كبـــريــاء وعظمـــة
ضابط أول :يا فندم العبارة هتغرق
القبطان :تغرق إزاي وأنا القبطان يلاَ
ضابط ثانى :يافندم كلامه صح لازم نلف ونرجع للسعودية تانى
القبطان :عشان يقولوا إنى معرفتش أطفى الحريقة ويفتكروا إنهم أحسن منى
ضابط أول :يا فندم إحنا معانا وزن فوق الحمولة والإستمرار خطر
القبطان :وإنت هتعرفنى شغلى ياض...دنا شغال قبطان من سنة 67
ضابط أول :مش دى سنة النكسة يا فندم ؟
القبطان :إخرااااااااااااااااااس...مش عايز أسمع صوتك..كل شىء
تحت السيطرة
***
غبـــاء وجهـــل
أحد الركاب (الضحايا) :ياساتر يارب...إيه الدخان ده...إلحقونا إيه
اللي بيحصل
فرد من الطاقم :مفيش حاجة يا حاج ده إبن عمى بيشوى كباب تحت
الحاج :كباب إيه يابنى دى ريحة هباب....كح كح كح....مش قادر
هو إيه اللى بيحصل بالظبط
فرد أخر من الطاقم أذكى من زميله السابق :دي يا حاج حريقة
عادية بتحصل فى كل السفن فى المكان ده عشان أشعة
الشمس بتضرب فى البوصلة...ومتقلقش طفيناها خلاص
الحاج :دى بتزيد والدخان بيعلى إلبسى يا حاجة سترة النجاه
فرد الطاقم بغضب :إنت مش واثق فى كلامى ولا إيه...أنا
المسؤول هنا ومش هتفهم أكتر منى...هات السترات دى إنتوا
عايزين تفزعوا الركاب وتعملوا قلق وخلاص...خش يابا جوه كابينتك
وإقفل عليك...قلتلك كل شىء تحت السيطرة
***
جـشـــع وطـمـــع
القبطان :أيوه يا ممدوح بيه يا مالك عباراتنا وولى نعمتنا إزيك
ياباشا أخبارك إيه
ممدوح بك فى عظمة :فيه إيه ياض يا سيد بتتصل دلوقتى ليه
وخلتنى أخرج من الجاكوزى
القبطان :أسف يا فندم كنت عايز أتصل فى وقت تانى بس قلت
يمكن نغرق قبل ما أعرف و.....
ممدوح بك :تغرق إزاى يا قفا أمال قبطان إزاى وعاملى
بتفهم...إتصرف ومتوجعش دماغى...إنت فاهم
القبطان :أرجوك طيب يا فندم قبل ما تقفل فى وشى كالعادة
قلي...هل ممكن أستخدم إشارة الإستغاثة
ممدوح بك :يا ليلة قطران على دماغك إنت عارف الإستغاثة دى
هتكلفنا كام يااااااااااااض
القبطان :خلاص خلاص يا فندم آسف آسف هحاول ألف وأرجع مع
إنى عارف إنى هتقلب
ممدوح بك :أصل أنا معين شوية أغبيا مش عارفين يخمسوا فى
البحر....سقط سرعة وجيب التانى ولف وإنت شادد الهاند بريك
هتلاقى السفينة فى السعودية يا غبي
القبطان :طب سلام يا فندم دلوقتى عشان محتاج إيدى اللى
ماسكة السماعة أسند بيها عشان السفينة بتميل على جنب
ممدوح بك :وإيه يعنى تميل على جنب هل ده سبب كافى عشان
ندفع كام مليون بعد الإستغاثة....صحيح اللى إختشوا ماتوا
القبطان :إطمن يا فندم .. كل شىء تحت السيطرة
ممدوح بك بعد غلق الخط وهو يبتسم فى دهاء :ياترى لو غرقت
دي كمان هاخد كام مليون بالظبط المرة دى تأمين
***
فســـاد وكوســـة متحللــة
ممدوح بك :ألوووو أيوه يا فتحى بك إزى معاليك
فتحي بك :إزيك ياااااض يا ممدوح
الواد ممدوح :تمام حضرتك جنابك نور عينى والننى يا مظبطتنا يا
مفطرنا يا مغدينا يا....
فتحي بك :خلص يااااااااض مش فاضيلك عايز إيه ؟
الواد ممدوح :حضرتك يا فندم سمعت إن العبارة بتاعتى بتغرق
فتحي بك :بقى هو ده اللى بتكلمنى عشانه...هى أول مرة يعنى
الواد ممدوح :يعنى مفيش قلق يا فندم
فتحي بك :هو إحنا بنلعب يااااض....مهو كل مرة بتبقى دوشة
يومين وبعدين النسيان بيثبت إنه أكبر نعمة وبيطلع الموضوع فشنك
الواد ممدوح :يعنى جنابك مش شايف قلق المرة دى....الركاب
المرة دى كتير
فتحي بك :لو إنت ممدوح قول كلمة السر
الواد ممدوح :كلمة السر (موافقة)....بس ليه يا فندم طلبتها منى ؟
فتحي موافقة :أصلك شكلك كده مش ممدوح اللى أعرفه....مش
هتعرف تختفى شوية وبعدين تطلع تقول الركاب معرفوش يتبعوا
وسائل السلامة وتدافعهم هو اللى أدى لميل العبارة يعنى ؟
الواد ممدوح :لأ هعرف طبعاً يا فندم وممكن نلبسها للقبطان كمان
بس أنا خايف على وضعى فى.......
فتحي بك :هاهاها.....اللى يبقى معانا ميخافش من
حاجة....اللى يخاف اللى ضدنا بس....فهمت يااااض
الواد ممدوح :فهمت يا فندم طبعاً طبعاً يا فندم ده معاليك كبيرنا
وحبيبنا وحامينا و....
فتحى بك :قلى ياض المرة دى هاخد كام من التأمين لو العبارة
غرقت بجد ؟
***
أنانيـّــة وجبــن وتخـــاذل
مهندس من الميناء المصرى :يا فندم جتلنا إشارة إن فيه عبارة
غرقت من ساعتين...نعمل إيه
المسؤول المهم :طب وإفرض إنها إشارة كدابة...مين هيبقى
المسؤول عن خروج وحدات الإنقاذ من غير لازمة...إنت ؟
المهندس :لا يا فندم أنا مليش دعودة أنا بقول يمكن الكلام ده
مضبوط لكن لو حضرتك شايف غير كده خلاص....
المسؤول بفخر :الحاجات دى عدت علينا كتير وإحنا بالخبرة بنعرف
إيه الصح وإيه الغلط وفى نفس الوقت المسؤولية كبيرة وده قرار
صعب ولازم نتأكد الأول
المهندس :أؤمرنى يا فندم
المسؤول المهم :نستنى شوية لغاية ما نتأكد ونشوف السعودية
هتقول إيه عن الموضوع ونشوف دول أوروبا هتقول إيه ونشوف
أمريكا هتقول إيه...وممكن نستنى رأى اليابان دول متقدمين جداً
وعندهم أقمار صناعية بتشوف كل حاجة....والدنيا مش هتطير
وكده أو كده الدنيا ليل والإنقاذ صعب ونستنى أهم حاجة أوامر من
الرياسة ببدء البحث والإنقاذ عشان نخلى مسؤوليتنا
المهندس :طب يا فندم ولو حد سأل عالإشارة اللى جتلنا وقال ليه
متحركناش ؟
المسؤول :هو حد يعرف الإشارة دى غيرنا ؟
المهندس :لأ يا فندم
المسؤول :خلاص............ ......يبقى كل شىء تحت السيطرة
***
خسّـــة ونــذالة
القبطان :يلا هنستعد للدوران يمين
ضابط أول :طب يا فندم مش نشوف سرعة الرياح ونضبط
القبطان :يلا مفيش وقت...نفذ
ضابط ثانى :تمام يا فندم
الحاج لفرد الطاقم :هو إيه اللى بيحصل...فهمونا ولا هاتوا سترات النجاة
فرد الطاقم بزهو :أنا أخذت سترات النجاه من كل اللى حاولوا
يلبسوها....وقلنا ميت مرة كل شىء تحت السيطرة
المركب تميل بشدة وتنقلب فى البحر
فرد الطاقم :إجرى يا عبده هات سترتين نجاه ليا وليك...مفيش وقت
عبده :أنا جبت أهو بس فين القبطان
فرد الطاقم :أنا شفته نزل زورق نجاه ونط فيه أول واحد وبعد عن العبارة
عبده :طب يلا نلحق نخرج بسرعة
فرد الطاقم :يلا بينا مفيش وقت حتى نفتح الكباين اللى قفلناها عالناس
عبده :ناس مين يا عم إحنا الوحيدين اللى فاضلين من الطاقم يلا
بلاش تخريف ده موت يابنى
***
نفـــاق وتدليـــس
المذيعة :فخامته أمر بالبحث والإنقاذ فوراً بعد 8 ساعات من
الغرق.....بس
المذيعة :فخامته بيتابع الموقف و كل شىء تحت السيطرة
المذيعة :فخامته مهتم بالموضوع
المذيعة :فخامته راح هناك عشان يتابع بنفسه
المذيعة :فخامته جه هنا تانى
المذيعة :فخامته بيطالب بالتحقيق
المذيعة :فخامته متضايق من الموضوع
المذيعة :فخامته راح باس واد صغير من اللى نجوا والواد قدمله ورد
المذيعة :فخامته ركب طيارة فخامته
المذيعة :فخامته بص للناس بحزن
المذيعة :فخامته حلف إن اللى عملوها مش هيفلتوا
المذيعة :فخامته هيصوم تلات أيام
المذيعة :فخامته فضل يطعم 10 مساكين عن الصيام
المذيعة :المفتى أفتى إن فخامته حالة خاصة ومش لازم يصوم أو
يطعم 10 مساكين
المذيعة :فخامته رقى المفتى وبقى مفتى أول
***
هبـل وإستخفـاف بعقــول النـاس
المذيعة :ننقل إليكم الأن فيلم تسجيلى عن غرق العبارات
والسفن حول العالم
المذيعة :تيتانيك اللى كان فيها جاك وروز غرقت وكلنا عارفين إن
غرق السفن شىء عادى ولا يدعوا للقلق
المذيعة :سالم إكسبريس....آآآآه.....آسفه ...قصدى سلمون بك
بسبس الكوالالمبورية غرقت فى بحر البقر سنة ألف و 800 ق.م
وكلنا عارفين إن غرق السفن شىء عادى ولا يدعوا للقلق
المذيعة :وفى معركة ذات الصوارى وفيلم الناصر صلاح الدين
غرقت عشرين.....بقول عشرين سفينة وكلنا عارفين إن غرق
السفن شىء عادى ولا يدعوا للقلق
المذيعة :وقد إحترقت ناقلة نفط فى الطريق إلى إيلات وكانت
متجهة لألف مسكن وضلت طريقها وكلنا عارفين إن غرق السفن
شىء عادى ولا يدعوا للقلق
ثم فى سنة 1587 م غرقت مركب سيولوس برسيوس الفنلندى
وغرق ما يقرب من 3000 فرد مش 1400 زى عندنا....يعنى الحمد
لله على كده أوى
العين صابتنا ورب العرش نجانا
البرنس سيد............ ....الأميرة جمالات
ترجع لنا بالسلامة يا أبو سيد
و
(كل شىء تحت السيطرة)
***
بجاحـــة ووقاحـــة
المذيع :هل العبارة السلام 98 كانت مستوفية لشروط السلامةوالأمان ؟
مندوب صاحب الدمار 98 :هههههههه....أكيد يا بيه هو فيه مركب
ممكن تطلع من غير فحص وتأكد من سلامتها يعنى ؟
المذيع :طب أمال فى دول أوروبية بيقولوا إنها كانت ممنوعة من
الإبحار فى مجالات الدول الأوروبية عشان بإختصار خردة وعمرها
الإفتراضى خلص من 15 سنة وكانت ناقلة بضائح وكانوا هيبيعوها
خردة فى إيطاليا فإشترتها شركة السلام زى غيرها وزودت عليها 3أدوار
كمان ودهنتها عشان تخفى الصدا ودفعت فلوس لشركة بنمية
سيئة السمعة عشان تديها وثيقة الصلاحية ؟
مندوب صاحب الدمار 98 :هو كل حاجة هنصدقها يا بيه !!! العبارة
كانت عشرة على عشرة وماشية تمام التمام ولا أجدع سفينة
فيكى يا بلد وكان (كل شىء تحت السيطرة)....بس الركاب لما
تدافعوا ميلوها على جنبها راحت غطست فى المالح
المذيع :وهل ده طبيعى والعيب هيبقى على الركاب فى الآخر ؟
مندوب صاحب الدمار 98 :هنعمل إيه طالما مش لاقيينالقبطان
***
حسبــي الله ونعــم الوكيـــل
فرد من الميناء معه ميكروفون وسط أهالى الضحايا :دلوقتى
هنقول الأسامى الجديدة للى أنقذناهم
أحد أهالى الضحايا :يارب المرة دى يارب...ده سايب أمه وأبوه
العيانين ومراته وولاده من غير حد غيرك...يارب
فرد الميناء : (كل شىء تحت السيطرة) والأسامى هي
آخر من أهل الضحايا :حرام عليكو بقه...حرام....كل يوم تقولوا
نفس الأسماء وقاعدين تزودوا عدد الناجين فى
التليفزيون...بتضحكوا على مين...ربنا ينتقم منكم
آخر من أهالى الضحايا :بيقولك نقلوا الجثث الجديدة مشرحة
زينهم...تخيل...يعنى نستنى هنا للى هيوصلوا والجثث ولا
هناك ....هما عايزين يمشونا من المينا وخلاص ومش مهم عندهم
حاجة تانية.....ربنا ينتقم منهم
صوت آخر :حرام عليكوا الشحتطة دى هو إحنا ناقصين بهدلة
مش كفاية اللى حصل
صوت آخر :ربنا ينتقم منكم
***
بعـد مـــرور أسبوعيــن
المذيعة :ميدو يتشاجر مع شحاتة والشعب المصرى زعلان من
ميدو ومنمنش الليل بيفكر هو ميدو عمل كده ليه......ليه كده يا ميدو ؟
المذيعة : فخامته سافر ألمانيا يتعالج من شكة دبوس مفاجأة
ونتمنى له دوام الصحة والعافية
المذيعة :ممدوح بك يعين رئيس المجلس بإجماع الأصوات
المذيعة :فتحى بك يؤدى اليوم حلف اليمين الدستورية لمنصبه الجديد
السلام عليكم ورحمه الله وبركاته
النمط الخطي
