قهوة المخربشين (5)

[duha]

السلام عليكم ورحمه الله وبركاته
ازايك يا عم صبحي
متنساش تتوصى بالمشاريب وخصوصا لضيوفنا الجدد السهران وhassian
الكلام عن الفساد فكرني بفكره سمعت عنها
وهي المجتمع الموازي

عندما يستشرى الفساد يصبح الفرق بين الصواب و الخطأ عدة مستويات من الخطأ النسبي الذى يتيح هامش من الخطأ متاح للاستخدام تحت مسميات مختلفه مقبوله سمعياً و اجتماعياً ثم يتحول الخطأ النسبي الى عرف اجتماعى ثم الى موروث ثقافى .. عندها تضيع قدرة المجتمع على التمييز بين الصواب و الخطأ و تظل كبائر الخطأ فقط غير مقبوله كالقتل و الدعاره و السرقه بالاكراه فيما يتقبل ما خفى من الرذائل و ما تعارف عليه بالاعتياد كالرشوه (الشاي ) و الاغتياب و النميمه ... و يصبح سوء التصرف "فهلوه" و الغدر بالوعود "شطاره " ..

عندها تصبح القدره على تغيير المجتمع تكاد تكون معدومه .. و لذلك اذا حاولنا التأمل في قصص الانبياء .. سنجد ان نهاية اغلب القرى الظالم اهلها الاباده و هو الحل الامثل لاستحالة الاصلاح .. الى ان نصل الى سيد الخلق محمد (ص) .. نجد ان قومه لم يبادوا و انما حدث شئ جديد .. هذا الشئ هو نشأة مجتمع موازى قائم على مبادئ محدده بعيداً عن تأثير القريه الظالم اهلها .. و بعد فتره معينه من النمو و الرشد اصبح لدى هذا المجتمع الجديد موروث ثقافى جديد قائم على تسمية الاشياء باسماءها و القدره على تحقيق مكاسب ماديه على الارض باعتناق المبادئ و نبذ الرذائل .. عندها يتشجع قطاع اكبر من المجتمع على الانضمام للمجتمع الموازى و ترك المجتمع الاصلى .. و عند اكتمال النصاب و تحقيق وفره عدديه من المؤمنين بالمبادئ .. يصبح من السهل اختراق القريه الظالم اهلها كما حدث من فتح مكه دون دماء .. حيث اصبح صوت الحق اكثر قدره على تحقيق النصر عن عجلة الحرب ..

يبقى السؤال ..

هل يمكن بناء مثل هذا المجتمع الموازى في عصرنا هذا دون انبياء ؟؟

[أحمدكمال]

مشاركة جميلة يا ضحى..
احنا محتاجين فعلا للعالم الموازي ده...
العالم القائم على العدل والمبادئ الاسلامية...
واعتقد اننا موعدين دائما بظهور المصحلين والمجددين ..
بس مش لازم نركن للنقطة دي ونتحرك..
احنا عندنا عوالم جديدة بتظهر وموازية بس للغرب .
زي دبي ودول الخليج...اللي بدأت تتحرر نوعا ما من قيمنا وتصبح مقلدين للغرب..
والسعودية اللي قامت اساسا على فكرة انشاء مجتمع اسلامي شوفي راحت لفين؟

فكرة انشاء مجتمع موازي محتاج ايمان مجموعة او شعب باحتياجهم للمجتمع ده..
واعتقد اننا في مصر مؤمنين بده بس مش عارفين ايه هي آليات تحقيقه وخصوصا واحنا بتمارس علينا ضغوط اقتصادية واجتماعية وسياسية....


فين الشاي؟

[The Caesar]

السلام عليكم

- تشرب ايه يا قيصر
- قهوه مظبوطه
- وعندك واحد قهوه مظبوه لقيصر بيه

****

كده انا بقيت جوه القهوه اهوه ....القهوه الثقافيه
في البدايه بحيي ضحي علي الموضوع الرائع ..وجامد جدا

وثانيا انا جي اشارك طبعا
**
-- طب والناس اللي معاك دول يشربوا
-- دول الحرس الشخصي
نزلهم موز باللبن ..دول ما بيشروبوش قهوه ولا شاي
-- واحد .اتنين ..تلاته ..ميه وخمسين..وعندك 300 موز باللبن لحرس قيصر
**

صبحي زمانه اتشد علي امن الدوله دلوقتي

***

موضوعنا الفساد ..واذا كان السبب الحاكم او المحكوم

في البدايه فكره المجتمع الموازي دي جديده اول مره اقرائها بصراحه ..وحلوه فعلا

نتخيل مثلا دوله اسبرطه ..الحديثه ..العسكريه ..الجامده قوي

طلع فها فجاءه مجتمع موازي ده .منفصل ..وبداء ياخد شكل وحضور
عشر دقايق..وهنلاقيهم مرميين في المعتقل الاسبرطي
خونه و عملاء وجواسيس ...وبيتعاملوا مع الاعداء..اللي هما الاصدقاء وبينا وبينهم سلام دلوقتي ..وسلامات وطيبون
وما بقناش عارفين اصدقائنا ولا اعدائنا ...بيحبونا ولا بيكرهونا زي ما بنكرهمم ..بيتجسسوا علينا ..محبه
سيتم القضاء علي هذا الكيان باي شكل ..و بتغطيه اعلاميه مدهشه تبين للناس الطيبين
ان دوله اسبرطه ديمقراطيه وراعيه الحق والسلام والخير والعدل

لحد ما الشعب يقول كفايه ديمقراطيه ..عايزين استبداد بقي

ده راييء عن فكره المجتمع الموازي ..زي العالم الموازي في قصص الخيال العلمي
ايام الرسول عليه الصلاه والسلام اعتقد كان الوضع ...مختلف

اعود للنقطه الجوهريه ..الحاكم ولا المحكوم
قبل ما اقول راييء
نيجي نبص علي الدول المتقدمه ونقول يا تري ما فهاش فساد
لا بالعكس مفيش دوله في العالم الا والفساد منتشر فيها ومتفشي
امريكا مليئه بالفساد .زفي كل المجالات وبها ايضا عصابات عالميه وعدم وجود امان الخ
لكنها دوله متقدمه ..فرنسا .المانيا .انجلتر ..ايطاليا.اليابان ..الامارت..الخ
طول ما فيه بشر يبقي فيه فساد
اذن ما السر
السر في القانون الذي يحمي المواطن ويقدر قيمه الانسان ويعطي كلل ذي حق حقه
قيمه العدل والثواب والعقاب
لو ان السارق تاكد تماما انه لو سرق ستقطع يده ما سرق
" بتوع البنوك الي هربوا بالميارات " ومازالوا
لكن فيه لعب من تحت الترابيزات ومصالح ..الخ
اذن النقطه هي فكره حمايه الحقوق...

هناك يحترمون الانسان ..ومحدش اكبر من القانون ..لكن لدينا..لا اعتقد
ده لوحد اتخانق مع حد مواطن عادي..هتلاقيه بيقولك انت عارف انت بتكلم مين
انا ممكن اعمل فيك ايه
فما بالكم باصحاب السلطه
**
اذن النقطه هنا ..العدل..
سيدنا عمر ..تميز بالعدل..فكان حاكم لن يجود الزمان بمثله فكان ياخد حق المظلوم من الظالم ..
ويضرب علي يد الظالم
هل تذكرون قصه ابنه عبد الله الذي جلده حتي مات
***
ثم

الصلاه ستؤذن
لي عوده ان شاء الله

[دقه قلب]

السلام عليكم ورحمة الله
اهلا ضحى مشاركة رائعة فعلا
عم صبحى واحد نسكافيه لو سمحت


بتتكلموا عن ايه بقى
الفساد اه اه الفساد اه
طيب انت يا ضحى بتتكلمى عن العالم الموازى وانا بعتقد مع الجميع انه مطلوب وبشدة ولكن
معتقدش اننا فى هذا العصر
الان شىء زى ده محتاج لحد مش هنقول فى مرتبه الانبياء ولكن على الاقل يتقى الله حق تقاته
ولا يخاف وحطى تحت لا يخاف دى خمسيت ستين خط
عندنا علماء وفقهاء وقادة على مستوى عالى جدا ولكن
همه فين؟
مطرودين من بلدهم او مشرفين فى المعتقلات
والباقى قد يكون عندهم العلم ولكنهم يخافون الجهر بالحق
ولى عودة
الان القهوة وحشتنى اوىاوى
عم صبحى سك على النسكافيه خلاص نفسى اتسدت
شكلك كبرت بقى والزهايمر اشتغل

[duha]

السلام عليكم ورحمه الله وبركاته
ازايك يا عم صبحي
القهوة المظبوطه لو سمحت

اهلا دقه قلب
اهلا قيصر منور القهوة

انا شايفه ان البعض يرى بضرورة وجود القائد الاسطورة الذي بيده الخلاص
في الحقيقه ارى ان مع الوقت اصبح القائد موروث ثقافى في حد ذاته و بالتالى اصبحنا مجتمعات سهلة الانقياد شديدة التفريخ للنموذج الديكتاتورى لتوافر عامل استصاغة الانصياع و الاشتياق للنموذج الالهى المتمثل في الانبياء .. و بما ان عهد الانبياء قد انتهى ، فقد توجب علينا البحث عن نموذج جديد للقياده و هو نموذج النظام System بدلاً من نموزج الفرد بمعنى تحديد نظام معين يكون كشريط القطار محدد الملامح بعيداً عن التمييع او الابهام بحيث لا يفسر الا بطريقه واحده مفهومه من الجميع ..

اذا رجعنا الى النموزج الالهى و ناقشنا تجربة سيدنا محمد (ص) فسنجد ان دور سيدنا محمد هو التبليغ فقط و ليس له الحق في اصدار اي قرارات من تلقاء نفسه .. فلقد كان (ص) لا ينطق عن الهوى بل كان ينطق بما يوحى له كما نؤمن جميعاً و بالتالى فان النظام الالهى كان هو المقدم على التبليغ او التنفيذ و انحسر الدور الرقابي بين سيدنا محمد (ص) و الله سبحانه و تعالى و بالتالى كان النظام صارماً الى حد كبير .. ثم بعد وفاة النبي (ص) آلت الخلافه او السلطه التنفيذيه الى غير الانبياء و الذين لم يكن عليهم رقابه من غير ضمائرهم و بالتالى تركت مساحه لاهواءهم كي تعبث على مدى عصور الدوله الاسلاميه بنسب متفاوته اعتماداً على مدى نقاء ضمائر هؤلاء الخلفاء ..

اذاً فالرقابه او وجود آليات للرقابه منفصله عن السلطه التنفيذيه تكاد تكون في نفس اهمية النظام نفسه كى لا يحدث الخلل ..

اتفق مع قيصر بضروة وجود قانون عادل يكفل حقوق المواطن ولا ياتي هذا الا عن طريق دستور حقيقي يكتب بيد الشعب ويوافق عليه الشعب

[hassain]

مساء الجمال عليك يا عم صبحي الشاي وحجرين بسرعة
مساء الخير يا جماعة
الوضع اليوم بيزيد تعقيد مش عرفين هل احنا متساويين في المعاملة من افراد السلطة التنفيزية مع من لهم وجود غير مباشر في السلطة حتي لو بالمعرفة ( فيد واستفيد )

واعتقد ان السلطة القوية تعني نظام عادل ومتساوي والكل اعتقد بيشوف فرق المعاملة الي انا اقصدها ...........................الشاي يا عم صبحي

المهم في النظام انة يكون نظام سايد علي الكل مش فات دة بية ودة افندي ودة ......الخ

في اعتقادي اننا لو انشانا تنظيم رقابي علي كل السلطات سوف ينتهي بنا الحال الي توقف كل شي حتي يبس فية الرقابيين بالموافقة وهل الرقابيين ضمائرهم صافية الله اعلم ولن تنتهي المشكلة

الحساب يا عم صبحي

السلام عليكم

[اهلاوي عاشق]

[color="Navy"][size="3"]مساء الخير يا عم صبحي اعملي سحلب على حساب ضحى
بالنسبة للفساد انا بقول ان السبب ممكن يكون مشترك فيه الحاكم والمحكوم .
الاتنين بيكملو بعض .
يعني لو السبب في المحكوم انا شايف ان الحاكم ساعد المحكوم او العكس هيا دي وجهة نظري.
وشكرا على الموضوع. والسلامو عليكم .
ماتنساش يا عم صبحي السحلب حسابه عند ضحى

[duha]

السلام عليكم
ازايك عمو صبحي
واضح ان شباب ابن مصر مشغولين هذه الايام بالامتحانات ربنا معاهم
ويا رب الكل يتوفق في امتحاناته وفي حياته عموما
القهوة المظبوطه يا عمو صبحي


عندما نتحدث عن التغيير تكون الاجابه اما "الاسلام

هو الحل " او " الليبراليه هي الحل " بدون اي نوع

من انواع التفاصيل كما و لو كانت تلك الشعارات

تحوى شئ محدد ... اعتقد ان تلك الشعارات تميل

الى ان تكون ادوات ردع عن كونها خطه محدده ..

فريق الاسلام السياسي يلوح بشعاره كي يصمت

الافواه و يتهم الطروحات الاخرى بالخروج عن الاسلام

ضمنياً ... و فريق الليبراليين لا يروا من الاسلام غير

صورة الدين افيون الشعوب الراسخه في اذهانهم دون

التطرق الى مبادئ هذا الدين الذى يحوى الكثير من

الافكار الليبراليه في حد ذاته .. و هنا تظهر

المشكله : كل من الفريقين يركز تفكيره على ما

ينقص الفريق الاخر دون التفكير اطلاقاً في طرح

حقيقي .. يعتمد الفريقين على اسلوب المناظره

الحيه في حين لا يعتمدوا اي من اساليب البحث

العلمى في تقصى الحقائق و طرح اجابات مناسبه

نابعه من ايدلوجية اي منهم .. الموضوع اقرب الى

تشجيع كرة القدم على شاشات التليفزيون .. فريقان

من المترهلين يتابعان مباراة يقودها رياضيين حقيقيين

بمشاعر اقرب الى مزيج من التعصب و عدم

التخصص .. فتخرج تحليلات غير موضوعيه و تعليقات

غير مناسبه للموقف و حلول غير منطقيه .. و النصر

لمن يتفوق لفظياً على الاخر و يتباهى بفخر كيف

افحم الطرف الاخر و كأن هذا هو الهدف الحقيقي من المناظره ..

و يبقى السؤال : في مجتمع كمجتمعنا تبدلت فيه

قيم الحق و الخير و الجمال .. كيف تكون البدايه ؟؟؟

[مستكة]

السلام عليكم ورحمة الله

عم صبحي بسرعه واحد موز بالبن وصلحه

موز باللبن واخدلي بالك مش تحط نقطة لبن وتكمل بالميه وفي الاخر يطلع عصير لمون


شوفي ياضحي اتفق معاكي في رايك بالنسبه للفريقين دول

مشكلتنا في العالم العربي اننا كلام وبس

كل فريق يطلعلك بخطب وكلام ووعود اول ماتسمعيها تقولي بس هو ده

بس فين النتايج للاسف مفيش

وان كنت اميل الي حد ما الي ان الاصلاح لن يتم فعلا الا عن طريق الاسلام

واكبر دليل علي كده نجاح الامة العربيه وقمة تقدمها كان في الوقت اللي بيطبق فيه الاسلام

لكن بصرف النظر عن زمان والان

صدقيني عشان الاصلاح يحصل لازم صحوة

يعني الاصلاح مش مجرد خط واحد بالعكس ده عدة خطوط متوازيه لازم تمشي مع بعضها

اولها تبدا من الافراد وتنتهي عند الحاكم مرورا بالاحزاب والاتجاهات المختلفه وسن القوانين واحترام حقوق الشعوب في تقرير مصيرها وحريتها في اختيار النظام الحاكم

وقدرتها علي اختيار اي الاتجاهات السياسيه الانسب لها في كل مرحله

بدل ماهي مسيره رغما عنها في طريق ما يعلم اخره الا الله

[mamdou7]

اسمحولي يا جماعة انضم لقهوة المخربشين واشكر جميع المؤسسين لهذه القهوة وجميع الزباين ايضا
بالنسبة لموضوع الحاكم ولا المحكوم والله الموضوع ده معقد جدا وعامل زي انهي الاول الفرخة ولا البيضة
بس انا شايف ان النسبة الاكبر من انتشار الفساد سببها الحاكم لان الحاكم رغم انه زي ما قال حسين ان الحاكم ده اصله كان محكوم ورغم ان ده عكي ماهو عليه دولة زنجبار الا ان الحاكم اساس الفساد ويقع ايضا مسؤولية علي المحكوم لان بصراحة كده فيه ناس بيجبها الفساد وبيتماشي مع مصالحها وبكده بقي المحكوم مسؤول عن الفساد
وفيه ناس تانية الفساد بيتنافي مع مبادئها واخلاقها وترفضه بجميع اشكاله ولكن ليس لها دور ايجابي في محاولة اصلاح وتقول "يا عم خلينا ماشيين جنب الحيطة" وبصراحة كما في دولة زنجبار منقدرش نلومهم اوي لو مشيوا جنب الحيطة خاصة في دول زي زنجبار اللي الحاكم فيها ماسك الدولة بأيد من فولاذ مش حديد

[duha]

السلام عليكم عمو صبحي
القهوة المظبوطه كالعادة

ارى ان جميع من اشترك في النقاش قد اتفق في معظم النقاط واختلف في بعضها.

نقطة البدايه في بناء اي مجتمع هى الفرد او الاسره على سبيل التحديد .. و هنا تكمن المشكله الحقيقيه : هل لدينا القدره على العمل الجماعى ؟؟ هل لدينا القبول الكافى لبناء قاعده للعمل الجماعى ؟؟؟ هل نستطيع ان نثق في عمل "الاخر" بحيث نعتمد عليه في جزء من المنظومه الجماعيه المنشوده ؟؟
اننا بحاجه الى تغير وجهة النظر السائده في سبيل رؤيه اعمق للمشكله و محاولة حلها .. البدايه يجب ان تكون خارجه عن الطروحات التقليديه مثل :

- انتظار القائد المنتظر

- الاسلام هو الحل

- الليبراليه هى الحل

- الطوفان هو الحل

- التقوقع في الذات تحت شعار "ابدأ بنفسك " بصورتها السلبيه الاقرب ل "خليك في حالك "

اذا اعتبرنا تلك الطروحات مجرد معطيات للحل و ليست الحل نفسه سنجد ان ما نريده فعلاً ابسط من مجرد شعارات : ما نريده هو صيغه للتعايش تضم جميع الاتجاهات الفكريه تحت مظله واحده .. و لكن ايجاد تلك الصيغه في منتهى الصعوبه نظراً لعمق الرفض بين الايدولوجيات المختلفه بالرغم من ان تلك الايدولوجيات تتفق في نقاط تماس عديده و لكن المشكله هى عدم تعودنا على "الاستماع " للاخر ..

ساروى قصه طريفه قرأتها .. تحكى عن قبطان بحرى في ليله مظلمه و ساعد الضباب على جعل الرؤيه اكثر صعوبه .. و اثناء النوباتجيه اخبره مراقب السفينه باقتراب ضوء من ناحية الشمال الغربي ... فطلب القبطان ان ترسل رساله لمصدر الضوء تطلب منه تغيير مساره .. فرد المصدر بانه يجب ان تغير السفينه مسارها .. فرد القبطان بان ترسل رساله تقول " انا القبطان كذا و امركم بتغيير مساركم .. ملحوظه .. هذه سفينه حربيه .." فرد عليه مصدر الضوء " نحن بحاره من درجه الثالثه .. نرجوكم تغيير مساركم حيث اننا مجرد فناره ! " ...

من القصه يتضح كيف نفكر في الامور بشكل عام من وجهة نظرنا نحن دون ان نحاول ان نفكر من وجهة نظر الاخر .. و دون الاستماع جيداً لحجة الاخر لن يكون هناك مجتمع من الاساس و سيظل الوضع على ما هو عليه ..

و لكن هل يؤدى التعايش وحده الى بناء مجتمع موازي ؟؟

[hassain]

مساء الخير يا عم صبحي هتلي شاي وحجر
مساء الخير يا جماعة
افتح التلفزيون يا عم صبحي علي قنات الجزيرة .................تمام
ناس بتموت وناس بتجرح وعمليات ضد البشرية حسبي الله ونعم الوكيل ربنا ينصر العرب اجمعين علي كل معتدي
عارف يا عم صبحي العالم الامركان دون ولا في فدمغهم زرة من المراعاه لحقوق البشر والغريب بيعملو احتفلات برعاية الكلاب والدببه و السناجب عيشين في دنية تانية

اقفل يا عم صبحي التلفزيون الاخبار تغم والله يتري الحال هيوصل الي فين

[duha]

السلام عليكم
ازايك يا عم صبحي
القهموة المظبوطه لو سمحت
اهلا يا hassian ازايك يا رب تكون بخير
انت متعجب من ايه يا حسين
هي دي امريكا
امريكا اللي اسست على جماجم شعب كامل شعب الهنود الحمر
وهي دي امريكا اللي عاشت على دماء الشعوب
اللي فعلا الواحد يتعجب منه
هو موقف الحكام العرب من اللي بيحصل
اللي مشغول بكرسيه واللي مشغول بشراء فلل وشقق فارهة في لندن وغيرها
واللي عامل خده مداس لاسياده الامريكان
واللي واللي
لكن يا ترى شعوبنا العربيه مالها
واقفين متفرجين ويندبو حظهم
منتظرين حد ياخدهم من ايدهم ويقول لهم هو دا الطريق
ما الطريق واضح ومستقيم ومافيه اي اعوجاج
مش شايفنه ليه
ولا خايفين من كلاب الحكومة
ولا خايفين هم نفسهم من التغير لا يحصل لهم مثل اللي حصل في العراق
تعرف ايه
ما يحصل في العراق ما يحصل ماهو في الاخر لازم هنوصل
في الاخر هتروح الهوجا وتوضح الرؤيا ويبان العدو الواحد
لكن نفضل قاعدين وساكتين ونقول امتى
عمرنا ما هنعرف نوصل

[magoo_gadoo2000]

بسم الله والصلاة على رسول الله...........
اخواتـــــــــــــــى الحلوين
لســـــــه جديد معاكم ويريت اقعد معاكم على القهوة الحلوة الجميله اللى مليانه مشاريب من كل الانواع غير الطلبات الصابحه والسمر والسهر والاحاديث المسليه وطبعا فيه اشياء كثيره من الابداع والفن .........ياريت تقبلونى معاكم واتونس بيكم...................................
اخوكم ماجوجادواسكندريه