الكاتشب والحب

[ابو جميل عسيرى]

الكاتشب والحب

المشهد الاول
(يقف وليد امام شباك التذاكر وهو ياكل سندوتش وبجانبه مى )
وليد (يخرج علبه كاتشاب من شنطته ويقربها نحو فمه ويضغط عليها
فتنفجر على فستان مى ) سسورى اصلى مافطرتش من امبارح بالليل
مى : وليد انت معفن ؟
وليج: لا وعلى كل حال حصل خير دا حتى كاتشب من الغالى

المشهد الثانى
(المترو مكتظ بالركاب )
وليد : لمى حاسبى رجلى يا ابله انتى مش دايسه على حصيره
مى : بقولك ايه انا عفاريت الدنيا بتتمرجح قدامى !
وليد :ومين سمعك انا مش طايق الشهيق اللى داخل سدرى
مى : تنظر الى دبله فى يدها
وليد : مى احنا وصلنا طريق مفحوت وكله دهاليز وطافح فيه مجارى
مى : وحبنا ؟ وقصايد الشعر الى كنت بتقلهالى ؟
وليد : كنت بنقلها من كتاب النصوص بتاع ثانوى
مى : حقيقى بقيت سافل ووشك مبقاش يدى سؤال من اجابه
وليد : فعلا انا مرسوم على علامه تعجب بقالى فتره
مى : اقلع الدبله الى جبتهالك
وليد :( يخلعها ) ولو انى كنت ناوى اجيب عليها محبس
(عوده الى المترو )
مى : (لا تزال تنظر الى الدبله فى حزن ) كده يا وليد
وليد : لا مؤاخزه هو حضرتك بتربى كلاب ؟
مى : انت مالك انت ؟
وليد: اصل انا عندى كلبه نتايه بدورلها عل...
مى: (تقاطعه ) لو مسكتش هلم عليك الناس
وليد: دا على اساس اننا واقفين فى شارع فاضى !
مى : تعرف تحط لسانك جوا بقك بدل ما اهزئك؟
وليد : شكلى كده هدوس على فرامل الخطر وارميكى بره المترو
مى : جرب كده وشوف هيحصلك ايه ؟
وليد : (يقرا المكتوب على فرامل الخطر ) غرامه مائه جنيه لمن يستخدمها فى غير حالات الخطر بقول نستنى لما الباب يفتح اوتماتيك

المشهد الثالث
(يصعد وليد الميكرو باص ويفاجا بوجود مى بجانبه )
وليد: انتى تانى هو مفيش حد خرج من بيتهم النهارده غيرك ولا ايه ؟!
مى : تسمح تختفى حالا من قدامى
وليد: ليه طالعلك من المصباح.. انا قاعد زيى زيك
مى : يظهر ان الذوق مش هيجيب معاك مجموع
السائق : يا جماعه ما يصحش كده .. ليكوا موقف قطعوا بعض فيه
وليد : اخرس انت يا اسطى وركز مع الاسفلت
مى : (لوليد) ياريت تنام لغايه ما نوصل علشان ماتحسش بالطريق
وليد : وانتى ياريت تطلعى راسك من الشباك عشان عايز اقفل الازاز
وليد :على فكره انا اسف على حركه الكاتشب .. بس جمالك مغطى على البقعه
مى : (فى ابتسامه رقيقه ) ميرسى
وليد : باحبك اكثر من الكاتشب
مى : وانا كمان بحبك
(يقبلان بعضهما البعض )
(فيفتح السائق المطوة بتاعته .. ويصرخ فيهم )
السائق : انتو بتقنطرونى ؟!

قطع

[نسر مصر]

هههههههههههههههههههه
اى الموضيع الناررررررررررر دى

[ابو جميل عسيرى]

السلام عليكم ورحمه الله وبركاته

اولا الموضوع اللى انا كاتبه يا جماعه منقول عن الاستاذ/ أيهاب دسوقى عن جريده الدستور.

وثانيا انا اسف لانى مقلتش كده من ساعه ما كتبته وعموما متزعلشى منى يا استاذ/ أيهاب.

ونرجوا ان يقبل اعتذارى منه ومن الجميع فى هذا المنتدى الرائع.

وشكرا ليكم.
والسلام عليكم ورحمه الله وبركاته.

ابو جميل العسيرى

[ابو جميل عسيرى]

ارجوا منكم الاستفاده باكثر وقت ممكن للمواضيع التى اضعها هنا فى اجزاء المنتدى الاخرى.

[safffffy2007]

هههههههههههههههههههههههههههههههههههههه
والله جميله اوي
تسلم ايدك

["لولا"]

هههههههههههههه
حسبى الله بعد دا كلة ...وبعد ما نشفوا رقنا ..دة من حق السواق يقطعهم
بس حلوة ..حلوة
تسلم ايدك يا ابو جميل

[Ahmed 123]