثة؟!
- لا.. كلهم كانوا نايمين!
* هل رشيت عليهم أي مخدر قبل ما تقتلهم؟!
- لا.. لامخدر ولاحاجة هم كانوا رايحين في النوم!
* وبعدين؟
- وبعدين قطعت أعضاءهم التناسلية.. ودفنتها بسهولة في حوش البيت.. أسفل السلم.. حفرت حفرة صغيرة في التراب ودفنتهم.. ومالاقيتش حد تاني في البيت!
* لكن بنات سيد الكبار كانوا نايمين في الغرفة اللي فوق؟!
- يضحك محمد ويقول بسخرية.
ما شفتهمش.. لو شفتهم كنت قتلتهم برضه.
* كنت تكرههم لهذه الدرجة؟!
- بالعكس.. سيد كان حبيبي قوي وشريكنا في الأرض!
* اذن ليه قتلته هو وأسرته؟!
- ما هو أنا ما اعرفش برضه ليه؟!
أقتل أي حد!
يسكت محمد لحظات التقط خلالها أنفاسه ونفس الحركات الغريبة تعود لملامحه حتي أنهاها بضحكة غير مسموعة ثم تهيأ لنا لنستأنف حوارنا معه.. فبادرناه:
* ورحت فين بعد كده
- خرجت من باب بيت سيد.. فضلت ماشي في الشوارع وحدي.. كل الناس نايمة.. ماحدش قابلني في طريقي خالص .. في اللحظة دي لوقابلت اي حد كنت قتلته.. فضلت
ماشي لحد مالقيت نفسي فوق سطوح بيت الاستاذ طه عبدالحميد المحامي.. نزلت من السلم الداخلي للبيت وانا ماسك في إيدي السكين والساطور.. دخلت حجرة طه 'الخارجية' .. كان الباب مواربا .. لقيت طه نايم لوحده علي الكنبة.. ضربته بالساطور علي دماغه وبعدين رقبته .. فوقع علي الأرض وبعدين فتحت بطنه وقطعت عضوه الذكري..
تركته ورحت ادور علي أي حد تاني داخل البيت فلقيت الخالة 'هند' ¬أم طه¬ نايمة وحدها في الحجرة الداخلية علي السرير .. ضربتها بالساطور علي دماغها وفتحت بطنها.. ومالقيتش حد تاني.
* لكن ابوبكر شقيق طه واولاده كانوا ينامون في نفس الدور؟!
- تقريبا كانوا قافلين الباب من جوه.. فتركتهم ومشيت من باب البيت!
بيوت فاضية!
* ورحت فين بعد كده؟!
- فضلت أمشي في الشوارع .. دخلت منزلين تانيين بنفس الطريقة.. لكن مالقيتش فيهم حد كانوا فاضيين.. مشيت بعد كده في الشوارع مش عارف رايح فين.. لحد ما لقيت نفسي في مدينة بني مزار..
* والساطور والسكين وديتهم فيه؟!
- رميتهم في ترعة الإبراهيمية!
* كم ساعة امضيتها في تنفيذ المذبحة دي كلها؟!
- مش عارف!
* وعملت ايه في بني مزار؟!
- قعدت شوية علي قهوة.. وبعدين روحت البلد تاني.. لقيت الناس كلها بتصرخ وقالوا ان الناس دول ماتوا مقتولين!
* واتصرفت ازاي؟
- بشكل عادي.. رحت بيتنا قعدت شوية .. وبعدين كنت واقف مع الناس في الشارع الكل بيتكلم عن الجريمة..
* ومازعلتش علي اللي قتلتهم؟
- زعلت طبعا.. خاصة علي سيد.
* انت عارف عقوبة جريمتك إيه؟!
- ايوه.. ياريت يعدموني علشان ارتاح.
* ومش خايف من أهل الضحايا؟!
- انا عارف انهم حيقتلوني لو شافوني بس أنا أعمل إيه؟!
* والجلابية الملوثة بدماء الضحايا وديتها فين؟!
- مفيش دم ولاحاجة !
* تقول ايه لاهل البلد؟
- والله ما انا عارف أقول حاجة..
* انت خططت لارتكاب الجريمة دي؟!
- أبدا.. جت كده لوحدها بالصدفة..
* وأثناء ارتكاب المذبحة كنت حاسس بإيه؟!
- ولا حاجة غير ان أقتل أي حد أشوفه!
* انت بتعاني من أي مرض نفسي؟!
- ايوه.. من سنة وانا تعبان وابويا وداني عند كاتره نفسيين وبيعالجوني
* نفسك في إيه؟
- دلوقتي نفسي اتعدم.. وقبل كده كان نفسي اتجوز بنت حلوه!
-------------------------------------------------
* مفاجأة الطبيب المعالج: السفاح لم يرتكب المذبحة وحده!
مفاجأة مدوية فجرها الدكتور نصر إبراهيم استشاري الطب النفسي وهو الطبيب المعالج للسفاح المتهم محمد.. أكد الطبيب أن المتهم من خلال دراسته لحالته لا يمكن أن يكون قد ارتكب المذبحة وحده!
'أخبار الحوادث' نشرت حوارها مع الطبيب المعالج بكل ما يحمله من مفاجآت مع التأكيد علي أن ما أثاره الطبيب و هو نفس ما أقر به في تحقيقات النيابة.
داخل عيادته الخاصة بمدينة بني مزار.. قابلنا الدكتور نصر إبراهيم وسألناه..
* ما تشخيصك الطبي لحالة المتهم محمد علي؟!
¬ قال الدكتور نصر:
محمد مريض عقلي مزمن تشخيصه 'فصام عقلي' بمعني أوضح تفسخ القوي العقلية للمريض بما فيها التفكير والمشاعر والإرادة والتصرفات.. يكون خلالها المريض فاقدا للبصيرة أي لا يدري أنه مريض ولا يحتاج للعلاج.
* وما أخطار هذا المرض؟!
¬ قال الدكتور نصر:
أخطاره تكمن في أنك تتوقع منه أي شيء يؤذي نفسه أو يؤذي الآخرين.
* تعتقد أن محمد يمكن أن يرتكب هذه المذبحة وحده وبهذه السهولة؟!
¬ قال الدكتور نصر:
صعب جدا أن يحدث هذا.. فالتنظيم الذي وقعت به الجريمة يؤكد علي صعوبة أن يكون منفذها شخصا واحدا.. لأن هذا التنفيذ يحتاج إلي دقة وإحكام.
* هل سئلت في التحقيقات؟!
قال الدكتور نصر:
نعم استدعتني النيابة العامة وسألتني عن تقييمي الطبي لحالة محمد ومدي خطورتها وما يمكن أن يرتكبه.. فأكدت في شهادتي أمام النيابة أنه يستحيل أن يكون محمد هو مرتكب هذه المذبحة وحده، فالجريمة البشعة التي وقعت كما قلت لا يمكن أن ينفذها شخص واحد مهما كانت الظروف.
* تعتقد أن تفكير محمد غير منظم؟!
قال الدكتور نصر:
المريض العقلي ذكي وليس غبيا.. فالذكاء عنده لا يتأثر بالمرض لكن الذكاء وحده لا يكون عاملا أساسيا ليدفع شخصا لارتكاب مثل هذه المذبحة وحده!
* منذ متي يعالج محمد عندك؟
¬ قال الدكتور نصر:
من شهر فبراير 2005 ونصحت أسرته برعايته وتكون تصرفاته تحت رقابتهم دائما.. وأوصيتهم بضرورة أن يتناول العلاج الذي قررته له بصفة دائمة.. فهذا العلاج وظيفته التخفيف من حدة المرض وتهدئته.
* وهل هناك عوارض أخري لهذا المرض؟
¬ قال الدكتور نصر:
نعم.. فهذا المريض العقلي يكون عنده دائما ضلالات تفكير.. أي يكون مقتنعا أنه شخص مكروه من الآخرين فممكن أن يقوم المريض بعمل عدواني ضد من يظن أنه علي خلاف معه.. أو يكرهه.. أيضا يمكن أن يعاني المريض من هلاوس سمعية أي أنه يمكن أن يسمع أصواتا تتكلم عنه أو تسيء إليه.
* ومرض محمد متي أصابه؟
¬ قال الدكتور نصر:
مرض الفصام عموما دائما يصيب المريض به في بداية العشرينيات.. ومحمد عمره حوالي 26 سنة الآن.. فممكن أن يكون أصيب به من سنة أو أكثر.. والشفاء منه صعب.. العلاج يخفف منه لكن لابد من خضوعه لإشراف طبي دائم.
----------------------------------------------
أسرة المتهم غاضبة
شيء طبيعي ان تنكر أسرة المتهم أي متهم انه ارتكب جريمة ما.. لكن أسرة المتهم في بني مزار غاضبة بشكل صارخ وتدلل علي هذا الغضب باسباب محددة.. خاصة ان والد المتهم وشقيقه كانا يتحدثان وحولهما مجموعة من الرجال ابناء القرية وقد تعاطفوا معهما
بعد الاعلان عن القبض علي 'السفاح'.. بحثنا عن أسرة المتهم والده واشقائه لنتحدث معهم.. لكن فوجئنا بعدم وجودهم داخل قرية 'شمس الدين'.. بعد مجهود من البحث توصلنا إلي مكان اقامتهم بمنزل عمدة احدي القري التابعة لمركز بني مزار.. أجهزة الامن منعت تواجدهم بالقرية خشية قيام أسر ضحايا المجزرة بالفتك بهم.
أخيرا.. قابلنا والد المتهم الحاج علي محمد عبداللطيف 66 سنة موظف بالمعاش.. هموم الدنيا احتلت ملامح الرجل.. احساس مرير بالظلم يملؤه هو وأولاده.. بدأنا نسأله.
* كيف علمت بوقوع المذبحة وأين كنت وقتها؟!
- كنت في بيتي مع زوجتي وأولادي طلعت ومختار ومحمد (المتهم).. وعندما سمعنا الصراخ في الفجر جرينا كلنا نشوف ايه اللي حصل.. قالوا فيه ناس في البلد لقوها مدبوحة في بيوتها.. كانت صدمة شديدة قوي علينا كأننا في حلم مزعج.. لان الناس اللي ماتوا دول ناس طيبين وكل أهل البلد عموما ناس طيبين ما عندناش أي مشاكل ولا مشاجرات ولاثأر ولا شباب منحرف.. قلت مش معقول اللي حصل ده.. لكن للأسف كان هوده الواقع المر.
* ومحمد.. كان فين وقتها؟!
- ابني محمد متعود يصلي الفجر حاضر في المسجد كل يوم وكل أهل البلد يعملوا كده.. وفي اليوم ده.. قبل اكتشاف الحادث بساعات.. وبالتحديد مساء يوم الاربعاء.. بعد عودتنا من الأرض أنا ومحمد.. اتعشينا كلنا أنا وهو واخوته.. وبعد الساعة العاشرة مساء بدأننا ننام.. قلت لمحمد قبل ما أدخل حجرة نومي:
لاتترك باب المنزل مفتوح والمواشي وحدها جوا الدار وأنت رايح تصلي.. لازم تقفل الباب كويس.. وقبل موعد الفجر بقليل سمعت صوت مشاجرة بين محمد ابني وأخوه مختار.. كان مختار يعتب عليه لانه يترك الباب مفتوح.. المهم راح محمد يصلي وبعدها بأقل من نص ساعة فوجئنا بالصراخ في كل البلد.. وعرفنا وقتها باللي حصل.
* ومحمد.. متي عاد إلي المنزل؟!
- عاد بعد الصلاة بشويه.. وكان عرف زينا بالمذبحة اللي وقعت.. وكان بيتصرف زي كل واحد من أولاد البلد.. حزن جدا علي اللي ماتوا وما كانش مصدق.
* إذن.. لماذا تم اتهام ابنك محمد بارتكاب الجريمة؟!
- يصرخ الرجل من أعماقه وهو يقسم بأغلظ الايمان علي براءة ابنه.. بصعوبة هدأنا من روعه ثم عاد يكمل كلامه بنفس الثورة التي بدأ بها قائلا:
فوجئنا ظهر اليوم التالي للحادث بضباط المباحث يحضرون لمنزلي.. سألوا عن محمد وجده جالس معنا في البيت.. وأخذونا كلنا معهم أنا ومحمد واخوته الصبيان طلعت ومختار لمركز بني مزار.. وهناك فوجئت بما لم أتوقعه أنا وأولادي أبدا.. اتهموا محمد بارتكاب المذبحة.. دافعنا عن أنفسنا وأقسمنا علي براءتنا.. لكن للأسف.. الضباط صمموا علي توجيه التهمة لابني ولم يسمعوا دفاعنا.. استدلوا علي اتهامهم ان محمد 'مريض عقلي يعني يمكن ان يرتكب أي جريمة بسبب مرضه.. قلت في نفسي أفرض ان الاحتمال ده ممكن.. بس يكون حاجة عادية يعني يعور نفسه أو أي حد من أسرته.. لكن انه يقتل عشرة بهذه البشاعة لايمكن أبدا.. صدقونا محمد طول عمره شاب مستقيم ويعرف ربنا وعمره ما ارتكب مشكلة مع أي حد.. صدقوني ابني مايقدرش يدبح دحاجة والله.. ده ابني وانا عارفه كويس.. يارب أظهر الحق وأنت مطلع علي الحقيقة!
القاتل الحقيقي.. فين؟!
تركنا الحاج علي منهارا وهو يبكي في هيستيرية.. وتحدث معنا ابنه مختار الموظف بشركة الكهرباء.. يقول مختار.
احنا هنا مش بندافع عن محمد علشان اخويا.. أهل البلد كلهم عارفين محمد كويس وعايش وسطيهم طول العمر.. والكل متأكد من براءة أخويا.. محمد متعود كل يوم يصلي الفجر حاضر في المسجد وأحيانا يذهب إلي بندر بني مزار يقضي بعض الوقت علي المقهي هناك ثم يعود للبيت قبل شروق الشمس.. احنا عاذرينه علشان ظروف مرضه بنحيطه برعاية كاملة ونقدم له العلاج في موعده.. صدقونا ياناس محمد لايمكن يعمل كده أبدا.. ولا حتي 20 زي محمد..
دوروا علي القاتل الحقيقي اللي ارتكب الجريمة وحاكموه.. مش دفاعا عن اخويا وبس.. لا لاظهار الحقيقة اللي كل الناس عايزة تعرفها علشان تطمئن.. صدقونا الناس في بلدنا وغير بلدنا لسه عايشه في خوف لحد دلوقت متوقعين ان القاتل الحقيقي لسه مجهول.. ومحمد مجرد كبش فداء لتهدئة الرأي العام.. الناس خايفة أحسن القاتل الحقيقي يظهر تاني قريب ونفاجأ بضحايا جدد مذبوحين.. الله أعلم حيكونوا مين.. وقتها يبقي إيه الحل.
لكن المباحث ضبطت جلابية أخوك محمد الملطخة بالدماء وأختك غسلتها؟!
يقول مختار ساخرا:
جلابية؟!.. جلابية إيه اللي غسلتها أختي؟!
ما عندناش أخوات بنات عايشين معانا في البيت.. الثلاثة متزوجات وعايشين مع أجوازهم في بيوتهم.. يبقي إزاي محمد خلي أختي غسلت له الجلابية.. يعني راح لها بيتها وقال لها اغسلي لي الجلابية دي؟.. ده كلام؟!
الهم الثقيل!
- يبكي مختار.. ثم يتدخل والده مرة أخري بنفس البكاء قائلا:
أحنا ذنبنا ايه.. ابني يدفع ثمن جريمة لانعرف عنها أي شيء.. ونقتل ليه.. والناس كلها حبايبنا اللي ماتوا واللي عايشين كمان.. ذنبنا ايه ان ابني يدفع الثمن وحده.. واحنا نتشرد من البلد وفي رقبتنا هم كبير ما تقوي عليه الجبال.. في رقبتنا دم لعشرة أشخاص ينتمون لثلاث عائلات بالبلد!
تركنا أسرة المتهم محمد بعد أن استمعنا لكلامهم الذي عرضناه كما قالوه.. ليس لدينا أي هدف من نشر هذا الكلام إلا لتوضيح الصورة كاملة امام الرأي العام من جميع الاطراف.. بعد أن فوجئنا أن الرأي العام غير مصدق أن محمدا هو الذي ارتكب هذه المذبحة.. وحده! ..وهذا حقه علينا.[/SIZE]
|
النمط الخطي
