لو كنت مكاني ؟

[مشمش]

اولا السلام عليكم جميعا
ثانيا دي اول مشاركه ليا هنا في الموقع لكن شاركت في منتدي قبل الغاؤه
ثالثا وهو الاهم ارجو ان يتسع صدركم لي لان قصتي طويله شويه

انا متزوجه من حوالي سنتين وعندي بنت عندها سنه وجوزي مركزه محترم وحنين جدا وطيب جدا وكريم وبيحبني مع العلم اننا لم نتزوج عن طريق قصه حب لان كل منا كان مرتبط ولكن النصيب غلاب وهو على صله قرابه بيا من بعيد عن طريق الام .
المهم احنا فترة الاعداد لزواجنا لم تكمل الشهر لان كل واحد فينا كان المفروض هيتجوز في الفترة ديه والحمد لله حصل وفاق وتفاهم بينا وتم الزواج وكان والد زوجي من اشد الناس فرحه بيا وفخرا بيا اكثر من زوجته وهي قريبتنا
واديكو فكرة بسيطه كده ان انا واخت زوجي وزوجات اخواته الصبيان كلنا كنا في نفس الفصل ووالدته كانت تدرس لنا !!!!
لغايه دلوقتي هتقولو امال فين المشكله هقولكو عندكو حق المشكله يا اخوتي الاعزاء في حمايا ؟!
طبعا هاتستغربو انه ازاي هو اللي مرشحني وفرحان بيا وازاي المشكله فيه .
هقولكو بكل بساطه ان طبعه شديد جدااااااااااااااااااااااااا والمشكله الاكبر انه متعقد من كل السيدات وانهم كلهم بيعملو اعمال وسحر لازواجهم مع العلم انه ليس كبير في السن هو في اخر الخمسينات ومعاه مؤهل عالي ( مهندس طيران )
ومشكلته كمان انه من النوع الفظيع في التدخل في حياتنا
طبعا كلكو ممكن تقولي خلاص استحمليه الكام يوم او وقت الزيارات ما بينكو طالما جوزك كويس معاكي وما بيتأثرش بيه
هقولكو ياريت كانت على قد كده كنت هستحمل فعلا .....لكن المشكله برضه انه بنى شبه بيت عيله في احدى المدن الجديده ولكل ولد منهم شقه !!!!
وغير ده كله بعد جوازي مفيش اسبوع عمل مشاكل مع اهلي وقطعني عنهم بالاكراه واقنع جوزي انهم هما الغلطانين مع ان ربنا شاهد هما عملو ايه وهو عمل ايه
وللاسف كمان اهلي جم لغايه عنده علشان يصفو الامور ويفهمو ايه اللي حصل لان طبعا كان في اطراف كتير بتوصل كلام غلط للطرفين مع العلم اني كنت في بدايه حملي في الشهر الرابع ودارى عليهم والاكتر من كده طردهم شر طرده
وكان دايما كل ما يوجه ليا اتهامات باني بقوم باعمال سحر وغيره طبعا انفي لاني الحمد لله مصليه وقارئه للقران واهلي كذلك فاستحاله هعمل كده يثور اكتر ويقول بتكذبيني وتزداد المشكله تعقيدا
وكان معظم الخلافات ديه باداريها عن جوزي منعا لزياده الموقف
وانا شعري جاف خلقه ربنا لكن باعمله فرد وسشوار وحاجات كده يتريق ويقول ان انا محجبه علشان اداري عيب شعري وحاجات كتير جدااااااااااااااا جداااااااااااااا كلها تجريح واهانه وسب للاهل وفي شخصي وكنت صابرة ومستحمله علشان خاطر جوزي وعلشان اللي في بطني وكمان ماليش حد اهلي اتقطعو عني غير كده كمان كنت مخطوبه وفسخت الخطبه قبل الفرح بفترة صغيرة لان لقيت نفسي مش هقدر استحمل طبعه فصراحه خفت برضه من كلام الناس لان خطيبي الاولاني كان فيه كتير من حماي الحالي تخيلو بقى العيشه !!
وطبعا اهلي لا فرحو بجوازي ولا حملي ولا ولادتي ....... حسبي الله ونعم الوكيل .
المهم , انا عارفه طولت عليكو جامد لكن سامحوني جوايا كبت وشعور بالظلم كبييييييييير
وتركنا البيت كذا مرة ورجعنا على امل العوده ولكن لا حياة لمن تنادي ولكن المرة دي كانت الاخيرة كانت التالته تابته زي ما بيقولو ولكن عفشي لازال هناك ومش عارفه اخده خالص وكنا سافرنا زيارة لوالدي ووجد زوجي فرصه عمل هناك ولكن بيخلص الاوراق هنا وصراحه خلال الفترة ديه كان مقاطعهم وكنت والله اقوله اتصل طمنهم حرام ما كانش طايق وكان يتخانق معايا
فبعد ما نزلنا مصر روحنا زورناهم وكانو لفترة وجيزة كويسين معانا ولكن بدات ترجع ريبما لعادتها القديمه لدرجه انه ادى لنفسه الحق انه يفتش في موبايل زوجي ووجد عليه ارقام اخواتي وعرف ان احنا رجعنا لهم او عالاقل على اتصال بيهم تخيلو عمل ايه ؟؟؟
عرض عليه انه يسلفه المؤخر بتاعي علشان يطلقني ..... شوفتو !!
رغم كده عملت نفسي ما عرفتش حاجه وبنروح نزورهم ونخدمهم بعنينا انا وزوجي
ولكن بقى المشكله الاكبر انهم بيلحو عليه انه يرجع البيت تاني وينزل الشغل مع اخوه والا يبقو غضبانبن عليه ؟؟؟؟؟؟؟؟؟؟؟؟
انا بقى بسأل هل ده عدل ؟ هل كل واحد بيتجوز بيقعد مع ابوه وامه والا يبقو غضبانين عليه ؟ وهل ربنا فعلا بيقبل دعوة الاب حتى لو كان ظالم ؟ مع العلم ان الابن بيحاول ما يخسروش والاب هو اللي بيتعنت اكتر وبيذل فينا اكتر لان عفشي تحت ايده
انا عايزة اقولكو ان انا لغايه دلوقتي لا حسيت ان انا اتجوزت ولا استقريت ولا حاجه لان كل حاجه فيها تدخل اكلنا نومنا لبسي نظام بيتي كل حاجه هما اللي بيحددوها وبعد ما سيبنا البيت طبعا قاعدين عند كل واحد شويه لما خلاص حاسه ان انا تعبت لكن للاسف مش بقدر احسسه بحاجه لان هو كمان مالوش ذنب ومشي عشاني ومتمسك بعدم الرجوع علشاني وعشانه وعشان ما يخسرابوه وامه
لكن للاسف هما اتعودو انهم يغلطو ويقسو ويجرحو وجوزي دون اخواته هو اللي يستحمل دون تقدير لانه انسان وعنده مشاعر وليه طاقه ده وصلت بحماي انه ضرب زوجي قصادي وكان هايضربني وانا حامل ويوم ما سيبنا البيت رفع عليا السكينه وقالي هقتلك انتي وهو لو في اخر الدنيا فأنا لا اأمن اني اعيش معاه تاني وخصوصا انه مره بسبب عصبيه وتهوره تسبب في جريمه قتل ( ضرب افضى ال الموت ) للاسف ما عرفتش بيها الا لما بعد ما اتجوزت وسبت البيت ورجعت لاهلي !!!!!!
المهم دلوقتي احنا هنا فرص العمل لزوجي ضئيله ومرتباتها لا تكفي حتي الحياة العاديه وامامنا فرصه عمل في الخارج بمرتب اعلى طبعا ومستوى ارقى
اهل جوزي ما يعرفوش بالسفر ده ولكن ابوه بقاله فترة كبيره مريض بالكبد
ولمجرد عدم موافقه زوجي على الرجوع مرة اخرى بيقولوله ها نبقى غضبانين عليك
فهل فعلا سفره وعدم رجوعه يجعل غضبهم مقبول مع العلم اننا مش ناويين نقطعهم
ولكن بناخد فرصتنا في الحياه لان هما ايضا سافرو في اول حياتهم واهلي كذلك وكتير من المعارف
وبرضه ااكد انه مش ولد وحيد ليه ولدين وبنت اخ اكبر بخمس سنين والتاني اصغر بسنه والكبير ده لا يزال قاعد معاهم اما الاصغر فتزوج في شقه ايجار لظروف خاصه بيه

ياريت يكون صدركو اتسع ليا وسمعتوني وفهمتوني ورجاء افيدوني بما يرضي الله
جزاكم الله كل خير
والسلام عليكم ورحمه الله وبركاته

[نيهال]

السلام عليكم يا مشمش
قلبى معاكى ومع زوجك
انا حاقوللك راييى وبصراحه




سافروا وسيبوا البلد





اذا كانوا همه مش مراعيين ربنا فيكم..وانتم عملتم اللى عليكم والحمد لله مش ناويين تقطعوا صله الرحم زى ما همه بيهددوكم




راييى سافروا وابدؤا حياتكم فى مكان جديد .اامن على حياتكم على الاقل




لان اذا كنتم حتستحملوا وجع الكلام دلوقتى ..بعد شويه محدش ضامن ايه اللى ممكن يحصل....منك او منه
ده راييى ....لكن انتم اللى ليكم القرار الاخير..
ربنا معاكم ويهدى النفوس
فى امان الله
وابقى طمنينا على البيبى.عامله ايه دلوقتى؟

[Mustang]

انا عايزة اقولكو ان انا لغايه دلوقتي لا حسيت ان انا اتجوزت ولا استقريت ولا حاجه

صراحة جملة صعبة و تقطع القلب

و ان شاء الله الاعضاء الكبار يساعدوكى ...

[محمدحسين]

صباح الخير يامشمش
كلماتك تبعث الكثير من الحزن والأسى ولكن دائما صاحب المشكله مايكون حائر ويشعر بالتعب من الالام وكثره التفكيرومهما شاركه الاخرين ولكن يبقى هو صاحب الألم الاكبر
القصه هنا لها عده ابعاد
الاول زوج حنين يقدس الزواج
الثانى اب من النوع الشكاك ولابد ان يكون له تجربه فى حياته ادت الى أنحراف تفكيره بهذا الشكل
الثالث عدم الأستقلاليه مما ادى الى التدخل فى حياتكم ومحاوله تدميرها

سوف أتكلم فى الموضوع
اولا يامشمش معك زوج حنين وهذا شئ جيد وتأكدى أنه مع الوقت سيزيد حبه وحنيته وتعلقه بك ولم أرى شئ فى رسالتك يشير اليه بشئ مسئ مما يعنى انك أيضا تبادليه حبا بحب وده شئ مهم يعطى أمل فى حياه مستقبليه ستتحسن
ولكن زوجك تحت وطئه ضغوط ابيه ولانه يريد ان يرضى ابيه ولايخرج عن طوعه حتى لايخالف شرع الله ويخرج عن عرف الحياه الأجتماعيه تحمل ضغوط ولم تكن ضغوطه بالسهل عليه أحساسه بعدم قدرته على توفير الحمايه لزوجته شئ فظيع له ويجرح شعوره كرجل ولاتعتقدى ان ضربه من قبل ابيه امامك بالشئ الهين بل هو جرح يفقده الكثير من الاحترام فى نظر زوجته التى فى كنفه ولكنه كان يحاول بينه وبينك احاطتك بالحنان والحب
وهذا شئ يضاف اليه كرصيد وهذا يعنى أنه زوج جيد وتمسكى به وساعديه ان يخرج معك من هذه المحنه حتى يكون لكم باقى العمر مع اولادكم
المشكله هو الاب الدائم الشك وهذا الشك لاعلاقه له بمركز اجتماعى او درجه ولكنه لديه حدث معين فى بدايه حياته أثر على شخصيته وحولها الى شخصيه عنيفه مسيطره وأظن أن زوجته وهى حماتك قد عانت منه الكثير
ولكن حتى لانكون عاطفيين من الصعب ان لم يكن من المستحيل تغيير الرجل فى هذا السن

والحل ان تستقلوا بحياتكم ولاحل غير ذلك ومها تدخل الاخرين سيزيد عند الأب وتمسكه برأيه وياليت يكون التعجيل بالسفر بالخارج حتى يستطيع زوجك
أن يخرج من هذا الجو
توفير المال للحصول على مسكن مستقل بعد عودتكم للوطن مره اخرى
خروج شخصيته من تحت وطئه استبداد ابيه وحريه فى أتخاذ القرارات
زياده قربه اليك وزياد الحب بينكم واستقرار حياتكم
ولايوجد شئ بدون ثمن
والثمن هو بعده عن ابيهفى البدايه وهو لن ينسى ابيه ولن يخرج عن طوعه فعليه ان ينقل اليه رساله مباشره ويتحمل ماسيلقاه من كلام قاسى بأنه يريد تكوين مستقبله وزياده خبرته وان فرصته جيده وأن الموضوع لايرجع اليك وانما يرجع لانه يريد ان يزيد دخله مع صعوبه الحياه فى مصر فى الوقت الحالى حتى يستطيع تربيه اولاده وادخالهم مدارس اجنبيه وتربيتهم التربيه التى يريدها
مع دغدغه المشاعر بانه يريد تربيه اولاده كما رباهم جدهم وانه يحلم بأن يكون ربع جدهم ويسافر
وعليك فى السفر ان ان تساعديه بالعمل حتى يكون لديكم مصدر رزق جيد يجعله لايشعر باى ضائقه ماليه تجعله يشعر بأن القرا رليس بالصحيح
ويبقى على أتصال بأهله ويرسل لهم الهدايا ويذهب الى العمره ويتصل بابيه ويقول له اننى دعوت لك هنالك قد يصده الوالد فى الاول ولكن مع حديث الاخوه والام سوف يخف الموضوع رويدا
ويبقى زوجك لك ويبقى لكم الاستقلاليه
مع دعوات لكم بأن يتم الله عليكم السعاده وترفرف السعاده على بيتك
وأجعلى حبك لزوجك دائما السند ,اعلم أنك لديك من القوه والحب له أن تعينيه لكى تهنئوا بعد فتره بحلاوه زواجكم
وبعد السفر أن شاء الله فى أول اجازه خذيه زورى أهله وحتى لو عاملوك بجفاء تحملى من أجله ومن أجل بيتك وحاولى عمل رحله شهر عسل جديده فى أول أجازه كأنكم تتزوجوا من جديد لاحياء الرومانسيه والحب
وربنا يوفقكم ويسعدكم

[maysam]

عزيزتي مشمش

اولا بحب بيكي جدا
وثانيا بهنيكي على صراحتك

من حق اي زوجين ان يكون لديهم استقلالية ويكون لهم بيت خاص وهم اللي بيقرروا شئونهم جوا وبرة البيت ومش حد تاني

واجب الابناء مراعاة الوالدين ، الاحسان اليهما ، تأمين احتياجاتهم وغيره
لكن لا طاعة لمخلوق في معصية الخالق!!

لما حماكي يطلب من جوزك انه يطلقك ..دا مش من حقه ود ا مخالف لشرع الله ، فالزوج مش ملزم على طاعته ، وقيسي عليه اي شيء تاني بيكون هدفه تخريب وهد اسرة وبيت!!!

السفر حل ممتاز ، ولو لم يتحقق السفر الحل انكم تستقلوا لوحدكم مهما كانت النتائج وما دام سفر الزوج لن يضرهم بشيء وبوجوج اخواة تانيين يعني الوالدين مش قاعدين لوحدهم خالص من غير اي حد معاهم ، مش شايفة فيها اي مشكلة لأنه لو سمحتوا لهم يتدخلوا اكثر ، حيتمادوا في التدخل ويصبح حق مكتسب وهذا شيء غير مقبول


وصدقيني الامور دي لازم يتوضع لها حدود من الأول والا بعدين مش حتقدوا تسيطروا على الموقف فيما بعد
هم بيزعلوا يوم .. يومين ..سنة .. سنتين بعدين بيرضوا بسياسة الأمر الواقع


زوجك واجبه يزو اهله ويتطمن عليهم لكن انتي مش ملزمة بالكلام دا ، انا رأيي ما دام هم رافضينك ومش طايقينك يبقى تتجنبي زيارتهم وتسيبي زوجك يقوم بالواجب لوحده وتكوني انتي بعيدة عنهم قدر الامكان

السؤال اللي نفسي اسأله

ما هو دور اخواته بالموضوع كله؟؟؟؟؟

ودور الأم ايه؟؟ انتي بتقولي انها مدرسة يعني مش ست جاهلة ، والست لها تأثير على زوجها فهل هي موافقة على اللي بيحصل؟

وهل اخواته مالهمش اي رأي؟؟ او اي حد من العيلة يكون بيفهم وله تأثير على الاب يعقله؟؟

عموما يا مشمش ، انا شايفة ان الحل واضح وما لوش تاني
حقكم تعيشوا بالطريقة اللي بتريحكم انتوا ومش حد تاني طالما ان اللي بتعملوه لا يسب اي ضرر لأي طرف تاني ، واللي مش عاجبه مصيره في يوم يعجبه

[الورد الجوري]

اولا اهلا بيكي يا مشمش معانا هنا
ثانيا ربنا معاكي يارب و يعينك على اللي انتي فيه ويجعل لكي من ضيقك مخرج
انا صحيح مش صغيره بس بردو مش كبيره و ليا الخبرة في الحياه
اللي تؤهلني لحسن الرد على مشكلتك كما تفضل محمد حسين و ميسم
بس انا ليا راي صغير
انا مع محمد حسين و مع ميسم في آراءهم
و فعلا السفر و الاستقلال بعائلتك ده الشيء الافضل
و طالما انتم هتفضلوا واصلينهم و لن تقطعوا صلة
الرحم فده مش حرام
ده غير ان ربنا سبحانه و تعالى عادل و مش بيظلم و مطلع على الامور كلها
و استحاله يقبل دعوة الاب او الام مادامت في غير محلها و ليست عن حق و مادمتم محتفظين باحترامكم لهم و لم تضروهم في شيء
" لا ضرر و لا ضرار "

وارجو منكي ان تطمئنينا على البيبي ( ان لم تخوني الذاكره ، اعتقد انها طفلة و اسمها ساره )
ياريت نسمع عنها كل خير و كل سنة وهي طيبة

[نورالقمر]

السلام عليكم ورحمه الله وبركاته
مشمش اولا انا مش هقدر اكتب رد بعد اللى قاله محمد وميسم والورد ربنا يكرمهم يارب
بس انا عايزه اقولك حاجه اصبرى واحتسبى صبرك عند ربنا واكيد اكيد اكيد ان شاء الله ربنا مش هيسبكم ابدا ابدا
وان شاء الله تكون فتره وتعدى وادعى دايما فى كل صلاتك ربنا يهديهم ويصلح احوالكم
ومن كل قلبى بدعيلك ربنا يهديهم وربنا يسعدك يارب
وحطى فى بالك دايما ان لولا المواقف الصعبه اللى بتقابلنا فى حياتنا مكناش هنحس بحلاوتها بعد مالمواقف دى ما تنتهى
انتى مظلومه ودعوه المظلوم ان شاء الله لا ترد
ويارب ان شاء الله نسمع منك عنك كل خير يارب ويكون فى اقرب وقت ان شاء الله

[heba_zaza]

مشمشتى اللى انا حاسه بيها اوى
اللى يشوف بلوه غيره تهون عليه بلوته
بعد اللى قولتيه ده عرفت انى مش لازم اتكلم عن اللى بيحصل لى لانه مافيش بلاوى تانى بعد اللى قلتيه
لازم لازم لازم (ان شاء الله ) تسافرى انتى و هو
هو انتى لسه بتفكرى هتستنى ايه بعد كدة لما يعمل فيكى انتى و لا جوزك حاجة لاقدر الله و اوعى تروحى البيت الجديد ده دى العيشة معاهم تقصر العمر و حرام عليكى ارجعى لأهلك و اوعى تسمحى لحد انه يغلط فيهم تانى و لا حماكى يغلط فيكى يعنى ايه يقولك شعرك ايه البنى ادم ده ما عندوش ذرة حياء معلشى يا حبيبتى استحملى الحبه دول لحد ما تسافرى و ربنا هيعوضك ان شاء الله بس اهم حاجة اهلك - اهلك- اهلك وجوزك و بيتك ولو انتى علشان هتبخايفة على زعل جوزك علشا هاتبعدو ا عنهم ابقى روحوا زيارات فقط زى الضيوف و ربنا يصبرك على ما ابتلاكى