قهوة المخربشيــ(4)ـــن....!!

[ابو ماجد]

اهلا يا استاذ احمد . الجو اليوم عندنا حقيقي جو رائع وجو غائم . ولا اورع

كيف الحال وةالله يا احمد انا مش عارف انت بتجيب المواضيع الجميله منين


انا دايما احب اعارض واخالف الرأي .. وابحث عن ما ياجج المواضيع نقاشا ويفتح افاق اوسع للحوار ..

عودا على الموضوع والظاهره اللي انتشرت كل واحد يقول رأيه في الدين ويفتي كل من يحفظ كلمتين اوحديثين...

مش ظاهره جديده ..اقول لكم ليه

طبعا .. مشكلتنا اننا نعرف كل حاجه .. واي اوحد يفهم كلمه في اي موضوع يعمل نفسه ابو العريف لكل المواضيع . يعني يعرف يركب لمبه يعمل نفسه هو كهربائي والباشا مهندس ويكلم في الطاقه النوويه .. وال.

واي واحد يفهم في اليساسه يعمل نفسه ابو السياسيه وانو ما في احد يفهم الا هــو .. الوحيد اللي يفهم.. والناس الباقيه تصرفاتها مكشوفه امامه واصلا هي غلط وهو فاهم اهدافهم ..

من هذا التسلسل .. ومن هذا المنطلق .. وهذا الفكر .. يعني صار الكل يمارس ويحاكي نفس الافكار ... وان كان الفارق بيهما كبير . لكن المجنون لا يعرف حدا للسكوت

عايز اسال سؤال . للاخوه الي القداما

الناس اللي جالسه هنااااااااك . منين انتو تعرفوهم .. ولا ايه ..يعني احسن نكون ازعجناهم وحنا بنكلم.. ونرفع اصواتنا فوق صوت الشيشه .

[yasovinas]

السلام عليكم ورحمة الله وبركاته يا شباب
ممكن اقعد في قهوتكم الجميله دي
بس الله يخليك يا عم صبحي شوف لي مكان بعيد عن الشيشه والدخان لاني من يوم ما بطلت تدخين مش باقدر على ريحة الدخان اطلاقاً

نيجي بقى لموضوع الفتاوي والآراء
الاسبوع الماضي كانت تسيطر على راسي فكرة موضوع كنت عايز اسميه (نعمة ونقمه) وكان يدور حول ان كل شيء في العالم يحمل شقين او يحمل اتجاهين ان يكون نعمة على صاحبه او نقمه عليه
من ضمن هذه الاشياء التي كتبتها في مدوناتي الخاصة ولم انقلها الى اي منتدى حتى تاريخه هي النت والتلفاز فكل منهما قد يكون نعمه علينا لما له من تاثير على الثقافه وانتشار الوعي ومعرفه العالم من حولنا الا انه قد يتحول الى نقمه لانتشار الافكار الهدامه والثقافه المنقوصه والتي الينا من كل مكان ومن كل شخص ولا نعرف من هو وما حقيقة تعليمه وثقافته فنرى برامج تاتينا بشيوخ ليس لهم من المشيخه سوى الجبه والقفطان اما ما يقولونه فالله وحده اعلم بما يعني او بحقيقته
التلفاز والنت اصبحوا مرجع اساسي للعديد من الشباب في النواحي الدينيه فتجد الواحد يذهب الى جوجل ويبحث عن تفسير آيه في موقع ما دون ان يبحث او يعرف من صاحب هذا الموقع
وحتى اذا قرأ ان الموقع مثلا تحت اشراف الازهر فما مدى صحة هذه الكلمه وما مدى صحة هذا الاشراف
الموضوع صعب وليس من السهل ان نحدد له حلول غير الرجوع الى امهات الكتب او الى احاديث اهل الثقة من علماء ومشايخ الوقت الحاضر

يا خبر انا قعدت ونسيت اطلب
واحد قهوة زيادة كبايه يا عم صبحي الله يخليلك عيالك


سؤال ورد على خاطري
هل ادارة دفة الحيث او الردود هي محددة بالعزيز "احمد كمال " ام انه من الممكن ان يطرح اي فرد من مرتادي المقهى اي موضوع ؟؟

معلش انا جديد هنا والسؤال ما حورومش يعني

[الورد الجوري]

اهلا بالمواضيع ..
هقول رايييييي بقى .. بدل الفرجه اللي كنت هاعملها و كل واحد بيسرد الذكريات
عم صبحيييييييييي عصير المانجه بليز

بص يا احمد .. الموضوع ده فعلا مهم جدا جدا .. لان دي مش ظاهره غريبه و بس دي بتوصل لاعلى مستوى من النقاشات ..
و للعلم الفئه دي منتشره بشكل كبير و خطرها بشع بجد .. لانها مش بس بتغلط .. لأ و بتقود غيرها للخطأ كمان ..

الايه الكريمه اللي انت ذكرتها كانت بتقول ان الرسول صلى الله عليه و سلم مذكر و ليس مسيطر .. ده و هو رسول و معصوم من الخطأ و لا تشوبه شائبه .. الفئه بقى اللي بنتكلم عنها دي مسيطره بكل الطرق و لا تكتفي بالمواضيع الدينيه فقط .. انا شفت الفئه دي في الكليه و بشكل خطير فعلا .. و اعتقد ان العيب في الشخصيات لان انا بحس ان تركيبتهم كده .. حب امتلاك و سيطره .. و العقل عندهم مكرس للسيطره و بس .. ده غير انهم قافلين عنيهم و عقولهم الا على آراءهم .. و الناس قدامهم صنفين الاول حلو و ممتاز و ده لانه صنف منقاد و ماشي تحت لواءهم و في نظر المسيطرين دول ان الصنف الاول ده هو اللي ربنا بيحبه و هداه الى اتباعهم .. الصنف التاني هم المغضوب عليهم وده بس لانهم عارضوهم في الراي او مسمعوش الكلام و منصاعوش لآراءهم و دول طبعا بيقام عليهم الحد و ممكن يوصلو الى اتهامهم بقله الدين او الكفر

النوع ده من الناس فعلا زي مانت يا احمد بتقول .. مش كلهم غلط .. لكم الاسلوب ممكن يكون سيء .. والطريقة غلط .. و المدخل اللي بيدخلوه للشخص كان من ناحيه غير محببه .. او ممكن يكونو مش فاهمين طبيعه الشخص اللي قدامهم

نيجي بقى للسؤال اللي هو احنا اتباع الرسول مفروض نعمل ايه ؟

كلنا عارفين ان الرسول صلى الله عليه و سلم لم ينشر الاسلام الا بالاقتناع و بالدعوة اللينه و منشروش بحد السيف زي مالمستشرقين كانوا بيقولو ا عنه صلى الله عليه و سلم... و الرسول كمان كان محدد لينا احنا اتباعه نعمل ايه و موجهنا التوجيه السليم لما قال صلى الله عليه و سلم " بشرو و لا تنفروا و يسروا و لا تعسروا "

هل تعرضنا لموقف زي ده قبل كده؟

اتعرضت لكتير جدا بصراحه و خاصة في الكليه و الواحد فعلا اتخنق .. الله المستعان

ياترى لو حد حاول يجبرك على فعل الخير؟ هتقبل؟

حقيقة شخصيتي لا تقبل الاجبار ..و اعتقد انه لو تعرضت للاجبار على فعل عمل خير ممكن جدا معملوش الا لو حصل و اقتنعت و تغاضيت عن اسلوب الاجبار اللي شايفاه من الشخصيات دي

على فكره السؤال ده بالذات ممتاز .. لانه يبين الخطر الكبير للفئه دي
اصل الناس
إما
هتعمل الخير اللي اجبرت عليه من قبل هذه الفئه و في الحاله دي فقدوا ثواب الخير ده لان الواحد كان مستكره و مجبر عليه " و كلنا عارفين الحديث بما معناه انه رفع عن امتي الخطأ و النسيان و ما استكرهوا عليه"

او
هتعمل الخير ده و هي مش مقتنعه بس بتخلص من الموقف اللي اتحطت فيه و في الحاله دي بقى رياء و بردو ثوابه ضاع

او
هتعند جدا و هترفض الانصياع لهذا الكلام و بالتالي هتكون الفئه المسيطره سحبتهم للعند و طبعا شويه و هيتهموهم بالكفر لان العند يورث الكفر مصداقا لقول الرسول صلى الله عليه و سلم

نيجي بقى للقصه الخياليه
انا لو مكان الاداره هشيل الشخص ده من موقعه و كمان ممكن مستاناش لما يسيطر كده قوي .. انا هشيله من اول اما الاحظ عليه الصفات دي
لان انا كإداره و مسؤوله عن موقع لازم اكون قد كلمتي .. بمعنى اني مقولش انه منتدايا او موقعي ده منبر حر للنقاشات و للآراء المختلفه و في نفس الوقت احط للناس شخص بالصفات دي و اديله صلاحيه عامه و كمان اسيبه يتحكم في الناس

سوري بجد بس مش عارفه اناقش القصه الخياليه دي من ناحيه انه معاه حق
لان مفيش حق في الدنيا دي كلها يكفل لشخص حريه السيطره و التحكم بالاخرين و لا حتى طبعا الدين مديله الصلاحيه دي لانه لو كان اصلا فيه صلاحيه بالسيطره على الناس كان ربنا منحها لسيد الخلق صلى الله عليه و سلم

طبعا طولت جدا .. بس هقول ايه .. معلش هي حكاوي القهاوي بتكون كتيره كده

عم صبحيييييي شكرا ع المانجه و المره الجايه يكون العصير في الفريزر من بدري اصلي بحبه متلج حتى لو كنا في البرد

[أحمدكمال]

ابو ماجد

لسه قاري كلامك بخصوص دخولك ابن مصر..منور ابن مصر
وياريت تكون عرفت سر الخلطة بتاعتنا


yasovinas

السير الموضوع على القهوة ارتجالي طبعا ...وعم صبحي الوحيد اللي ممكن يقول فركش...عم صبحي ما بين قهوة المخربشين 3 و 4 انضم للحزب الوطني وبقى من رؤوس الفساد قصدي من معالم مصر الحرة....بس ياريت ندي لكل موضوع حقه في الحوار مش اكتر
القهوة منورة يافندم

الورد الجوري
اولا فريزر ايه وبتاع ايه يا جماعة احنا قهوة بلدي يعني المانجة هنوصى عليها الشجرة علشان تستوي بسرعة ونوصي عليها المزارعين علشان يقطفوها بسرعة وسواق النقل علشان يجبها بسرعة وبعدين في السريع كده اي عصر ونقدمهالكم بالهنا والشفا
عجبني رايكم يا فندم...وعجبني صراحتكم في الرد على الاسئلة

[yasovinas]

المشاركة الأصلية بواسطة أحمدكمال

yasovinas

السير الموضوع على القهوة ارتجالي طبعا ...وعم صبحي الوحيد اللي ممكن يقول فركش...عم صبحي ما بين قهوة المخربشين 3 و 4 انضم للحزب الوطني وبقى من رؤوس الفساد قصدي من معالم مصر الحرة....بس ياريت ندي لكل موضوع حقه في الحوار مش اكتر
القهوة منورة يافندم

باه اخيراً في حد رد على اي كلام بقوله هنا


تصدقوا انا كنت فاكر ان انا الوحيد اللي ؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ابن مصر

[الورد الجوري]

المشاركة الأصلية بواسطة أحمدكمال

الورد الجوري
اولا فريزر ايه وبتاع ايه يا جماعة احنا قهوة بلدي يعني المانجة هنوصى عليها الشجرة علشان تستوي بسرعة ونوصي عليها المزارعين علشان يقطفوها بسرعة وسواق النقل علشان يجبها بسرعة وبعدين في السريع كده اي عصر ونقدمهالكم بالهنا والشفا
عجبني رايكم يا فندم...وعجبني صراحتكم في الرد على الاسئلة

ايه ده يا احمد
كله بسرعه بسرعه .. ايه العمل لما الراجل يعمل حادثه و بعدين تجيلي المانجايه مكسوره؟؟
و بعدين انا قلت في الفريزر .. يبقى الكلام يتسمع " هيه دي السيطره "

وبعدين حتى العصر هيكون في السريع .. مفيش غسيل الاول ؟؟ .. ناويين تسمموني ؟؟
لاااااااااااا ده بعدكم مش هتخلصوا مني بالسهوله دي

ميرسي خالص ده من ذوقك يا احمد بس هو ردي ييجي ايه في ردودك السديده دائما ياريس

[أحمدكمال]

المشاركة الأصلية بواسطة yasovinas

باه اخيراً في حد رد على اي كلام بقوله هنا


تصدقوا انا كنت فاكر ان انا الوحيد اللي ؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ابن مصر

متخفش يا فندم احنا معاك بس من بعيد لبعيد

[أحمدكمال]

ميرسي خالص ده من ذوقك يا احمد بس هو ردي ييجي ايه في ردودك السديده دائما ياريس

دي سياسة دلع الادارة

[الورد الجوري]

المشاركة الأصلية بواسطة أحمدكمال

دي سياسة دلع الادارة

[نيهال]

ايه يا زعيم .كل ده انا عملته فى عم صبحى باشا
ده فنجان كابتشينوا
مليشى دعوه بقى
انا عايزه كابتشينو.....يا اما شاى بالمرمريه
يللا انا مش عايزه اتعبه بس
وتكون المرمريه من رفح
يللا بقى


هههههههههههههه


نيجى بقى للمهم
اولا فعلا للاسف الفئه اللى انت اشرت اليها منتشره بصوره رهيبه وللاسف بتعصبها وتشددها بتمثل صوره مهينه وسيئه للاسلام


بالنسبه لدور اتباع الرسول......
هوه اتباع سنته يعنى فيه عندنا سنن نعلمها جيدا ولا يعنى تركها كفر ..ولكنه شكر لنعم الله علينا سبحانه وتعالى
انا مش اعرف فى الدين كتير
لكن انا بسمع اراء كتير ولعلماء متباينين كثير ولكن فى النهايه انا عندى عقل اميز بيه انا اتبع مين.او ايهم كلامه موثق


للاسف تعرضت لموقف زى كده من قبل وللاسف فاقد الشئ لا يعطيه ابدا
يعنى مثلا عمرى ما حاسمع كلام والدى بعدم التدخين اذا رايته يدخن ..مهى المشكله كله حاسب نفسه فقيه وهوه افضل من الغير ولم ارى الا القليلين ممن هم ملتزمين حق الاتزام بالتواضع
للاسف
وده كان سبب فى الارهاب الفكرى والدينى اللى اصاب شباب كتير مش فاهم حاجات كتير
وكمان للاسف مفيشى رقابه على الشرائط اللى بتنزل السوق واللى ممكن اى حد يجيبها فاى حد مش عارف اى حاجه حياخد الكلام مطلق وثقه وطبعا قول على اللى بيسمع السلام



لو حد اجبرنى على فعل الخير .......
اولا الاجبار مش بينفع معايا للاسف ولو نفع بكون فى حاله متدمره نفسيا
وعموما ده بيعتمد على الانسان اللى بيجبرنى على الموضوع يعنى لو انا واثقه فيه ثقه عمياء يعنى عارفه انه بيقوللى الخير بجد ومش رياء امام الناس او امام الله.فطبعا حاسمع كلامه وحاقتنع بعد فتره ......وجربته كتير مع والدى رحمه الله


انما لو الانسان اللى بيجبرنى على الموضوع ده انا مش واثقه فيه
فللاسف مش حيقدر انه يجبرنى لو اتهدت السما على الارض وبالتالى انا مذنبه لانى عندت والعند من الشيطان( اعوذ بالله من الشيطان الرجيم)


وصعب جدا انى اعمل حاجه مش مقتنعه بيها .......ولو عملتها مجبره بعد ذللك حيكون فيه جزء منى ولو بسيط بيايدها ومش عايز يعترف ( تسميها كرامه ....مش عارفه ايه بصراحه)





ولو شفت واحد بيذلك بحاجة يمتلكها علشان تنفذ وجهة نظره ؟هتعمل ايه؟؟
المذله لله وحده
على رقبتى كده زى ما بيقولوا
مستحيل اقبل انى اكون امعه او اكون منقاده منغير ما يكون لى راى
وعموما ده بيعتمد على الشخص اللى بيتكلم واللى بينصح او اللى بيوجه.يعنى لو انا بحبه لدرجه انى انفذ اللى هوه عايزه .]بقى اكيد انا كمان عايزه اعمل كده......انما لو انا مش بحترم ها الانسان واسلوبه مستفز وغير ادمى وحاسس ان الناس دى اقل منه
والله لو كان على رقبتى مش حيحصل



تعالو نألف سوا قصة خيالية....ان احنا معانا شخص واحد في عالم ابن مصر قادر على انه يطور المنتدى والشخص ده كان معاه باسوردات كل حاجة بصفة موقعه ده...الشخص ده لقى حاجة مخالفة لافكاره...
قام قفل الموقع خالص...وبدأ يملي اشتراطاته على الادارة ؟
تعالو نناقش الموضوع من زاويتين مختلفتين
1) انه فعلا معاه حق
2)انه لا يمتلك الحق
هل اللي عمله ده لصالح دينه واسلامه ولا لاء؟
ولو انت مكان الادارة تعمل ايه؟

اوكى وادينا معاك
سورى مش معاه الحق مطلقا ..لاننا بشر وللاسف بنختلف
لكن الاختلاف ليس مطلق
يعنى فيه حدود بتقيده


وبالنسبه لموضوع اذا كان بيفيد الاسلام والدين .ده لو الموقع فيه مخالفات جسيمه يعنى مش موقع محترم اصلا.بصراحه يبقى الافضل انه يتحرق اصلا

ولو انا مكان الاداره
لو موقعى محترم .........حاطرده ...وليكون عبره لمن يعتبر
ولو الموقع .........يبقى سورىه حاحرقه اصلا ( دى انا مش لاقيه ليها لازمه ومش عارفه انا حطيتها ليه )
بس هوه ده اللى جه فى باللى



ايه يا اونكل صبحى يعنى لا كابتشينو ولا شاى بالمرمريه


لا
انا زعلانه

[يوسف المصرى]

المشاركة الأصلية بواسطة نبض القلب

قبل اي شيء
احب ارحب باخي وزميلي يوسف المصري

الله يازمااااان
فاكر يايوسف
كنت بالنسبة لي معضلة في التفكير
وكنت بشوف انه صعب احد يفهمك
ولكن مع التواصل معك وقراءة افكارك اصبحت افهمك

انت من الذين يعيشون في الزمن الصعب

احلى تحية لك ولكل حروفك هنا

.

ياااااااااااه .... نبض القلب
فعلاً والله زمااان
فاكر طبعاً هو انا اقدر انسى
بس زي ما قلت قبل كده دوامة الحياه بتخدنا من أحبابنا

[يوسف المصرى]

المشاركة الأصلية بواسطة maysam

اولا مبروك الافتتاح الجديد للقهوة

انا طول عمري نفسي اقعد عالقهوة اللي بنشوفها بالمسلسلات عارفة انها امنية صعب تتحقق بس اهو الامنية جت لحد عندي

مش صعبة خالص يا ميسم انوى بس وتعالى مصر و خلى الباقى عليا

[عتاب]

[quote=أحمدكمال]
كلامي النهاردة عن ظاهرة انتشرت في مجتمعنا بشكل ملحوظ..وهو ان كل واحد عرف كلمتنين في الدين عين نفسه حكما على الناس ...وعين نفسه المحلل والمحرم لاي موقف...

ياريت يكون الكلام ده في الكبائر لاء ده بيجي للحاجات اللي عليها اختلاف ويتصدر ...
ويرفض الحوار بدعوى انه ده اللي قاله الله وقاله الرسول صلى الله عليه والسلم.."من منظوره طبعا"..

فعلا الشخصيات دي موجود منها كتير وماننساش ان التطرف الديني مازال موجود وان كان نسبته بتختلف من فترة للتانية
بس هو فيه نقطة دلوقت اذا كان الشخص بالفعل جاب حديث او آية قرآنية واضحة وصريحة وقال ان ده الصح هل وقتها بنسمع كلامه؟؟
للاسف اوقات بنرفض شيء لمجرد العند . ازاي فلان ينصحني (حتى لو جاب ادلة على كلامه) يبقى انا حرة ربنا هايحاسبني
طيب ليه ناخدها من وجهة نظر انه عايز يبين انه احسسنا مننا ليه مانسمعش منه ونلغي حتة الكرامة دي لان ماعتقدش لما نقابل ربنا هانقوله احنا مانفذناش كلامك لان فلان ده كلمنا باسلوب مش كويس او عايز يطلع احسن مننا
عذر اقبح من ذنب لان طبيعي جدا ان فيه ناس احسن مننا وناس اقل مننا . وعلينا اننا نحاول نكون احسن واحسن ونتعلم الشيء الصح من اي انسان يمر في حياتنا مهما كان سيء

هل تعرضنا لموقف زي ده قبل كده؟

كتييييييييييييييييييييييييييييييييييير لان في عصرنا ده الاختلافات كترت اوي ومفيش في ايدينا شيء غير اننا نتمسك اكتر بالقران والحديث ومالناش دعوة بالناس اللي بتفسر بمزاجها لصالحها وبس
وللاسف لو اتمسكت بوجهة نظري ابقى عنيدة ودماغي ناشفه مع انهم برده متمسكين بوجهة نظرهم وماحدش اتهمهم بالعند (سبحان الله)

ياترى لو حد حاول يجبرك على فعل الخير؟ هتقبل؟

اولا انا هاعمل الخير لو شايفاه خير حتى لو اللي نصحني بيه عدو مش صديق وبعدين اذا كنت انا عارفة انه خير يبقى ليه استنى حد يجبرني عليه . مانا انفذه من غير اجبار
اصل الدين مفيش فيه عند لاني مش هاضر الا نفسي لو عندت
يعني لما حد يقولي صلي وانا اعند وماصليش ياترى هو هايتضر في شيء؟؟؟ لا طبعا انا باضر نفسي وهو سواء انا نفذت او لا اخد ثواب . الكرامة لو بالشكل ده تبقى غباء . لان الانسان الغبي هو اللي يشرب السم لمجرد ان حد نصحه وقاله ماتشربش

تعالو نألف سوا قصة خيالية....ان احنا معانا شخص واحد في عالم ابن مصر قادر على انه يطور المنتدى والشخص ده كان معاه باسوردات كل حاجة بصفة موقعه ده...الشخص ده لقى حاجة مخالفة لافكاره...
قام قفل الموقع خالص...وبدأ يملي اشتراطاته على الادارة ؟
تعالو نناقش الموضوع من زاويتين مختلفتين
1) انه فعلا معاه حق

اعتقد لو معاه حق كان هايتكلم وينصح مش انه هاياخد قرار لوحده بس الانسان اللي بياخد قرارات فردية ده شخص بيكون حاسس انه مش معاه حق وماحدش هايوافقه عل رأيه

2)انه لا يمتلك الحق

يخبط دماغه في الحيط وبعدين يقفل المنتدى زي ماهو عايز لان المنتدى مش اسم المنتدى بالاشخاص اللي فيه واحنا قادرين نعمل منتدى زيه واحسن

هل اللي عمله ده لصالح دينه واسلامه ولا لاء؟

ده يتوقف على نوعية الحاجات اللي شافها المفروض تتغير

ولو انت مكان الادارة تعمل ايه؟

زي ما قلت المنتدى مش اسم المنتدى اشخاص وافضل لينا نسيبله المكان ونبدأ في مكان تاني كلنا ويبقى يفرض رأيه على نفسه بقا هههه

[أحمدكمال]

خلي بالك يا عتاب اننا بشر..
كلامك نظريا صح مية في المية..
لكن احنا بشر علشان كده ربنا قال "لست عليهم بمسيطر" وقال بما معناه لست عليهم بجبار وقال" ادعو الي سبيل ربك بالحكمة والموعظة الحسنة" وقال"لو كنت فظا غليظ القلب لانفضوا من حولك"...
انت ممكن تديني شيكولاته...بس الغلاف بشع اخاف اكلها....
وممكن تديني نفس الشيكولاته دي بش بغلاف كويس يشجعني ان كل مرة اطلبها تاني.....
في الاخر احنا بشر...

بس خلي بالك ان احنا دلوقتي بنكلم في موضوع تاني غير النصيحة...
احنا بنكلم في اذلال الناس علشان يتبعوا الحق ...
اذلالهم معنويا او ماديا زي قصتنا...
وانا قصدت اضرب مثل بابن مصر علشان محدش يقولي الموقع ده بيقدم ايه