قهوة المخربشين (5)

[omarr]

المشاركة الأصلية بواسطة نرجسية

و خلال الثلاث سنوات
هل كنت تبحث عن زوجة بنفس التخطيط و التدبير و المثابرة
أم أن فتاة طنطا حطمت آمالك ؟

فتاه طنطا .. لم تحطم آمالى ..

وبعدها لم احاول ان اجرب مره اخرى طريقتى "العبقريه" فى البحث عن فتاه بنفسى ..

بدأت اعتقد فى صحه الطريقه التقليديه و انه قد تكون مناسبه ..

رضخت للطريقه التقليديه و قبلت ان اكون " خروفا " مسحوب من رفبته .يساق الى
بيوت الناس للعرض ..

اصبحت خروف البف .. وفكره كونى " كيس جوافه " اصبحت مقبوله .. وخاصه ان عمر الأنسان
قصير .. وصلت لسن التلاتين ولا بد ان ارضخ الى لعبه التقاليد والموروثات الثقافيه ..

والحمد لله ربنا وفقنى بعد صلوات كثيره اليه .وجدت نصفى الأخر و شريكه عمرى . التى احبها واعشقها .عشقا ...
ساعه ما شفتها .. قلت فى نفسى .. اه يابنت الأيه .. انتى كنت مستخبيه فييين ؟
قبلتها فورا .. وهى الأخرى قبلتنى فورا وخاصه اننا تربطنا بهم قرابه ما ... وانها كانت تسمع عنى
وتزوجنا بعد 10 شهور من اول مقابله ..

[duha]

رحله البحث عن عروسه
رحله جميله بصراحه انا اول مرة اسمع عن هيك مغامرة
ما كنت اتصور ان البحث عن عروسه بهالصعوبه
رحله ولا رحله كلكامش للبحث عن نبته الخلود
ولكن في الاخر يا عمر رضخت للامر الواقع و عرفت ان العروسه مخبأه لك في علم الغيب تاتيك ساعه يشاء الرحمن
باختصار قسمة ونصيب

[Dr-Ayat]

سالخير

أ\ حسين ما شاء الله كل ديه مغامرات..
وفعلا احيانا النصيب بيكون قدام عينينا ومش شايفينه..

بارك الله لك بزوجتك وعائلتك

جناب العمدة عايزين نسمع مغامرة حضرتك بقى

بكرا فيه تدبيسة للموضوع ده ممنوع الهروب.

[omarr]

ضحى ...

تسلمى لى على تفاعلك مع الموضوع ..

[omarr]

د.آيات ..

تسلمى لى على ردك وتفاعلك ..

[duha]

المشاركة الأصلية بواسطة Dr-Ayat

سالخير

جناب العمدة عايزين نسمع مغامرة حضرتك بقى

بكرا فيه تدبيسة للموضوع ده ممنوع الهروب.

يللا استعد

[omarr]

وهذه بعض الخواطر التى تمثل نفسيتى فى تلك الفتره

كتبتها لسيزار فى الشغبطه ...


لما كنت عازب ...

كنت ياسيزر فراشه بتلف حوالين النور ..
كنت رمح ...بيدور على عصفور بيطير
كنت على طول ياترى ؟ وامتى ؟ ومين ؟
كنت سايب نفسى خالص ..ماشى جوايا حنين
كنت كهربا لدعتها عقربه فانفجرت ضياء على طين
كنت بالليل ذكر وانثى .. كنت اهو اهو من الأنين
كنت ناقص نص ..مقطوع قلبى اليمين
كنت وكنت ياسيزر .. قولى بقى انت مين ؟


الشغبطه مرمطه والحب مسؤليه .

[omarr]

جناب العمده ...

هات ما عندك ...الا فلا لبى

[duha]

شغبطه حلوة يا عمر
انا قريتها في موضوع شغبطة وبجد ضحكتني
ياعيني عليكم اتاريكم متبهدلين واحنا مش دريانين
ربنا يسعدك يا عمر

[omarr]

المشاركة الأصلية بواسطة duha

شغبطه حلوة يا عمر
انا قريتها في موضوع شغبطة وبجد ضحكتني
ياعيني عليكم اتاريكم متبهدلين واحنا مش دريانين
ربنا يسعدك يا عمر

طبعا يا ضحى واكتر كمان ...

الأغتيه بتقول " من غير الست تبقى حياتك ملوخيه "

والملوخيه
او
حياه الرجل بدون انثى

هى ملوخيه ...

هى حياه ...

غير متماسكه
غامقه
اكتر مكونانها " شوربه "
سريعه العطب .. تفسد بسرعه
ملهاش لازمه .. اذا كانت وحدها ..
رخيصه ...
ناشفه ...

[جناب العمدة]

المشاركة الأصلية بواسطة Dr-Ayat

سالخير

أ\ حسين ما شاء الله كل ديه مغامرات..
وفعلا احيانا النصيب بيكون قدام عينينا ومش شايفينه..

بارك الله لك بزوجتك وعائلتك

جناب العمدة عايزين نسمع مغامرة حضرتك بقى

بكرا فيه تدبيسة للموضوع ده ممنوع الهروب.

ان شاء الله يا دكتورة
بس قصتى مش مشوقة زى حسين .

[جناب العمدة]

سبحان الله يا حسين .. قعدت تدور وربنا مخليلك نصيبك
وجنبك .. موضوعك فكرنى بصديق لى هنا مصرى طريقته طبعا
كانت غيرك خالص انت دخلت البيت من بابه بعد ما سالت من بعيد
بس هو ايه اللى عملو .... اضحك يا سيدى :
فى احدى اجازاته وكانت قصيرة وكان عايز يخطب ويتجوز بسرعة وباختياره
هو بغير الطريقة التقليدية .. قاللى انو كان كل ما يقابل واحدة فى الشارع
يعجب بشكلها يقولها انتى متجوزة او مرتبطة ... لك ان تتخيل بعض الردود
اللى كان بيقابلها .. من ضمن الردود واحده قالتلو تعالى اطلبنى من جوزى
وفى مرة راح الصيدلية يجيب علاج .. سال الدكتورة انتى متجوزة .. قالتلو
انت عايز علاج وللا عروسة .. قالها الاتنين .. قالتلو العلاج اهو والخاطبة
اعتذرت النهاردة ومش جايه .
وفى الآخر رجع من غير ما يعمل حاجة .

ربنا يسعدك ويباركلك مع شريكتك اللى اختارهالك ربنا .

[نرجسية]

مش عارفة اذا كان الشباب بيفكروا بنفس تفكيرك السابق و للا لأ يا استاذ حسين

هل الشباب بيفكر فى مغامرة و اثارة بدلاً من الزواج التقليدى اللى بيعتبروه عادات معفرة و متربة ؟

هل الشباب لا يثق فى اختيار الأسرة ؟

و ما الفرق بين الزوا التقليدى و الزواج الغير تقليدى

ماهو فى كلا الحالتين بتكون لازم فيه ما يسمى بالمقابلة الاولى

و فى كلا الحالتين اما اوافق او لا اوافق ؟

[جناب العمدة]

المشاركة الأصلية بواسطة omarr

جناب العمده ...

هات ما عندك ...الا فلا لبى

مقدرش ارفض يا سحس .. وتدبيسة آيات كمان .


البداية معايا كان الغريب فيها انى ما كنتش جاهز ماديا ومكنتش بفكر
فى الموضوع . بس كنت جالس مع احد زملاء صديق لى متدين وسالنى
انت متجوز .
لا.
طب ليه
استغربت .. دا انا لسه فى بداية حياتى ومش جاهز ماديا وقدامى حاجات كتير
قاللى بالعكس دا انت علشان ربنا يرزقك لازم تاخد خطوة فى الموضوع
انت مسمعتش حديث الرسول صلى الله عليه وسلم اللى بيقول
"من اراد سعة فى الرزق عليه بالزواج " واسترسل فى شرح الصحابة لما كانوا
بيمروا بضائقة كانوا بيسعوا فى الزواج .
المهم كلامه اقنعنى انا بس المشكلة فى اهلى واهل البنت اللى هتقدملها
فى الوقت ده كان فى زميلة لى فى العمل كانت مهتمة بى بشكل ملفت
وكنت عارف اصلها وفصلها لان بيتهم كان جنب العمل (جمعية اسلامية ) وكان الوالد
يرحمه الله بيصلى معانا فى المسجد وعارفنى وبيعزنى . وكنت باتمنى ارتبط بيها
بس كان بيمنعنى حتة المادة وكمان الاهل وتفكيرهم كما ذكر حسين . وبعض اقاربى
اعمامى وخالاتى .. كانوا مرشحين لى بناتهم وفاتحونى اكتر من مرة بشكل شبه صريح .
شوية شوية لقيت الفكرة مسيطرة على تفكيرى .. طب ما ابتدى اعرض الموضوع
على الوالدة ولو اقتنعت يبقى هتساعدنى افاتح الوالد . وخاصة انى كنت على امل
انى هعمل شىء واحقق ذاتى ماديا .. منين وازاى مكنتش عارف بس كنت مؤمن بكده
بعد تردد طوييييل فاتحت البنت وسالتها عن رايها ردت رد ايجابى وقالتلى اتفضل فى اى وقت
وكلم الوالد .. شرحتلها اصلى وفصلى وقلتلها سيبينى الاول اكلم اهلى واعرف رايهم
. تشجعت وفاتحت الوالدة وانا خايف تقول انى (خبت وانت اللى بقول عليك عاقل)
شرحتلها الموضوع وقولتلها الحديث وكان ردها سياسى يحمل بعض الحنق .
بالنسبة لاختيارك انت حر فيه بس انت مش جاهز ومش هنقدر نروح للناس نقولهم
ابننا مش جاهز وجاى يطلب ايد بنتكم انت عاقلك مش فيك ؟
اجهز واحنا نروح معاك اى مكان لاى واحدة انت تختارها .. غير كده انسى الموضوع .

يتبع

[جناب العمدة]

حسيت انى اتسرعت انى فاتحت البنت وكلمتها فى الموضوع وكان صعب
عليا انى اقولها اصرفى نظر .. قابلتها فى الشغل وحكيتلها عن اللى حصل
وقولتلها اهم عقبة امامى وهى جوازى من خارج العائلة او البلد على الاقل
دلوقت مش موجودة .. قالتلى حط رجلك على اول طريق تحقق ذاتك وانا هقنع
اهلى وهستناك .. المهم خطوة جادة .
عملت زة النحلة ادور على فرصة سفر .. من مكتب لمكتب .. من محاولة نصب
لفرص تعبانة .. الى ان وفقنى الله بعقد شركة فى السعودية .. كان العقد ضعيف
نسبيا .. بس قلت اهى فرصة يمكن اقدر اغير الامور لما اسافر واشوف الجو هناك
صليت صلاة استخارة .. والحمد لله شوفت خير .. توكلت على الله ومضيت العقد
طبعا مقدرتش افاتح اهلى تانى بعد ما عرفت رايهم .. كلمت البنت تحددلى مقابلة مع
الوالد .. تانى يوم مجاتش الشغل وسالت عليها زميلاتها قالولى دى النهاردة جايلها عريس
وجاهز ومتريش كان مسافر لبلد اوروبى وراجع اجازة وعرفت تانى يوم انها رفضتوا بسبب
العبد لله المفلس حضرتى وطبعا قلتلها انى ازاى هروح واقلهم انا مش جاهز بعد اللى كان متقدملك ده .. قالتلى انا حكيتلهم على كل حاجة وقلتلهم انى مصرة عليك .. وقالولى
خليه ييجى ونتكلم معاه .
رحت وكنت مش عارف ابدا ازاى .. قلتلهم بسرعة وكلام سريع .. انا اسمى فلان
ومن البلد الفلانى وباشتغل محاسب فى شغل بنتكم وقدامى فترة صغيرة واسافر
وووووو .. رصيتهم حتى ضحكوا من طريقتى .
الوالد الله يرحمه قاللى يا ابنى انا عارفك وعارف اخلاقك واسمع عن عيلتك .. بالنسبالى
انا معنديش مانع طالما هيه شارياك وانت اخلاقك طيبة .. احنا هنستناك سنة وبعدها
تجيب اهلك وتتفضل اهلا وسهلا واكتر من كده يبقى ربنا يوفقك يا ابنى ويوفقها مع واحد
تانى .

يتبع