الراجل لما يساعد مراته فى شغل البيت دا يبقى عيب ؟؟؟

[Half-Magic]

السؤال هنا هو ... الراجل لما يساعد مراته فى شغل البيت دا يبقى عيب ؟؟؟

طبعا لازم نعترف بأن سى السيد انتهى خلاص من عصرنا للأسف ... و اصبح الزوج مسالم جدا .. و ساعات كتير بنلاقى ازواج بيقوموا بمساعدة زوجاتهم فى شغل البيت و خاصة غسل الأطباق و كمان عند التنفيض.. يشيلوا السجاجيد و ينفضوها كمان .... لكن المشكلة ان الرجل وقت مواجهته بذلك ينكر و ينفى نفى شديد ان يقوم بهذه الأعمال ؟؟؟ ليه بقى هى عيب و لا ايه ؟؟؟
و لو كان صريح و اعترف لأصحابة بأنه يقوم بهذه الأعمال .. تلاقى صحابه بدأو يضحكوا عليه و يقولو له انتا مش راجل.. انتا سايبهاا تمشيك وتتحكم فيك .. وخد بقى من الكلام دا ...

بجد انا عايز اعرف ايه رأيكم ؟؟ مساعدة الراجل لمراته فى شغل البيت بتقلل من قيمته و لا ايه النظاااام ؟؟؟ الواحد عايز يطمن على مستقبله .. هههههههههههه

[مستكة]

يا اخ ماجيك احب اقولك حاجه مهمه جدا









الراجل مش بس بكلمته الراجل برعايته لبيته واسرته

ههههههههههههههههه

لا بجد هو ايه العيب في ان الزوج يساعد زوجته يعني

هل مثلا لو ساعد في البيت مش هيكون راجل مش فاهمه طب ماهي الست بتشتغل وبتشوف شؤن البيت وبتربي الاولاد معني كده ممكن تصحي في يوم تلاقي في وشها شنب ودقن من كتر المسؤليه ؟
ههههههههه بهرج طبعا

طب بجد مش شايفه فيها اي عيب لما الزوج يساعد زوجته من باب الرحمه بيها وتخفيف العبء عنها ده لو فعلا هي تحتاج المساعده

انما بصراحه انا ضد ان الزوجه تكون مش تعبانه او مشغوله والزوج يقوم بالاعمال المنزليه
ملهاش لازمه يعني
وبعدين لو رجعنا ورا شويه






لا كمان




بس كفايه كده



ايام الرسول (ص) كان بيقوم ببعض الاعباء المنزليه وكان بيساعد زوجاته وهو رسول الله افضل الخلق خاتم المرسلين انتو متخيلين
يعني مهما كان الرجل وضعه او مركزه عمره ما هيكون جزء من الفامتوثانيه من المثل ده
فمن تواضع لله رفعه وبلاش الافكار الغلط دي وياريت نصححها لانها لا عيب ولا حرام

متخفش يا ماجيك ادرب علي شغل البيت واتوكل علي الله اصلا 3/4 البنات مش بيعرفو في شغل البيت و الربع الباقي هيشغل ازواجه يعني من الاخر لا مفر
انا بهدي النفوس وبقدملك نصيحه باخلاص

[dalia]

المشاركة الأصلية بواسطة Half-Magic

السؤال هنا هو ... الراجل لما يساعد مراته فى شغل البيت دا يبقى عيب ؟؟؟

لا مش عيب و مستكة زيي ما قالت بالفعل ان اشرف الخلق كان يحيك ملابسه و يساعد زوجاته

يعني ده رد كافي للموضوع الاساسي
نيجي بقي للباقي

المشاركة الأصلية بواسطة Half-Magic

لكن المشكلة ان الرجل وقت مواجهته بذلك ينكر و ينفى نفى شديد ان يقوم بهذه الأعمال ؟؟؟ ليه بقى هى عيب و لا ايه ؟؟؟

بيرسم نفسه عليهم مش اكتر

المشاركة الأصلية بواسطة Half-Magic

و لو كان صريح و اعترف لأصحابة .. تلاقى صحابه بدأو يضحكوا عليه و يقولو له انتا مش راجل..

معلش ماهو اللي يدور عليهم يلاقيهم برضوا بينضفوا و يغسلوا و .........و...

كمان يستاهل بيطلع اسرار بيته ليه؟؟

المشاركة الأصلية بواسطة Half-Magic

بجد انا عايز اعرف ايه رأيكم ؟؟ مساعدة الراجل لمراته فى شغل البيت بتقلل من قيمته و لا ايه النظاااام ؟؟؟ الواحد عايز يطمن على مستقبله .. هههههههههههه

لا مش بتقلل و لا حاجة بالعكس بترفع من قدره ادام زوجته .... و بيقوي روابط المحبة و الالفة بينهم

و كمان بيعمل شيء فعله افضل الخلق النبي عليه السلام

و نصيحة بقا ====>>> كل شاب مقبل علي الزواج يتعلم شغل البيت علشان يرجح كفته شويه
ادام العروسة و اهلها خصوصا في
ظل الظروف الاقتصادية الحالية
ههههههههههههههههههههه

تحياتي

[محمدحسين]

ياسلام على الرجل وهو داخل البيت ومراته تقول له البس المرايه بسرعه علشان تسوى الاكل علشان عندى تليفون مع واحده صاحبتى ههههههههههههههههه
بدأت رأى بضحكه
لكن الحقيقه لازم يكون فى تعاول بين الطرفين طالما واحد منهم يستطيع مساعده الاخر لانها سفينه تسير والاثنين يقودناها بالتبادل
وأذا كانت الزوجه خرجت الى الميدان نتيجه للظروف الاقتصاديه التى تمر علينا جميعا فمن بابا اولى أن يرد لها الرجل الجميل ويساعدها فى اى شئ ممكن
والا شعرت بالغبن عليها وأنعكس على حالتها النفسيه وبالتالى علاقتها بالطرف الاخروعلى حياتهم الزوجيه
ولكل مقام مقال زمن سى السيد انتهى ومن لازال يتمسك به كمن يسبح ضد التيار
وبعدين بيته أولى من أصحابه الذين يضحكون عليه ومن يسمع كلام الناس فلن يفعل شئ فى حياته وسيصبح العوبه فى يد الاخرين وشخصيه سلبيه

[Half-Magic]

الف شكر لك يا مستكة و لك يا داليا و لك يا زعيم على التواجد و المشاركة ... و واضح ان أرائكم جميعا واحده و هى ان مساعدة الرجل لزوجته مش عيب ...

على فكره الراجل قبل الزواج بيبقى حاجة و بعد الجواز حاجة تانية خالص و ده من الواقع ...
انا اعرف واحد كان قبل الجواز عامل نفسه سى السيد بجد و كا لما يجى الكلام على شغل البيت و كدا و هل ممكن انه بساعد فيه .. كان يزعق و يقوول انا اساعدها فى شغل البيت .. ده استحاله ... المهم تمر الأيام و صاحبنا ده يجوز و تتوقعوا فى يوم كنت ماشى من تحت بيته و قولت انده عليه و اسلم ... بصيت فوق على البلكونه لقيته بينشر غسيل ... الصراحة متملكتش نفسى من كتر الضحك ورحت منادى عليه و قولته ايه مش عايز اجيبلك أومو .. ههههههههههه

انا مش بضحك عليه علشان هو عمل كده انا ضحكت علشان هو كان بيقاوح و يألف !!!

الف شكر لكم مره اخرى على المشاركة الرائعة دى

[maysam]

ههههههههههههههههههههههههههههههه
يا سلام عليك يا ماجيك

ضحكتني بجد على الموقف اللي قلت عليه

بصراحة ردود مستكة وداليا ومحمد كفوا


انا زمان كان لي رأي بالموضوع ، وبعدين اختلف رأيي بعدين مع الزمن ،، ما هو عادي الواحد برضو بيتغير

زمااان بقى كنت اقول مش غلط ان الزوج يساهم شوية بحدود المعقول ، يعني يساعد حسب مقدرته بس كنت احس ان الموضوع بيقلل شوية من البريستيج بتاعه ، لكن انا هلأ مش شايفة ان البريستيج له اي علاقة بالموضوع

بس بنفس الوقت مراعاة للظروف النفسية اللي ممكن تحدث من جراء الفضيحة دي ولأن مجتمعاتنا لا زالت تعيش ترسبات صعب جدا التخلص منها ، ومنعا للمواقف اللي ممكن الزوج يتعرض لها من تريقة وغيره فانا بقترح انه مش ضروري يتم الاعلان عن قيامه بهذه الواجبات ، ممكن نخليها سرية

عموما انا حاتكلم عن نفسي ، انا زوجي لا يساهم ابدا ابدا بالموضوع دا ، والسبب طبعا هو التعويد ، الحق عليانا ما عودته عشان كان عندي شغالة وهي تقوم بالشغل ، بعدين استغنيت عنها من فترة قريبة ، فأنا اللي اتدبست بكل شيء

لكن هي الصورة بمجتمعاتنا مش مقبولة لسا بالشكل اللي نحن عايزينه
ان شاء الله الصورة تتصحح بالمستقبل ونشوف آخرتها ايه

[Half-Magic]

عندك حق يا ميسومة للأسف مجتمعنا الشرقى بيرفض هذه الصورة للرجل !! لسه الناس نفسها تعيش زمن سى السيد ...

الف شكر لك يا ميسومة على المشاركة و التواجد

[أحمد سليمان]

بص يا محمد

لكل واحد دور
و كلاً ميسر لما خلق له

بمعنى ممكن أساعد أه لو كانت محتاجه مساعده
بس انا بره البيت بشتغل علشان اوفر لها حياه كريمه
يبقى لازم ادخل بيتى مرتاح نفسيا على الاقل
مش مطلوب منها حاجه فوق العاده

ثم يا اخى
دلوقتى فى مكنسه
و غساله ملابسه
و غساله أطباق
و فى مكنسه بتغسل الارض و السجاد و الستاير
و بوتجاز أشغال ذاتى
ووصفات الاكل بقت جاهز و احيانا فى بعضها بيبقى بيتباع و ناقص على التسخين بس


يعنى الهانم ست البيت كل اللى عليها تصحى الصبح ترمى الكام طبق اللى عنها فى الغساله بتاعت الاطباق و كام قطع هدوم فى غساله الهدوم
و كل واحده فيهم بتطلع الحاجات نضيفه و جاف
ده فى غسالات بتكوى الهدوم كمان ( مش بتكرمشها يعنى )

عايزين أيه تانى بقى

يعنى نقطع من لحمنا و نديها

ههههههههههههههههههههههههه
















بس لو كانوا يستاهلوا ما عنديش مانع

[maysam]

هو كلامك صحيح يا احمد ، بس برضو مش كل الناس عندها امكانيات توفر التكنولوجيا كلها اللي عددتها ، ممكن جزء منها ، فلو ما كانت متوفرة ، ساعتها الموقف بيكون مختلف

الموضوع هو مش موضوع تبادل ادوار ، بس لما الست تكون مزنوقة ، ومش مفترض انها طول الوقت مزنوقة ، لو لقيت مساعدة فاعتقد ما في اي مشكلة ، لكن مش تكون طول السنة مزنوقة ، لأن الاصل ان الست خصوصا لما تكون عاملة ، تقدر تنظم وقتها ، ولو ما قدرت برأيي لازم تقعد بالبيت وتبطل شغل ، لأنه بيكون كله على حساب صحتها ونفسيتها ونفسها ، الا لو كان شغلها ضروري جدا والعيلة محتاجاه ، وهاد بيحصل كتير في ايامنا ، خصوصا بالظروف الاقتصادية الموجودة ، فما دام هي بتشتغل بناء على طلب منه ، يبقى لازم برضو يساعدها بحدود الممكن

[Half-Magic]

ايه يا سى أحمد أنت عايزهم يعلنوا الحرب علينا
كلا مك صح يا أحمد و انا موافق عليه برده و لكن فى نفس الوقت ميسم ذكرت نقطة هامة جدا و هى ان مش كل الناس حتقدر تشترى الحاجات دى كلها ..... يعنى اكيد فيه زوجات لسه بتغسل الأطباق بنفسها و تغسل و تنضف و تكوى بنفسها برده و ممكن فوق كل ده و ده بتكون بتشتغل علشان تساعد فى مصروف البيت .. اعتقد فى الحالة دى المفروض على الزوج هنا المساعدة ... و مساعدة بقلب جامد كماااان ....

و على فكره لو اسره عندها غسالة أطباق و غسالة هدوم بيتكوى و تخلى الغسيل معطر و عندها مكنسه بتكنس و تغسل السجاجيد يبقى اعتقد مش حيكون عندهم مانع يجيبوا شغالة فليبنية تقوووم بالحاجات دى كلها

[دقه قلب]

اعتقد ان الزوج فى كل الاحوال لازم يساعد زوجته فى شغلها حتى لو شا يفها مش محتاجه مساعده يعرض عليها المساعده عارفين ليه



الانها اولا هتفرح جداا ولو كانت بتحبه قيراط ف ابسط يا عم بقى 24
ثانيا هى وقتها هتراعى شعوره اووى وهتقدر انه راجع تعبان ومع ذلك بيحاول يساعدها و ساعتها مش هتسمح له يعمل اى حاجة ومش بعيد يلاقيها جايبه الطشت وبتغسل له رجليه

[عتاب]

طبعا يكفي ان الرسول صلي الله عليه وسلم كان بيساعد في شغل البيت
فانا شايفه ان مفيش مانع ان الزوج يساعد زوجته في شغل البيت
بس طبعا يخليها في سره ومايقولش لحد خالص وخصوصا مامته
هههههههههههه احسن تيجي تهد البيت علي اللي فيه
بس هو فين الزوج اللي بيعمل كده انا من كتر ماشوفت بقيت اتمنى الاقي راجل مايبوظش اللي مراته بتعمله
مش هانقوله يساعد بس علي الاقل مايهدش اللي بتعمله مراته طول اليوم
مش هى تنضف البيت من هنا وهو ييجي يبهدله ولا كانها عملت اى حاجة
مش كفايا هى تطبخ وهو بياكل هى بتغسل وهو يلبس هو تكوى وهو يكرمش هى تلم وهو يبعزق
ههههههههههههههههه
انا اعرف رجاله بيصحوا من النوم عطشانين يقوموا يصحوا مراتاتهم عشان يجيبولهم يشربوا
طيب تخيل واحدة عملت كده مع جوزها وشوف هو هايعمل فيها ايه مش بعيد يطلقها في موقف زى ده
ارحموا الستات وحسوا بيهم شوية دول الجنس اللطيف النص الحلو زى مابيقولوا

[maysam]

المشاركة الأصلية بواسطة عتاب

طبعا يكفي ان الرسول صلي الله عليه وسلم كان بيساعد في شغل البيت
فانا شايفه ان مفيش مانع ان الزوج يساعد زوجته في شغل البيت
بس طبعا يخليها في سره ومايقولش لحد خالص وخصوصا مامته
هههههههههههه احسن تيجي تهد البيت علي اللي فيه
بس هو فين الزوج اللي بيعمل كده انا من كتر ماشوفت بقيت اتمنى الاقي راجل مايبوظش اللي مراته بتعمله
مش هانقوله يساعد بس علي الاقل مايهدش اللي بتعمله مراته طول اليوم
مش هى تنضف البيت من هنا وهو ييجي يبهدله ولا كانها عملت اى حاجة
مش كفايا هى تطبخ وهو بياكل هى بتغسل وهو يلبس هو تكوى وهو يكرمش هى تلم وهو يبعزق
ههههههههههههههههه
انا اعرف رجاله بيصحوا من النوم عطشانين يقوموا يصحوا مراتاتهم عشان يجيبولهم يشربوا
طيب تخيل واحدة عملت كده مع جوزها وشوف هو هايعمل فيها ايه مش بعيد يطلقها في موقف زى ده
ارحموا الستات وحسوا بيهم شوية دول الجنس اللطيف النص الحلو زى مابيقولوا

هههههههههههههههه الله عليكي يا عتاب
باين عليكي شايلة كتير هههههههه

بس معاكي حق ، هو بس يقوم بنفسه ويكتر خيره وخليه بعيد احسن
بس حلوة حكاية يصحيها من النوم تجيب له مية .. يا سلام لو دا وقع تحت ايدي ، ما تتخيليش كنت حاعمل فيه ايه

[نورالقمر]

السلام عليكم ورحمه الله وبركاته
هو بصراحه بعد كل اللى اتقال مافيش كلام اقوله
انا رأيى مادام الرسول عليه افضل الصلاه والسلام كان بيعمل كده يبقى مفيش فيها عيب نهائى بل بالعكس بتتجازى عليه خير واكيد واجب على كل رجل يساعد زوجته ايا كانت مساعدته حتى بس لو هيحط حاجته مكانها مش يستناها تعمله كل حاجه بس برضه عشان ماابقاش ظالمه فى رجاله بتبقى فعلا راجعه من شغلها تعبانه جدا ماتقدرش تعمل حاجه فكل واحد على على حسب قدرته وربنا يقدر الجميع ان شاء الله
عتاب بالراحه ع الناس شويه كده البنات تكتئب من اولها ويضربوا عن الزواج بسبب كلامك سيبيهم يكتشفوا بنفسهم
يللا اقابلكم فى موضوع تانى فى ابن مصر
سلام

[Half-Magic]

المشاركة الأصلية بواسطة دقه قلب

اعتقد ان الزوج فى كل الاحوال لازم يساعد زوجته فى شغلها حتى لو شا يفها مش محتاجه مساعده يعرض عليها المساعده عارفين ليه
الانها اولا هتفرح جداا ولو كانت بتحبه قيراط ف ابسط يا عم بقى 24ليس مهم أن تحب المهم من تحب
ثانيا هى وقتها هتراعى شعوره اووى وهتقدر انه راجع تعبان ومع ذلك بيحاول يساعدها و ساعتها مش هتسمح له يعمل اى حاجة ومش بعيد يلاقيها جايبه الطشت وبتغسل له رجليه

الف شكر لك نجلاء على المشاركة و بجد كلامك صحيح 100 % .... الراجل لو قدر يحسس مراته بالأحساس ده و يعمل كده ... أكيد ولو كانت بتحبه قيراط يبقى حبقى 24 قيراط