قهوة المخربشيــ(4)ـــن....!!

[شكولاته]

السلام عليكم ورحمة الله

شكلكوا كده خلصتوا كلام في السؤال السابق وهتبدءو تشربوا من غير ما تدفعوا كله بيتقيد عن الواد صبحي ع النوته ((((((( صبحي ما تنساش نسبتي))))))))


اقولكوا علي حاجه وتقولوا رأيكم طبعا هتقولوا


الفـــــــــــــــــــــــــــــــــلوس

تشتري الاكل ومتشتريش الطعم
تشتري الدوا ومتشتريش الصحه
تشتري الغطا ومتشتريش الدفي
تشتري الناس ومتشتريش حبهم

الفلوس تشتري كل حاجه لكن متشتريش المتعه في اي حاجه الا اذا اراد صاحبها
خلاص يبقي كده الفلوس ملاهاش لزمه
طب ازاي وانا بكلمكم من علي كمبيوتر بفلوس ونت بفلوس وكهربا بفلوس
وعايشه علشان باكل وبشرب وده كله بفلوس
يبقي الفلوس ليها لزمه
احترت بس هي مش كميا وانا عارفه حلها لكن بعد ما اسمع ارائكم
الفلوس ليها لزمة ولا ملهاش ؟؟؟؟؟؟؟؟؟؟

صبحي افندي واحد شاي باللبن وشوف لي ساندوتش واكتب ع النوته مفيش فلوس

[دقه قلب]

السلام عليكم

مساء الورد

صبحى الشاى وحياة ابوك معلقة سكر واحدة


ايه الكلام الحلو ده يا شيكو ولا اقول ايه ما هو الحلو ميقولش غير الحلو

بصى يا ستى

الفلوس طبعا واكيد و 100 100 ليها لزوم ولكن
هل هى اولوية؟
يعنى فى ناس بتحمد ربنا على نعمه الستر الاكل والشرب والبس وكل حاجة بس بحدود وبالمعقول

وفى ناس عايزة اكتر ومش راضيين عن حالهم عايزين كل شىء اكتر
اللى معاه عربية عايز احدث منها
و و و و
العيب مش فى الفلوس
العيب فينا البنى ادمين

يا صبحى صحصح معايا حسابك اهه وكده خالصين

[شكولاته]

دقه ممكن تقولي لي يعني ايه فلوس؟؟
انتي اتكلمتي تمام لكن قولي ليالفلوس بالنسبه لك ايه؟
ولو مرضتي وملقتيش تمن العلاج رد فعلك ايه؟؟
شوفي انا عاوزه اسمع اراء كتير وباستفاضه وانا لسه ليا كلام تاني بعدكم

واحد سحلب ياصبحي

[دقه قلب]

الفلوس بالنسبة لى انى الاقى الاحتاجات اللى تكفينى بحدود رفاهيه معقوله
وان لم تتواجد الرافاهيه ف الحمدلله
الفلوس انى الاقى ثمن العلاج والاكل والشرب ومن الاخر كده الستر يعنى واكتر من كده فضل من عند الله وان لم يتواجد ف الحمدلله

ولى عودة تانى بس انا زعلانة الشاى بتاعى بارد يا صبحى

[عتاب]

سبحان الله يا شيكو موضوع الفلوس واهميتها كنت بفكرفيه امبارح واتناقش فيه مع صاحبتي
دخلت المنتدى لقيتك كتبتي عنه (من القلب للقلب رسول )
الفلوس بالنسبالي وسيله اني اعيش افضل مش غاية في حد ذاتها
عمري ما اتمنيت اكون غنية بس دايما في بالي اعيش عندي اللي يخليني ماحتاجش لحد وبس
عارفة حتى لما اشتغلت وقبضت مابقيتش عارفة اعمل بالفلوس ايه
كل اللي اعرفه اني عايزة ماحتاجش لحد في يوم من الايام
بس ده مايمنعش اهمية الفلوس للاكل والشرب والعلاج وحاجات كتير وعندنا في مصر زي مانتى شايفه شباب كتير مش قادرين يتجوزوا بسبب الماديات
اتمنى يكون معايا فلوس واساعد كل اللي اعرفهم من الشباب ومحتاجين يتجوزوا ومفيش فلوس
بس للاسف مش معايا
وكمان مشبحب يكون معايا فلوس زيادة عن حاجتي
بحس الفلوس بتفقد قيمتها لما بتزيد عن حد معين
ولما بتزيد اكتر اعتقد يعني هاتخليني اشيل همها ازاي احافظ عليها
كلامي متلخبط عشان لسه صاحيةمن النوم
هات الشاي ياعمو صبحي ماينفعش كده عايزة اصحصح عشان اعرف احكي

[شكولاته]

صبحي ازاي تزعله دقه قلب
هات لها احلا شاي سخن نار
دي بتقول كلام جميل جدا
حتي اللي لسه صاحيه من النوم ياريت ياعتاب دايما تكتبي وانتي لسه صاحيه لانك بتبدعي
ربنا يعطيك علشان تقدري تساعدي كل اللي نتي عايزاه
ونبقي في موضوع الفلوس
محدش لي رأي تاني؟

[سارة]

السلاااااااااااامو عليكو

بتتكلمو في ايه .....؟؟ ايه الفلوس ....عيزين رأي ..؟

امممممممم احنا عيشين في زمن صعب يعني كل حاجة بالفلوس علشان كده

لازم الواحد يشتغل علشان يعيش مستور

مش بالضرورة يكون مليونير بس يكون معاه للظروف علشان ميطرش يدين و بعدين يدور من فين

هيسدد يعني على بساط أحمدي أنا معاكو فكل كلمة

واد يا صبحي واحد شاي من غير سكر أصلي عمله ريجيم

[ِAbItOuS]

الفلوووووووس

جننت كتيييير

وزعلت كتيييير

وياما خلت ناس تقتل بعضها

وياما خلت اخوات تفارق حضنها

الدم بئا ميه بسببها

والعيش والملح اصبحوا سكينه وخنجر

كله كله كله

علشان الفلووووس

الفلوس بئا ليها حجمها

لو كبرت عنه اكلت وضيعت ومووووتت

لو صغرت عنه بهدلت وشرددت وموووتت برضوا

لازم يكون ليها حدود في حياتنا

علشان نعرف احنا بتعامل مع ايه وعايزنها ليه

وطريقا فين وهى جايه منين وبعد كل ده

ايه هى ديه الفلوس...

مالها المقايضه كانت زي العسل

اخد حبة ذرة بتلات بيضات

موضوع مثير جداً وشائك ومش أي حد

!! هيعرف بجد يوصف الفلوس !!

لان لو وصلنا للفلوس وعرفنا ايه هى

(((مكنتش لقيت كل اللي حواليك)))

-الكلام متروك مفتوح المعاني-

[أحمدكمال]

الفلوس تجسيد حديث لاختلاف الناس...
زمان اللي كان عنده فرخة احسن من اللي معندهوش
واللي عنده فدان احسن من اللي معندهوش
الموضوع اتطور بقى اللي عنده شوية ورق اسمها "الفلوس"يبقى احسن من اللي معندهوش..!!

دي فطرة البشر...ومش دايما فطرة البشر لازم تتساب على اخارها ..
احيانا بتكون الفطرة اختبار وابتلاء من عندالله عز وجل لقوة ايمانك..
دايما بدي مثال بان الذكور بتميل للاناث وربنا قيد ده وقالك غض بصرك الا عما حلل الله لك ...كابتلاء واختبار..
والاناث بتميل الي اظهار انها اجمل من في الارض والله سبحانه قيد ده وقالها التزمي الحشمة والحجاب...

على نفس المنوال البشر "اناث وذكور "بتميل الي فطرة الا وهي "حب الامتلاك"

الفلوس==حب الامتلاك

مين فين مش نفسه يمتلك كل حاجة!
عن طريق الفلوس هتقدر تحقق ده!
بس فين الاختبار وفين البلاء
انك تجيب الفلوس بطريقة صح وشرعية...وده الطريق اللي اوله شوك واخره جنه...
وفي طريق تاني سهل جدا ده اللي اوله ورد واخره نار...

خلاصة الامر
انه نجى من اتخذ من المال وسيلة لا غاية

[بنت فلسطين]

مسا الخير .. والله اشتقت لهالقهوة

وعندك واحد قهوة مزبوط وواحد تشيز كيك بس خليهم على حساب احمد كمال

[snow white]

السلام عليكم
عم صبح الكاكاو بتاعى الله يخليك

الفـــــــــلوس..؟

اكيد الفلوس مهمه بالقدر اللى يكفينا عشان نعيش حياه كريمه من غير ما نحتاج لحد بمعنى ان الواحد يقدر يكفى نفسه من أكل وشرب وعلاج

وميمنعش وجود بعض الرفاهيه اذا أمكن

لكن وجود الفلوس بالقدر اللى يلغى راحه البال ده بقى هو اللى مرفوض

[سارة]

مساء الخير

يا صبحي قهوة لو سمحت....

ايه ده لس بتحكو في نفس الموضوع

خليني بقه أشوف أخبار الدنيا و أنا بشرب قهوتي

[عتاب]

طيب وانا كمان عاوزة حاجة ساقعه لان الجو حر النهاردة

والحصص كانت كتير والعيال تعبوني (كلام مدرسين ههههه)

[أحمدكمال]

انتوا قلبتوها مشاريب بس ولا ايه يا جماعة!!

طيب المشاريب على حسابي كلها علشان انتم وحشتوني ....

[بنت فلسطين]

المشاركة الأصلية بواسطة أحمدكمال

انتوا قلبتوها مشاريب بس ولا ايه يا جماعة!!

طيب المشاريب على حسابي كلها علشان انتم وحشتوني ....

الله الله .. دة أحمد باشا هنا .. يا أهلا يا اهلا
انت فين يا باشا .. بقالك زمان يعني غايب


كل دة جدول مواعيدك مليان


لا بجد أهلا بيك يا حمد نورتنا من تاني .. وطبعا المشاريب عليك أمال هتهرب مثلا