هل تقبل الزواج من فتاة أكبر منك / هل تقبلي ؟

[عتاب]

سؤال مهم بصراحة استوحيته من موضوع مواصفات شريك الحياة

والسؤال ده نبهنى له جودوولف لما قال انه عايز فرق السن قليل اوى سواء هو الاكبر او هى الاكبر

وانا بالفعل شوفت جوازات العروسة بتكون اكبر من العريس سواء بايام او شهور او سنة وسنتين بصراحة ماشوفتش اكتر من سنتين ومع ذلك بالاقي الناس معتبرين الفرق ده قليل


هل رأيك كشاب انك ممكن تتجوز واحدة اكبر منك؟؟؟؟
او انتى كبنت تقبلي تتجوزى شاب اصغر منك؟؟؟؟

وياترى ايه الفرق في السن اللي ممكن تتقبليه او يتقبله الشاب عند الارتباط ببنت اكبر منه

انا عارفة طبعا ان السيده خديجة كانت اكبر من الرسول صلي الله عليه وسلم ب 15 سنة بس احنا فين وهما فين لا فينا شاب في عقل الرسول واخلاقه ولا فينا بنت في عقل السيده خديجة واخلاقها


يالا يا شباب ولاد وبنات كله ييجي يقول رأيه بمنتهى الصراحة

[noha]

اخوتى فى الله...
السلام عليكم ورحمة الله وبركاته
انا دايما التزم الصمت داخل المنتدى واعتقد ان عدد قليل جدا فى المنتدى يعرفنى ولكن الموضوع الجميل دة خرجنى عن صمتى وصممت انى اشارك...
يمكن لانى عايز الكل يستفيد من التجربة اللى انا مريت بيها او انى اكون مجرد حالة مش تعميم للقاعدة ولكن يؤخذ بالحسبان عند التفكير فى الموضوع " وخاصة انى اكره التعميم فى اى شئ دايما يوجد من يشذ عن القاعدة"
قد كان ان تقدم لى شاب اصغر منى بسنة تقريبا وكل ما فيه كان يدلانه شاب كويس وعلى دين وكان اعتراضى الوحيد مسألة السن دى لانى كانت من احلامى ان شريك حياتى يكون اكبر منى وبكتير لانى كنت عايزة الخبرة حاجات كتير ابسط حاجة انه يكون مر باليوم اللى انا بعيشه دة مرة قبل كدة علشان يكون فاهم بحس باية " يعنى انا تفكيرى كدة "
المهم ان الكل وقف ضدى وقالى دة تفكير سطحى والسن مش مشكلة والاكتر ان والده كان اصغر من والدته بسنتين...المهم كان فى شبة مطاردة منه هو شخصيا علشان يقنعنى بالموضوع وان السن مش عائق بينا.
المهم بالضغط شوية وبالاقناع شويتين تمت الخطوبة ...
ولقت انسان مش سطحى بالمرة اقصى خبراته المدرسة الثانوية والجامعة مش لية اى نشاط مش لية اهتمامات حتى الاصحاب مش موجودين
عموما دة كلة كان ممكن يتغير مع انه كان رافض لاى تغيير
الاهم انى اكتشفت انة بيكدب عليا كمان او بمعنى اصح بيختار الطريق السهل علشان يرضينى
يعنى لما نتفق على حاجة انه يعمله يقول عملها ومش بيعمل حاجة
زى انه يبطل السجاير قبل الخطوبة وقال ان بطل ومش حصل حاجة وهكذا...
فقلت كفاية كدة ونقف لحد هنا ومفيش نصيب
الحمد لله ان الانفصال دلوقت احسن من بعدين
المهم حتى طريقته فى تقبل الانفصال كانت هايفة
نظام يقف يستنانى على الناصية ويرن التليفون والكلام بتاع المراهقين دة
المهم هذة تجربتى للعبرة واتخاذ العظة
والسلام عليكم لانى كدة طولت عليكم فعلا
ومحدش يكتب مواضيع حلوة تانى علشان مش ارد عليها تانى
سلام واشوفكم على خير

[عتاب]

اختى نهى اولا اشكرك جدا علي كلامك الجميل عن الموضوع
ثانيا اشكرك علي صراحتك واهتمامك انك تفيدي غيرك بتجربتك
انا مش هاقول رأيي الشخصي دلوقت انا هاستنى اسمع جميع الآراء الاول
بس بالنسبة لموضوع الهيافة ده احد عيوب ان البنت تكون اكبر من الولد
لان البنت بطبيعتها بتكبر بسرعه في افكارها وتصرفاتها طبيعة المجتمع بتفرض عليها كده من بدري عن الولد
برده مش هاقول رايي انا باتناقش بس
وفيه حاجة مهمة عايزة اقولها ياااااااارب تتعمل مواضيع حلوة دايما عشان نهى تقبل تكون معانا وتقول رأيها

[sehr_3inik]

انتى كبنت تقبلي تتجوزى شاب اصغر منك؟؟؟؟


اولا السلام عليكم ورحمه الله وبركاته

ازيك ياحبي عامله ايه يارب تكوني بخير

بصراحه سؤالك ده مهم جدا جدا جدا

بس انا عن نفسي مااقدرش اوافق ان جوزي يكون اصغر مني

لاني محتاجه ظهر يحميني

يصلح غلاطاتي

يوجهني مش انا اللي اوجهه

عقله يكون اكبر مني

يكون فاهم الحياه مش انا اللي افهمهاله

انا بصراحه مش أؤيد فكره انه يكون اصغر مني في السن دي ابدا ابدا

وانتي قولتي احنا مش زي السيده خديجه رضي الله عنها والرسول كانت متزوجها علشان التجاره

دلوقتي اللي بيتجوز واحده اكبر منه ب15 سنه زي ما رسولنا الكريم عمل بيكون متجوزها علشان سنتين وهتتقلب

او اهي واحده اعيش معاها مرتاح وهي اللي معاها كل حاجه

لكن

لو الفرق بسيط شهور او ايام ممكن لو لقيت فيه كل اللي بتمناه من ربنا ممكن وقتها اتغاضى عن النقطه دي

بس انا داخليا مش مقتنعه بيها بتاتا

كفايه عليكي كده علشان مش تزهقني مني

سلام ياحبي

وتسلم ايدك على الموضوع العثثثل زي سعادتك

من اختك في الله شوشو

[sehr_3inik]

هههههههههه ايه يانهي ليه ياقمر مش عايزه تنوينا في مواضسع تانيه

لا بجد كده هتزعلينا وهتحرمينا من رأيك الجميل

وتجربتك دي مهمه جدا لينا كلنا

شكرا ليكي ياست الكل

من اختك في الله شوشو

[عتاب]

اهلا يا شوشو يا احلي اخت واجدد اخت ليا
بما انى اختك الكبيرة هاقولك شاطرة يا شوشو هاجيبلك حاجة حلوة
معاكى حق فعلا في كلامك وبالفعل كل بنت محتاجة شاب تعتمد عليه تحس ان خبرته اكبر
محتاجة انسان يوجهها زى مابتقولي علي الاقل ماتحسش انها بتتعامل مع طفل محتاج لسه يفهم الحياة
بس مش عارفة ليه مفيش ولاد دخلوا يقولوا رأيهم
وكمان فيه سؤال تانى ماحدش جاوب عليه
تفتكروا الفرق المناسب يكون كام سنة؟
يعني انا اعرف بنات بيرفضوا ناس في سنهم وتقول لا انا عايزاه اكبر منى بخمس سنين او اكتر
هل لو مش عايزاه اصغر منك تتمنى يكون اكبر منك بكام سنة والا ماتفرقش؟؟؟؟؟؟؟؟
هاهريكم اسئله موضوعى وانا حرة فيه ههههههههههههههههه

[sendrella]

احم احم

انا جيت

بصي بقي ياعتوبتي ياجميله انتي

في رأيي ماينفعش ابدا البنت تتجوز واحد اصغر منها

والبنسبه لي لو اصغر بيوم واحد بس برده مش هقبل

اصل العمليه نسبيه
ازاي
اولا عمليا وعلميا اثبتت الدراسات ان عقليه البنت تفوق عقليه الولد اللي في نفس السن

" دي حقيقه علمية مش افتكاسة "

يعني عقلية البنت تكافيء تقريبا عقليه ولد يفوقها سنا بحوالي من4 لـ 6 سنين

وفي نفس الوقت برده رافضه فكره فرق السن الهايل بين البنت والولد بحوالي 10 لـ 15 سنين برده البنت بتكون اصغر بكتير من الراجل وبتعيش سن مش سنها وبرده العلاقه " غالبا " بتكون مش متكافئة

يعني ده رأيي

يامواضيعك الجامدة ياعتوبة

تحياتي

[عتاب]

هههههههههههههههههه
احم احم عتوبتك وجميلة انتى بصراحة عيشتيني
ادى رأى تانى معانا اهو وبرده نفس الرأى وهو رفض السن الصغير للشاب
يا شباب المنتدى ياعالم ياللي هنا
انا قلت يا بنات يا ولاد ماقولتش بنات بس انتا روحتوا فين
اديني قاعدة مستنية الرأى الاخر بعد ماسمعنا الرأى الحلو ههههههه

[محمدحسين]

طبعا ان مر على هذه الموضوعات كثيرا
واعتقد ان الموضوع يرجع برمته الى شخصيه الشاب وعقله وتفكيره وتربيه وتعلقه بدينه
الرسول صلى الله عليه وسلم لما نجح زواجه مع السيده خديجه
هل لانه فقط نبى
لا
لانه خير خلق الله
بخلقه
وعقله
وكلمته الطيبه
وحنيته
واحترامه
وصدقه
وامانته
ورجولته الحقيقيه

حينما تجدى فى رجلك المنشود هذه الاخلاق او جزء منها كبير
فتأكدى انه ممكن ان ينجح
المشكله ليس فى السن
ولكن المشكله فى ان الذين
لايكذبون
ولاينافقون
ويحترموا الاخرين
وكلمتهم طيبه
ويعرفون التعامل مع المراه وأحتوائها
ويعرفون المعنى الحقيقى للرجوله

لم يعودوا كثيرين ؟؟؟

[عتاب]

شكرا علي المشاركة يا محمد
واخيرا لقينا صوت رجالي في الموضوع
بالفعل المشكلة في الصفات والاخلاق
ومع الاسف اغلب الشباب بتكون صفاتهم في اعمار معينة اى كلام
لحد مايكبروا شوية ويبدأ تفكيرهم ينضج
يعني تفكير الشاب في سن الجامعه اكيد غير تفكيره بعد التخرج وهو عاطل طبعا كالعادة
غير تفكيره بعد مايشتغل شغل اى كلام غير تفكيره بعد مايلاقي شغل يكفيه ويساعده علي الارتباط
اعتقد كل دى حاجات بتأثر علي شخصيته وبالتالي بتاثر علي الاختيار
علي العموم برده مستنيين آراء اكتر من الشباب والبنات ها مين كمان؟؟؟؟؟؟؟؟

[بكــار]

رأيك كشاب انك ممكن تتجوز واحدة اكبر منك؟؟؟؟
الموضوع بالنسبه ليا لا يمثل مشكله على الاطلاق
فمثلا
اناشاب حبيت واحده اكبرمنى ولو بسنه او سنتين اوتلاته
مشمهم بقى
الشعور او الحب الى جوايا ان الو فيه تبادل للمشاعر اكيد الحب دا هيكبر

وهيقلب الى زواج
لكن مشمعنى ذلك انى اروح احبواحده اكبر منى بعشر سنين مثلا هههههههههههه
تحياتى

[عتاب]

اهلا بكار وكل سنة وانت طيب
انت بتتكلم انك لو حبيت واحدة مش هايفرق معاك انها اكبر بسنتين تلاته
اكيد طبعا لان الحب بيدفعك انك تتغاضي عن حاجات في الانسان اللي بتحبه
لكن انا باتكلم عامة لو انت عايز عروسة يعني الجواز التقليدى هاتقبل واحدة اكبر منك؟
والا هاتقول وانا ايه اللي يغصبنى علي كده مانا اخد واحدة اصغر منى احسن؟؟؟؟

[مستكة]

عندما نتحدث نكون حكماء ........ وعندما نفعل نكون اصحاب مصالح

[=BASSEM=]

منورين يابشريه



حلو الموضوع ياعتاب !!



صعب ان الواحد يرد علي الموضوع دا ياعتاب اصل كون الواحد بيروح يتجوز مش بينقي بطيخ

يعني مستحيل حد يحدد اي نعم هي لاتندرج ضمن احلامي بس هو ايه السن دا عموما

هل هو مجرد تحديد لوقت الانسان او الوقت اللي عاشه الانسان علي الارض

و بعدين السن مش مشكله يعني هي لو كانت لقطه و المشكله في السن عادي ياستي الواحد يبقي

يتجوز تاني واحده اصغر منه بفرق السن اللي في الاولي


الموضوع بصراحه شبه مستحيل الحكم عليه بس انا هقلك علي نظرتي عموما


لو شفت واحده متجوزه واحد اصغر منها مش مقبوله بمجتمعنا الشرقي


لو شفت واحد اكبر من واحده متجوزين مقبوله بمجتمعنا الشرقي


بس المهم ان الواحد يلاقي الانسانه المناسبه

اكبر او اصغر مش هي دي المشكله


المشكله في التفاعل الكيميائي بين الطرفين

[عتاب]

مش فاهمة يا مستكة انتى جايه تحفظى الموضوع عندك والا ايه هههههههههه
والا خير الكلام ما قل ودل ولو ان كلامك مادلش علي حاجة
طيب بتوجهى كلامك ليا والا لحد قال رأي ماعجبكيش هههههههه
انا باحاول اخمن بس مش اكتر وياريت ترجعى تقولي رأيك احسنلك