قهوة المخربشيــ(4)ـــن....!!

[الورد الجوري]

المشاركة الأصلية بواسطة النسر الذهبى

ولو انت مكان الادارة تعمل ايه؟

بجد بجد هولع فيه

حلوة الجمله دي قوي
طبعا ردك جميل
بس الجمله دي عجبتني

[yasovinas]

النهارده الجمعه ربنا يبارك لكم فيها ويرزقكم ساعه الرضا فيها يارب

• القهوه اليوم فاضيه ليه يا عم صبحي
• معلش يا استاذ ياسو ما انت عارف الجمعه وكل الناس راجعه من الصلاة على السوق يجيبو مشتريات البيت
• ايه يجيبو ايه ؟؟؟؟؟؟

هو دا موضوع النقاش النهارده يا شباب {وطبعاً يا شابات} هل تقوم بشراء مستلزمات البيت "سواء لوالدتك او لزوجتك؟؟؟"
والسؤال الاهم ودا برضه للشباب وعايزين راي البنات {هل تلاقي استحسان من بنات حوا لما احضرته ؟؟}

بصراحه وبدون مجامله فانا شخصياً قررت وبعد 15 سنه جواز وقبلهم 15 سنه مع خالتكم ام ياسو ان اقلع عن هذه المهمه واعلنت اعتزالي ومنتظر تنظيم مباراة اعتزال في سوق زنانيري او سوق راتب بالاسكندرية مع اول اجازة


تذهب وتلف وتدور وتتحمل الزحام وتساوم وتفضل تنقي وتفعص في ام الحاجه وبعد دا كله ترجع البيت وانت مرفوع الراس مزهوا بما انجزت منانتصارات وطوال الطريق ترتب القصص التي سوف تقصها للمدام والاولاد عن صولاتك وجولاتك مع الباعه (وطبعاً مع شوية تحابيش )
وما ان تدخل يا صديقي الى المنزل تبدأ المأساه
ايه دا خوخ صغير
وليه الطماطم مفعصه كده انا عايزاها للسلطة ولو مش مفعصه تبقى ليه جامده انا عايزاها للطبيخ
وجبت البطيخه بكام ؟؟ ضحكوا عليك دا انا امبارح جايباها باقل من ذلك بمشعارف قد ايه

بعد طول عناء قررت ان اتحمل انا الفرق واعلن اسعار اقل مما اشتري به !! حتى انال الرضا السامي واشعر بالفخر والاعتزاز امام الاولاد
ولكن هيهات هيهات يا ابن ادم ان ترتاح وتستريح مع نصفك الـ!!!!!!!!!! حلو

فما رايكم ادام الله فضلكم


آه قبل ما انسى هات لي واحد قهوة زيادة كوباية يا عم صبحي وحساب الشباب كووولهم على حسابي النهارده


البنات لاء

[أحمدكمال]

ليه بس كده يا ياسو
جبت على الجرح
متفكرنيش من اللي بيحصلي من امي واخواتي
مش عارف ليه عايزين الواحد يفقد الثقة في نفسه
بص ايدي في ايدك ووننظم حملة ضد الستات شعارها

اللي مش عاجبه ينزل يجيب بنفسه

[النسر الذهبى]

انا بقى نادرا لما بجيب طلبات البيت لما تكون والدتى ربنا يخليهالى تعبانه شويه ولا حاجة
بس فى الكام مرة الى جيبت فيهم
هى كانت بتعيب على البطاطس مثلا او الطماطم احيانا
بس مش كل مرة يعنى
وبالذات لو كانت طالمة الطماطم حاجة اسمها بلحى
وانا معرفش مين بلحى دة
فبجيب طماطم وخلاص
وحاليا بطلت اجيب حاجة
هى بتجيب حاجتها وهى طالعة من تحت وخلاص على كدة

[مستكة]

هو دا موضوع النقاش النهارده يا شباب {وطبعاً يا شابات} هل تقوم بشراء مستلزمات البيت "سواء لوالدتك او لزوجتك؟؟؟"
والسؤال الاهم ودا برضه للشباب وعايزين راي البنات {هل تلاقي استحسان من بنات حوا لما احضرته ؟؟}

ياه ايه المواضيع المحرجه دي بس


ليه الفضايح


يلا مادمتم بتجيبوا اتشجع واقول باه

في الحقيقه انا مسؤلة قسم المشتروات في البيت

اي حاجه تخص المطبخ انا اللي بجيبها

وتوليت هذا المنصب بمجرد ما اخدت اعفاء دراسي واصبحت علي المعاش

ماما قالتلي استلمي

ومنكرش في الحقيقه اني شردتلها الميزانيه تماما ... لكن ده في الاول بس

وكنت كل مااجيب حاجه تثني عليها وتقولي برافو حتي لو كانت هترميها

جر رجل في الاول عشان مبعهاش واقدم استقالتي في اي وقت

وللاسف ماخدتش بالي الا بعد فوات الاوان

بعد مافهمت فعلا وعرفت الفرق بين البطاطس والقلقاس

وان البطيخ فاكه مش خضره ... وان السمك اشتريه من السماك مش من الفرارجي

واصبح معايا سر المهنه معدتش اقدر اتراجع خلاص ماليش حجه باه لو قلت مش هجيب

هتقلي ما انتي بتعرفي

ومن ساعتها باه بدا النقد

- انتي الناس بتضحك عليكي ... انتي مش بتجيبي حاجه كويسه

- ده منظر طماطم .. ده شكل بدنجان !!

- دي اسعار تشتري بيها !!!

ياماما ده افضل الموجود ودي اسعار السوق هو انتي تعرفي الاسعار منين بتشتري !!

- لا لا انتي اللي مبتعرفيش تشتري وهما بيضحكوا عليكي

ويوم سعدي باه اما تجيب هي حاجه باه

امسكها اسبوع كل يوم افكرها باللي اشترته واسعاره واللي جري فيه

عشان كده ان شاء الله ناويه اسيب الموضوع ده علي زوج المستقبل

يلا الواحد يلاقي حد ينقده






وعندك واحد عصير لمون بالنعناع يا صبحي اروق بيه


وعلي حسابي

انا واحده بقيت راسماليه وشاحنه موبايلي بميه

[الورد الجوري]

مساء الخير يا جماعه

ازيك يا عم صبحي .. انا تعبانه النهارده و مش هينفع اشرب العصير بتاعي المثلج
بليز هاتلي سحلب بس يكون فيه جوز هند و عين جمل بس .. و اوعه يتحط فيه سمسم لاني مش بحبه

الموضوع المطروح ده حلو .. ميرسي يا ياسو



هل تقوم بشراء مستلزمات البيت "سواء لوالدتك او لزوجتك؟؟؟"

صراحة انا مش بنزل اجيب انا الحاجه .. و اذا نزلت لازم مرافق لان انا انقي الاشياء ممتاز جدا لكن شيل اكياس بقى متلقوش .. اخيب شخصيه تشيل شيء في ايدها في العالم كله " بلا فخر طبعا "



والسؤال الاهم ودا برضه للشباب وعايزين راي البنات {هل تلاقي استحسان من بنات حوا لما احضرته ؟؟}

حقيقه بقى و بمنتهى الصراحه .. انتو الشباب متنفعوش في شرا الطلبات .. بدون زعل يا شباب .. اصل انا بشوف انه ليكم طرق غريبه .. الواحد منكم يدخل اول او اقرب سوق موجود جنبه " دايما لما انزل السوق الاقي الرجاله اغلبهم عند اول محل " و بعدين يشوف اول خضري فين و يروح عليه و بعدين لو هيشتري خيار و الخيار مرصوص في قفصين هيشوف القفص الاول بس وميكلفش نفسه يبص التاني افضل منه و لا لأ و بعدين يقف قدام الخضري .. ياريس و لا يا حاج و لايا ابني " على حسب الشخص اللي قدامه " وايديه في جيبه .. ويقول : الشيء ده بكام ؟ يقوم الراجل يقول مثلا 10 قروش يابيه .. يردو بقى الشباب كالآتي ..
اما
يقول لا ياراجل ميصحش ب 10 قروش ايه .. اوزن اوزن 2 كيلو و الحساب يجمع و في الاخر ينسى يفاصل و طبعا لو تلاحظوا انه نسي اصلا ينقي الحاجه

او
يقول ماشي و يرضى بالسعراللي قدامه و يقوله اوزنلي كذا
و بعدين يحاسب زي الشاطر و بردو مينقيش

او
يقوله لأ .. 10 مين .. دي ب5 قروش بس " قال ايه هيبدأ بقسمة وسط للراجل و بعدين يبقى يرضيه و يعلي شويه السعر " وفعلا البائع يرسي السعر على 8 مثلا .. و يرد هو بمنتهى الفخر هاتلي كيس عشان انقي ..
و تبدأ المأساه بقى اللي متفرقش عن الحالات السابقه .. لان بقول هات خيار صغير .. الاقي الخيار الكبير هو اللي جاي .. اقول هاعمل محشي بطاطس الاقي البطاطس اللي جيالي بيضاوية الشكل و طويله .. اقول هاعمل بطاطس مقليه يجيبلي بطاطس المحشي

وعايزة اقول انه في كل الحالات دي اللي فاتت بنلاقي الحلويات بقى في الكيس يا ماشاء الله انعم و اكرم .. افتح الكيس وقابل بقى
المفعص و البايظ و الطري و المعفن ...... فيه كتير بس ان الله حليم ستار

والجزء التاني بقى من اللي بيحصل هو وجع الراس التابع لنزول الشباب السوق .. هب كل واحد مستعد و مجهز قصص البطوله العالميه و الميداليات الذهبيه في شراء الخضراوات و الفواكه المنزليه .. وهاتك يا قصص و لغايه اما دماغنا تورم

طبعا الحكايه دي من خلال اخويه و الله اعلم المستقبل مخبي ايه و ربنا يستر


بس فيه شيء يا ياسو .. مش بس بنات حوا هم اللي بينتقدو .. انتو كمان كده .. خللي اي واحده اشترت هدوم مثلا تلاقي الشباب يردو .. ايه ده ولا تسوى اللي انتي دفعتيه و الله الراجل داحك عليكي .. و الله لو رحتي الحته الفلانيه اللي هوديكي ليها بالعربيه بقى هتلاقي الاشياء دي بنص التمن .. وهاتك يا تريقه


شكرا يا عم صبحي على السحلب .. كان لذيذ
متعملش بقى لحد تاني منه .. ده مخصوص للورد الجوري

نراكم على خير

[maysam]

صباح الخير على قهوتنا
بما انه عندي الشتا نازل من الصبح والدنيا برد ، يا ريت واحد نسكافيه



موضوع حلو يا ياسو
هل تقوم بشراء مستلزمات البيت "سواء لوالدتك او لزوجتك؟؟؟"

شكله موجه للرجالة يعني ، انا صراحة ممكن اجيب للبيت بس لو مزنوقة يعني مضطرة وكان عندي طاريء ونسيبيا يعني بلاقي اول محل قريب مني وانزل له وما ليش خلق اقعد افاصل بالخضار والاكل ، لانه تقريبا التسعيرة ثابتة عندنا ما فيش مفاوضات ، بس ممكن افاصل بالمشتريات اللي من النوع التاني زي اللبس وخلافه

انما شغل المشتريات انا مريحة نفسي منه نهائي ، وكمان مش بتتدخل بالاسعار ولا اعرف عنها مش يعني قلة اهتمام فيها ، بس مش معقول كل ما زوجي يجيب لي شيء اقعد احقق بالاسعار وانا مالي انا

وبالنسبة للبنات لما قرأت اقوالهم هههههههه نصيحة مني لما تتجوزوا ، ما تعودوش ازواجكم على انكم تشتروا انتوا ، دي حكاية بصراحة بلاش منها ، اسمعوا مني وحتدعوا لي

[النسر الذهبى]

ممكن بقى نفتح موضوع تانى ولا لسه عامة انا عندى موضوع جديد

السؤال الاول موجه للبنات الى قاعدين على قهوتنا
فى فرحك تحبى يكون فرحك متكلف وفى مكان راقى ومغنيين على مستوى ولا يكون فرح فى مكان عادى مع توفير الفرق فى شىء تانى ينفع بعد كدة وفى حالة الاختيار سواء دة و دة يكون ايه السبب ؟؟

السؤال التانى موجة للرجالة الى قاعدين على الكراسى الى جمبى

لو رحت تتقدم لواحدة وانت شابف انها كويسه جدا من كل الجهات ووافقت بيك فعلا بس اشترطت انه يكون الفرح فى مكان عالى التكاليف جدا واكتر من امكانياتك يكون ايه تصرفك ويكون ايه ردك

مستنى تفعالكم وفين القهوووووووووووووووووووووووووة بتاعتى يا عم صبحى

[عتاب]

المشاركة الأصلية بواسطة النسر الذهبى

السؤال الاول موجه للبنات الى قاعدين على قهوتنا
فى فرحك تحبى يكون فرحك متكلف وفى مكان راقى ومغنيين على مستوى ولا يكون فرح فى مكان عادى مع توفير الفرق فى شىء تانى ينفع بعد كدة وفى حالة الاختيار سواء دة و دة يكون ايه السبب ؟؟

عم صبحي اتأخر في الشاي بتاعي
واهو الفجر ادن ومش هاشرب عشان صايمه
ماااااااااااااااشي يا عم صبحي حسابك معايا شكك

بالنسبة للسؤال بقا
انا عامة بحب الشيء الوسط
يعني لا هو تكاليفه عالية اوي لان ده يسمى بزخ واسراف ربنا هايحاسبنا عليه
ولا كمان يكون فرح تحت الصفريعني خير الامورالوسط
موضوع مغنيين على مستوى او على نص مستوى مرفوض عندي اساسا
وبفكر اوقات انه يكون فرح اسلامي لاني باذن الله هاكون محجبة
ومش هاجيب مطرب ورقاصة في فرحي وانا كده حتى مايصحش
وبرأيي ان كلها مظاهر فارغة وممكن اوفر الفلوس لشيء تاني
ومايمنعش اني افرح برده ويمكن افرح اكتر كمان
اذا وفرت فلوس وسافرت اقضي شهر العسل في مكان جميل
او استخدمت الفلوس في شيء مفيد
وماننساش ان ربنا هايسألنا عن مالنا فيما انفقناه

وبمناسبة الفلوس انا مش هادفع تمن الشاي اللي جه متأخر
خللي عم صبحي يدفع

[أحمدكمال]

امممم

انا شخصيا ممكن اتنازل عن الفرح
والخطوبة
والمهر
والشقة


نكلم جد بقى وهو موضوع جميل جدا...انا ياسيدي لما هروح اتقدم لواحده هكون موضحلها امكانياتي ليها ولاهلها وتبقى عارفة الحلوة والمرة لانها على حسب امكانياتي انا هتعيش باقي العمر معايا

رضيت كان بها ...هشيل .
مرضيتش ربنا يوفقها بقى

لكن استحالة ابدأ حياتي وانا من تحت الصفر علشان فرح ابهة

[الورد الجوري]

المشاركة الأصلية بواسطة النسر الذهبى

ممكن بقى نفتح موضوع تانى ولا لسه عامة انا عندى موضوع جديد

السؤال الاول موجه للبنات الى قاعدين على قهوتنا
فى فرحك تحبى يكون فرحك متكلف وفى مكان راقى ومغنيين على مستوى ولا يكون فرح فى مكان عادى مع توفير الفرق فى شىء تانى ينفع بعد كدة وفى حالة الاختيار سواء دة و دة يكون ايه السبب ؟؟

السؤال التانى موجة للرجالة الى قاعدين على الكراسى الى جمبى

لو رحت تتقدم لواحدة وانت شابف انها كويسه جدا من كل الجهات ووافقت بيك فعلا بس اشترطت انه يكون الفرح فى مكان عالى التكاليف جدا واكتر من امكانياتك يكون ايه تصرفك ويكون ايه ردك

مستنى تفعالكم وفين القهوووووووووووووووووووووووووة بتاعتى يا عم صبحى

السلام عليكم و رحمة الله و بركاته

ازيك يا عم صبحي ؟ جهزلي السحلب بتاعي بليز

ايه اخباركم كلكم ؟

ازيك يا نسر ؟ موضوعك جميل

انا الصراحه مقدرش اخد راي قاطع في الموضوع ده لان ده شيء مشترك بيني و بين الطرف الاخر .. فالاول لازم اعرف رايه ايه و ظروفه هتكون ايه .. و ايه الحد او المستوى اللي يقدر بامكانياته يوصله .. و على ضوء اللي قدامي هتصرف .. لكن بشكل عام انا اتعودت و الحمد لله اني اتاقلم على الوضع اللي انا فيه و على الامكانيات المتاحه و اسعى لتحسين ظروفي دائما .. عشان كده انا هيكون طلبي انه المكان يكون متوسط على الاقل يعني و يكون موفر احترام للضيوف و الناس اللي جايه تهنيني بحيث انه الضيف ميحسش بأي تقليل في الاحترام تجاهه .. اما بقى المغنيين والفرق و الكلام الفاضي ده ميهمنيش .. اصل معلش مش هكون سعيده و انا باديه حياتي و حياته بديون " الدين في نظري من اوحش الاشياء " و طالما المكان تم فيه احترام ضيوفي و تقديم تحيه لهم " على قد بردو الامكانيات المتاحه " يبقى الحمد لله .. و ياريت مننساش انه الفرح ده معمول عشان افرح فيه مش عشان اندم على عمايله بعد الجواز او عشان افتكر انه كان سبب لخلاف معين او دين مربوط عليا و الله اعلم هسدده امتى .

ميرسي يا عم صبحي ع السحلب
نشوفكم على خير و بخير

[yasovinas]

مساء الخير يا شباب
الشتا دخل ومصر بقت برد والسقعه بدأت خدوني في وسطكم اتدفى بحبكم
هات لي واحد سحلب بالمكسرات يا عم صبحي
انا عايز اقول كلمتين للناس اللي لسه ما اتجوزتش نصيحه من اخ سوابق في موضوع الجواز اسمعها مني وابقى ادعيلي
لا تبخل على يوم فرحك باي شيء بس المهم يكون في حدود امكاناتك ؛؛؛فعلا هذه الليلة او هذه الفرحه لن تتكرر مرة اخرى الا بعد اكثر من عشرين سنه عندما تفرح باحد اولادك صدقني اجمل ذكرى هي ذكرى هذا اليوم وصدقني مرة اخرى سوف ترى اجمل ابتسامه من زوجتك في كل مرة تذكرها بهذا اليوم ولو بعد عشرين سنة جواز ؛؛؛؛؛ اكرر لا تبخل على هذه الليلة في حدود الامكانيات ،،،، شهر العسل يمكن ان يتكرر ومع الايام ومع تحسن الاحوال يمكنك ان تلف العالم وتتمتع بكل ما فيه ولكن ليلة الفرح لا يمكن تكرارها
اسمعوا مني ورزقي على الرزاق

تحياتي

[yasovinas]

ايه دا من اول امبارح ما حدش دخل القهوه امال عم صبحي هياخد راتبه منين



اقول لكم حاجه ،،،،،،،،،،،،،،،،،،،،،،،،،،،، تصبحوا على خير


واراكم امس