شغبطه ..

[The Caesar]

شغبطه

من زمان وانا بحب الشغبطه ..ومع الوقت عرفت ان الموضوع له اثار تاريخيه
فما كان يفعله المصريين القدماء علي جدران المعابد والمقابر..ليس ..سوي شغبطه
الكاتب المصري الذي يجلس القرفصاء هل يعرف احد ماذا كان يكتب؟
بالطبع لا ..اكيد كان بيشغبط
عندما يوقع الفرعون علي وثيقه بالقاء معارضيه للتماسيح ..كيف كان يوقع
بالتاكيد كان يشغبط..
ثم عندما اتجول في قاعات التاريخ لا اري سوي المزيد من الشغبطه ...في الفنون والكتابه والرسم وكل اوجه التعبير الانساني..الي ان وصل الامر الامر الا الشغبطه الاكترونيه الان..وشغبطه الدستور حاليا ً
في الجامعه كنت عندما " يهديني الله " ويجيلي نفس احضر محاضره كنت استمع الي الدكتور اول 10 دقائق
تقريبا ثم اجد نفسي..امسك دفتري و قلمي واسجل كل افكار معاليه العلميه علي شكل دوائر وخطوط متاطعه..واخري مستقيمه واشكال فرويديه تعبر عن الكبت النفسي المستفحم من الضظط المتولد عن عمليه الاستماع لمعاليه..ويا حبذا لو ان هناك صديق او صديقه ..تستجيب لعمليه الشغبطه ..ونتنافس علي التعبير عن مكنوناتنا الدخيله برسومات لا معني لها سوي ..شغبطه
وتطور الموضوع مع الوقت ..طبعا كل حاجه صغيره لازم تكبر..بقينا نشغبط شغبطه فنيه ووضعنا قواعد انا وعده اصدقاء للشغبطه ..ومنافسات لاشكال تعبيريه ليس لها معني ...فن راقي .مش اي حد يفهمه طبعا ً
كانوا من اقرب الاصدقاء..اصدقاء الشغبطه
ومن ملاحضات عن فن الشغبطه وجدت اني لست الوحيد في هذا الفن التعبيري الراقي
فاذا صادفك الحظ و لا قدر الله وركبت المترو او اوتوبيس او ميكروباص ستجد ان هناك فنان ما قام بعرض فنه الرائع علي الجدران وعلي جلد الكراسي ..وعلي الاشجار وعلي كراسي الحدائق ..اي مساحه يمكن الكتابه عليها ستجد احدهم قد قدم فنه التعبيري..
بل حتي لاحظت ان الصحفيين اللذين يظهروا يكتبون علي ورق امام الكاميرات و مدربين كره القدم والوزراء الخ
والصحفيين في اللقاءات الحواريه التلفزيونيه ..ما نظن انهم يكتبون افكارهم ..ليس سوي شغبطه علي شكل دوائر ومربعات واشكال مختلفه ..
اذن الشغبطه وسيله لتسجيل الافكار قديمه ومعاصره
ومن منا لا يسجل خواطره ويجلس بالساعات يعبر عن مكنونات نفسه الدفينه عندما يشعر انه في حاجه ان يكتب ثم يلقي بهذه التحف الفنيه في ادراج النسيان ..اعتقد معظمنا...
هذه المذكرات او الخواطر ما هي الا شغبطه ادبيه ..معظمها غير قابل للنشر العام
لذا في هذا الموضوع هانشغبط .
كلام ليس له تقسيم محدد ..هو اقرب للفضفضه ..اي فكره تاتي علي بالي او بالكم ..وعايزين نشغبطها
ها نحطها هنا .ونناقش شغبطتنا دي .يمكن تكون لها معني او ليس لها معني ..فاي يعني
كانوا بيضربوا زمان المثل عن ان الانسان اصله مش قرد انك لو اعطيت قرد اله كاتبه لن يكتب لك قصيده من قصائد شكسبير ..لكن لم يعطي احد قرد اي اله كاتبه لنري النتيجه
محدش يفهم غلط
المعني الباطني مش مطلوب هنا..انا قصدي اننا كل واحد قدامه اله كاتبه ..كي بورد ..
فيورينا انه شكسبير.علي قد ما يقدر
ما علينا يالا نشغبط ونسيبنا من المقدمات الطويله

[The Caesar]

الشغبطه الاولي


اجلس احتسي القهوه .وامر علي الاخبار الجميله ...
يا ساتر يا رب
يا الله
ارحمنا يا رب
القهوه تبرد..
فاعد كوب اخربعد ان شعرت بحاله من الاكتئاب والرغبه في شرب مزيد من القهوه
اقرر عدم المرور علي اي قنوات اخباريه ولا صفحات اخباريه
مفيش غير قنوات الاغاني
يا الله
يا ساتر يا رب
ارحمنا يارب
ليه يا بنتي تعملي في نفسك كده ..كل ده علشان الفلوس والشهره ...
القهوه لا تبرد هذه المره ..بل اسكبها من مرارتها ..فيبدو اني لم اعد استطعم الاشياء جيدا ً
هوه الشاي ..مفيش غير الشاي اللي ممكن يرجع بالواحد الا الاتزان ..ويظبط الدماغ يا سلام عليه
كوب من الشاي سكر زياده ..مع بضع قطه من البسكوت الساده .ايه ده انا في الجنه ...
قررت عدم النظر الي قنوات الاغاني .
مفيش غير قنوات الافلام
عربي ولا اجنبي
اعتقد الاجنبي اكثر تشويقا
البطل ..يا ولد ..ايه المرونه دي..عمال يضرب في الخلق..كان عضلاته دي كاوتش
ومطاراد بالسيارت.. وسيارت حرام عليكم التعقيد ده ..سيارت تحفه واخر موديلات عماله تتبهدل وتدمر
والملايين من الرصاصات ..وناس بتموت بس البطل ..مفيش خدش بسيط ..
ويخرج احدهم ار بي جي ..يبدو انه عربي .لانه ينطق بكلام غير مفهوم زي خناق البط ..لكنه اسمه حمزه
ويضرب الار ب جيه فطبعا العرب اغبياء ..زي ما الفيلم بيوضح فالقذيفه يفجرها العربي في نفسه ..
وتظهر هيلكوبتر يقودها شرير ما ..يرتدي عمه افغانستانيه ..اشاره علي العرب..
واللعاب يتساقط من فمه ..ويطارد البطل المعجزه ويطارده بملايين اخري من الطلقات والصواريخ
يا الله البطل ده ايه جامد اوي..عمال يراوغ ويتحرك ايه صرصار بيجري...يا ولد
احول القناه ...لاجد احدهم يتكلم عن تعديل الدستور ومدي اهميته للرخاء الاقتصادي المنتظر
والعدل الاجتماعي المنتظر...الخ
فاقرر ان اعود مره اخري بملء ارادتي الي الفيلم الاجنبي

[duha]

اهلا قيصر
ممكن اشغبط معاك شويه
انا لما امسك القلم لا اعرف اشغبط لكن ابدا برسم دائرة صغيرة او مربع صغير يتسع ويزداد حجمه وبخط متصل وبدقه متناهيه. واهم شئ الدقهفي الخطوط
ما علينا اليوم قلت يمكن مع الكيبورد هاعرف اشغبط شويه
انه صباح ربيعي جميل الجو مشمس مع نسمات باردة رقيقه رائحه ازهار البرتقال تملا المكان وشدو العصافير وتغريد البلابل يعج بالمكان كل شئ يدعوك للانطلاق
انا وحدي في غرفه موصده لا اقوى على الخروج كل شئ خارجا بشع ومخيف
ادرت الراديو . الله انها ماجدة الرومي كم هو رقيق صوتها وهي تغني
يا ريت فينا بننسرق سرقه
عاجناح شي ورقه
عم بيطيرها الهوا
ونحنا سوا
تحت السما الزرقا
فكرت انه ليس من الضرورة ان يكون معي احد حتى لو كنت وحدي المهم اطير المهم ان اكون على ظهر تلك الورقه اللي يطيرها الهوا تحت السما الزرقا
يا ريت
والريح
تاخذنا الريح
تمرجحنا الريح
تباعد مطارحنا
تصير الدنيا نحنا
ونحنا نصير
نطير نطير
يا ريت
يا ريت اطير وابعد عن مطاحنا ابعد عن هنا ابعد عن كل مله صله ب هنا
وتذكرت عبد الرحمن منيف حين يقول في رائعته شرق المتوسط كم هو عبقري عبد الرحمن منيف
(وعندما وصلت الى الحدود وقبل ان اخرج تمنيت ان ا...... على ارض الوطن)
بالتاكيد لن افعل مثلما تمنى عبد الرحمن منيف لكن يكفيني ان اطير
ان ابتعد
واطير
يا ريت
يا ريت فينا نطير
عاجوانح عصافير
نطير

[The Caesar]

[center]ضحي .مرحبا بكي ..وبشغبطتك ..
حلم الطيران دفع ثمنه الكثيرين .ابتداء من بن الهيثم ...ثم الكثير من الضحايا..حتي انا طرت..ودفعت ثمن التذاكر غاليا ً
اخشي عليكي من الطيران لوحدك ..فيه انظمه رصد متطوره ..تلاقي وراكي صواريخ ايه حاجه حلوه كده
..
حلمك جميل ضحي ..بس اللي بيبعد عن اصله بيبقي مسخ مالوش طعم ..صدقيني
في انتظار المزيد من شغبطتك ضحي

[نيهال]

شغبطه؟
معنديش اى مانع..


حطيت الكيبورد على رجلى.......لان ده انسب مكان ليه
وقمت شغلت كوكتيل هادى جدا.......

اتمنيت امنيه ان الميزان بتاعى ميجيش الاسبوع اللى فات
وسالتنى ورد هوه ايه الموضوع
بس مكنش فيه الوقت انى اشرح لها
المهم كانت امنيه وللاسف لم تتحقق
المهم الاسبوع كان ملخبط.......
اضحك قوى
ومره واحده اقعد اعيط.......خدتنى منى فى حضنها وبكيت................عارفه ان تفكيرى مش ليه نهايه
بس يا ريتنى ما جيت ولا سيبت موقعى
عارفه ان العمال قادرين انهم يضحكونى
فى اليوم ده الصبح
داخله عليهم
بحاول اضحك.........مجرد انى اقولهم صبح الخير وتلاقى حد بيضحكلك وبيقوللك كلام جميل
تنسى كل الحزن اللى بيك......ولو للحظه
يا عم سالم غنيلى ممكن؟
هههههه
والله ده اللى حصل
محبتش حالى يتغير ....همه ملهمشى ذنب يقلقوا عليا
وخصوصا ان كل حاجه محلوله .....بس انا اللى مش عارفه مالى .......
جايز لان مش كل حاجه بعوزها بتكون ليا
...مش راضيه بحالى مع انه ممكن يكون احسن لناس كتير
مسكت القلم الرصاص وكتبت اللى حاسه بيه جايز اهدى شويه
قطعت الورقه..مش عايزه حد يقرا اللى بكتبه..........قطعتها حتت صغيره قوى
ورميتها فى الهوا.....................يا باشمهندسه مالك حالك متغير؟


شويه وفرحت قوى...........وعلى اد فرحى ........بكيت بعدها





حارجع تانى اكمل بقيه الشغبطه


بس بليز
مش حد يحاول يحلل اى كلام فى اى كلام
لانى عن نفسى..مش فاهمه ومش عايزه افهم

[The Caesar]

مرحبا ً بالاميره ............الصغيره ..وبشغبطتها ..
لن اسيء فهم شغبطتك ..
المهم انك تكوني مبسوطه وانتي بتشخبطي وتكوني انبسطتي..في انتظار المزيد..

[Honey1900]

عجبتني شخبطاتكو

شوية و هرجع يمكن اشخبط

[The Caesar]

علي طول الحياه
نقابل ناس ونعرف ناس
و بيدور الزمان بينا
يغير لون ليالينا
ونتوه بين الزحام والناس
ويمكن ننسي كل الناس
ولا ننسي حبايبنا
اعز الناس حبايبنا
***
يا سلام عليك يا حليم ايه الروعه دي
اعز الناس ..
***
قيمه ان يكون لك اهل واب وام وناس تسال عنك .....
حتي وقت قريب لم اكن اعرف معني ان يكون الانسان يتيم ..ولا اشعر بالمعني البليغ الذي يقول فيه المصطفي علي الصلاه والسلام
" انا وكافل اليتيم في الجنه كهاتين ..واشار باصبعيه السبابه والوسطي.." عليه الصلاه والسلام
يجعل من كافل اليتيم ..رفيق له في الجنه..يا الله
ما سر ان يكون كافل اليتيم بهذه الدرجه الكبيره ..حتي يكون مقرب بهذه لدرجه من خير الخلق
حتي رأيت الاطفال الايتام ..تلك الاملائكه الصغيره ..التي..لا اعرف ظروف انها بلا اب ولا ام ولا اهل يسألون عنهم..سوي متطوعين لفعل الخير
كيف يشب ه>ا الطفل او الطفله بدون ان يجد ام تحن عليه او اب يرعاه ويوجهه
ويكون مصيره مرتبط باحسان وكرم و بالخير الموجود لدي الاخرين
لكن مهما عظم هذا الخير..لا اعتقد ان هناك شي يعوضهم عن نعمه الام والاب
ان تكبر تلك الصغيره لا تجد ام تشاركها افراحها ..ولا اسرارها ولا تفاصيل حياتها ومشاكلها
ولاقدوه
يا الله كم ان نعمه الاب والام ..من اكبر النعم ...وربما لا نقدرهم حق قدرهم حتي نري من هم محرومين منها....
يا الله يا رب العالمين ..يا رحمن يا رحيم ..قدرنا علي اسعادهم وارضائهم ...وازرع الحب في قلوبنا تجاه عبادك المحرومين من هذه النعمه يا رب العالمين

[نيهال]

المشاركة الأصلية بواسطة The Caesar

مرحبا ً بالاميره ............الصغيره ..وبشغبطتها ..

لن اسيء فهم شغبطتك ..

المهم انك تكوني مبسوطه وانتي بتشخبطي وتكوني انبسطتي..في انتظار المزيد..

احم احم
الحمد لله اكيد راح اكون مبسوطه مدام ليا اصدقاء زيكم يا .......القيصر
ربنا مش يحرمنى من وقوفكم جانبى


اتغدى الاول وحقعد اشخبط شويه...فرصه قبل ما ارجع الشغل

[yoya]

الحقيقة انا كتير اما اكون زعلانة او متضايقة او زهقانة بجيب الورقة والقلم و وابدأ فى فن الشغبطة

ساعات الشغبطة بتطلع معايا كدة

وساعات بتبقى كدة
وممكن اوى تبقى كدة
وفى الغالب بتبقى كدة
بس بجد انا عايزة اعمل مسابقة للشغبطة فى المنتدى ان شاء الله تعجبكم

[عتاب]

موضوع جميل اوي يا سيزر
هاشخبط معاكم شوية

روحت الشغل ي عادتي كل يوم
احساسي انه يوم عادي زي غيره
لقيت زميلتي بتقولي الطلبة جايبينلك هدايا
استغربت هو النهاردة ايه يوم ميلادي عدى ومحدش من الطلبة يعرفه
اه افتكرت النهاردة عيد الام
ياااااااااااااااااه
احساس جميل اوي لما الاقي الحب ده
برغم عدم موفقتي على الاحتفال باليوم ده شرعا بس ماقدرتش امنع فرحتي باللي عملوه
قريت كلامهم الجميل اللي كتبوه على هداياهم
كلمة من ابنتك
مش قادرة اوصف احساسي وقتها رغم انهم اكبر من انهم يكونوا ابنائي او انا اصغر من اني اكون امهم
بس حقيقي حسيت اد ايه شعور الامومة شعور جميل
محدش يقدر يعرفه كويس الا اللي عاشه
افتكرت يومها وانا صغيرة لما كان ييجي يوم الام وكنت اجيب هدية لمدرسة بحبها اوي وكنت باكتبلها من ابنتك ..... ضحكت اوي لما افتكرت ان المدرسة دي اكبر مني ب9 سنين بس ومع ذلك اعتبرتها امي
وافتكرتها وافتكرت ان علاقتي بيها دلوقت صداقة واخوه
واتمنيت ييجي اليوم اللي اكون فيه صديقة بجد لتلميذاتي
وعرفت ان اللي عملته زمان بيترد ليا دلوقت
كما تدين تدان

[مستكة]

الجيل الحالي من الاطفال مختلف كتير عن جيلنا

كمان التعليم اسلوبه اختلف .. طيب ماهو طبيعي مش معقول هيفضل هو هواه النظام لكل الاجيال

بس هو احنا عندنا تعليم ؟؟؟


لا لا المشكله مش في التعليم المشكله في قيم معدتش موجوده اصلا زمان كانت نسبة الاميه اكتر من دلوقتي بس الناس عندهم قيم


طيب ماهي القيم راحت بسبب الماده اللي بتحكم كل شيء .... هو احنا عندنا ماده ؟؟؟


ما علينا ... كل حاجه اتغيرت

المفروض اننا بنتقدم مش بنتاخر لكن اللي بيحصل هو العكس

يعني كل يوم بنقل في كل حاجه ماديا واخلاقيا مفاهيمنا نفسها بقت مشوهه

التناقض هو العامل الاساسي في كل شيء

فيه سطحيه عجيبه في التعامل وطريقة التفكير انا مندهشه ليها

اقل ما يقال انه الاستهبال شغال علي ودنه

استهبال الطالب علي المدرس واستهبال المدرس علي الطالب وعلي طريقة اداؤه

استهبال الموظف في عمله واستهبال الهيئات مع عملائها وموظفيها

استهبال النظام نفسه

فيه استخفاف غريب مقدرش اتعامل بيه مع طفل في كي جي وان

لانه مش هيتقبل المبرارات العبيطه دي

لكن مع الاسف وعلي الرغم من اننا كلنا عارفين انه كله ضحك علي الدقون

وعارفين مدي العبط الا اننا بنقبل بيه امور مسلمه

ياتري ليه ؟؟

قلة حيله ؟؟ غباء ؟؟ امل في مستقبل افضل ؟؟ كسل ؟؟

( ارسل الاجابه الصحيحه يمكن تكسب )

في النهايه حياتنا كلها عباره عن سمك لبن تمر هندي

[مستكة]

اه سوري نسيت اقول اني بشخبط في الورق بحاجات كتيره رسومات

وبما اني معرفش اعملها هنا

قلت اما انكد عليكم باللي بيدور في دماغي

يلا باه عليكم الاستحمال

[عتاب]

المشاركة الأصلية بواسطة مستكة

اه سوري نسيت اقول اني بشخبط في الورق بحاجات كتيره رسومات

وبما اني معرفش اعملها هنا

قلت اما انكد عليكم باللي بيدور في دماغي

يلا باه عليكم الاستحمال

اهو ده اللي كنت خايفة منه
يابنتى كل الناس تشخبط الا انتي
بلاش الحاجات الغريبة اللي في دماغك دي تطلع
والا هانتحول كلنا على اللومان
وخصوصا الدستور الجديد مايعرفش يامه ارحميني