عريس في الشارع

[عتاب]

بصوا بأه ..أولا الحكاية دي برضه من فصيلة هم يبكي و هم يضحك ..بس الصراحه يعني الصراحه ..انتوا هتضحكوا عليا أنا..هتشوفوا ..بس بقولكوا ايه بما اني فتاه ركيكة ..قصدي رقيقة رقيقة..و مهيضة الجناح..ههه حلوة مهيضه دي..فبليز بليز .بلاش تريقة


الحكاية دي مايعرفهاش أي حد غير انا و ماما ..ماحكيتهاش لأي حد من أصحابي ..يعني ابقوا اتفشخروا قدام كل أصحابكم بالأمتياز ده ...حصريا ..حكاية العريس ..إقرا الحادثة ..اقرا الحادثة


احمم..مقدمة...عارفين ايه احساس واحده و هي ماشية في الشارع و تحس ان حد معجب بيها..مش معاكسه يعني و كده .لأ بيبقى فيه كده كيميا زي مابيقولوا الأجانب ..و على فكرة فيه جوازات كتير بتبدأ كده ...واحد يشوف واحده في الشارع..يمشي وراها ..يعرف ساكنة فين و يسأل عليها و يخطبها ..ابن عمي عمل كده و البت لسعته حتت قلم على وشة .علم على صداغه 3 أيام ..قام هو اتكيف قوي و قال البت دي واضح انها مؤدبة و متربيةوراح خطبها ..آه وربنا..هي صحيح بعد كده اتضح ان ايديها بتطول عليه في كل المواقف مش في الموقف ده بس .بس و الله الراجل مبسوط و بيحلف باليوم اللي شافها فيه..و بيلعن أبو ...والا بلاش دي في مقام عمتي برضه


المهم أنا يوم نازله من البيت رايحه الشغل..حسيت بكيميا م اللي كنت بقولكم عليها دي ..حسيت ان فيه عين هتخرم قفايا .اتديرت بسرعه كده في الخباثة لقيتلكم راجل انما ايه ..طول بعرض بارتفاع.ماسك ف ايده شنطة سودا و لابس بدله و كرافته و نضارة شمس....عامل كده زي العيال اللي كانوا بيطلعوا في إعلانات جمعية شباب المستقبل بتاع جمال مبارك "شباب الجيل .قوام جينا ..هو ..هو" فاكرينهم ؟..المهم الواد كان حليوة و انا قلبي هفهفله أول مالمحته ..استنيت شوية ع المحطه و بعدين جه الميكروباص..ركبت راح راكب ورايا..قلت الشياكه دي كلها هتركب مكروباص ليه يعني..أكيد في الأمر إنا ..و جه كمان قعد جنبي ....يا حلولي يا حلولي..بس كنت خايفه ليعاكس و ساعتها أنا ماعرفش أبويا .باللي ف رجلي و لايهمني لا شباب المستقبل و لا جمال مبارك ولا حاجه أبدا..


بس لاقيته في نص المسافه كده ..بيميل عليا و بيقول باسلوب رزين كده
...لو سمحتي ممكن أسأل حضرتك على حاجه ..وانتوا ماتعرفونيش... باتسطل لما حد يقولي حضرتك .بس برضه مش سهله يعني..صدرت الوش الخشب و قلتله ..خير بمناسبة ايه ؟...يعني كنت عايز أسأل بس ..هو حضرتك مرتبطه ..واضح انك مش مخطوبة ولا متجوزة مافيش دبل في ايديكي ..بس الإرتباط بأه لازم أتأكد منه من حضرتك .(حضرتك تاني يا حلولي)..والله الكلام ده مايتقالش في مواصلات و بعدين انا ماعرفكش و مش متعوده أكلم حد ماعرفوش ..


طب يعني أنا لو معجب بحضرتك و عندي نيه أتقدم رسمي ..أعمل ايه ..أصلي بصراحه متابعك من مده بس دي أول مرة أتشجع و أحاول أكلمك .ياحلاوة ياحلاوة متابعني من زمان ..ده واقع بأه..بس برضه على مين ..لازم أثبت ..و الله لو حضرتك متابعني زي مابتقول تبقى عارف بيتي و عارف بابايا ..هو الوحيد اللي ينفع يتكلم
في المواضيع دي ..لو سمحت ماتحرجنيش اكتر من كده ..جامده جامده يعني ...الحقيقة انت كده أثبتيلي اني أحسنت الإختيار....ياسلام ياسلام..الله الله ..هو ده الكلام ..لحد كده الأمور كلها صح و مية مية ..صديته آه بس كمان قلتله كلم بابا..سيبتله سكه مفتوحه يعني .


الواد بأه التباع راح شاخط فيا في اللحظه دي .الأجرة يا أبله والا هتركبوا ببلاش...يابن الذين..دانا عماله أترسم من ساعتها تبعتر كرامتي كده ؟...جيت أمد ايدي جوه الشنطه لقيتلكوا الأخ بأه راح بسرعه مطلع فلوس و محاسبلي ..لأ مايصحش ..لأ بأه اسمحيلي ..أنا لا يمكن أقبل واحده هاتقدملها تدفع و انا موجود ...وجون وجون وجون .هيتقدملي خلاص أيوة كده هو انا صحيح ماعرفش هو بيشتغل ايه و الا عايش فين والا بيقلد فنانين والا ايه نظامه بس الجواب بيبان من عنوانه.



أول ما المكروباص وقف لقيته نزل معايا في نفس المحطه و بصلي و قاللي .أنا حبيت أنقذك يعني في المكروباص ..واضح قوي انك ماعاكيش فلوس...الدم ضرب في نافوخي..وله انت هتتمنظر عليا والا ايه ؟..واضح ان شنطتك فاضية آخر الشهر بأه يالا وفرتلك أجرة المكروباص تنفعك ..بصتله بذهول كده و قلت له ..مين اللي قالك الكلام الفارغ ده ..انا عمري مامشي بشنطتي فيها أقل من 300 جنيه..قالي باستهزاء كده .لاااااماصدقش..الدم كان خلاص قرب يطلع من نافوخي زي النافورة..رحت مطلعه كل اللي في المحفظه مورياهولي .أهه حتى شوف 50-100-200-220


لقيته مد ايده اخد الفلوس..و بصلها كده و عدها و قاللي آه صحيح انتي معاكي فلوس أهه
و في لحظه راح مطبقهم و حاطتهم في جيبه ..و قاللي انا هاخليهم معايا بأه سوفينير لحد لما آجيلكم البيت ..ماستوعبتش و قبل ما آخد فرصة أقول كلمه واحده كان راكب ورا واحد على موتوسيكل شكله كده كان ماشي ورا المكروباص و هوا .فص ملح و داب



أختكوا بأه واقفه في وسط الشارع هابلااااااااااه ..زي اللي اتدلق عليه جردل مايه مش نضيف..مش عارفه أصوت والا أطلع أجري وراه والا ألطم على وشي ...فضلت واقفه يجي خمس دقايق في الشارع مش عارفه اروح فين والعربيات تقعد تزمرلي و لما تلاقيني مسهمة تقريبا اللي سايقين يقولوا في نفسهم دي يا اما طارشه يا اما مجنونة يا اما م اللي بيبيعوا مناديل ..و الناس تعدي تبصلي... و العيال الصغيرة يشدوا في هدوم أهاليهم ..بابا بابا هي الست دي عامله كده ليه؟



بعد شوية كده لفيت و دخلت المستشفى اللي باشتغل فيها .و على وشي تعبير كده زي تعبير العمده الآلي بتاع زمان ..دخلت الصيدلية..قعدت ع المكتب ..و فجأه .....انفجرت في العياط ..و العيال زمايلي اتلموا حواليا..مالك .فيه ايه؟...حد زعلك ..حد كلمك؟

من بين العياط و الشحتفه ما اقدرتش أقولهم غير كلمه واحده
.................................................
..................................
..................
اتسرقت

منقووووووووووووووووووول


السؤال هنا للبنات تفتكري ممكن تعملي ايه لو لقيتي عريس في الشارع
وبيقول انه عاوز يتقدملك هاتتصرفي ازاي
عايزة اعرف رأيكم
وكمان رأي الولاد ياترى ممكن تتقدم لواحدة شفتها في الشارع
هل ممكن دي تكون مقدمة تخليك تحاول تعرف اهلها واخبارها وعيلتها وممكن تتقدملها فعلا؟؟؟
ياترى ممكن تفاتحها اولا والا تروح البيت من بابه احسن؟؟
ها مين هايتناقش معانا؟؟؟
وياريت اللي يعرف قصة زي دي يحكيهالنا

[yasovinas]

قصه جميله واللي كتباها بصراحه اسلوبها لذيذ قوي
نيجي بقى للفكرة ؛؛؛ موضوع امكانية الحب او الانجذاب من الشارع كده صعب قوي ؛؛ يعني ان الواحد او الواحده يحب من اول نظرة عادي ووارد وعلى فكرة دا ما يبقاش حب بيبقى اعجاب بالشكل لكن بعد ما بيحصل تقارب ونقاش فبيتحول الاعجاب اما للحب او للبعد
اظن ان موضوع طلب ايد واحده في الشارع بيبقى صعب وغير مقبول

[7oOoDa]

سبحان الله فعلا !! لسه من حوالي تلات ساعات كنت بتناقش مع صاحبي في نفس الموضوع ! الفكرة اللي منتشرة عند البعض ان لو واحد في يوم من الايام مستقبلا شاف واحدة في الميكروباص مثلا واعجب بيها يسالها انتي مرتبطة ولا لا..وكان
طبعا بالنسبالي ده من رابع المستحيلات..مهما كان مدى الاعجاب..ومن غير ذكر اسباب لان معرفتها المفروض بديهية :]
لا بس فعلا صدفة !

بالنسبة للقصة نفسها..فدي سذاجة فعلا..لان الشخص كان بيبدي تصرف يدفعها انها تطلع الفلوس..كأنه بيقولها طلعي كل اللي قدامك ووريهولي ! ده غير تحول مختلف تماما في موقفه..

وعلى فكرة بسمع عن تقدم حصل بالشكل ده (الميكروباص مش السرقة طبعا) وانتهى بالزواج وناجح جدا لحد الان

[عتاب]

المشاركة الأصلية بواسطة yasovinas

قصه جميله واللي كتباها بصراحه اسلوبها لذيذ قوي
نيجي بقى للفكرة ؛؛؛ موضوع امكانية الحب او الانجذاب من الشارع كده صعب قوي ؛؛ يعني ان الواحد او الواحده يحب من اول نظرة عادي ووارد وعلى فكرة دا ما يبقاش حب بيبقى اعجاب بالشكل لكن بعد ما بيحصل تقارب ونقاش فبيتحول الاعجاب اما للحب او للبعد
اظن ان موضوع طلب ايد واحده في الشارع بيبقى صعب وغير مقبول

اه فعلا اسلوبها في الكتابة عجبني اوي
وفعلا موضوع الحب في الميكروباص او الشارع ده صعب اوي
بس هو ممكن ولد يعجبه شكل بنت مبدئيا
او ينجذب ليها من اول نظرة وساعتها يحاول يعرف عنها معلومات
واعتقد الافضل مش يتقدملها في الشارع طبعا
الافضل يروح البيت من بابه ويبقى الشارع وسيلة تعارفهم
نورت الموضوع يا ياسو

[عتاب]

المشاركة الأصلية بواسطة 7oOoDa

سبحان الله فعلا !! لسه من حوالي تلات ساعات كنت بتناقش مع صاحبي في نفس الموضوع ! الفكرة اللي منتشرة عند البعض ان لو واحد في يوم من الايام مستقبلا شاف واحدة في الميكروباص مثلا واعجب بيها يسالها انتي مرتبطة ولا لا..وكان
طبعا بالنسبالي ده من رابع المستحيلات..مهما كان مدى الاعجاب..ومن غير ذكر اسباب لان معرفتها المفروض بديهية :]
لا بس فعلا صدفة !

بالنسبة للقصة نفسها..فدي سذاجة فعلا..لان الشخص كان بيبدي تصرف يدفعها انها تطلع الفلوس..كأنه بيقولها طلعي كل اللي قدامك ووريهولي ! ده غير تحول مختلف تماما في موقفه..

وعلى فكرة بسمع عن تقدم حصل بالشكل ده (الميكروباص مش السرقة طبعا) وانتهى بالزواج وناجح جدا لحد الان

شفت ازاي انا عرفت اقرا افكارك انت واصحابك كمان
اعتقد انك تفاتحها في الشارع دي صعبة اوي بس ممكن من رؤيتك ليها تتقدملها في بيتهم؟؟

بالنسبة للقصة انا بحترم رأيك جدا لان انا نفسي قلت البت دي هبلة لانه فجأة غير موقفه من الاعجاب للاستهزاء
واساسا حتى لو كده ايه اللي يخليها تطلع الفلوس وتديهاله المفروض تطلع تمن المواصلات وترميهاله في وشه
بس بصراحة اسلوب عرض القصة الفكاهي عجبني وحبيت اجيبها ومنها نتناقش في الموضوع نفسه
نورت الموضوع بمرورك ومشاركتك

[maysam]

هي قصة ظريفة وبتحصل طبعا

انا لا اؤمن بالحب من النظرة الأولى ولا العاشرة ، ممكن يكون اعجاب قد تبني عليه فيما بعد
انما الفكرة كفكرة انا ارفضها ، وتعرضت لها كذا مرة بالشارع في ايام ثانوي ، وكان رد فعلي هو قطع الطريق على الي قدامي ببساطة لأنه ما كان في نية تفكير بمشروع زواج ولا غيره ، بس هوموقف محرج جدا جدا!!

لكن في ناس بتتقبله عادي ، الموضوع بيرجع لطبيعة الاشخاص والظروف والملابسات للموقف نفسه
بس في ايامنا استبعد ان في ناس لسا بتعمل هيك ، لأنه صار في قنوات تانية للتعارف واسهل كتير من قنوات زمان!!

[عتاب]

المشاركة الأصلية بواسطة maysam

هي قصة ظريفة وبتحصل طبعا

انا لا اؤمن بالحب من النظرة الأولى ولا العاشرة ، ممكن يكون اعجاب قد تبني عليه فيما بعد
انما الفكرة كفكرة انا ارفضها ، وتعرضت لها كذا مرة بالشارع في ايام ثانوي ، وكان رد فعلي هو قطع الطريق على الي قدامي ببساطة لأنه ما كان في نية تفكير بمشروع زواج ولا غيره ، بس هوموقف محرج جدا جدا!!

لكن في ناس بتتقبله عادي ، الموضوع بيرجع لطبيعة الاشخاص والظروف والملابسات للموقف نفسه
بس في ايامنا استبعد ان في ناس لسا بتعمل هيك ، لأنه صار في قنوات تانية للتعارف واسهل كتير من قنوات زمان!!

كالعادة رد ميسومة حبيبتى في الجوووووووووون
انا كمان مش مؤمنة بالحب من اول نظرة ولا اول شهر كمان
ممكن يكون فيه اعجاب مبدئي بيزيد كل يوم بس الحب الحقيقي صعب يتولد فجأة
بس ده مايمنعش ان فيه جوازات شوارع كتير (قصدي بتبدأ من الشارع )

نورتي الموضوع يا ميسومة
وربنا مايحرمنى ابدا من طلتك على مواضيعي

[yasmina]

ههههههههههههههههه


والله يا عتوبة لاخر لحظة وانا فاكرة ان اتقدملك عريس بجد


لحد ما لقيت كلمة منقول

تنحت اودام الشاشة

[عتاب]

المشاركة الأصلية بواسطة yasmina

ههههههههههههههههه


والله يا عتوبة لاخر لحظة وانا فاكرة ان اتقدملك عريس بجد


لحد ما لقيت كلمة منقول

تنحت اودام الشاشة

عيب يابنتي احنا مش بتوع الحاجات دي
عرسان ايه وكلام فاضي ايه بس
وبعدين العريس اللي يجيلي في الميكروباص ويعمل كووووول ده اخرته معايا مش تمام
احنا صعايدة يابنتي انتي نسيتي والا ايه
وكمان يسرقني دا وقعته زي وشه
نورتي الموضوع مع انك ماقولتيش رأيك

[هيثم حمدي]

السلام عليكم

تصدقي يا بنت عمي

اني بجد افتكرت زي بعض الاخوة ما قالوه ليكي ان القصه وتمثيلها عتاب
وبجد افتكرت زيهم كده
فرحت اؤي وكنت مبسوط لغالبيه القصه عندما الي جمله عندما سالها انتي مرتبطه وما ذالك

كنت معتقد ان دي عتاب وقتها

وفجاة حسيت اني اتغيرت واتضايقت من بعض الاشياء
عندما استفز بنت عمي ان شنطتها فاضيه وكده
وكان خلاص الدم بيجرئ في نفوخي

بس ما هديت غير لما قلتي انها منقوله

المهم
من وجهه نظري بالاعجاب والزواج
عن طريق الشارع
انا بصراحه معنديش مشكله انه يحصصل كده وعادي
بس اللي يتعمل كالاتي
ده من ناحيتي انا مثلا
اني لا اكلمها خالص يدوب امشي وراءها وبس واعرف فين بيتها
واحاول ان اسئل علي اهلها وعلاقتهم ايه
وعن كل شييء عنهم
وفي الاخر اقرر
تصلح بان تكون او لا تكون

متزعليش مني يا بنت عمي اني افتكرت انتي
بس بصراحه كنت سعدت جدا باني بعتقد ان بنت عمي تقدم لها عريس

ويارب يارب يكرمك الزوج الصالح
في القريب العاجل

[MoHaMeD NaSSaR]

رأي الولاد ياترى ممكن تتقدم لواحدة شفتها في الشارع
هل ممكن دي تكون مقدمة تخليك تحاول تعرف اهلها واخبارها وعيلتها وممكن تتقدملها فعلا؟؟؟

اي بنت اشوفها بالشارع وتعجبني بالشارع على هالحال لازم اتقدم لكتير هههه في كتير بعجبوني بالشارع

لا نيجي للجد بقى

اذا فعلا بنت عجبتني جدا ممكن اروح اتقدملها واخطبها

كتير راح يقولوا كيف بدك تخطبها وانت ما بتعرفها

ما هي الخطبه وما المقصود بها

الخطبه هي للتعرف الخاطب على خطيبته والعكس سواء من ناحيه معنويه او حسيه ماديه يعني عن خباياها وافكارها
والسؤال عنها و و

اذا لا فرق بين الزواج لو لقتها بالشارع او لو كنت تعرفها بالنسبه الي يعني


ياترى ممكن تفاتحها اولا والا تروح البيت من بابه احسن؟؟
ها مين هايتناقش معانا؟؟؟


لا طبعا اروح للبيت لانه لها ولي ولها انسان مسؤول عنها بروح بسألأه وبفاتحه بالموضوع وهو بقى يسألها

وهذا ليس تقليل من قيمة الفتاه



شكرا عتاب
عالموضوع

[بنت فلسطين]

هههههههههههه قصة عنجد خطيرة ..

وأنا واجهت متل هالقصة عنجد ... وردة فعلي كانت ..............









الصدمة

والله عنجد كنت أتفاجأ ... كيف بيجي يخطبني بالشارع ... ومرة واحد قلي ... أهلك بالبيت هلأ ؟ يالله بجيب أهلي وباجي

بس هلأ لما أي واحد يتقدملي كدة بالشارع ... بسيبه يحكي (بالفلسطيني " يلعي " ) وبمشي ... يعني بعتبره زيه زي الي بيعاكس .. ولو اضطر الأمر وكان وقح شوية ,,, بعطيه (كلمتين بالعضم) وبمشي .. يعني ممكن أهزأه قدام الناس بالشارع (بس إذا زودها) ... وإذا (تمـــــــــــــــادى) ... ساعتها بناديله أي شب قدامي أو الأمن .. وانتوا عارفين الشباب في الأردن ومصر وفلسطين ... بس تستنجد بنت فيهم بيركضوا تيساعدوها ...

عتاب موضوع أكثر من رائع ... ويمكن أرجع ... تحياتي ومنورة دايما

[7oOoDa]

هوانتوا عارفين الشباب في الأردن ومصر وفلسطين ... بس تستنجد بنت فيهم بيركضواتيساعدوها ...

لا تعليق :]

[بنت فلسطين]

المشاركة الأصلية بواسطة 7oOoDa

لا تعليق :]

أنا عديت مصر لأني بحكي عن تجربة بالـتأكيد ...