اخوانى واخواتى ابناء ابن مصر
كاتب هذا الموضوع هو لونلى دوك العضو فى ابن مصر وليس لونلى دوك المشرف العام
قد يتسائل البعض وهل هناك فرق؟؟
نعم لان المشرف العام كلامه يحمل الصبغة الرسمية (زى تحذير مصراييم اياه
) ويعبر عن رأى الادارة بينما كلام العضو بيبقى خفيف ويعبر عن وجهه نظره هو .
بعد المقدمة الطويلة دى عندى شوية ملاحظات احب نتناقش فيها وارجو منكم الصدر الرحب وسعة الافق :
-الاقتباس :
لاحظت حاجة كترت جدا فى الفترة الاخيرة وهى الاقتباس ,, لاحظت ان البعض عندما يرد على موضوع بيعمل اقتباس للموضوع كله وفى الاخر بيكون رده عباره عن شكر صاحب الموضوع او الاشاده بان الموضوع رائع !!! طب انا افهم انه يعمل كده لما يكون ناوى يرد فى مكان اخر او مثلا فى منتدى تانى
ده انت بترد على نفس الموضوع وما ناقتش فيه حاجة مثلا طب بتعمل له اقتباس كامل ليه؟؟!!
من وجهة نظرى ان ما فيش حاجة اسمها اقتباس كامل لموضوع او حتى لرد,,مثلا انا اعمل اقتباس لفقرات معينه عجبتنى او حاتناقش فيها
ممكن طبعا اعمل اقتباس كامل لموضوع او لرد بس ساعتها حارد جوه الاقتباس نفسه يعنى حتبقى الفقرة اللى عايز اناقشها او ابدى ملاحظة عليها موجودة وردى تحتها على طول
أنا بادخل على موضوع الاقى معظم اللى ردوا عليه عاملين اقتباس للموضوع كله !!!! والاقى مثلا اللى ناقشوه فعلا او كتبوا تعليق بجد قليلين جدا جدا.
- كتابة المواضيع فى الاقسام المختلفة :
والله ايدى وجعتنى من كتر نقل المواضيع لاقسامها الصحيحة
ياجماعة ده كل قسم من اسمه واضح ايه نوعية الموضوعات الى تتكتب فيه
بعد التسجيل الاعضاء الجدد بينزلوا مواضيع للتعريف بأنفسهم والترحيب بهم
عارفين انا مرة فى نص ساعة نقلت 6 مواضيع ترحيب من اقسام المنتدى المختلفة حبر وورقة والعام (قاعة ابن مصر) والاقتراحات والشكاوى ودهاليز المجتمع !!!
طبعا انا بالتمس العذر لاخوانا الجداد (ولو انه المفروض انا ما باسجلش فى منتدى غير لما باتصفحه الاول ويعجبنى يعنى مفروض اكون اخدت فكرة عن نظامه) لكن القدام حجتهم ايه بقى؟؟
انا معاكم ان ساعات الواحد يكتب موضوع او ينقله مثلا ويكون محتار ده يتحط فين ساعتها يحطه فى قاعة ابن مصر ولو المشرف شاف انه مش مكانه الصحيح حينقله,, احنا بنتكلم على حالة مفروض تكون نادره ما تبقاش القاعدة.
- سيل المواضيع الجديدة :
وفى قول اخر زخام (المطر الشديد)
المواضيع الجديدة
بازعل فعلا لما اقلب فى صفحات كل قسم والاقى موضوعات جيدة ورائعة لم يرد احد عليها او لم تأخذ حقها الفعلى فى المناقشة
والسبب الرئيسى لهذا هو السيل
السيل "بيجرف" الموضوعات للصفحات المتأخره وتدخل الموضوعات الرائعة تيه النسيان لان اغلبنا اتعود انه يتصفح الصفحة الاولى من اى قسم الا لو كان بيبحث عن حاجة معينة
بذمتكم مش خسارة؟؟
كثرة المواضيع الجديدة ليس ابدا دليلا على النشاط والتميز واحيانا قد تستفيد من رد فى موضوع ما اكثر من قرائتك لخمس مواضيع جديدة مثلا
الهدف الاساسى من المنتديات هو الاستفادة قبل حتى التعارف وقبل تمضية الوقت
- الامانة الادبية فى النقل :
اعتقد طبعا كلكم لاحظتم وتابعتم ما دار مؤخرا بخصوص هذا الموضوع
فلن اضيف جديدا او اتحدث فيه مطولا
عايز اقول انك لما تكتب كلمة منقول او تشير للمصدر بتحترم نفسك قبل ما بتحترم من نقلت عنه
وايضا عايز اقول انه ده بيبقى اسلوب او استايل شخص بمعنى من تسول له نفسه مثل هذا عادة بيبقى كده ايضا فى حياته الحقيقية ومع كل المواقف
- أين المواضيع والردود الحوارية؟؟!! (مش من الحوارى طبعا
)
قوة وتألق وتميز اى منتدى ده عصبه
للأسف نسبة مثل هذه المواضيع والردود لا تتعدى 5% فى ابن مصر
كل واحد يحاول يتناقش باللى ربنا يقدره عليه,,,نحاول حنلاقى منظر تانى خالص
- فيه طبعا حاجات تانية بس تدخل تحت بند حالات فردية وليست ظاهرة
* لغتنا العربية حتندثر ياجماعة لو فضل كل كلامنا بالطريقة دى
أنا لاحظت كتير اوى اوى من الغلطات الاملائية فى المواضيع والردود
انا عارف ان احنا مش فى مدرسة
وانا كتير اوى احب اتكلم او ارد باللغة الدارجة او العامية لكن حتى وانا بارد بالعامية باحاول ما يكونش فيه غلطات املائية كتير على قد ما اقدر
* كلما كان الشىء نادرا وصعب الحصول عليه كلما كان ثمينا وكلما زادت قيمته,, أنا لست ضد المجاملات ابدا
وبأسعد عندما يجاملنى أحد وأكون باستحقها,,لكن عندما اكتب اى موضوع او رد والاقى "فرقة" بترد عليا دائما رائع..الله ينور..تسلم ايديك....اقولكم الحق باشعر ساعتها ان الشكر او المديح لا أستحقه وفقد قيمته ومعناه عندى لانه ببساطة "رطرط" وبقى عمال على بطال.
ياريت نتناقش فى الكلام ده مع بعض
دى الحاجات اللى فاكرها حاليا وبناء عليه هذا الموضوع سيظل مفتوح لو افتكرت حاجة تانى او اى حد من اخوانى واخواتى عنده ملاحظة يحب يحطها ونتناقش فيها
أنا باحب هذا المنتدى فعلا وباشعر انه بيتى التانى وانكم اخوانى واخواتى لهذا كتبت هذا الموضوع
تحياتى
و طبعا من كتر مهو مستاء مني لم يعطي الموضوع ادنى اهميه اصلا سواء بالسلب او بالايجاب 
مش معقول يعني الحكاية دي ... 
حنفضل نكتب رسايل شكر لبعض ولا ايه 
