المنصـــــــــــورة زمــــــــــــــان

[عتاب]

شوفوا صور المنصورة من قديم الازل وهى جميلة وعسولة تقولوش اوروبا يا اخواتى ههههههههه
ماتنسوش تبصوا علي التواريخ

اللي يعرف فرنساوى يترجم لو سمحتوا
انا هاقول اللي فهمته بس

Bureau du Service des Irrigations. Cliché G. Papastefanou, circa 1909.
مافهمتش حاجة للاسف ههههههههههههه








Collège des Frères. Cliché Max Rudmann, vers 1909.
فهمت انها كلية بس كلية ايه الله اعلم







Consulat d'Espagne, vers 1908.
تقريبا القنصلية الاسبانية اعتقد







Défilé militaire devant la Moudirieh, vers 1906. Cliché Ephtimios.

مافهمتش غير المديرية








L'hôpital de Mansourah. Cliché Max Rudmann, vers 1907.
مستشفى المنصورة تقريبا هانغنيلها علي اول الطريق الزراعي ههههههه











Maison d'Antoine bey Tadros, vers 1910. Cliché Max Rudmann.










Rue Mit Hadar, vers 1908.
شارع ميت حدر الحمد لله فهمت حاجة

Mosquée du Cheikh Hassanein. Cliché Ephtimios, vers 1906.
مسجد الشيخ حسانين بدأنا نفهم يا جدعان









Mosquée el Nagar. Vers 1906.
مسجد النجار (ماعرفش فين بصراحة )










Mosquée Hussein bey, vers 1906.
مسجد حسين بيه برده ماعرفش فين ياريت حد يقولي







Mosquée Hussein bey. Cliché Ephtimios, vers 1911.
مسجد حسين بيه كلاكيت تانى مرة ههههههههههه
اللي بيعرف حاجة في المنصورة حاليا يقولي ده فين لو لسه موجود يعنى وماكنش راح مع حسين بيه









Petit bras du Nil, vers 1906.
حتة من النيل ههههههههههههههههه









Pont de Talkha, vers 1913. Cliché Ephtimios.
كوبري طلخا ياجدعان اهو









Rue El Nil. Circa 1908.
شارع النيل كان جميل اوى ياريته فضل كده









Rue El Nil. Cliché G. Papastefanou, circa 1905.
برده شارع النيل اللي هى المشاية حاليا








Vue générale de Mansourah. L'on aperçoit les bords du Nil.. Circa 1906.
منظر عام للمنصورة برده البيوت فوق بعض ماعرفش ليه









La Mosquée Saleh Ayoub, vers 1904. The Cairo Postcard Trust.
مسجد الصالح ايوب








El Sekka el Guédida. Circa 1908. The Cairo Postcard trust.
السكة الجديدة يارجاله وصلت









Rue Sekka el Guedida. Cliché Ephtimios, vers 1913.
السكة الجديدة تااااااااانى








Tribunaux Mixtes. Cliché G. Papastefanou, vers 1903.
مين ده؟!!!!!!
الجهل هايظهر تانى









Vue générale du centre de Mansourah. Circa 1905.
منظر عام لوسط المنصورة تقولوش ماتش كورة قدم طيب فين الهجوم









Vue Générale de mansourah, vers 1909. Cliché G. Papastefanou.
منظر عام للمنصورة للنيل طبعا



اخيرا خلصت ترجمة هاروح اخد كورس فرنساوي وارجعلكم
احب اشكر نور القمر اللي جابتلي الصور دى ربنا يبارك فيها وتعبتنى لحد مانزلتها هنا ربنا يسامحها بقا هههههههههه

[نورالقمر]

هههههههههههههههههههههههههههههه
ايه ياعتاب اللى انتى عملتيه ده
فضحتينا
يقولوا ايه دلوقتى بنات المنصوره جهله ومابيعرفوش لغات
ياجماعه هى بس خايفه م الحسد فبتظهر نفسها بقى ايه مش عارفه فرنساوى
لكن انا ابصملكم انها بتعرف
ايه المنصوره دى يابنتى الا قوليلى بينى وبينك كده الصور دى عندنا
بس تصدقى هى ممكن تكون المنصوره بس فى كتب التاريخ فى اوروبا
والله شكلها سكر ياعتوبه عامله زى اللى بنشوفه فى التلفزيون
بشكرك على مجهودك بس برضه فضحتينااااااااااااااااااااااااااا

[عتاب]

ميغسي بيكو نوغ الكمغ
برافووووووووووو تغي بيا
انتوا بس مش واخدين بالكم من الصبح باكلمكم فرانسيه
علي العموم انا بس باحوش العين عنى احسن تحسدونى علي ثقافتى اللغوية الفذة
واللي بيتريق ياريت يوريني الهمة ويفك طلاسم حجر رشيد اللي قدامنا ده
ههههههههههههههه

[مستكة]

الموضوع ده تحفه بجد



عتاب ونور بجد مش عارفه اشكركم ازاي انتوا قدمتولي اجمل هديه من غير ماتعرفوا


بجد المنصوره زمان كانت جميله جدا جدا اجمل من دلوقتي كمان


البركه في الجانب اللي كانوا عاملين فيها شغل جامد جدا





جميل جدا شكل ميت حدر هنا

واللي ميعرف ايه ميت حدر ... انا اقولكم

هو اكتر شارع حيوي في المنصوره

فيه تلاقي اي حاجه ( اكل يعني )

كله محلات لبيع الخضار وخصوصا الخضروات والفاكهه الغريبه والغير منتشره في اسواق المنصوره مثلا تلاقي فيه من الفواكه زي القشطة والافوكادو المانجه في غير اوقاتها والبطيخ في غير اوقاته واي فاكهه في غير وقتها تلاقيها هناك ..

غير المكسرات تلاقيها طول السنه هناك ... كمان الخضار زي الخرشوف والبروكلي واي خضار في غير اوانه او قليل التواجد تلاقيه هناك

بالاضافه الي محلات الجزاره والسمك وبعض المطاعم الشعبيه ..

احسن حد يعمل تمر هندي وعرق سوس والعصاير الطبيعيه دي تلاقيه هناك ... يعني اللي عايز اي حاجه في اي وقت هيلاقيها هناك

باختصار هو شارع يحتوي علي كل حاجه فاتح 24 ساعه مشهور جدا عندنا هو منطقه شعبيه .. ومازالت البيوت هناك قديمه

ممكن تلاقي المحلات متجدده وشكلها مطور واصلا البيت من فوقها تحس ان هيقع عليك وانت واقف ... وانا متاكده ان فيه بيوت من اللي في الصوره دي لسه زي ماهي الي الان ...

واللي عايز يشوف ميت حضر فعلا يزورها في رمضان ... وخصوصا قبل الفطار بساعتين او في الفتره من 1 بليل الي الفجر ..

بجد جو تاني خالص اللي عايز يحس برمضان علي حق يتمشي فيها قبل المغرب ...

معلش ان كنت طولت في الشارع ده .. يادوب علي ماخلص




الشيخ حسنين هو مسجد كبير وملحق به مقام لهذا الولي

وهو حاليا ميدان كبير في المنصوره ومنطقه مهمه جدا جدا

يتفرع منه اهم سوق تجاري في المنصوره كلها وهو شارع العباسي ( اللي يعرف يمشي فيه يبقي بطل )

طبعا في الصوره واضح ان مكنش فيه بشر ... محدش يعرف يمشي في الشيخ حسانين دلوقتي لا راكب ولا ماشي ...

يعتبر منطقه شعبيه جدا ... ويقام مولد الشيخ حسنين سنويا وبيحضرله ناس من انحاء الدقهليه ويعتبر اكبر مولد بيحصل في المنصوره ..

عمري ما رحته الصراحه بس اسمع عنه












ازاي متعرفيش فين مسجد حسين بيه ؟؟؟؟؟؟

شكلك بتهرجي طبعا ....

المسجد مازال موجود حتي الان ...

واللي مستغرباله انه زي ماهو بالظبط متغيرش فيه اي حاجه

بس اللي اتغير شكل الشارع

مسجد حسين بيه يقع في اول شارع حسين بيه

وهذا الشارع موقعه تحديدا في :

هو يعتبر امتداد لشارع بنك مصر

واللي بيقطعهما شارع السكه الجديده

( عارفه انتي المكان الواسعه اللي فيه تقاطع السكه الجديده مع ميت حدر مع بنك مصر اهو حسين بيه هو االشارع الرابع بتاعهم ...

برضه الشارع ده من اقدم شوارع المنصوره ومازال فيه بيوت قديمه بيتميز بيها وان كانت قليله لان معظمها اتهدم واتبنب بدل منه عمارات ( منهم لله باه )

يشتهر الشارع ده بوجود الورش الخاصه بتصليح السيارات وبيع قطع غيار السيارات واكسسواراتها وكمالياتها وكل ما يتعلق بيها ..
الجميل عندنا ان كل مهنه معينه تلاقيها متجمعه في مكان واحد



الكوبري ده فعلا بيوصل بين المنصوره وطلخا

طلخا دي تعتبر عاصمة المنصوره او امتدادها بي هو كل الفرق بينهم كوبري

بس ده كوبري القطر يا عتاب

هو اول كوبري وصل بين طلخا والمنصوره واللي عمله الانجليز تقريبا .. وده عشان القطر يعدي بيه النيل

لان المنصوره من اكبر المحافظات اللي فيها خطوط سكه حديد فيها حوالي من تلات خطوط لاربعه

ولو تلاحظوا شط النيل اللي في يمين الصوره ..

كان علي شكل مساطب وكانت بتتزرع ... دي المشايه حاليا يا عتاب

قبل كده مكنتش اي حاجه لان فيضان النيل مكنش يسمح انها تكون طريق يستخدمه الناس




ده كان شارع النيل ايامها .. انما مش المشايه حاليا

ده اللي هو شارع الجمهوريه دلوقتي ( فوق يعني )

واللي ميعرفش المنصوره اشرحله .......

يا جماعه شارع النيل زمان كان بينه وبين النيل مستوي مرتفع كتيير عشان ايام فيضان النيل كانت الميه مستواها بيعلي جدا ويفيض علي المنطقه المحيطه بيه ... فكانوا ميقدروش يستغلوا المساحه دي في حاجه غير الزراعه او يتركوها فاضيه ..

تخيلي يا عتاب بيحكولي ان المشايه كلها ومنطقة النوادي في طلخا بطول النيل كانت تابعه للنيل ولا تنحصر عنها المياه الا فتره بسيطة في السنه ( يعني عندك مثلا مدرسة صلاح سالم دي كلها كانت تبع النيل )

اللي انا بكلم عنه ده يا جماعه دلوقتي شوارع من اهم شوارع المنصوره طبعا بعد السد وقلة الميه اصبحت دي مساحات واسعه غير مستخدمه هي حاليا حيويه جدا ...

المشايه دي هي شارع الكورنيش بس مستواه قريب من النيل لان فيه شارع موازي له برضه بس اعلي منه وهو الجمهوريه والشارعين يعتبروا كورنيش بيوصل بينهم مطالع ومنازل ( موضوع كبييييييييييييير متاخدوش في بالكم )

المشايه دي حاليا تعتبر من اكتر الاماكن تحضرا وتمدنا في المنصوره ممكن نعتبرها عباس العقاد بتاع المنصوره






ده اعتقد انه المسجد اللي في اول العباسي يا عتاب

هو هو نفس الشكل ونفس اللون متغيرش فيه حاجه

اصلا مكنتش اعرف اسمه بس عرفته من شكله
واخد ناصيتين دلوقتي الناصيه الجانبيه دي بتطل علي السكه القديمه في ضهر مديرية الامن وهتلاقي اودامه علي طول رمضان السيد الكبابجي وبعده ميتشو وبعدين في الاخر تلاقي في وشك راندوبلو

اما الناصيه اللي قدامنا دي فهي بداية شارع العباسي من عند البحر ( والمحلات اللي تحت دي مازالت موجوده الي الان منها مكتبة الاقصي ومقلة العباسي و عصارة قصب معرفش اسمها )

طبعا انتو شايفين في الصوره اودامها نافوره وزرع .... دلوقتي تشوفوا كل خير ( انصحكوا متشوفوش خالص ... عينك ما تشوف الا النور )

بس بجد الجامع ده من الحاجات الاثريه اللي بحبها جدا .. كل ما اعدي من عليه ابص علي بنايته وشكله جميل جدا لكن للاسف مهمل جدا

الحاجات دي اثار والله يا جماعه حتي باين من اسمه بس مفيش اي اهتمام بيها خاااااااالص






طبعا طبعا الكلام ده ملوش اثر دلوقتي

الا بعض البيوت القليله جدا جدا وخصوصا في السكه الجديده

لانها تعتبر شارع تجاري مهم جدا جدا في المنصوره

بس غير العباسي ... العباسي كله تجارة ادوات كهربائيه وسلع معمره

اما السكة الجديده تختص بالملابس والدهب

تقريبا كل محلات دهب المنصوره في السكة الجديده .. كمان كلها محلات ملابس واحذيه

بس لو تدققوا في الصوره تلاقي الشوارع زمان كانت مبلطة ببلاط الجرانيت الاسود

والمنصوره من المدن القليله اللي اهتم بها الجاليه الاجنبيه ( الاحتلال بمعني اصح ) ومش عارفه ليه

وفيه بعض المناطق مازالت شوارعها بنفس البلاط من عشرات السنين لا بلاطة اكسرت ولا طلعت من مكانها ولا جرالها اي حاجه ... شغل ولا كلمه

مش زي انهارده يبلطوا الرصيف ولا بيمشي عليه عجله ولا عربيه وتلاقي البلاط فرقع



طبعا انا معرفش ي ايه ولا فين

بس بشبهه عليها حاسه اني شايفاها

واحساسي بيقولي انها في المختلط والله اعلم

وبالمناسبه يا جماعه ...... المختلط ده حي في المنصوره وسمي بالمختلط لان كان فيه محاكم مختلطة لرعاية شئون الاجانب المتواجدين .. وللعلم المحاكم دي مازالت موجوده الي الان بس طبعا محاكم عاديه دلوقتي

لو تشوفوا البنايات هناك ... تقريبا كلها نفس الشكل ده وفيه اروع من كده ... تحس الدور الواحد فيها باربع ادوار من دلوقتي ... ايام الخير والرخص باه .

من اجمل المناطق في المنصوره بجد .... اااااااااااااااه لو عندي جراه وانزل اصور

والله كنت جبتلكم مناظر تعرفوا فيها المنصوره بجد



المسجد ده مسجد الصالح ايوب اللي اكلمنا عنه ودي صوره اوسع للمكان

الشارع اللي قدامنا ده اسمه السكة القديمه ( اللي بطول )

والحته الواسعه علي اليمين دي بنزينه حاليا في ضهرها علي طول مديرية امن الدقهليه

اما اللي بالعرض باه العباسي





يا سلام فين ايام الزمن الجميل

علي العموم انا قلت اللي اعرفه عن الصور اما الصور اللي معرفتهاش هسال وانقب الي ان اعرف اصلها وفصلها ربنا يسهل ......

اوعوا تكونوا زهقتوا .... ولا طولت عليكو ...... انا بس جبت نبذه مختصره لكل صوره .

اصلي محبش اللك والعجن الكتير



ملحوظه :
1 نور القمر الصور دي رحمتك من اللي كنت هعمله فيكي ( اما تدي وعد لحد كوني اده )

2 ياعتاب يا بنتي الله يكرمك ملقتيش حاجه في سكتك وانتي بتنزلي الصور دي لابن لقمان ينوبك ثواب

[Mustang]

ايه يا عتاب فيه حد من المنصورة ميعرفش فرنسى
دا فرنسا هى اصلنا و كل بيت منصورى لازم تلاقى فيه بصمة فرنسية
فرنسا هى اصلى و نيلها هو دمى
عموما لو حد من اصحابى الى من المغرب دخلوا هبقى اقولهم عشان يترجموا الحاجات دى


و اييييييييييييييه يا مستكة كل الحاجات دى انتى بتعرفى الحاجات دى ازاى
ما شاء الله شاكلك مذاكره المنصورة حته حته و لا تكونى انتقلتى عبر الزمن؟


اكتر حاجه ضحكتنى فى الموضوع ان السكة الجديده بقالها اكتر من 100 سنه و برضه لسه اسمها السكة الجديدة مش ناوية تقدم ابدا

[عتاب]

مستوكة ايوة كده ورينا الهمة بجد مش عارفة من غيرك اعمل ايه
انا حاسة انك فعلا جاية من زمن تانى بس فين آلة الزمن عشان نرجعك ونرجع معاكى هههههه
بجد الشرح جميل جدا استفدت منه كتير (بس بلاش رغي هههههههههه)
تقوليش سياح وانتى التور جايد بتاعهم ههههههههههه احسنتى وبارك الله فيكي بجد

موستانج ياريت لو تعرف فرنساوي تترجم انت يا اللي بصمتك فرنساوى
ياجماعة اعذرونى انا اصلي من المنيا يعني بصمتى فرعونى شوية ههههههههه
احمدوا ربنا انى ترجمتلي كلمتين والا تلاتة . يالا ورينا الهمة واشتغل في الترجمة
فيه حاجة غريبة بقا نور وعتاب ومستكة وموستانج كلنا من المنصورة تقريبا ماحدش عايز يشوف الصور غيرنا

[مستكة]

الترجمه اهي :

1 مكتب خدمات الري ..

2 كلية الاخوة او (الرهبان)

3 قنصلية اسبانيا

4 ديفيله عسكرى امام المديرية

5 مستشفى المنصورة

6 بيت انطوان بيه تادرس

7 شارع ميت حدر

8 جامع الشيخ حسنين

9 مسجد النجار

10 مسجد حسين بيه

11 فرع من فروع النيل

12 كوبري طلخا

13 شارع النيل

14 منظر عام للمنصوره

15 مسجد الصالح ايوب

16 السكة الجديده

17 السكه الجديده

18 دي باه تدل علي عبقريتي وقوة ملاحظتي ... والله ماكنت فاهمه يعني ايه ولما اترجمت طلعت .......

المحاكم المختلطة زي ماتوقعت بالظبط ..... انا خساره في البلد دي يا جدعان

19 منظر عام للمنصوره

20 منظر عام للمنصوره

[عتاب]

اهى مستكة جابت واحدة فرنساوى ماعرفش منين وترجمت نفس اللي قلته
عشان تعرفوا انى مثقفة وبعرف لغات ههههههههههههههههه

[نورالقمر]

مستكه حبيبتى بجد والله العظيم انتى عملتى جو جامد فى الموضوع ربنا يكرمك يارب ويبارك فيكى يارب
اوباااااااااااااااااااااااا جينا للاحراج بقى واللى يوعد مش يخلف
حقك عليا يامستكه بقى والمسامح كريم ومش تزعلى وليكى عليا ياستى لما اوعد تانى اخلف برضه
بس انتى ادعى بس انى اصحى م النوم عشان اعرف اشوفكم
شايفه ياعتاب mustang ايوه كده هو ده الكلام ولا بلاش كل بيت منصورى عنده بصمه فرنسيه تسلم لغتك الفرنسيه
بس صحيح يامستكه انتى مااتكلمتيش كتير ليه دا حتى الواحد يادوب فى ثانيه خلص الفيلم اقصد السطر اللى انت كاتباه
لالالالالالالالالالا مايصحش كده خالص ماتعودناش على قله كلامك كده
شايفه ياعتاب الفرنساوى اللى مترجم ده شكله ابن ناس اوى مش الفرنساوى بتاعك نوغ الكمخ دا انا جبت العيله كلها تترجمها يابنتى
تسلمى يامستكه ياااااااااااارب

[عتاب]

ايه يابنتى مش عاجبك الفرنساوى بتاعى
طيب انا ماجبتش حد يغششنى انما مستكة جابت واحدة تغششها
احمدى ربنا انى عرفت اى كلمتين وخلاص
انا ماشوفتش الفرنساوى من ايام الفراعنه هههههههه
فييييييييييييين ايام تانية ثانوى والله كنت شاطرة فيه جدا
وكمان انتى عارفانى بانطق الفرنساوى ولا اللى مولودة في فرنسا
يعني لا تقوليلي بعرف ولا ماعرفش المهم انى بانطقه كويس هههههههههه

[sehr_3inik]

اييييييييييييييه الجماااااااااااااال والروووووووووووووعه دي يابوبا

تسلم ايدك ياحبيبه قلبي


الترجمه احلى مافي الموضوع هههههههههههههههههههه

لا بجد تسلم ايدك ياحبي

ومستكه عامله شغل جااااااااااااااااااااااامد

تسلم ايدك ياتوووووووكا

ايوه كده

خلو جمعيه نساء العالم ترجع تاني

من اختكو في الله شروق