لحظـــــــة مــــن فضلكـم

[عتاب]

هاتكلم عن حديث الساعه في المنتدى اليومين دول ومعلش استحملوني لاني لازم اتكلم.

هل كان خطأ منى اني اقرر اسيبكم لفترة ؟؟ والا كان خطأ منى اني كتبت عشان اعرفكم ده؟؟؟ والا خطأ اني سمعت كلامكم ورجعت؟؟؟ مش عارفة بجد ليه عتاب في قفص الاتهام دلوقت؟!!
اى عضو بيمشي بيقول ان السبب المنتدى مش عاجبنى وبيتهم ناس . انا لما قلت هامشي ماتهمتش غير عتاب نفسها. قلت هاسيبكم فترة اصلح فيها حاجات في شخصية عتاب
مش من حقي ؟!!!!

قلت هاغيب فترة انا نفسي ماعرفهاش وكتبت بالنص لما احس اني استحق اكون بينكم وانكم راضيين عن عتاب وعتاب راضية عن نفسها هارجع

كلكم طالبتونى اني ارجع عن طريق الايميل او الرسايل الخاصة او الموضوع نفسه

وفي نفس الوقت وقبل رجوعي ناس اتهمتنى اني عامله مسرحية واني بامثل عليكم وان مفيش مشكلة من اساسه خليتنى امشي وان كل الحكاية اني عايزة الناس تتحايل عليا عشان ارجع واني عايزة اعرف قيمة عتاب عندكم
سؤال محيرني منين جابوا الاتهامات دي كلها !!!!

عتاب معاكم من سنة تقريبا . هي دي اخلاقها؟؟ هي دي صفاتها؟؟
لو عتاب ممثلة زى مابعض الناس قالت ولو اللي انا قلته كان مسرحية . ياترى الناس دي شاركت في المسرحيه ليه؟؟
ليه اللي اتهموا عتاب هما اللي دخلوا طلبوا منهم تقعد معاكم . اذا كانوا شايفين انها بتمثل كانوا سابوها تواجه مصيرها وتمشي بسبب تمثيلها

الغريبة اللي اتهمونى اني بامثل اتهموني قبل ما ارجع يعني دخلوا في نيتي وعرفوا اني بمثل. ودخلوا في علم الغيب وعرفوا اني راجعه

تقدروا تسألوا احمد كمال قبل كلمة مسرحية وانى بامثل كنت رافضة الرجوع ازاي . وبعد الكلمة دي لقيت اني لازم ارجع واواجه الناس دي واحمد كمال بنفسه شجعني على الرجوع (و ده احد اسباب رجوعي)

لو كنت صممت على رأيي ومارجعتش كان فيه ناس هايتهمونى اني ماحترمتش حد واني فاكرة نفسي شيء مهم واني فاكرة المنتدى هايخسر لو عتاب مش موجودة فيه
كان كل الناس اللي طالبوني بالرجوع هايزعلوا من عتاب اللي ماعملتش خاطر لأي حد (و ده سبب تاني خلاني ارجع)

اما اهم سبب خلاني ارجع وهو الصديقة اللي انا مشيت عشان حسيت اختلافي معاها في الرأي بعدها عني . ومشيت عشان احافظ على صداقتنا بره المنتدى . حاولت اكلمها بره المنتدى بعد ما سيبتكم وبرده رفضت كلامي. ولقيت اني مشيت عشان احافظ عليها و ده ماحصلش. (وكان ده اهم سبب من اسباب رجوعي)

اللي اتهموني اني بامثل وان مفيش مشكلة اساسا بيني وبين اى حد يقدروا يسألوا اللي عارفين المشكلة . اسألوا مستكة واسألوا سنو وايت واسألوا احمد كمال . اسألوهم فيه مشكلة والا الموضوع مسرحية وبس
ومش عايزة من مستكة او احمد او سنو غير انهم يقولوا اه فيه مشكلة او لا . وبرده مايحكوش المشكلة لان صاحبتها ماتكلمتش فيها وانا مش هاتكلم فيها احتراما لرغبتها

اعتقد ان فيه ناس قالت انها هاتغيب قبل كده وماحدش اتهمها بالتمثيل. هاتقولوا انهم غابوا فعلا ونفذوا كلامهم
هارد عليكم ردين وهما
اولا انا اتهمونى اني بامثل اتهموني قبل ما ارجع مش بعد ما رجعت . يعني لما قلت هاغيب اتهمونى وبعدها رجعت يبقى كان اولى برده اى حد قبل كده قال هاغيب انكم تتهموه زيي وبعدها تشوفوا هايرجع والا لا

ثانيا انا قلت هاغيب فترة لا يعلمها الا الله . قلت هاغيب لحد ماتبقوا راضيين عن عتاب . تفتكروا اي رضا تاني هادور عليه لما الاقي ميسم ونصار واحمد كمال وهاف وحودة وهيما ومعمد وكتائب الاقصى وهانى وباسم واميرة الرومانسية وفله ومستكة وسنو وايت ونيهال وياسمينا ونوتي ايز بيطالبوني اني ارجع وبيقولوا ان شخصية عتاب عاجباهم
هاستنى ايه تاني !!!!!

كنت اتمنى لو حدعنده نقد لشخصية عتاب كان كتبه وانا كنت ملزمة اني اغير العيب ده في عتاب قبل ما ارجع . لكن لما احمد كمال طلب انكم تقولوا مميزات وعيوب عتاب في نظركم . ماقولتوش غير اني بامثل واني عامله مسرحية

هل ده نقد ام تجريح؟؟؟
هل ده اسلوب النقاش المتحضر اللي بتبحثوا عنه ؟؟؟
هل ادخل اقول فلان منافق او اشتمه بأي طريقه واخرج اقول انا قلت رايي وكل واحد حر؟؟؟

هل لما دخلت المنتدى بعد كلمة اني بامثل وانى عامله مسرحية . هل لما دخلت وقلت اني مسامحة اى حد اساء ليا كان عن ضعف مني!!!!!
احب اعرفكم ان الانسان القوي بس هو اللي يقدر يسامح . هو اللي يتلقى الكلمة ويقول عفا الله عما سلف

كلكم عارفين ان عتاب مش بتسيب حقها وانها ممكن تحارب العمر كله عشانه ومش هاتيأس ابدا . لكن كلكم لاحظتوا من قبل رمضان وانا بقول دعوة للتسامح وانا بقول يارب انا مسامحة اى حد اساء ليا لحد اللحظة دى .
مديت ايدي لكل شخص اساء في حقي وقلت مسامحاك . ومديت ايدي لكل شخص اسأت في حقه وقلت ياريت يسامحنى.

كان غلط منى انى عملت كده؟؟؟ كان لازم ارجع اتخانق وارد كل اساءة؟؟؟ سكت لما قالوا مسرحية وقلت مسامحة . قلت يمكن الموضوع يتقفل . رجعت النهاردة الاقي الكلمة بتتكرر تاني والاقي اعتراض ازاي الموضوع يتحذف عشان الكلمة دي !!!! . ياسبحان اله الاتهام بالكدب والتمثيل دلوقت بقا مش اساءة ومش تجريح !!!! دى حرية رأي!!!!! لا وكمان اتهمونى ان اللي اتقال حقيقة !!!!

حسبي الله ونعم الوكيل .ده اللي هاقوله واحنا في العشر الاواخر من رمضان . ومش بقولها عشان مش مسامحة الناس دي . لأ انا بقولها عشان ربنا هو وكيلي وهو اللي يدافع عني اذا اي كلمة تانية اتقالت عني بعد كده بدون بينة .

اما عن اللي فات فانا مسامحة فيه برده . وان كنت كتبت الموضوع ده فعشان الكل يقرا ويفهم اني مش ساكتة عشان ضعيفه ولا ساكتة عشان دى الحقيقة . انما كنت ساكتة يمكن الامور تهدا والمنتدى يرجع بيحب بعضه زي الاول
واتكلمت لما لقيت الموضوع مازال بيتفتح تاني رغم سكوتي.

اتقوا الله وانا معاكم هاتقي الله في الايام المفترجة دي . واللي حاسس ولو لحظة انه اخطأ يستغفر الله وهو الغفور الرحيم . واللي مش حاسس انه اخطأ برده يستغفر الله وربنا ياخدله حقه باذن الله

استغفر الله الذي لا اله الا هو الحي القيوم واتوب اليه

[=BASSEM=]

السلام عليكم ...


بصي ياعتاب بغض النظر عن الموضوع عشان انا مش فاهم منه اي حاجه ..

بس الي استوعبته ان فيه ناس قالوا ان انتي هتسيبي ابن مصر و دي مسرحيه

بس انا عايز اقولك حاجه احنا في العشر الاواخر من رمضان

و كفايه مشاكل في ابن مصر .. !!

انا شايف الموضوع شخصي نوعا ما يعني انتي و صحابك و انتم كنتم في فتره قريبين من بعض

سامحيهم مش مشكله و الي بيسامح او الطيب مش معناها ان هو ضعيف

بصي الي بيشتغل كتير غلطاته بتبقي كتير

بمعني انتي حاليا بتشاركي في ابن مصر بقوه - ماشا الله - و اكيد بتبقي مركزه و اعصابك فيه

و لو حصلت اي مشكله بتاخديها علي اعصابك بس في وسط كل دا بتخسري حاجات صغيره

حاولي تبقي اهدي من كدا يعني دول صحابك و قالوا كلام انتي مش متقبلاه خلاص

مش لازم الانسان يقف في حياته علي كل كلمه اتقالتله

و بعدين انا بستغرب صراحه هو احنا مورناش حاجه و هنقعد نقطع في بعض

ياجدعان في حروب علي العراق و فلسطين و الله

ربنا يوفقك ياعتاب

و ربنا يعلم ان انا واحد من الناس الي بحترمك جدا و بحترم شخصيتك في ابن مصر

بس انا ساعات ببقي رخم و بتنرفز في ردودي بس مش معني كدا اني مش بحترمك مثلا

انتي شخصيه تجبري الناس علي احترامك و الله

و ان شاء الله ربنا يوفقك و تقدري تاخدي القرار الصح مع اصحابك او الي قال الكلام دا

مش عارف ليه افتكرت دكتور محمود

كان زمانه حللنا المشاكل دي

يلا بكره يرجع ان شاء الله

تحياتي ياعتاب

[Honey1900]

و انا كمان مسامحك يا عتاب زي ما سامحتي اللي اساءو ليكي

[عتاب]

تحياتي لك ياباسم ولرأيك اللي باحترمه جدا
فعلا احنا في العشر الاواخر من رمضان وانا قلت اني مسامحة
وعشان ماحدش يقول اني بعمل شهيدة واني فاكرة نفسي دايما على حق
انا بقول ياريت لو حد زعلان مني يسامحني زى مانا مسامحة لو ليا حق عند حد
كل اللي باتمناه ياريت ماحدش يتهمنى بشيء مالوش ادلة وبدون بينة . وحرية الرأي لها حدود في اننا مانجرحش حد
ويكفي اني اقول كلمة مسرحية واني بامثل دي جرحتنى عشان اللي قالوها يتوقفوا عنها
ولو حتى من باب اننا مانصفش حد بما يكره
نورت الموضوع ياباسم سعيدة جدا برأيك اللي قلته فيا
نصيحة مقبولة من اخ محترم اثبت للجميع ان اختلافنا في يوم ما لم يفسد للود قضية

[عتاب]

المشاركة الأصلية بواسطة honey1900

و انا كمان مسامحك يا عتاب زي ما سامحتي اللي اساءو ليكي

شكرا للاستجابه السريعه
ربنا يعفو عنا جميعا ويسامحنا كلنا باذن الله
ورمضان كريم

[Honey1900]

اهو سامحتك قبل ما تطلبي


كدة مية مية و ربنا يعفو عن الجميع


انت طبختي ايه انهاردة ؟؟؟؟؟؟؟ ( لو مطبختيش قولي فطرتي ايه ؟؟؟ )

[maysam]

عتاب انا حاقول كم كلمة وبس ومختصرة عشان مش بحب الكلام كتير

انتي لما قعدتي مع نفسك ، لاقيتي انك انتي غلطتي لما عملتي اللي عملتيه؟؟؟؟
انا متأكدة انه ردك لا مش غلطانة

ورضا الناس غاية لا تدرك

الأهم الانسان يكون راضي عن نفسه ومش مهم يرضي كل اللي حواليه طالما هو مش بيسيء لهم باي شكل من الاشكال ، وطالما تصرفاته هي تخصه لوحده ومتعلقة فيه فقط ، يبقى هو الاقدر انه يحدد ويعرف اذا كان اللي بيعمله صح ولا لا

وما تنسيش ان الصح والغلط دي تعابير مطاطة

اللي انا بشوفه صح يمكن غيري يلاقيه غلط
واللي بشوفه غلط يمكن غيري يلاقيه عادي

فانا مش مضطرة اني اسمع كل الناس بتقول ايه واعيش على اعصابي بقى ، طالما انا مش بسبب ضرر لأي حد يبقى انا لي حق التصرف

وشيء تاني عمر المسامحة او الاعتذار كان ضعف ، بالعكس دا قمة القوة والثقة بالنفس
فما تسمعيش كلام كل واحد جاي على باله يقول كلمة ويمشي ، الكلام ببلاش الايام دي وما فيش اسهل من ان الناس تطلع حكاوي وكلام

انتي ما عملتيش غلط ، وانا ما حسيت ابدا ان في مسرحيات بالموضوع وكلنا من حقنا نفضفض لم ا نتضايق وبنتعشم يعني من اصحابنا واسرتنا هنا ، انهم يتفهمونا ويستوعبونا ويقدروا اللي بنمر فيه لما نكون في مرحلة صعبة او مشكلة او مجرد متضايقين وخلاص

ما فيش حد هنا ملاك

وما فيش حد عمره ما غلط

صلوا على النبي يا جماعة واعتبروا القضية انتهت

وما فيش اجمل من اننا نقول: سبحانك لا اله الا انت اني كنت من الظالمين

تحياتي

[دقه قلب]

ميسم بجد افضل ختام للموضوع
وياريت يتقفل بجد كفايه كده

[Honey1900]

سبحانك لا اله الا انت اني كنت من الظالمين

[نيهال]

يا ريت
كده كتير قوى



واللهم صلى على سيدنا محمد وعلى اله وصحبه وسلم

[عتاب]

المشاركة الأصلية بواسطة maysam

فما تسمعيش كلام كل واحد جاي على باله يقول كلمة ويمشي ، الكلام ببلاش الايام دي وما فيش اسهل من ان الناس تطلع حكاوي وكلام

انتي ما عملتيش غلط ، وانا ما حسيت ابدا ان في مسرحيات بالموضوع وكلنا من حقنا نفضفض لم ا نتضايق وبنتعشم يعني من اصحابنا واسرتنا هنا ، انهم يتفهمونا ويستوعبونا ويقدروا اللي بنمر فيه لما نكون في مرحلة صعبة او مشكلة او مجرد متضايقين وخلاص

صلوا على النبي يا جماعة واعتبروا القضية انتهت

وما فيش اجمل من اننا نقول: لا اله الا انت سبحانك اني كنت من الظالمين

تحياتي

شكرا لمشاركتك الجميلة يا ميسم
ماتعرفيش رفعت معنوياتي اد ايه دايما كلامك بيديني القوة اني اكمل طريقي
ويكفيني انتي وكل اللي مش معتبرينها مسرحية ولا تمثيل
هانصلي على النبي عليه افضل الصلاة والسلام
واشهدك يارب اني سامحت في حقي
لا اله الا انت سبحانك اني كنت من الظالمين

[عتاب]

المشاركة الأصلية بواسطة دقه قلب

ميسم بجد افضل ختام للموضوع

[بكــار]

قبل ما الموضوع يتقفل ويروح فى طى النسيان لا ن دى طبيعة الانسان انه بينسى
عايز اقول حاجه
لو كل واحد فكر فى نفسه
وحاول يتخلى عن الاخرين
هنكون كلنا فى غابه
ملئيه بالوحوش
كل واحد بيفكر فى نفسه
كل واحد خايف على نفسه
والنهايد هيكون فى تفرق
وهيكون فيه انهيار وفى النهايه مش هيكون فيه حاجه اسمها مجتمع ولا حاجه اسمها اسره ولا حاجه اسمها اخوة
ولا هيكون فيه اى معلم من معالم التكوين الاجتماعى

انا عايز اقول كلمة بسيطه
احنا هنا فى ابن مصر
((شعارنا روح الاسرة الواحده ))
صح ولا مش صح ؟
دا الى بدان عليه !!
ودا الى ساتمرينا عليه
ودا الى هنكمل عليه باذن واحد اح
عتاب انسى الى فات
واى حد قال عنك كلمة مش كويسه فى المشكله دى بالذات نفضيله ايوه بالبلدى كدا
نفضيله لانه ما يستاهلش انك تتكلمى عنه او تعاتبيه (( وعتاب الندل فعلا اجتنابه ))
وفكرى كويس ايه الى بيضايق الناس حاولى تبعدى عنه
دى نصيحتى لاختى الكبيره اتمنى انها تعمل بيها
واخيرا اهلا بيكى فى عالم ابن مصر من جديد
اخت فاضله يحترمها الجميع

[عتاب]

[quote=ملك الرومانسيه]
عتاب انسى الى فات
حاضر

واى حد قال عنك كلمة مش كويسه فى المشكله دى بالذات نفضيله ايوه بالبلدى كدا
نفضيله لانه ما يستاهلش انك تتكلمى عنه او تعاتبيه (( وعتاب الندل فعلا اجتنابه ))

فعلا انا اتعلمت النقطة دي قريب ومن النهاردة هاشتغل منفضة للندل بس

وفكرى كويس ايه الى بيضايق الناس حاولى تبعدى عنه
دى نصيحتى لاختى الكبيره اتمنى انها تعمل بيها
ان شاء الله هابتعد عن اللي بيضايق الناس وليهم حق فيه . انما اللي يتضايق من كلمة حق مايهمنيش زعله لاني هاتحاسب على كل رأي اقوله

واخيرا اهلا بيكى فى عالم ابن مصر من جديد
اخت فاضله يحترمها الجميع
اهلا بيك يا هيما
وميرسي اوي لذوقك واخلاقك العالية
وبلاش اختك الكبيرة دي احسن يفتكروني عجزت ههههههه
دا انا حتى بيبي

[بقـايا قلـب]

أنا طبعا مش عارف ايه المشكله لاني مكنتش موجود في الفتره اللي فاتت دي

بس من خلال ما فهمت احب اضيف تعليق

عتاب مش اي مشكله تحصل بينك وبين اي حد تحاولي تنسحبي
المفروض ان انتي تقفي وتواجهي المشكله دي
شايفه نفسك انتي الصح يبقي تواجههي اي حد لغايه ما تثبتي انك انتي فعلا اللي صح

اكتشفتي انك انتي اللي غلط يبقي مفيش ابلغ من كلمه أسف
وأكيد طبعا مفيش اي مش بيغلط كل ابن ادم خطاء وخير الخطاين التوابين..

علمي نفسك تواجههي مش تهربي .


كلمه الي الاعضاء :ممكن يبقي في اختلاف مع عضو معين ممكن يبقي نقد لرأيه
بس معتقدش ان مش المفروض يبقي في نقد لشخصيته نفسها
النقد البناء هو الذي يمس راي الشخص وليس ذات الشخص نفسه

وللاعضاء اللي بيقولو انها عملت مسرحيه !!
ليه بدل ما ترحبو بيها تاني بتحاولي برضو انكم تبعدوها عن المنتدي
ممكن دي واحده شايفه انها بعد ما حاولت الانسحاب مقدرتش تستغني عنكم يبقي المفروض انكم تستقبلوها بصدر رحب
مش باتهامات وتجريح .

عموما ربنا يارب ميجبش اي مشاكل تاني
انا بجد حبيت المنتدي دا يا جماعه وبجد مش عاوز اشوف فيه اي مشاكل
وعفا الله عما سلف