قهوة المخربشين (5)

[amr_miza1]

صباح الخير على كل المخربشين ..

ابتسامة ازيك .. امبارح لما أكلت المسقعة .. مش قادر اوصفلك ايه اللى حصل .. حسبى الله ونعم الوكييييل

حسين صباح الخير عليك ..

جناب العمدة .. الشاعر الكبير .. ربنا يقويك ومنتظرينك

سيزر . حساب النسكافيه عندى

برديس .. بردة لسه واخدة الاجازة ومفيش حد بيروح المدرسة

اعملى شاااااااااى يا سنقر .. تقيل وسكر برة

[برديس]

مساء الخير على كل المخربشين
علشان منساش حد
ايوه يا عمرو احسدنا بقا على اليومين الى مريحنهم
خلاص يا عم كلها اسبوع وهنكون فى حوسه ما يعلم بيها الا ربنا
ربنا يستر

بمناسبه الحسد الدكتوره ايات كانت فتحت الموضوع ده قبل كده
وسبناه ومتنقشناش فيه
انتوا ايه رايكوا نفتحوا تانى

[amr_miza1]

ايوا يا برديس .. موضوع الحسد فعلا موجود بس الواحد مش بيحب يفكر فيه كتير علشان مايتعبش ..

انا حصل معايا موقف كدا اعتقد انه حكيته قبل كدا .. بنت قالتلى مرة ايه دا انت عنيك خضرا .. وبررقتلى كدا ... روحت البيت وعنيا دى كانت هتطلع من دماغى من الألم .. ورحت للدكتور يومها

هي مبقتش خضرا خلاص .. بقت مشمشى.. انا بقول كدا علشان الحسد يعنى ههههههههه

[amr_miza1]

بس حسين كان اتكلم فى موضوع مهم جدا ..
مش عارف ليه الناس متكلمتش فى الموضوع .. موضوع فتاوى القهاوى ..!!..!!

[برديس]

هههههههههههههه
حلوه يا عمرو حكايه مشمشى دى
كويس انك رحت للدكتور بس
انا بقا اتحبست فى البيت يومين بسبب
موقف زى الى حصلك
كانت عنيا خلاص حمرا ومتعرفش جالها تلوث منين
بس مش هقول لون عينى ايه

على فكره انا قلت رائى فى موضوع الاستاذ حسين ارجع صفحه للخلف

[Dr-Ayat]

سالخير ازيكم

مش عارفة انا حاسة اني محسودة النهاردة:(
مع ان الامتحان كان سهل وحليت كويس بس مش عارفة
مخنوووقة
وبخانق كل الناس
ممكن اضرب سنقر؟؟

:(
يا برديس انا مشكلتي مع الحسد مشكلة عشان ماما عملالنا قلق بسببها
يعني تبخير يوم االجمعة ولو خد كان عندنا وقال كلمة علينا من غير ما يسمي ممكن تعمل معاه مشكلة او مثلا تقوله الله اكبر الله اكبر وتحط ايديها فوشه هههههه
اينعم بيحصلنا فصول بايخة بسبب الحسد لدرجة ان مرة فيه كباية ازاز فرقعت اما كانت واحدة عندنا وقالت كلمة وماما عينك ما تشوووف اللي عملته فيها ... انا اقصد الاعتدال حلو يس والحسد موجود
بس ما نخافش من كل حاجة بسببه زي ما ماما عاملةفينا

سنقر يالا تعال اضربك

[amr_miza1]

المشاركة الأصلية بواسطة برديس

هههههههههههههه
حلوه يا عمرو حكايه مشمشى دى
كويس انك رحت للدكتور بس
انا بقا اتحبست فى البيت يومين بسبب
موقف زى الى حصلك
كانت عنيا خلاص حمرا ومتعرفش جالها تلوث منين
بس مش هقول لون عينى ايه

على فكره انا قلت رائى فى موضوع الاستاذ حسين ارجع صفحه للخلف

هههههههههههههه ماشى يا شيماء ومين قالك انى عاوز اعرف ههههههههه

والف سلامة عليكى من الحسد يا ستى هههههه .. انا بهزر على فكرة

[omarr]

الى جميع المخربشين والمخربشات .. مساء الخير ..

موضوع الحسد ...

امى لم تكن تؤمن بالحسد و من صغرى حتى تزوجت فى الثلاثين من عمرى كنت اعتقد
ان الحسد مرتبط بعالم الجن , ثم بعد ذلك عرفت انه موجود و لكن لم اكن اهتم به ادنى
اهتمام . وعندما تزوجت كنت اتناقش كثيرا معى زوجتى واختلف معها .
فهى شديده الكتمان وتعيب عليا انى بعمل نشره لو حصل لى حاجه حلوه . والأن
ومع الوقت تأثرت كثيرا ببعض افكارها عن الحسد و اعتقد انه موجود .اما تأثيره فانا فى
الحقيقه لا اعطيه اى اهتمام .. ولكنى اصبحت لا اعارض زوجتى على افكارها .

[عتاب]

اهلا بكل رواد القهوة
بقالي كتير ماقعدتش على قهوة ولا حتى شاي هههههه
المهم انا هاشرب حاجة ساقعه وبعدها هاتولي ايس كريم

نيجي بقا للمهم
الحسد
انا فعلا لحد فترة قريبة مكونتش بهتم بموضوع الحسد ده ولا بيشغل بالي
بس بعد اكتر من موقف بدأت اخد بالي (شوية صغيرين) لان صعب اغير نفسي فجأة
وانا اللي كنت اي حاجة تفرح اقولها لكل اللي في سكتي
بس حاليا بحاول اتعلم الكتمان
وربنا يسهل واعرف

[جناب العمدة]

السلام عليكم ورحمة الله وبركاته
عاملين ايه يا مخربشين .. مواضيع كتير انفتحت
وكلها مواضيع شيقة للمناقشة .
طالما مفيش حد عالقهوة الوقت يبقى اتكلم مع الواد سنقر على آخر موضوع
ياد يا سنقر ... وحياة والدك كوباية شايى تقيلة وشيشة وتعالى اقعد
جنبى واسمعنى بدون تعليق .

الحسد بالطبع الجميع متفق انه موجود بدليل القرآن وانا عانيت منه عدة مرات
اذكر مرة منهم لما خلصت الاعدادية وجبت مجموع مرتفع كان من عادتنا اننا نوزع
شربات للضيوف .. اتت لتهنئتنا احدى جارتنا ومعها ابنها الفاشل (طلع تاجر مخدرات
فيما بعد) قالتله شايف محمود مجتهد ازاى مش انت يا فاشل .
وبدون مبالغة مغص مفاجىء كان هيموتنى واخدونى على المستشفى ساعتها
جايز يكون صدفه بس الوالدة فسرت ده ساعتها على انه حسد وعنين جارتنا يندب فيها رصاصة
على حد تعبيرها .
الاغرب اللى هحكيهولكم الوقت :
تعرفوا ان فى ناس بتحسد بارادتها وترى نتيجة الحسد بام عينيك فورا .. متستغربوش
شفتها بنفسى .. واحد حاسد تراهن مع احد الناس وامامى على ان ياتيه ببلح
من النخلة من غير ما يطلعها .. نظر الحاسد الى البلح ومش فاكر الجملة اللى قالها
مثلا يااااااه دا العرجون شايل كتيير وبلح صح ......... سقط عرجون البلح فى الحال
صدقونى رايتها بام عينى .
اللهم اكفنا شره وشر الحاسد .
ايه يا سنقر مش مصدق .. شكلك مش مصدق
لا مصدق ياعمده .......... اصحاب العقول فى راحة

[uniQue]

وانا معدي حبيت بس اسلم علي جناب العمدة وعمر والشاعر اللي معندوش كلمات ( ثديقي الثدوق ) وكل ناس القهوة الطيبيين
ربنا يحفظكوا ويفرحكوا ديما

[uniQue]

وسلامي الخاص لـ oomrr وبقوله : كل سنة وانت طيب

[Dr-Ayat]

صباح الخيرات

جناب العمدة
أ\حسي
عمرو
اسلام
سيزار
متيم
هيثم
بحور
بردبس
ابتسامة
عتاب منورانا
روزي
لقاء
صباح الفل

[ابتسامة الحياة]

السلام عليكم ورحمة الله وبركاته
رواد قهوة المخربيشن
كيف حالكم جميعا

[Dr-Ayat]

ابتسامة صباح الفل اشرقت الانوار

يالا تعالي شوفي خربشاتنا في المسابقة