(احلى قصة )الأمل

[عتاب]

اول مرة في حياتي اكتب قصة انا مش كاتباها عشان اكسب بيها لاني واثقة من موهبتكم
انما حبيت تقروها وتعرفوني رأيكم عشان شكلها كده اخر مرة هاكتب فيها
نبدأ بسم الله


لم تكن أمل إنسانة عادية .. دائما كانت تشعر انها مختلفة . هي بالفعل مختلفة فهي تمتلك عقلا راجحا منذ طفولتها وقلبا رقيقا جعل مشاعرها تتفتح مبكرا . تعلمت كيف تحب كما لو كانت شابة ناضجة
فقد ربط الحب بينها وبين زميل دراستها محمود الذي لم يتوانى لحظة واحدة في التعبير عن حبه لها. كان كل شيء يفعله يدل على هذا الحب الكبير . وبرغم تهافت البنات عليه الا انه لم يهتم بغيرها ولم يفكر في سواها
وهي بالرغم من كل مشاعرها تجاهه ...بالرغم من كل هذا الحب الذي تحمله في قلبها له الا انها لم تحاول لحظة واحدة ان تبوح بسرها لأي إنسان حتى له
كانت دائما تتظاهر بعدم اهتمامها به وتتجاهل محاولاته المستمرة لمعرفة حقيقة مشاعرها تجاهه
كانت تظن ان السعادة التي تعيشها ستستمر الى اخر العمر ولكن .......
وما اصعبها من كلمة – كلمة مكونة من ثلاثة أحرف- تفعل بحياتنا الكثير وتهدم الكثير من آمالنا واحلامنا.
جاءت لحظة الفراق العصيبة على كل منهما وتقطع قلبها ألما على الحب البريء الطاهر الذي لم يخرج من قلبها قط . وجدت نفسها تودع احلامها فجأة . وجدت حبيب عمرها يسافر ويبتعد لظروف خارجة عن ارادته.
كم كانت تتمنى ان يعرف مدى حبها له قبل سفره. كم كانت تحلم بأن يستمع اليها قبل الرحيل . ولكن لسانها لم يطاوعها على النطق باسمى كلمة واجمل شعور دخل حياتها .
وسافر حبيبها ولم تنقطع اخباره عنها في بداية سفره وكان دائم السؤال عنها . وبعدها انقطعت اخباره ولم تعد تعرف عنه شيء ولكنها ظلت متمسكة بأملها في لقائه يوما ما .
لم تعرف في حياتها سوى حبه ولم تفتح قلبها لسواه رغم مرور سنوات عديدة على فراقهما
وجاء موعد اللقاء.. صدفة كآلاف الصدف التي تمر بنا .... ولكن لا – هذه ليست صدفة- فهي تتوقع رؤيته فهذا زفاف صديقه المقرب ولابد أن يحضر وهي أيضا ستكون موجودة . ستعطل كل شيء من اجل هذا اللقاء . ستفعل أي شيء لتراه . لا تعرف ماذا تقول عندما تلقاه .. هل تصارحه بما في قلبها تجاهه من سنين ؟؟ هل تصمت وتدع عيناها تتكلمان؟؟؟ هل سيطاوعها لسانها على النطق والحديث معه؟؟ كم تمنت هذه اللحظة التي تجمعهما . كم اشتاقت اليه والى حديثه الرائع ... واليوم ستراه وتحقق أمل حياتها الذي عاشت من اجله سنين.

دخلت أمل الحفل وهي في شدة الخجل فهذه عادتها كلما كانت تراه . بحثت عنه بعينيها أين هو؟؟ ألم يأت بعد؟؟؟ هل من الممكن ألا يأتي؟؟ لا فهي لا تستطيع تحمل هذه الفكرة..... انه أملها الأخير أن يجمعهما هذا المكان
دارت بعينيها في أرجاء المكان حتى دق قلبها بعنف حينما رأته واقف هناك بجانب العريس لم يتغير كثيرا نفس وسامته المحببة الى قلبها نفس ابتسامته الساحرة وعينيه الرائعتين . لم تشعر بالوقت يمر وهي تنظر اليه ... كم كانت تتمنى ان يتوقف الوقت عند هذه اللحظة التي التقت عيناها بعينيه ... استمرت النظرات بينهما من بعيد وقد كان ينظر اليها بين الحين والآخر لكنه لم يتقدم خطوة واحدة ليكلمها
قررت ان تتقدم هي حتى وجدت نفسها تقف أمامه لا يفصلهما سوى خطوة واحدة وجاءت زميلة دراستهما لتقوم بالتعارف بينهما ومد يديه مبتسما ليسلم عليها وكان لقاء أيديهما أشبه بالحلم الجميل الذي لا تريد له أن ينتهي أبدا .... تكلم وما أجمله من صوت اشتاقت لسماعه مند سنين ... سألها عن حياتها وأخبارها .... رأت في عينيه نظرة غريبة لا تعرف سببها نظرة امتزجت بابتسامته وبرغم غموضها الا انها زادته وسامه . لم يحاول ان يتكلم عن نفسه أو حياته وهي لم تستطع السؤال فقد منعها حياؤها من ذلك .
ما أجمل هذه اللحظات التي جمعتهما وما اقصرها ... فقد حان موعد الفراق ... كم حزنت من إهماله لمشاعرها ونظراتها له بين الحين والآخر وهو الذي لم يبدل هذه النظرة الغريبة التي تراها في عينيه كأنه لا يراها ولا يشعر بلهفتها عليه ...
وقفت أمل لكي تودعه وهي تحمل في داخلها بركان من الألم والندم على حب حملته في قلبها طوال سنين ولم يقابله سوا التجاهل .... وقفت أمل ومدت يدها لتسلم عليه للمرة الأخيرة ولكنه لم يمد يده لها ... لم ير هذه اليد وهي تودعه ... نعم فهو أعمى منذ سنين – منذ انقطعت اخباره عنها-
حادث قاسي افقده نور عينيه فقرر ان يبتعد عنها حتى باخباره . ويتركها تعيش حياتها بعيدا عن معاناته. وعندما عرف انه سيلقاها قرر الا تعرف شيء مما اصابه . قرر الا يكسب تعاطفها بدلا من الحب الذي تمناه دوما ... ولكنها عرفت .. الان فقط عرفت كم يحبها وكم تحبه ... الان عرفت انها لن تستطيع الحياة بدونه .. الان فقط سمحت للسانها ان ينطق ويتكلم عما يجيش به صدرها من مشاعر ... لن تتخلى عنه ابدا ولن تسمح لأي شيء ان يفرق بينهما بعد الان ... ستكون له دائما العين التي يرى بها كل شيء جميل ... ستعوض معه كل السنين التي مرت في فراق وألم ولوعة ... ستعيش معه حتى اخر العمر ولن تسمح للحزن ان يتسلل اليه ابدا ... ستكون له دائما الامل في الحياة

[redrose]

جميله اوي يا عتوبه so romantic
ومكتوبه باسلوب ادبي جميل وصور رائعه
الحكايه ليست جديده ولكنها جميله اوي
يا ريت نقرا ليكي حاجات اكتر ليه لا يا بيبي
يلا ربنا يعينك Go ahead

[عتاب]

المشاركة الأصلية بواسطة redrose

جميله اوي يا عتوبه so romantic
ومكتوبه باسلوب ادبي جميل وصور رائعه
الحكايه ليست جديده ولكنها جميله اوي
يا ريت نقرا ليكي حاجات اكتر ليه لا يا بيبي
يلا ربنا يعينك Go ahead

ررووووووووووووووز وحشتيني
الحمد لله ان القصة عجبتك
دي اول مرة اكتب واخر مرة برده
الحكاية دي مش جديدة بجد؟؟؟
انا والله ماعرفش دانا كتبتها في لحظة تجلي
ماعتقدش الساعه دي هاتيجي تاني
نورتي الموضوع يا قمر

[The Caesar]

برافو ..عتاب

قصه قصيره ممتعه ..أحم أحم ..انا دلوقتي هاعتبر نفسي ناقد فني وروائي..ماشي
بصي يا بنتي يا عتاب ..انتي عاندك الموهبه ..قويه ..أسلوب رقيق..وكلمات رقيقه ..الحس الفني عالي..والتركيز علي الفكره موجود ..بشكل قوي..القصه الامل..والبطله أمل..قصه حب من طرف واحد ..او كانت تعتقد انه من طرف..واحد وفي انتظار الامل ..حتي تبينت الحقيقه .ان الامر كله قصه حب مثاليه ..بها وفاء واخلاص ومعاناه..و أحتراق المشاعر ..فاهمه حاجه من الكلام ده
المعني بيوصل بسهوله جدا ً بدون تعقيد او خروج ..من سياق الفكره ..وبشكل.لا يبعث علي الممل
ومع احترامي لاريء redrose فأن الفكره تمت معالجتها بشكل جديد ..تماماً
بجد عاندك الموهبه قويه ..وصادقه ..
يعني مفيش حاجه اسمها اول واخر مره ..لازم نشوف كتاباتك ..الممتعه ..مع تمنياتي بالتوفيق !!
مش قصدي علي الفوز لاني بنافس بقصتين..اقصدي بالتوفيق في الكتابه عموما ً

[نورالقمر]

ليه مين فين
عملنا فيكى ايه يابيبي
دا اانا بحبك والله
ايوه رحم الله امرىء عرف قدر نفسه
اول واخر مره
تانى مره هتضيع فيها رقاب



















ع فكره بهزر اوعى تزعلى
لا بجد والله جميله خالص
ماشاء الله عليكى يابنتى كل ده عشان بغيب عنك شويه مواهبك بتطلع اكتر واكتر حسه انى لو غبت سنه كامله كده ولا حاجه هرجع هلاقيكى بيبي تانيه خالص
افتكرى الجمايل دى بس
يلا منتظره اشوف اكتر

[عتاب]

المشاركة الأصلية بواسطة The Caesar

برافو ..عتاب

قصه قصيره ممتعه ..أحم أحم ..انا دلوقتي هاعتبر نفسي ناقد فني وروائي..ماشي
بصي يا بنتي يا عتاب ..انتي عاندك الموهبه ..قويه ..أسلوب رقيق..وكلمات رقيقه ..الحس الفني عالي..والتركيز علي الفكره موجود ..بشكل قوي..القصه الامل..والبطله أمل..قصه حب من طرف واحد ..او كانت تعتقد انه من طرف..واحد وفي انتظار الامل ..حتي تبينت الحقيقه .ان الامر كله قصه حب مثاليه ..بها وفاء واخلاص ومعاناه..و أحتراق المشاعر ..فاهمه حاجه من الكلام ده
المعني بيوصل بسهوله جدا ً بدون تعقيد او خروج ..من سياق الفكره ..وبشكل.لا يبعث علي الممل
ومع احترامي لاريء redrose فأن الفكره تمت معالجتها بشكل جديد ..تماماً
بجد عاندك الموهبه قويه ..وصادقه ..
يعني مفيش حاجه اسمها اول واخر مره ..لازم نشوف كتاباتك ..الممتعه ..مع تمنياتي بالتوفيق !!
مش قصدي علي الفوز لاني بنافس بقصتين..اقصدي بالتوفيق في الكتابه عموما ً

طبعا لازم افرح جدا لما القصة تعجب سيزر
اللي هو اساسا قصصه رائعة
لا وكمان بيضحي بنفسه وعاوز قصص تانية
الله يكون في عونك .فعلا انت انتحاري

[مستكة]

ايه ده كله ايه ده كله

ياريتك اشتغلتي من زمان يا حجه عتاب عشان المواهب الدفينه دي تطلع

عمري ما هنسي اول ما اتعرفت عليكي وقلتلك ليكي خواطر ؟

قلتيلي ساعتها لي بس لنفسي بس مش بطلعها لكائن من يكون

الحمد لله ان الحصار اتفك واصبحتي تعذبي عامة الشعب بخواطرك

لا بجد يا عتوبه اذا كانت دي اول محاوله ليكي وجميله كده

يبقي اكيد الجاي احلي باذن الله

مادام عندك الاحساس سيبي قلمك يكتب متئيديهوش

فيه امل فيكي يابنتي والله

بالنسبه للقصه واحداثها فهي رومانسيه اوي وعجبتني جدا

بس تفتكري فيه حد كده انهارده لسه !!

وانا بقرئها توقعت ان في النهايه امل هتلاقي محمود اتجوز خلاص

وانها هتندم انها مدتلوش فرصه .. يعني نهايه واقعيه زي اللي بيحصل لاي حد

كمان نكديه لانك وعدتينا تنكدي علينا .. بس توقعاتي طلعت اوت المره دي

[عتاب]

المشاركة الأصلية بواسطة نورالقمر

ليه مين فين
عملنا فيكى ايه يابيبي
دا اانا بحبك والله
ايوه رحم الله امرىء عرف قدر نفسه
اول واخر مره
تانى مره هتضيع فيها رقاب

ع فكره بهزر اوعى تزعلى
لا بجد والله جميله خالص
ماشاء الله عليكى يابنتى كل ده عشان بغيب عنك شويه مواهبك بتطلع اكتر واكتر حسه انى لو غبت سنه كامله كده ولا حاجه هرجع هلاقيكى بيبي تانيه خالص
افتكرى الجمايل دى بس
يلا منتظره اشوف اكتر

انتي بتقولي فيها يابنتي
انتي عارفة غيابك وغياب شروق ومستكة عني بيعمل فيا ايه
ربنا مايحرمني منكم ابدا

غيابك خلاني اكتب شعر وكمان قصص
وياعالم بكرة هاكتب ايه كمان (هاكتب كتابي بقا )
مبسوطة اوي جدا خالص ان القصة عجبتكم
ويارب دايما ازهقكم بكتاباتي
نورتي الموضوع يا قمر

[عتاب]

المشاركة الأصلية بواسطة مستكة

ايه ده كله ايه ده كله

ياريتك اشتغلتي من زمان يا حجه عتاب عشان المواهب الدفينه دي تطلع

عمري ما هنسي اول ما اتعرفت عليكي وقلتلك ليكي خواطر ؟

قلتيلي ساعتها لي بس لنفسي بس مش بطلعها لكائن من يكون

الحمد لله ان الحصار اتفك واصبحتي تعذبي عامة الشعب بخواطرك

لا بجد يا عتوبه اذا كانت دي اول محاوله ليكي وجميله كده

يبقي اكيد الجاي احلي باذن الله

مادام عندك الاحساس سيبي قلمك يكتب متئيديهوش

فيه امل فيكي يابنتي والله

بالنسبه للقصه واحداثها فهي رومانسيه اوي وعجبتني جدا

بس تفتكري فيه حد كده انهارده لسه !!

وانا بقرئها توقعت ان في النهايه امل هتلاقي محمود اتجوز خلاص

وانها هتندم انها مدتلوش فرصه .. يعني نهايه واقعيه زي اللي بيحصل لاي حد

كمان نكديه لانك وعدتينا تنكدي علينا .. بس توقعاتي طلعت اوت المره دي

ميرسي يا مستكتى على كلامك الحلو ده
بس برده يا توكا فيه خواطر بكتبها لنفسي مش لعامة الشعب
والله يا اختي ماعرفش الوحي نزل عليا امتى يعني اقعد العمر الطويل ده (مش طويل اوي ) ماكتبش حاجة
ومن 3 شهور بس لما اشتغل وابقى مشغولة الاقي نفسي بكتب شعر وقصص كمان
انا مستغرباني . شكلي كده باودع وعايزة الحق اعملي حاجة مفيدة
انا كنت وعدتك انكد عليكي زي مانتى عايزة بس القصة فيها جزء مؤلم بالفعل وهي حيرة كل طرف منهم ياترى التاني بيحبه ولسه فاكره والا لا . وبعد كل الحيرة دي ماحبيتش النهاية كمان تكون نكدية وتقليدية (ماهو طبيعي هايسافر وينساها ويتجوز كلهم بيعملوا كده )
تسلمي حبيبتى على المرور ومشاركتك الجميلة

[مستكة]

لا شكر علي واجب ياختي

بس انا بقصد نكد من النوع التاني

حاجه كده من اللي بالك فيها

حاجه زي الحته اللي شوفتيها .. الناس فرحانه ومبسوطه زهقوا بئه عايزين شوية نكد

يلا جهزلنا انتي بس حاجه كده وانا مستعدة بالمناديل

منتظره اهو

[عتاب]

هههههههههههههههههههههههههه
الحتة اللي شفتها دي ايه
هو احنا في غرزة والا محل اقمشة
الحتة اللي شفتها عندك يصعب عليا الناس اكتبلهم زيها
و انتي مصممة نزليهالهم في المنتدى
خلي الشعب يتنكد ههههههههه

[بنت اسكندرية]

جميلة يا عتاب اوى

واحلى حاجة فيها انها رومانسية وفي نفس الوقت مش مملة

يعنى مكتوبة كويس ,, تسلم ايدكي حبيبتى وما تحرميناش من الحاجات الحلوة دى

[Honey1900]

حلوة اوي

بس تحمل نهاية درامية , اسلوب جميل و انسيابي

كل التقدير

[عتاب]

المشاركة الأصلية بواسطة بنت اسكندرية

جميلة يا عتاب اوى

واحلى حاجة فيها انها رومانسية وفي نفس الوقت مش مملة

يعنى مكتوبة كويس ,, تسلم ايدكي حبيبتى وما تحرميناش من الحاجات الحلوة دى

تسلمي حبيبتي على مرورك ومشاركتك الجميلة وتشجيعك
هي اول قصة اكتبها وسعيدة جدا انها نالت اعجابكم
واتمنى اني دايما اكون عند حسن ظنكم

[omarr]

عتاب ..

احب اسجل حضورى عندك .. القصه جميله عتاب .. وخاصه ان البنت البطله

حبها كان حب حقيقى بالرغم من كتمانها لمشاعرها ..

لوهله الأولى افتكرت الشاب تزوج ..او انه كان معه خطيبته .. او شىء من هذا القبيل

تسلم ايدك ..