الحب زى الرز لازم تتقلوا عليه شوية لغاية ما يستوى !

[محمدحسين]

الحب زى الرز لازم تتقلوا عليه شوية لغاية ما يستوى !

بجد حبنى قوى و شدنى ليه من أول مرة شوفته ..
جملة بتسمعها كتيير من أى واحدة أو واحد
بعد معرفة الطرف التانى بدقائق أو حتى ساعات
طيب الإحساس المتلهوج المتسرع دا جه إمتى وإزاى معرفش ..

تلاقى الواحد أو الواحدة من دول أو لما تشوفه وتبصله تحس من شكله أو لبسه إنه مختلف وتقول فى مخها أيوه هو دا وهو فى نفس الوقت يلعب فى مخه نفس الحوار إللى نشأ نتيجة إن الإثنين أول مرة يشوفو بعض مش أكتر .

ويتطور الموقف من خلال النظرات المتبادلة بين الإثنين (تبقى مصيبه لو واحد فيهم نظره ضعيف ) وبيتطور أكتر واكتر لما يقفوا يتعرفوا على بعض صحيح بيبقى وقع الصدمة كبير لما يبدأ كل واحد منهم فى الكلام يعنى هو يلاقيها مش بتتكلم بنفس طريقة الكلام الجذابة إللى كان رسمها لها فى خياله أول ماشفها من 5 دقائق ولا هى تلاقى صوته دافى زى ما كان شكله بيدل بس بينتهى المشهد الجامد ده بنصر لكلا الطرفين وبتتبادل أرقام التليفونات..

* ألو ياسمين تصورى مادانيش غير 65 ميسد وماكلمنيش إلا 7 مرات من الصبح ..
* عادى يا بنتى أكيد وراه شغل أصبرى شوية معلش دى كانت صاحبتى ،

ونرجع للمتلهوجين المتسرعين اللى بيفضلوا طول الليل بعد تبادل الرهائن قصدى نمر التليفونات يبصوا للنمرة ويسبلولها على أساس إن النمرة بتدل على شخصية صاحبها ( نمرة الولد إللى فيها رقم 6 كتيير معناها إنو بتاع بنات ونمرة البنت إللى فيها رقم 4 كتيير معناها إن البنت بتحب تشتغل الأولاد .. شوفتو الفلسفة) ! .

وأثر البحلقة للنمرة يؤدى إلى تخيل إن النمرة بتنبض وبتدق دقات أسرع من دقات قلب التنين الأخضر والاشتغالة الأكبر إن فيه بعض البنات تقولك دى النمرة دافية بجد دا شكله بيحبنى لأ هيحبنى أهه لو يبعت sms حتى دا كان قلبى ينهار من هزات الفيبريشن المتوحشة ويفضل الطرفين على كده لغاية ما واحد يقرر يرفع سماعة التليفون ويكلم الثانى ..

* ألووو ياسمين إلحقينى تخيلى ما رنش من 3 دقائق ونص مش قادرة أفكر أو استحمل .

* يابنتى اتقلى واهدى على الرز لغاية ما يستوى ..

لا وممكن يشيط لو قلبته بقولك أنا هاكلمه وخلاص .. معلش صاحبتى تانى بس خلونا مع المتسرعين و المتلهوجين إللى يفضلوا يتكلموا و يتكلموا ثم يتكلموا وبعد ذلك يتكلموا ودا على اعتقاد منهم إنهم لما يتكلموا كتيير دا هيسرع التهاب المشاعر من الأصل .. ودا طبعاً مش صحيح لأنهم بيعملوا ذى ست البيت البليدة إللى بتبقى عايزة تعمل أكلة سريعة فى ثوانى فبتطلع حاجة متجمدة وشبعانه ثلج من الفريزر وتدخلها الميكرويف علشان تستوى صحيح بيبقى شكلها سخن وجميل بس بيبقى لسه فيها ثلج وطعمها وحش وطبعاً ضار صحياً .

بعد فترة من مكالمات ودخولات وخروجات وعتابات وآهات المتلهوجين المتسربعين واللى هما أنفسهم مش عرفين دا كله على أساس إيه أصلاً بيوصلوا كل واحد فيهم للحقيقة المرة والبشعة إللى وصلولها بعد عناء وتعب .. تخيلوا إيه يطلعوا مش بيحبو بعض ولا ينفعوا لبعض أصلاً .

[maysam]

ههههههههههه

الموضوع تحفة يا محمد

يعني كل الدنيا بقت تمشي على الموضة اشمعنى يعني نستثني الحب !! يعني هو كان ناقص ايد ولا رجل مثلا عشان ما يبقاش تيك اواي او شغل سلق بيض !!

احداث الحياة بقت تفرض مستجدات ما عاد في شيء غريب او غير عادي

[فله]

في ناس بتتقل اوي لحد مايشيط منهم ويكبوا ويعملوا من الاول احنا فاضيين ورانا ايه

موضوع جميل اوي والحورات دمها خفيف جدا

[نيهال]

احم احم
هوه الموضوع بيوصل انى ابحلق فى رقم التليفون
طيب وانا اعمل ايه
رقمى فيه 4.......واعمل ايه اذا كان رقمه هوه كمان فيه 6
الخاين الغشاش


ههههههههههههههههههههه
بجد الموضوع حلو جدا قوى خالص
اينعم احنا جيل متسرع بس احيانا بنحاول نظبط شويه......احيانا

[نيهال]

[yasmina]

احم احمد

هو مفيش غير ياسمين

بس حلو الحوار دة

[محمدحسين]

المشاركة الأصلية بواسطة maysam

ههههههههههه

الموضوع تحفة يا محمد

يعني كل الدنيا بقت تمشي على الموضة اشمعنى يعني نستثني الحب !! يعني هو كان ناقص ايد ولا رجل مثلا عشان ما يبقاش تيك اواي او شغل سلق بيض !!

احداث الحياة بقت تفرض مستجدات ما عاد في شيء غريب او غير عادي

بكره هيطلع لنا مطرب ياميسوم
الحب الحب الحب
أحمر وأصفر واخضر
بس فعلا أنا فى احد المنتديات وجدت بنت بتشتكى ان حبيبها أعطيته 24 ميسد كول خلال يوم ولم يرد عليها وهى بتبكى ومش عارف ليه هو مطنشها
والله ياميسوم البيض لو مااتسلق كويس مش هيتأكل يبقى ازى الحب بالطريقه دى يبقى حب أو يتبلع
الواحد زمان كان يقعد يحب حبيبته من بعيد عشرين سنه وبعدين يتجوز غيرها هههههههههههه

[محمدحسين]

المشاركة الأصلية بواسطة فله

في ناس بتتقل اوي لحد مايشيط منهم ويكبوا ويعملوا من الاول احنا فاضيين ورانا ايه

موضوع جميل اوي والحورات دمها خفيف جدا

طيب ماحطه على نار هاديه علشان مايشيطش ويتحرق ونعمل رذ جديد مش كده والا أيه ههههههههههه

[محمدحسين]

المشاركة الأصلية بواسطة نيهال

احم احم

هوه الموضوع بيوصل انى ابحلق فى رقم التليفون
طيب وانا اعمل ايه
رقمى فيه 4.......واعمل ايه اذا كان رقمه هوه كمان فيه 6
الخاين الغشاش

ههههههههههههههههههههه
بجد الموضوع حلو جدا قوى خالص

اينعم احنا جيل متسرع بس احيانا بنحاول نظبط شويه......احيانا

عن قريب شركات الهمحمول هتعلن عن رفع أسعار الخطوط التى تحتوى على رقم 4 أو رقم 6 نظرا للاقبال البشع عليها
ويجى واحد يتقدم لواحده تطلب منه موبابيله واذا لاقت رقم سته تقول مش عايزاه يابابا ده بتاع بنات هههههههه

[عتاب]

المشاركة الأصلية بواسطة محمدحسين

الواحد زمان كان يقعد يحب حبيبته من بعيد عشرين سنه وبعدين يتجوز غيرها هههههههههههه

موضوع اكتر من رائع
خفة الدم متجسدة في الموضوع ده
فعلا اليومين دول بتلاقي الشباب مسروعين على الحب
تلاقي الواد لسه في ابتدائي ومعلق كام بنت ومش مبالغة والله شفت بعيني ماحدش قالي
ربنا يشفيهم ويهديهم ويعرفوا ان كل وقت وله ادان والشيء اللي بييجي في معاده هواحسن شيء
تسلم ايديك يا محمد

[enda]

موضوع لذيذ مووووووووووووت يا محمد بس انت كده هتخليني اغير رقم موبايلى اصل فيه 4 كتير اوى
وبعدين بقي
على العموم بجد موضوعك لذيذ بس انا شايفه ان الى بيعمل كده هما موموعه معينه من الاشخاص بيلقبو بالبنات او الاولاد الخفيفه بس نسبه للعقل الخفيف وان مش كل الناس على نفس الطريقه دى
تمام يا محمد وشكرا اوووووووووى

[صمت الكلام]

طب انا بقى يا محمد بقالى 3 سنين بحب واحد وطول ال3 سنين بشك فى حبه مع ان الى حوليا شكين وهو نفسه يرتبط بيا رسمى بس بس ابوه معقد شويه

[امرأة العزيز]

سرد رائع ..ويمكن يكون بيحمل في طياته وقائع لشرائح معينة من الشباب ..

اكيد الظاهرة دي محتاجة تفسير .. اكتر من انها تكون محتاجة سخرية ..

معتقدش ان فيه حد بيحب يضحك علي نفسه الا لسبب وجيه جداً.. بالنسبة له علي اقل تقدير..

ميل كلا الطرفين للاخر شئ طبيعي وفطري .. الشعور بالانجذاب ايضا طبيعي وفطري ..

لكن لعب كل طرف علي الاخر في المشاعر ومحاولة خداع الاخر باسم الحب هو ده الي مش طبيعي ...

اخي محمد حسن ..

اري ايضا ان نهايتك للموضوع كانت مفتوحة فما عرفنا ما هو الذي من المفترض ان يكون عليه الحب ..؟؟

ودي