المراه سلعه تخضع لقانون العرض والطلب !!!!!

[جنه]

كلنا عارفين قانون العرض والطلب علي السلعه

وهو ان العلاقه طرديه بين الطلب ع السلعه وعرضها

يعني كل ما الطلب يزيد علي سلعه معينه يزداد العرض منها
معلش دوشتكم بقوانين تجاريه اصلي خريجه تجاره
ولما شفت اللي كان بيحصل واللي حاصل افتكرت قانون العرض والطلب


طيب هو ايه اللي حصل واللي بيحصل
حاضر هقولكوا


كان زمان ماما بتقولي كان المطلوب في سوق الجواز هي الست الطخينه قوي
وكل ما تطخن كل ما الطلب عليها زاد وبقت عروسه مرغوب فيها من كل العرسان



بعدها
اتغير الحال والطلب بقي يزيد ع الست اللي بتهتم بشكلها وشعرها وشكل الفستان

لانه ظهر نجمات السينما الرفيعين واللي بيهتموا بشكلهم فبالتالي بدات الستات تلبس تحت الركبه عشان برضه تجيب العرسان

بعدها
بدا الاهتمام بالناحيه الدينيه يزيد وظهر دعاه فبدا العرسان يطلبوا عروسه محجبه بس في نفس الوقت شيك وظهر الحجاب المودرن اللي لبس البنات فيه مالوش اي علاقه بالحجاب


بعدها والللي بيحصل دلوقتي
المطلوب دلوقتي هي العروسه المنقبه
وفعلا بدا عدد المنقبات يزداد وانا شخصيا اعرف بنات اتنقبوا مخصوص عشان يتجوزوا

سؤالي دلوقتي
ايه السبب في تطبق قانون العرض والطلب ده ع الجواز وبالتالي جعل المراه سلعه


هل الشباب؟

اللي اهتموا بالمظهر قبل الجوهر
يعني مثلا انا اعرف واحده اتقدملها انسان محترم ومتدين ولكن كان شرطه قبل اي كلام انها تنتقب
ولما والدها قاله انها بتعاني من حساسيه في عينيها وانها ماتقدرش تلبسه راح ومارجعش
مع انه متقدم لانه عارف انها مؤدبه ومتدينه ومحترمه لكن ترك ده كله وقال لا منتقيه لا بلاش



هل البنات ؟

واللي رضيت انها تكون سلعه واول ماتسمع ان الطلب زاد علي شكل معين تجري وتغيره
من غير ما تقتنع او حتي تسال ده صح ولا غلط وانعدمت شخصيتها امام رغبتها انها تبقي عروسه

هل المجتمع ؟

زي الاهالي اللي بترفض مثلا ان بنتها تنتقب الا لما تتجوز

[فانتـــاستـــك]

رزقك الله أعالي الجنان يا جنه

موضوعكـ حساس .. ومعانيه بتضرب في الراس

هي رساله موجه لكل شاب وفتاه

هوا احنا ليه بنجري وراى التطور في كل حاجه؟

وان حصل ما قلتي انو البنت بتتماشى مع اللي حاصل من أجل انها تتجوز فهذا خطأ
وانو الراجل نفسوا يتشرط أكثر من اللازم برضوا خطأ

أنا أشوف انه فيه صفتين مهمتين في الرجل والمرأة
الدين و جمال الروح وليس الوجه والجسد
ولكل رغباته وميوله.

وشكرا ع الموضوع التحفة.