مين يختم القرآن ؟؟

[عتاب]

انا بكتب موضوعى النهاردة مش عشان نرد ونجامل ونقول موضوع كويس وجميل
انا بكتب موضوع للجادين فقط زى ما بيقولوا في الاعلانات
احنا هنا في ابن مصر اخوات كلنا مقتنعين اننا اسرة واحدة
ولانى مقتنعه ان الاسرة هى بناء المجتمع يبقى لازم نكون اسرة مؤمنة عشان صلاح المجتمع
وانا لا ازكى علي الله احد لما اقول ان الاسرة دى فيها خير كتير
انا فكرت في حاجة كويسة نعملها سوا يعني نحاول ناخد بايدين بعض
عشان نتقابل في الجنه ونقول احنا عملنا حاجات كويسة مع بعض
زى ما اشتركنا في اللعب والهزار والمناقشات والفضفضة عايزين كمان نشترك في العبادة
فانا عندى فكرة ياريت تعجبكم وتلاقي منكم ترحيب واقبال
عايزين نختم القرآن مع بعض بمعنى كل واحد فينا ياخد جزء او اتنين يتفق معانا عليهم ونختم القرآن كل اسبوع
انا عارفة ان فينا ناس بتقرا جزء كل يوم وفينا بتقرا اكتر من كده وفينا اقل
واللي عايز يواظب علي ورده اليومي يواظب عليه ويزود الجزء او الاتنين اللي هاياخدهم في الاسبوع اعتقد مش كتير
عايزين دى تكون بدايه واللي عنده شئ تانى يقول وكلنا نشترك فيه ان شاء الله
انا هاسجل اسمى اول واحدة في اللي هايختموا القرآن ومستنية ردودكم عشان اسجلكم ونقسم الاجزاء علي بعض واللي عايز اجزاء معينه يقول والا هانرتبهم بترتيب الاشتراك
1-محمد السيد علام(الاجزاء من 1-5)
2-مستكة (الاجزاء من 6-10)
3-هاف ماجيك(الاجزاء من 11-15)
4-سندريلا (الاجزاء 16و17)
5-شوشو(الاجزاء 18و19)
7-عتاب(الاجزاء من 20-30)

[مستكة]

طب ممكن اقترح حاجه يا عتوبه ...

حكاية قراءة القران دي بتختلف من حد للتاني حسب ظروفه

كمان ممكن انا انهارده مقدرش اقرا الورد بتاعي لمشغوليات ولا حاجه فباجي تاني يوم اعوضها

خلينا نتفق مثلا بواجب يومي ..ازاااااي ؟؟؟

اقولك انا :

مثلا نتفق نقرا كل يوم ماتيسر من القران ( جزء او نص او ربع حسب ما تختارو انتو )
حديث شريف : نختار حد يكون عنده العلم ينزلنا حديث بالسند والعنعنه والشرح والتفسير نحفظه كمان
اذكار يوميه : نتفق علي اذكار لحد ما تتحفظ ونزود عليها كل فتره
سنه : نتفق علي اتباع سنه معينه ونفس الشيء بتزيد بمرور الوقت
ونعمل موضوع متابعه اللي قصر يدخل يقول عشان ضميره يانبه وميكسلش تاني وكمان ندعي لبعض بالثبات
وان شاء الله لو عجبتكم الفكره ممكن نطور فيها ...

[عتاب]

ايه يا مستكة مش تستنى اكمل الموضوع اهو انتى قلتى بعض الافكار اللي كنت هانزلهالكم
عاجبك كده يعني اضربك والا ايه
المهم اننا نواظب فعلا مش مهم مين اللي اقترح الفكرة
وبعدين انا قلت جزء في الاسبوع كله يعني تقريه في اى يوم او حتى تقسميه المهم اخر الاسبوع نكون ختمنا القرآن او حتى جزئين برده مش كتير
وبالنسبة للاذكار بالفعل انا باجهزها وان شاء الله هانزلها النهاردة
وفعلا اللي هايقصر او مش هايقرا الجزء او الاتنين اللي اخدهم لازم هايعترف عشان حد يقراهم بداله والختمه ماتبقاش ناقصه
علي العموم انا هاسجلك معانا يا مستكة في الختمة وعقبال الباقيين يالا يا جماعه عايزين نبدأ

[مستكة]

اوك يا ميس عتاب اتشطري علي غيري

هو كله زعيق زعيق كده

مش كفايه اني الوحيده اللي اتجاوبت معاكي اصلا

ناس متجيش الا بالعين الحمرا صحيح

مسمعش حسك لمدة يومين باه

[عتاب]

مش عارفة ليه ماحدش معبرنى في الموضوع ده
دانا حتى باقول نطيع ربنا مقولتش حاجة غلط والله
ربنا يسهل وحد يعبرنى غيرك ولا الذل اللي شايفاه منك

[محمدالسيدعلام]

كلمكم جميل جدا انا معكم

يا عتاب ويا مستكه

[عتاب]

اهلا بيك معانا يا محمد
انا كنت فقدت الامل ان حد يشاركنا وكنت هاقسم الختمه عليا انا ومستكة بس
بس الحمد لله لسه فيه امل
علي فكرة ماحدش فيكم اختار اجزاء يعني هاتاخدوا اجزاء حسب الترتيب ان شاء الله

[عتاب]

أذكار الصباح والمساء

- سورة الفاتحة- آية الكرسي –سورة الإخلاص – سورة الكافرون- المعوذتين
- اللهم إنى أصبحت أشهدك وأشهد حملة عرشك وملائكتك وجميع خلقك انك أنت الله الذي لا اله أنت وأن محمدًا عبدك ورسولك (4 مرات)
ا - اللهم فاطر السماوات والأرض عالم الغيب والشهادة رب كل شيء ومليكه اشهد أن لا اله إلا أنت أعوذ بك من شر نفسي ومن شر الشيطان وشركه وان اقترف علي نفسي سوء أو أجره إلي مسلم (3 مرات)
- اللهم بك أصبحنا وبك أمسينا وبك نحيا وبك نموت واليك النشور (3 مرات)
- أصبحنا وأصبح الملك لله والحمد لله لا شريك له لا اله إلا هو واليه النشور (3 مرات)
- أصبحنا علي فطرة الإسلام وكلمة الإخلاص وعلي دين نبينا محمد صلي الله عليه وسلم وعلي ملة أبينا إبراهيم حنيفا وما كان من المشركين (3 مرات)
- اللهم إنى أصبحت منك في نعمة وعافية وستر فأتم علي نعمتك وعافيتك وسترك في الدنيا والآخرة (3 مرات)
- اللهم ما أصبح بي من نعمة أو بأحد من خلقك فمنك وحدك لا شريك لك فلك الحمد ولك الشكر (3 مرات)
- أصبحنا وأصبح الملك لله والحمد لله لا اله إلا الله وحده لا شريك له، له الملك وله الحمد وهو علي كل شيء قدير .رب أسألك خير ما في هذا اليوم وخير ما بعده وأعوذ بك من شر ما في هذا اليوم وشر ما بعده رب أعوذ بك من الكسل وسوء الكبر رب أعوذ بك من عذاب في النار وعذاب في القبر (3 مرات)
- يا ربي لك الحمد كما ينبغي لجلال وجهك وعظيم سلطانك (3 مرات)
- رضيت بالله ربًا وبالإسلام دينًا وبمحمد صلي الله عليه وسلم نبيًا ورسولاً (3 مرات)
- بسم الله الذي لا يضر مع اسمه شيء في الأرض ولا في السماء وهو السميع العليم (3 مرات)
- اللهم إنا نعوذ بك من أن نشرك بك شيئًا نعلمه ونستغفرك لما لا نعلمه (3 مرات)
- أعوذ بكلمات الله التامات من شر ما خلق (3 مرات)
- اللهم إنى أعوذ بك من الهم والحزن وأعوذ بك من العجز والكسل وأعوذ بك من غلبة الدين وقهر الرجال (3 مرات)
-اللهم أنت ربي لا اله إلا أنت خلقتني وأنا عبدك وأنا علي عهدك ووعدك ما استطعت أعوذ بك من شر ما صنعت اأبوء لك بنعمتك عليا وأبوء بذنبي فاغفر لي فانه لا يغفر الذنوب إلا أنت (3 مرات)
- استغفر الله الذي لا اله إلا هو الحي القيوم وأتوب إليه (3 مرات)
- سبحانك اللهم وبحمدك اشهد أن لا اله إلا أنت استغفرك وأتوب إليك (3 مرات)
- اللهم صل علي محمد وعلي آل محمد (10 مرات)
- لا اله إلا الله وحده لا شريك له ، له الملك وله الحمد وهو علي كل شيء قدير (10 مرات)
- حسبي الله لا اله إلا هو عليه توكلت وهو رب العرش العظيم (7 مرات)

[عتاب]

دى اذكار الصبح والمساء عايزين كلنا ان شاء الله نواظب عليها
يالا همتكم معانا فيه حاجات كتير عايزين نعملها سوا
مالكم روحتوا فين مش معقوله مش شايفين الموضوع

[محمدالسيدعلام]

بازن الله احنا مع الله ثم معاكى

[عتاب]

شكرا لتجاوبك يا محمد وشكرا لمستكة
وفعلا احنا مع الله في الموضوع ده
وان شاء الله نكون ممن يظلهم الله تحت ظله يوم لا ظل الا ظله

[عتاب]

طيب كده شكل ماحدش هايدخل في الموضوع غيرنا
عتاب ومستكة ومحمد السيد علام
اعتقد انى كده مضطرة اوزع التلاتين جزء علينا
هانخلى الختمه في اسبوعين عشان عددنا اقل من المتوقع
معلش هاضطر اقسمهم لان ماحدش منكم اختار اجزاء معينه
1-مستكة (الاجزاء 1و2و3و4)
2-محمد السيد علام (الاجزاء5و6و7و8)
3-عتاب(من9 لحد 30)
بما انى عملت الموضوع ومسئولة انه يكمل يبقى انا اللي هاتحمل النقص العددى
ياريت محمد ومستكة يبدأوا من بكرة الثلاثاء (16 مايو ) ونخلص علي 30 مايو ان شاء الله

[Half-Magic]

جزاك الله خيرا يا عتاب على الموضوع الجميل ده و على هذه الدعوة الرائعة منك لختم القرأن الكريم سويا ...ممكن بقى اشترك معاكم ... عايز اكتب أسمى ... ممكن

مش عارفة ليه ماحدش معبرنى في الموضوع ده
دانا حتى باقول نطيع ربنا مقولتش حاجة غلط والله

لا غلط و لا حاجة لا سمح الله بالعكس موضوعك اكتر من رائع يا عتاب كفاية انها دعوة جميلة منك لختم القرأن سويا ... و اعتقد مفيش مشاركات كتير علشان مش كان فيه دعاية كتير له و كمان انا عن نفسى لم اشاهده فى شريط اخر المواضيع و اعتقد غيرى كثير ... ايه رأيك يا عتاب تعملى موضوع به لينك للموضوع ده و تنزليه فى قسم ابن مصر TV و كمان ممكن نبعت رسائل على الخاص كدعوات للأعضاء فى ابن مصر لكى يعرفوا بالموضوع .... و على فكره مش عيب و لا حرام اننا نبعت دعوات للناس علشان تشاركنا ... ( الدال على الخير كفاعله ) اكيد الكثير لم يروا موضوعك.. شوفى لو تحبى ابعتلك انا الرسايل دى أو تبعتيها حضرتك ...يالاه فكرى بسرعة...

ياله بقى قسمى من جديد و شوفى أى أجزاء سوف اقرأها .. بجد انا مشتاق جدا لبدء القراءة معكم... انا حرجع تانى هنا بليل علشان اعرف ابدأ من اى جزء ...

جزاك الله الف خير يا عتاب على موضوعك الأكثر من رائع ... تحياتى.

[sendrella]

اكتر من رائع ياعتاب

ربنا يقدرني واقدر اتابع معاكم

لكن اكيد اول االامتحانات ماتخلص هكون معاكم علي طول

جزاكم الله كل خير

[مستكة]

في انتظار التقسيم النهائي

وياريت تحددي اكتر بمعني :

الاسبوع الاول :

هنقرا كام جزء + حديث + اتباع سنه + اذكار الصباح والمساء + صلاة الفجر حااااااضر