صباح الفل على احلى مخربشين وخربشات
الحاضرين منهم والغائبات
احب اقول رايى فى حكاية قهوة المخربشين 5 او 6
بس قبل ما اقول رايى عايز اقول حاجة بسيطة :
ليه كان بيتعمل اجزاء 1 , 2 , 3 , 4 ؟؟
عشان ان صاحب الموضوع ما كانتش ظروفه بتمكنه من انه يتابعه فكان بيتعمل جزء جديد بصاحب قهوة جديد
وايضا عشان ان الاقبال مثلا على الموضوع كان بيبقى قليل خالص ,, فكان بيحتاج تنشيط فى صورة جزء جديد وافكار جديدة وناس جداد
لما نبص للكلام اللى فوق ده,, حنلاقى ضحى متابعة باستمرار قدر استطاعتها
وحنلاقى ايضا الاقبال على القهوة ما شاء الله بدون حسد
قهوة المخربشين 5 تختلف عن الاجزاء السابقة فى ان فيه ناس كتيرة ارتبطت بالقهوة ومش ارتبطت بقهوة المخربشين عامة لا دى ارتبطت بقهوة المخربشين 5 بالذات,, ممكن حد يسأل طب ويعنى تفرق ايه ما ممكن يرتبطوا بالقهوة 6 و7 ,,اقولهم لا ... احيانا الانسان بيرتبط بحاجة معينة بيبقى فيها حاجة بتجذبه اليها مش شرط انها تكون الاحسن والافضل وده سر وسحر الارتباط
عارفين قهوة المخربشين 5 دى عاملة زى قصر البارون او قهوة الفيشاوى اللى فى سيدنا الحسين,,, قصر البارون حاليا مكان فاضى وقديم وممكن بداله يبقى فيه قصر رائع افضل منه 100 مرة
وقهوة الفيشاوى قديمة وممكن بدالها تتعمل قهوة على احدث طراز
ما ينفعش,,, ليه بقى؟؟
لانى انا والالاف غيرى اتعودوا على قصر البارون الخربان ده واتعودوا على قهوة الفيشاوى بكراسيها وكل اللى فيها,, لما يعملوا قهوة الفيشاوى 2 ,, مش حاروحها مش لانى ضد التجديد ,, لا لانى ارتبطت بالقهوة القديمة فى حاجات وذكريات معينه واصبحت تمثل بداخلى قيمة معينة
والعالم كله بيعمل كده
بيحافظ على قيمه اللى بتشكل ذكريات ومعانى معينة للناس وبيسيبها موجودة ويعمل الجديد زى ما هو عايز لكن ما بيقفلش القديم
قهوة المخربشين 5 تختلف عن الاجزاء الاربعة السابقة,, وروادها المنتظمين يعرفون لماذا,, وهى ليست امتداد للاجزاء السابقة ليتم انشاء جزء جديد على أنقاضها,, هى كيان قائم بذاته
قهوة المخربشين 5 اصبحت اثر تاريخى فى ابن مصر لا يجوز المساس به,, جدد وابدع كما تشاء دون ان تغلق الاصل
فيه اقتراح لكم :
اعملوا موضوع جديد وليكن اسمه مثلا " كافيه المخربشين " وانتم وشطارتكم ممكن تخلوا المنتدى كله يجى عندكم فى الكافيه,, ولتكن موضوعاتها وحوارتها مختلفة عن قهوة المخربشين,, ابدعوا وتفننوا وستجدوا الكل عندكم دون الحاجة الى اغلاق قهوة المخربشين
واتركوا قهوة المخربشين 5 كما هى لعشاق الاصالة والقديم والذكريات
وقد ياتى يوم يطلب فيها رواد قهوة المخربشين 5 انفسهم اغلاق القهوة للانتقال الى كافيه المخربشين
معذرة للاطالة ,, ولى عندكم مشروب بعد الفطار
