أكـــــــــلة وفــــــــــتوى

[أحمدكمال]

بسم الله الرحمن الرحيم

مساء الخير عليكم في النص الحلو

انا اسف اني اقتحمت عليكم القسم اللذيذ ده

بس انا جعان بقى وقلت اجي القسم اشوفي اي أكلة بسرعة اعملها....


لقيت اكلات كتير قوي قوي قوي ...
قلت يا واد يا احمد ...منعمل موضوع عن اكلة معينة وكل الاعضاء تفتي ازاي تتعمل وتقعد انت تجرب لغاية ما توصل للطريقة اللي هي مية مية

الواحد كلها سنة ويتخرج ويبقى عازب ومحتاجكم تعلموني الطبيخ يا سادة

واكيد في ناس كتير غيري مستنية الفرصة دي ....


الفكرة مرة تانية اننا هنختار اكلة معينة وكل واحد مننا يقول هو يبعملها ازاي مقاديرا ووصفا...
مين عارف في الاخر نبقى نعمل كتاب ننزله في السوق ونسمية "شيف ابن مصر"...للأكل البيتي....


وطبعا ميسم معانا مستشارة للنكهات الاردنية والفلسطينية والفراشة للنكهات الخليجية

نبدأ بايه !!!

اختار انا

مكرونة

[مستكة]

مكرونة

حدد يا هندسه فيه ميت نوع من المكرونه اي واحد تقصد عشان الوصفه تكون مظبوطه



هي فكرة الموضوع جميله اوي

بس كده المستور هينكشفن ويبان

والفضايح هتكون بالزكايب

والله حليم ستار

[yasovinas]

شوف يا صاحبي
انا هحكي لك على المكرونة البيضا
دي بقى بتتعمل باي نوع من انواع المكرونه
الاسباجيتي ممكن
العقلة يمشي الحال
الشرايط نووو بروبليم
حضرتك الاول هتسلق المكرونه ولازم تراعي انك لا تضع المكرونه في المياة الا بعد الماء ما يغلي وايضا يجب وضع القليل من الملح في مياة السلق ومن الضروري جدا القليل من الزيت منعا للتعجن
هتشيب المكرونه في الماء المغلي على نار هادية لمدة خمس الى عشر دقائق
بعد ذلك تصفي المكرونة في مصفاة في الحوض لتتخلص من مياة السليق وينصح بان تجري عليها مياه من الصنبور لفترة تتراوح من دقيقتين الى خمس دقائق للتخلص من النشا

بعد ذلك تضع المكرونه مرة اخرى على النار في حلة بها قطعه زبد او سمن وتضيف عليها ما ترغب من البهارات وايضا قليل من الجبنه الرومي المبشورة او جبنة الموزريللا وقليل من المشروم المقطع
وبالهنا والشفا يا صاحبي


ممكن تضيف الى المكرونه في المرحلة الاخيرة لحمه مفرومه معصجه بتبقى جميلة جداً

من الانواع التي اعشقها المكرونه النجريسكوا لكن صعب اني اشرحها يا ريت حد من بنات حوا تتفضل وتشرحها لنا

[أحمدكمال]

يا جماعة انا علشان المنتدى
هطلع سر العيلة

ربنا يستر ومحدش في العيلة يهدر دمي

المهم انا هقؤلكم على طريقة عمل المكرونة بالصلصلة الحمراء " يعني بالطماطم ومش عايزين تريقة "

نفس طريقة السلق بتاعة yasovinas ...

سر العيلة كله يتلخص في الصلصلة

هتجيب طماطميتن حلوين كده وتبشرهم "من البشر"..هتقولي ماله الخلاط اقؤلك كل ما تتعب اكتر يطلع الطعم احسن هتبشرهم وبعدين تجيب علبة صلصلة طمام وتحطها على الطماطم المبشورة وبعدين هتقوم جايب واحدة ماجي "ايوة ماجي " وتفتتها حتت صغيرة وتحطها على الطماطم والصلصلة
في الوقت ده حضرتك تكون عملت ايه حطيت شوية زيت او سمنة"كل واحدة ليها طعم"...وسبتهم يقدحوا وتحط بعد كده الطمام والصلصلة والماجي عليها...وتقلب بعدين تحط ربع معلقة فلفل اسود وابتداء من نص معلقة ملح على حسب مودك في الملح بقى ....
وتقلب كويس وبضمير ...
وتسيبوا الخلطة دي على نار هادية لغاية ما تحس انها استوت " حوالي10-15دقيقة"...

كده الصلصة اتعملت والمكرونة جاهزة...
انا بقى بحب احط الصلصلة على المكرونة البيضة واحط عليهم شوية فلفل اسود واكلهم
لكن تقاليد عيلتنا كالاتي..
تجيب حلة تيفال محترمة "لو عندك المنيوم مضمنش النتيجة " وتحط الصلصة والمكرونة وتقلب..وبعدين تدوق وتشوف ناقها شوية ملح ولا فلفل اسود

وبالهنا والشفا
كان معاكم الشيف العالمي كيموووووو

[أحمدكمال]

صحيح مش عيب اقول طريقة عمل المكرونة والبنات تقعد ساكتة كده



"اللي لسه بيضحك ايوة هتبشر الطماطم "

[الورد الجوري]

هههههههههههههههههههه
حلوة قوي المحاولات دي
انا هتابعكم من بعيد

والله انا بعرف اطبخ كويس جدا الحمد لله
بس مشكلتي اني مش بقدر اقول طبخاتي لحد
حتى لما حد يعجبه اكلي و يقول عملتي دي ازاي اقول :
لما تحبوا تاكلوها تعالوا و انا اعملهالكم
ده غير اني مش بحب حد يآنسني في المطبخ اصلا و يقف معايا
" زي ميكون سر القنبله النوويه"

انا مش بخيله و لا انانيه بس مش عارفه انا ليه كده بالذات بالنسبه للطبخات

[مستكة]

طيب انا سالتك بتتكلم عن اي نوع في المكرونه عشان الموضوع يكون اكثر تنظيما مش اكتر

علي العموم مادام بداتوها اسباجتي نكملها نجرسكو


لا هقولكو علي طريقة اسباجتي بحبها جدا


اولا : يتم سلق المكرونه بالطريقه التقليديه ( سالفة الذكر )


ثانيا : نعمل عصاج ( طريقته للي ميعرفش : نبشر بصله كبيره او اتنين متوسطين مع مقدار من اللحم المفروم حسب عدد الاكيله ونضع عليه قليل من الفلفل الاسود والملح وقليل من الزيت ونتركه علي النار حتي يستوي )

ثالثا : زي الشطار كده تجيبوا شفشق الخلاط وقطعوا فيه طماطم

- خمس فصوص ثوم كبير

- معلقتين كبار صلصه

- فلفلايه كبيره

ويضرب الخليط كله

الطريقه :

يوضع خليط عصير الطماطم علي العصاج ونضع عليه من التوابل ( قليل من القرفه وبهارات اللحمة وجوزة الطيب - وطبعا قبل كده حطينا ملح وفلفل علي العصاج فمش هنحط تاني )

ويترك علي النار حتي تتسبك واول ما نحس انها ابتدت تستوي ..

بنكون مجهزين زتون اسود مقطع ومجهز يوضه علي العصاج بالصلصه لمدة عشر دقايق وقبل رفعه من علي النار نكون مجهزين ماشروم مقطع قطع صغيره ونضعه علي الخليط ويترك خمس دقايق فقط ويرفع الخليط من علي النار


قبل التقديم زي ما سبق وقالوا نجيب حله ونسيح فيها زبده او سمنه بلدي او زيت للي مش بيحبوا ده ولا ده ونضع فيها المكرونه البيضه

واول ما تسخن وتكون جاهزه للاكل نضعها في الطبق لو عايزين تحطوا الصلصه علي وشها كان بها

لو عايزين كل حاجه تكون في طبق مستقل برضه براحتكو


ملحوظه هامه :

- عند وضع الملح يجب يكون اقل من المعدل العادي بكتير عشان الزتون الاسود بيكون مالح اصلا وبعد انتهاء الطبخه ابقوا زبطوا باه الملح

- لو حابين تضيفوا جبن رومي او مودزاريلا علي الصلصه يكون شيء جميل جدا

- لو محدش بيطيق الماشروم بلاشه مش ضروري اوي ... علي الرغم من ان الماشروم من فوايده انه مهدي فعال للاعصاب وبارد علي المعده من التوابل

- ولو محدش طايق المكرونه اصلا يرمي الطبخه كلها ويطلب بيتزا تيك اواي ويريحنا من تعب القلب ده






















اه وقبل ما تمشوا من هنا اوعوا تنسوا حاجه مهمة جدااااااااااااااااااااا




وبالهنا والشفا

[الورد الجوري]

تسلمي يا مستكه
الطريقه دي لذيذه بجد
و فعاله جدا
برافو يا جميل

[مستكة]

تسلمي يا مستكه
الطريقه دي لذيذه بجد
و فعاله جدا
برافو يا جميل

ميرسيه يا ورد لتشجيعك رفعتي معدنياتي

بس معني كده انتي مجرباها باه

[Honey1900]

غير غسيل الاطباق اجهز رقم الإسعااااااااااااااف ولا ايه؟؟؟

بلاش فتي بس

فاصل و نواصل

[مستكة]

غير غسيل الاطباق اجهز رقم الإسعااااااااااااااف ولا ايه؟؟؟

لا لا لا اطمن خالص

مفيش ضحايا تستلزم الاسعاف


هما يادوب حالتين تسمم

وخمسه عسر هضم

وتلاته زايده

[الورد الجوري]

[أحمدكمال]

تسلم ايدك يا مستكة
بس انتم ياااااااااااي مش بتبشروا الطماطم

[مستكة]

بس انتم ياااااااااااي مش بتبشروا الطماطم

ان كنت زعلان علي قشر الطمام متخافش



ما احنا مش هنصفيها


اهو عندك الطماطم وعندك قشرها ولاتزعل نفسك ابدا



ولو عايز البصل والتوم بقشرهم ولا يهمك ميرضيناش زعلك ابدا

[yasovinas]

هذه الاكلة انا بعشقها وطبعا لي اسبابي الخاصه اهمها اني بعرف اعملها شوفوا يا سادة المطلوب طبعا كوب من الارز (يستحسن يكون بسمتي ) ونصف كيلو لحم مفروم وكيس بسله خضرا نص كيلو تقريبا
كالعادة هنعصج اللحمه المفرومه ونضيف عليها البهارات (انا شخصيا بفتح دولاب المطبخ وافرغ من كل القناني اللي موجوده فيه )
نفضي كيس البسله في طاسه تيفال ومعاها قليل من الزبد او السمن او الزيت كل واحد حسب رغبته نحمر البسله قليلا لحد ما تنشف جلدتها بعض الشيء

طبعا نكون بلينا كوباية الرز في شوية ميه علشان النشا يخف شويه وبعدين نغسله ونحطه في حلة الرز ومعاه كوبين ماء والبسله المحمرة واللحمه المعصجه وتشغل عليها حلة الرز الكهربائية (بتفصل لوحدها )

اثناء ذلك وفي نفس الطاسه التيفال اللي حمرت فيها البسله تحط شوية كاجو ولوز مقشر وصنوبر (ان وجد) وقليل من الذبيب وتتركهم دقيقه او دقيقتان على النار في السمن
افرغ خليط الرز والبسله واللحمه المفرومه في طبق الاكل ورش عليه شوية مكسرات وزبيب متحمرين وادعي لاخوك ياسو ابن فينس