قهوة المخربشين (5)

[amr_miza1]

واد يا سنقر ... انت يابنى هقول لعم صبحى يعلقك .. الشاى للأستاذة برديس

معاكى حق بس ليه احنا مش بيبقى عندنا نظرة سليمة وواقعية من الاول .. انا طبعا مش بقصدك انتى انا بتكلم بوجه عام ..
بس فيه هنا سؤال مهم مش عارف اجابته بصراحة
هل قناة الجزيرة بتزيد وتكبر الموضوعات لأغراض سياسية ..؟
أم انها مجرد لجذب الانتباه .. يعنى مجرد لاغراض تجارية ترويجية ؟؟

[سها soha]

اهلاا ياجماعة منورين

ولا دة نور الشمس

لاء الشمس غابت دة اكيد نوركم

اهلاا برديس منورة الكافية كلة

واسمك حلو اوى بس مش عرفة معناة

ازيك ياضحى اخبارك اية

ازيك ياعمرو كيف الحال

ازيك ياعمر بس سمعتهم بيقولولك ياحسين

ازيكم كلكم ياجماعة عاملين اية

بالنسبة لقناة الجزيرة محدش يقدر انها قناة كويسة

بس مش عارفة لية بحس ان الاعلام العربى ما بيقدمش الحقيقة كاملة

دة ممكن يكون لة سبب سياسى

لاء مش ممكن دة اكيد

ولا اية

بما ان عمرو صاحب الموضوع يبقى هو الى يتكفل المشاريب

اعزمنى يلا اطلبلى واحد ارفة باللبن

خلاص ياجماعة والله ما نتوا دافعين عمرو فك الكيس يلا

:

[برديس]

ايوه كده وصى عليا

بالنسبه لنظره الواقعيه على ما اعتقد ان الانسان العربى والمصرى خاصه
دايما عاطفته غالبه عليه ياعنى مش بيحكم عقله قوى
وعلشان كده بيقع فى مشاكل كتير وتلاقيه بيتنرفز وبعد ما يهدا ويفكر بالعقل
يقول انا عملت كده ليه مش عارفه صح ولا غلط
اما بالنسبه لقناة الجزيره فاعتقد انها لاغراض سياسيه لان لو تجاريه فى
كذا وسيله لشد انتباه المشاهد غير فبركة الاخبار وتضخيم الشى والى يغيظ
لو لاحظت هتلاقى الاخبار المصريه فقط اى حاجه تحصل بيكبروها زياده عن الازم
زى الى حصل فى اسكندريه وقالوا ان فيه فتنه طائفيه وقامت الدنيا على مصر
وقالو ان المسحين مضهدين فى مصر وهكذا وهكذا كذا حاجه ياعنى مش دى بس

واضح ان الشاى مش جاى اقوم اعمله لنفسى وخلاص

[برديس]

اهلا يا سها ده نورك
بس انتى كده بدبسى عمرو يلا بقا خليها عليه
بجد انا كمان مش عارفه معنى الاسم
لكن عمرو قال انه هيضور على معناه ياريت يلاقيه لانى
فعلا عايزه اعرف معناه
انا ضورت فى المعجم الوسيط ومعرفتش اطلعه

[amr_miza1]

قرفة باللبن !!!
انا قولت دى هتفتح ع الرابع وتطلب عصير فريش والا حاجة .. قرفة؟! هات قرفة يابنى لأبلتك سها

موضوع الحقيقة الكاملة دا يا سها صعب جدا بس فيه بردة قنوات كويسة زى العربية والحرة معتدلة بردة
بس انتى رأيك يعنى ان الجزيرة بتزايد وبتكبر الأمور لأغراض سياسية ..

طيب من رأيك ايه مصلحتها من كدا .. وخصوصا ان قطر مالهاش اى دور سياسى فى المنطقة ..
وبصراحة انا كنت سمعت ناس بتقول ان الجزيرة بتاخد دعم امريكى وبتعمل لمصلحة امريكا .. بس انا بصراحة مش الكلام دا 100 %

هى ممكن تكون مصالحها امريكية بس طبعا هى مش محتاجة دعم من امريكا ,,
والا ايه رأيكم
!!
فين القرفة يابنى .. هتخلى الاستاذة سها تقول عليا بخيل والا ايه

[amr_miza1]

برديس

كلمة لاتينية تعني الجنة والفردوس

تصدقى طلع اسم جميل اوى

[برديس]

الله والله طلع معنى الاسم جميل اوى انا كده حبيته اكتر
متشكره اوى يا عمرو

طبعا واضح ان مصلحها امريكيه وازاى بقا مش محتاجه دعم من امريكا
فى دوله عربيه مش محتاجه دعم من امريكا انت ايه رايك

[amr_miza1]

ولا شكر ولا حاجة مايهمكيش .. هات يا سنقر حاجة ساقعة للأستاذة برديس .. جاين عليا النهاردة بخسارة .. كان ايه اللى جابنى

الدعم المالى معتقدش ان القناة محتاجاه من امريكا
وخصوصا ان قطر مش ناقصة فلوس ما شاء الله مش بحسد يعنى
واكيد فيه جهات كتير جدا بتدعم القناة زى قطر للبترول وغيرها ..

[برديس]

متشكره اوى على الحاجه الساقعه بس يا خصاره انا مبشربهاش
ممكن يكون اى عصير يلا يا سنقر غير الطلب

انا كمان ماعتقدش انها محتاجه دعم مادى
مش عارفه ايه السبب بصراحه
ايه يا سها رحتى فين

[amr_miza1]

ماهو السبب هو انها مش محتاجة .. دولة غنية تقدر تصرف على 50 قناة زى الجزيرة كدا

عموما الواحد لما حدث يمر قدامه او برنامج او مقال .. لازم يشوف رأية الشخصى ويعمل نقد بعلقيته وحياديته . وما يندفعش ورا كلام وخلاص

مش عارف سها راحت فين دى حتى سابت القرفة لغاية ما بردت

اشربها انا بقى .. طالما هدفع حسابها

[omarr]

عمروووووووووووووو انا لسه راجع ..... هات يا سنقر كرسى ...

عم صبحى هاتجيب حاجه نشربها ولا زى كل مره ..

اهلا برديس .... اهلا سها

قناه الجزيره ألأخباريه مهتمه باحداث الشرق الأوسط وتركز على العالم العربى
لكن هناك مشكله منيله بنيله وفى منتهى الخطوره . انها عندما تنقل المسالخ و المذابح التى
يتعرض لها المسلمين والعرب لا يصدر عنها اى موقف سياسى او دينى تجاه الأحداث
عشان قال ايه .. هى قناه اخباريه تلتزم بمبداء الحياديه ...!!!!!!!!!!!

وطبعا اللى شاف ال السى ان ان و كثيرا من تلك القنوات الحياديه اثناء تعرض امريكا لأحداث 11 سبتمبر وجد انه هناك تنسيق تام بين الحكومه الأمريكيه وما يتم عرضه و كان واضح انه مافيش حياديه الوضح انه كان فيه مؤازره و كانت تلك القنوات عندما تعرضت اوطانها للخطر وقفت الى جانبها قلبا وقالبا ولغايه النهارده ما حدش بيشوف جندى امريكى ميت على اى من تلك القنوات بما
فيها الجزيره نفسها .

لكن بالنسبه للعرب والمسلمين نلاقى الجزيره تعرض كل يوم فرق الموت و قطيع الموتى و اطنان من الأشلاء البشريه دون ان يطرف لها جفن و لا يصدر عنها رأى .وده اللى جعلنى ابعد عنها ..

انا مش عايز قناه عربيه تعرض اللى بيحصل .. انا عايز قناه عربيه تشرح لى ايه اللى بيحصل

وطبعا فيه فرق كبير بين الحالتين .. وعلى رأى آبله نظيفه .. القطنه ما بتدكبش

عم صبحى هاتجيب حاجه نطفحها ولا ارمى نفسى تحت عربيه

[wael.galal]

السلام عليكم ورحمة الله وبركاته شكرا علي الترحيب وديه أول مرة أدلي برأي في القهوة وكما تعودت أنا وأصدقائي بس كانت القهوة مختلفة شوية (بدون بنات) المهم
موضوع قناة الجزيرة ده أثرناه مرة وطلع عليها أنها قناة عملية لليهود وفيها مذيعين يهود تقريبا أتنين
ومنهم من قال أنها تبع أمريكا
ومنهم من قال أنها قناة تقوم بتنوير الشعوب ورفع الصوات المفونه في أوطانهم ولكن
توجد دلائل علي أنها ليست عملية وهذا للأسباب الاتية :-
وكيف تكون عميله وامريكا ضربت مكتبها مرتين مره في كابول ومره في بغداد .
وكيف تكون عميله و مصورها سامي الحاج في غوانتنامو بدون ذكر اسباب ...
وكيف تكون عميله والضغوط عليها وعلى قطر متلتله من امريكا ..

وأصبح الإختلاف في الدلائل
ولكن ماذا تشاهد علي الجزيرة مذابح الملسمين لماذا؟
هل سنثأر يوم لهم ؟
هل سيشعل نار الغيرة فينا ؟
وما هي الفائدة أن تشعل نار الغيرة علي المقدسات ( الحكام واقفون أمامك وأتذكر يوم الاتوبيس في الجامعة عندما ذهب طلاب إلي القدس وعندما وصلوا رجعوا بخفين حنين )
أما عن نفسي كنت أتابعها يوميا لمعرفة أخبار الملسمين والبلد أيه
وأنا بحب أتابع الأخبار أول بأول وحتي ولو كان فيها شيء من تكبير أو الفرقعة الإعلامية فهذا هو دور الإعلام
فقد روى الطبراني عن حذيفة أن النبي صلى الله عليه وسلم قال: (من لم يهتم بأمر المسلمين فليس منهم، ومن لم يمس ويصبح ناصحاً لله ولكتابه ولرسوله ولأئمة المسلمين وعامتهم فليس منهم)


والله أعلم

[duha]

السلام عليكم
اهلا برديس منورة القهوة
اهلا سها
عمر وعمرو
وكل اللي هنا
ازايك عمو صبحي الحقني بالقهوة المظبوطة اصل الكلام عن الاعلام العربي يوجع الدماغ
بجد الاعلام العربي سبب تخلفنا وتاخرنا واتمنى اعرف اعلامنا يعمل لصالح من
اول شئ بس احب انقل خبر حديث جدا نقلته قناه الجزيرة
في دورة الالعاب العربيه العراق حصل على المركز السابع وكل المتابعين يعرفون كيف حال العراق وكيف هي ظروفه يكفي ان اقول ان السنه الماضيه فريق سباب التايكواندو حصل على ميداليه ذهبيه في احدى البطولات وعند عودته اختطف الفريق بالكامل وذبح جميع افراده وهم شباب دون السابعه عشرة
الخبر الذي نقلته قناه الجزيرة هو ان العراق حصل على المركز السادس عشر وهي نتيجه ممتازة نسبه للظروف التي يمر بها العراق
نفسي افهم لما العراق احرز المركز السابع ليه قناه الجزيرة تقول انه حصل على المركز السادس عشر
نفسي حد يفهمني
المهم اعتقد ان 90% مما يمر به العراق من فتنه واقتتال سببه قناه الجزيره
ولنترك الجزيرة جانبا
اعلامنا العربي يعاني من حاله غباء مزمنة وكما تعلمون ان الغباء موهبه فان اعلامنا ينفرد بهذه الموهبه بل يحتكرها له لوحده
لو تركنا القنوات الموجهة سياسيا جانبا لاننا عارفين اهدافها ومن يوجهها
ولو تركنا القنوات الخاصه جانبا (رغم ما تسببه من امراض اجتماعيه خطيرة) لاننا نعرف اهدافها
لكن
ان تقوم القنوات العربيه بتضخيم الاحداث (تعمل من الحبه قبه) وتجعل من لاشئ حدث حقيقي
يؤثر سلبا على المجتمعات شئ غير مفهوم حقا

[omarr]

وائل , ضحى , عمرو , تصوروا انا كنت فاكر اننى انا بس اللى مش بحب القناه ديه .


عم صبحى هاتجيب حاجه نشربها , و لا انت شكلك كده تبع الجزيره

[Dr-Ayat]

واد يا سنقر نزل مشاريب لكل رواد القهوة النهاردة كله على حسابي

انا خلصت امتحانااااااات والأجازة ابتدت