قهوة المخربشين (5)

[amr_miza1]

مســــــــــــــاء الخير على أحلى ناس فى المنتدى وفى الدنيا كمان

مش عارف حاسس انكم وحشتونى جدا

حسين وايات ونسرين واسلام اللى مش باين .. وبرديس وبحور وابتسامة وسو لونلى وكل الناس

وضحى طبـــــــــــعا .. اه لازم اخلى عندى دم .. هيا صاحبة القهوة وهيا اللى بتحاسب

وعلى فكرة يا ايات انا سعيد جدا بالكلام اللى قولتيه دا والحمد لله انك بقيتى كويسة... بس مش سعيد بالكلام اللى قولتيه هناك ... واخدة بالك انتى .. هتودينا المعتقل منك لله ههههههه

بخصوص الموضوع المثار حاليا هو بجد موضوع مهم .. واحنا عتقد من أكثر الناس احتياجا للسعادة .. وخصوصا فى هذه الايام السوداء من تاريخنا .. مش عاوز ادخل فى سياسة هنا بس انا بربط الظروف اللى حوالينا بشخصياتنا واحساسنا ..
عاوز اقول كمان ان السعادة احنا اللى بنصنعها تقريبا .. وبخصوص كلام بحور فى ان داليدا والفيس بريسلى وغيرهم كانوا اغنياء ولكن غير سعداء .. عاوز اقولك ان المال مالوش علاقة بالسعادة
او يمكن تقولى انه عامل هامشى جدا فى السعادة ..
وممكن برأيي المتواضع اقول ان سر السعادة .. فى الرضا والصحة والعقل والاخلاق ... بمعنى أصح كل المعانى الانسانية بتخلينا سعداء

القهوة يا سنقر علشان مقومش اكسر القهوة ...

[Dr-Ayat]

welcome back Amro
نورتنا

بالنسبة للموضوع اياه عاتي اهو نسلي بعض هناك

[bo7or]

مساء الفل يا دكتورة........
اسمحى لى اختلف معاكى
انتى زعلتينى دة انا لسة بحضر كتاب د.ابراهيم قوة التحكم فى الذات.....
الكتاب اللى فعلا غيرنى..
اللى فكرته الرئيسية ان مبادئ السعادة نابعة مننا احنا بس......
عمرو كان منزل الفصل الاول منه فى صفحة من صفحات ضحى,, انا ناوية ان شاء الله انزل الاربعة الباقيين....

استاذ عمر انا فعلا كنت أقصد إختيار واحد........و بالهنا و الشفا القهوة و الكيك..

(استاذ عمرو ) اقصد عمرو انا لما حطيت الامثلة مكنتش أقصد الفلوس بس كان فى الشهرة الشكل النفوذ يعنى الحاجات اللى ساعات ممكن حد يتخيل ان ليها علاقة بالسعادة و بالرغم من العوامل الخارجية نفسهم معرفتش تسعد.. بغض النظر ان لية رأى فى موضوع الفلوس دة و هو انها مش سبب للسعادة(خالص) بس هى ممكن تزود سعادة حد سعيد اصلا لأن بلا شك هى ممكن تسهل الحياه شوية.. و بالنسبة للأسباب اللى قلتها فهى الخلاصة


و مقولتوليش هو كافيه و لا قهوة بلدى يعنى ممكن اطلب ميلك تشيك؟؟؟؟؟؟؟؟؟؟
ويدوم العز!!!!!!

[Dr-Ayat]

اهلا بيكي يا بحور مساء النور ,,,

انا بختلف معاكي ومع الكاتب بردو

الانسان والظروف والمحيط هم الي بيحددو السعادة مش احنا نخلقها ممكن نغير الظروف شوية ونحاول نتأقلم بس اما نقعد مع نفينا اعتقد هانقعد نفكر في الالك والظروف الوحشة اللي احنا فيها

تخيلي واحد حياته كلها مقلوبة على دماغه وعامل زي ده >>>> هههههه الناس هاتقول عليه مجنون !!

تحياتي لك.


__________________________________________________ ________________________

:( ادعولي نتيجة الامتحان تظهر بقى انا على اعصابي من الصبح

ولسه ما نزلتش بيقولو كمان ساعتين منهم لله اعصابي باظت

[amr_miza1]

ويلكم آيات هههههههههههههه صباح الخير

بحور .. انتى باين عليكى داخلة على طمع .. مرة تقولي كيكة .. ومرة ميلك تشيك .. احنا فى قهوة عم صبحى على فكرة مش جروبى

على العموم .. واد يا سنقر ... كوباية حلبة للأستاذة .. وعلى حسابها

بس انا بصرحة بقى كان عندى موضوع كدا كنت بفكر فيه .. الذوق العام

بلاقى ناس كتير بتردد " وهجيب الجو بتاعى يقعد جنبى ويتحنتر .. ويحط ايديه فى دراعى وينأنججنى ويتمختر " المشكلة ليست فى كلمات الأغنية .. المشكلة فى من يسمع ويردد وكأنها نوع جديد من أنواع الثقافة ..
اذكر عندما كنت فى الجامعة كنت أذهب بصبحة خالى الى حفلات ثقافية فى بيت أحد من أصدقائه وكنت أرى الكثير من الكتاب والمثقفين والعازفين والمطربين .. وما ان ننتهى من قول قصيدة الا ويعزف لنا العازف مقطوعة لأحد الموسيقيين العظماء .. وما ان تنتهى الا ونجد أحمد فؤاد نجم وقال مقطوعة من الزجل المعهود لديه .. وما يتبعه من تعليقات وأقاويل واراء ... اعتذر عن سردى لحكاية أمر شخصى ..
ولكنى أريد أن انوه على واقع موجود بالفعل وهو البرود الثقافى .. وما يتبعه من تخبط وتراجع الذوق العام ..
هل أصبحت الحياة عبارة عن حنتور .. واه يا نارى اه يا نارى !!

انا خلاص يا سنقر كرهتك .. مش عاوز اشرب حاجة هبقى اشرب فى بيتنا

[bo7or]

ان شاء الله النتيجة تبقى أحسن من اللى انت عايزاه كمان
بس سؤال بسيط انت دكتورة فى أى مجال هل الطب؟؟؟؟

انا مش عارف انت قرأتى الكتاب و لا لأ ,,, عموما انا نزلت منه فصلين فى القاعة العامة ,, مش هقبل أعزار هتدخلى تقرأيه و لو سطر كل يوم(هو كدة رخامة)!!!!

انا بجد بجد مبسوطة بالرقى اللى هنا فى الحوار,, مهما أختلفنا نحترم أثنتينا!!!!

ومحدش راضى يقولى فى ميلك تشيك فى المنيو!!!!!!!
شكلى هقضيها سحلب النهاردة أتنين سحلب يا عم صبحى للدكاترة!!
أصلى مقلتلكيش ان انا مشروع دكتورة برضه!!!
و لو مقمتش من عالقهوة هيفشل!!!

[bo7or]

يلا حلبة حلبة يا عمرو حد طايل!!!!!!!

اصبت جرحى يا سيدى !!!

الموضوع دة بقى بيتعبنى اوى بقيت بحس إن انا اللى غريبة فى وسط اصحابى لما أقول مثلا انى أقرأ لنزار و جويدة يعتبروننى من زمن قد انتهى!!

و لا لما أقولهم انى قرأت كتاب عن البرمجة اللغوية العصبية.....
و يا سلام لو وقعت فى الكلام و قلت انى اتفرجت على برنامج حمدى قنديل,, دة انا تبقى وقعتى هباب..........
و يا سلام بقى لو حضرت فرح اليومين دول و سمعت الاغانى اللى بتشتغل,,, مقولكش على مدى الثقافة اللى بتشع منها و كل الذى يشغلهم هو الديك و زوجته.. مبقدرش اكمل معاهم و الله بسيبهم و امشى و ساعات بيزعلوا منى....

عشان كدة مش بلاقى نفسى خالص فى وسط جيلى اللى نادرا اوي لما تلاقى حد فيهم مهتم بالثقافة فى السن دة !!!!!!!!


خلاص نفسى اتسدت عن الملك و الكيك و السحلب والحلبة اللى بردت.....
سك يا واد يا سنقر عالطلبات

[Dr-Ayat]

ان شاء الله النتيجة تبقى أحسن من اللى انت عايزاه كمان
بس سؤال بسيط انت دكتورة فى أى مجال هل الطب؟؟؟؟

انا مش عارف انت قرأتى الكتاب و لا لأ ,,, عموما انا نزلت منه فصلين فى القاعة العامة ,, مش هقبل أعزار هتدخلى تقرأيه و لو سطر كل يوم(هو كدة رخامة)!!!!

ههههه ايوه يا بحور انا طب بشري سنة رابعة هو انت مش شايفة فتوقيعي المواد النيلة اللي باخدها...

عندي سؤال حضرتك انتَ او انتِ اصلك بتقول مش عارف

وبعدين الكتاب بصراحة ما قريتوش هاتولي لينك اصل كسلانة جدا ومش بحب ادور
بس بردو مختلفة هههههههههه انا مختلف فإذا أنا موجود

بعدين ايه الي رماك عالطب وبلاويه


عمرو ما تيجي نضرب الواد سنقر وعم صبحي ونشتغل مكانهم القهوة بقو مرتادينها كتاااار وبتكسب

[bo7or]

بس كدة دة انت تأمر يا قمر!!!
انا حضرتى بتقول على طول مش عارف مش مش عارفة يعنى دى مش غلطة

قوة التحكم فى الذات.......د.ابراهيم الفقى

ولا تدوري ولا حاجة
بالمناسبة انا بقى صيدلة مش طب يلا اهى كلها بلاوى!!!!!!!

[Dr-Ayat]

:(:(:(

[amr_miza1]

هههههههههههههههه
يعنى انا قولت موضوع وبحور مشكورة عبرتنى وردت وقالت كلام كويس ولسه هنتناقش ..
تقومى تنفضيلى وتقولى نتكلم عن الحسد ... ههههههههههههه

وبعدين قهوة ايه اللى هنشتغل فيها .. مش دلوقتى طبعا ... امال لما ندخل المعتقل هنبقى نهرب فين .. اكيد هنيجى القهوة انا هبقى عم صبحى واركب شنب زيه كدا وانتى تبقى سنقر ههههههههههههه وتلبسى جلابية زرقه مخططه كدا ههههههههههههههههههههههه وبكدا أمن الدوله مش هيعرفنا ههههههههههه

[bo7or]

والدتى بتسلم عليكوا و بتقولكم واحدة واحدة.......
موضوع موضوع .. عايزين نظام!!!!!!!!!!!1

سؤال هو انا ممكن اتاخد فى الرجلين معاكوا أنا لسة صغيرة مش حمل امن الدولة!!!

انا بالنسبة لى الرغيف كبير و المواصلات فاضية و الشقق كتير و كل شوية يقولولنا فكوا الحزام فكوا الحزام
من خاف سلم يا اصدقاء.......و تحية لسعادته...
و اركزوا على موضوع و العبوا مع بعض ما تتخانقوش...

::

[برديس]

مساء الخير على كل رواد القهوة وحشتونى خالص
الله عليكو ايه الجمال ده كله
اغيب يوم واحد الاقى 3 موضيع مره واحده
وامبارح انا وحسين مكناش عارفين نتناقش فى ايه
دلوقتى بقا لخبطونى ارد على انه موضوع الاول
واد يا سنقر كباية شاى فالخمسينه يابنى علشان نعرف نرد
نبتدى بالاول انه السبب فى السعاده
عارفه يا بحور الموضوع ده بيفكرنى بانه الاول البيضه ولا الفرخه
نفس الشى اوقات الظروف بتكون سبب لسعادة الانسان
واوقات الا نسان نفسه بيكون سبب سعادته
ياعنى انتى قلتى ان التحكم فى الذات ممكن يجعلك سبب السعاده
طيب فى اوقات الشخص مش بيقدر يتحكم فى ذاته وبيكون الحزن مش بيقدر يتخلص منه
ياعنى مثلا عند افتقاد عزيز مهما تتحكمى فى ذاتك عمرك ما هتشعرى بالسعاده
او عند صدمتك فى شخص كنتى بتثقى فيه نفس الشى
علشان كده باولك ان الاثنين مع بعض مش حاجه ولا حاجه

[Dr-Ayat]

كملوا موضوعكم انا سحبت موضوعي هابقة انزله مرة تانية...



تصبحوا على خير دلوقت.

[برديس]

المشاركة الأصلية بواسطة amr_miza1

ويلكم آيات هههههههههههههه صباح الخير

بحور .. انتى باين عليكى داخلة على طمع .. مرة تقولي كيكة .. ومرة ميلك تشيك .. احنا فى قهوة عم صبحى على فكرة مش جروبى

على العموم .. واد يا سنقر ... كوباية حلبة للأستاذة .. وعلى حسابها

بس انا بصرحة بقى كان عندى موضوع كدا كنت بفكر فيه .. الذوق العام

بلاقى ناس كتير بتردد " وهجيب الجو بتاعى يقعد جنبى ويتحنتر .. ويحط ايديه فى دراعى وينأنججنى ويتمختر " المشكلة ليست فى كلمات الأغنية .. المشكلة فى من يسمع ويردد وكأنها نوع جديد من أنواع الثقافة ..
اذكر عندما كنت فى الجامعة كنت أذهب بصبحة خالى الى حفلات ثقافية فى بيت أحد من أصدقائه وكنت أرى الكثير من الكتاب والمثقفين والعازفين والمطربين .. وما ان ننتهى من قول قصيدة الا ويعزف لنا العازف مقطوعة لأحد الموسيقيين العظماء .. وما ان تنتهى الا ونجد أحمد فؤاد نجم وقال مقطوعة من الزجل المعهود لديه .. وما يتبعه من تعليقات وأقاويل واراء ... اعتذر عن سردى لحكاية أمر شخصى ..
ولكنى أريد أن انوه على واقع موجود بالفعل وهو البرود الثقافى .. وما يتبعه من تخبط وتراجع الذوق العام ..
هل أصبحت الحياة عبارة عن حنتور .. واه يا نارى اه يا نارى !!

انا خلاص يا سنقر كرهتك .. مش عاوز اشرب حاجة هبقى اشرب فى بيتنا

عموووووووووووووووور احنا مش قد زعلك اكيد بردو هنرد على موضوعك
بس بصراحة حكايتك دى محسسانى انت من جيل بعيد قوووووووووووووى
هو لسه فى حد بيسمع كده
اه انت هتقولى على الذوق بحور قالت انها مش بتقدر تكمل فرح
تعملوا ايه بقا لو كان امام بيتكوا كوافير رجالى ( حلاق ياعنى)
لا بقا وطول اليوم بيشغل الاغانى الغريبه دى واغانى تانيه مالكوش عليها
ولا التوزيع الموسيقى الجديد لاغانى ام كلثوم والعندليب والى يستفزك اكتر
اغانى نجاة المعروفه بالرقه والجمال مالكوش
وحاجات تانيه كتير
على فكره يا بحور انا كمان اصحابى فى الجامعه كانوا يتريقوا عليا لما اقول انى
بحب اغانى نجاه
بس ما دام فى ناس زينا وبنرفض الاغانى دى يبقى لسه فى امل ولا ايه

عم سنقر كباية لمون للاستاذ عمرو يروق بيها دمه