العزاء فى عمر مكرم
طول ما انا ماشي في الشارع اشوف لافتات غريبة ولا تدل على معناها أبداً
حافظاً على نظافة مدينتكم ... معاً نحو خطواط هادفة وخدمة احسن ( شركة مياه القاهرة ) ... المصرية للإتصالات تتمنى لكم مشاهدة ممتعة ... حجات من هذا القبيل ..
قولت النظافة طيب فين النظافة دي ... الشوارع بقت اوسخ من الأول ... بعد لما كنا بندفع 5 جنيه للزبال ويجي ويطلع ويخبط علينا وياخد الزبالة وينزل ومنلقيش الزبالة غير بالضبط لمدة 10 دقائق امام كل عمارة ... وبعد كده تيجي عربية الزبالة تشيل كل حاجه ... وكنا سعداء ...
طبعاً مع وجود بعض التلاكيك من اصحاب العماير .. ليه وليييه حطين الزبالة امام المنزل لمدة 10 دقائق محبكش غير عمارتنا ... ( ودي كانت اكبر المشاكل اللي بتواجهنا )
وفيه مشكلة كمان ... الوقت اللي كانت بتيجي فيه عربيت الزبالة تشيل الزبالة ... كانت بتقلب ريحة الشارع ... لمدة 10 دقائق وكنا بنستحملها ... اصل دي زبالتنا مش زبالة الشارع اللي ورانا ..
تعالوا شوفوا دلوقتي الزبالة تقرف ومليانه في الشوراع و صناديق الزبالة مكسرة ... والعربية بتيجي كل 3 أيام ويفضلوا يشيلوا في الزبالة من على كل ناصية شارع لمدة ربع ساعة ... وبعد لما يشلوها نفضل نشم في ريحت الأرض اللي بقت تقرف وشكلاه عفن من كتر القرف ... والكلام ده في " مدينة نصر " ما بالكم بالمناطق العشوائية أو منطقة مفيهاش ناس مهمين شوية ؟؟؟
وبالنسبة ... لشركة .. المجاري .... يووووه اقصد المياه ... من كام يوم المية قطعت عندنا وكانت ضعيفه ... طبعاً حوشنا شوية مية كده في طبق كبير ... وثاني يوم جيت ابوص على المية ... ولا حول ولا قوة إلا بالله ... لقيت فيها " تراب ، ورملة " مترسبين في قاع الطبق ...
عندما سألت أمي قولتلها ايه ده ... مش دي المية اللي إحنا بنشربها ... دي مترسب فيها تراب وقرف ... ردت عليا وقالت ( لا يا حبيبي مهو إحنا لازم نشربها قبل ما التراب يترسب ) ""طبعاً كانت بتتريق "" وقالت يعي هنعمل ايه ... حسبنا الله ونعم والوكيل
نيجي للمصرية للإتصالات ... وانا شايف انها الشركة الوحيدة اللي ممكن نقول انها نضفت " شوية " يعني الدليل الحمد لله بعد ما كانوا بيقفلوا في الخطوط في وشنا ... لقينا موسيقى ... هو صحيح الأرقام اللي بناخدها منهم بردو مبتردش ... بس على الأقل فيه إحترام في المكالمات ...
ونلاقي كتر أللف خيرهم ... بيحفروا وبيمدوا خطوط جديده ... طيب والله كويس ... بس بنظام ( هم هيكسروا ويخربوا الأرصفة ... وإحنا هنبلط تاني عشان هم بشوات بيكسروا بس ) ولما سألت المهندس قولتلوا خير فيه ايه ... قالي اصل الخطة الموضوعه ان كل بيت يكون عنده خطيين ... طبعاً انا مردتش عليه عشان متنقطش ...خطين إيه والناس شوية شويهه هيبطلوا يجيبوا سكر .. وزيت ... وبطلوا يخرجوا ويتفسحوا ويزوروا الجناين ... بقينا عملين زي الحمير في ساقية عشان نسد إحتياجتنا
فلما جيت بقه عشان اترجم واستنتج معنى كلمة ( خصخصة ) ملقتش غير معنى واحد بعد دراسة متأنية مع مقارنتها بالمواقف ... وبعد ان تم قسمها إلى ثلاثة أقسام (خص ) (خص) ( ة)
خ = خربوا بيتنا
ص = صوتوا للصبح
ده الجزء الأل من الكلمة ... أما الجزء الثاني
خ = خبطوا دمغكوا في الحيط
ص = صبركوا بالله إنتوا لسه شوفتو حاجه
أما عن الـ ( ة ) عند قلبها إلى أصلها مرة أخرى ... نجدها ( هـ ) عليها نقطتين ... يعني ( نقطة ) ( نقطة )
إذن ...
بما أن (ة) = هـ
إذن ( هـ ) = هتشوفوا أيام سودة
و بما أن تم فصل النقط إلى نقطتين .
إذن النقطة الأولى ( هيه النقطة التي تصيب الإنسان وتجعله واقف ساكت تماما ً )
والنقطة الثانية ( هو نقطة الشرطة ... التي سوف يتم طربنا فيها بالجزم لو اعترضنا )
إذن معنى كلمة الخصخة بعد فك شفرتها وترتيب الحروف حسب المعنى الصحيح
خربوا بيتكوا " طيب " صبركوا بالله إنتوا لسه شوفتو حاجه ... خبطوا دمغتكم في الحيط " و " صوتوا للصبح ... " ده كمان " هتشوفوا أيام سودة ... "حتى " تأتيكم النقطة " إما بالسكتة القلبية ... إما " تأتيكم النقطة " عشان تديكوا بالجزم
كلمة أخيرة ... انا مبقولش الكلام ده إعتراض على الحكومة ... عشان الحكومة مش هتعمل كل حاجه ... لازم إحنا نصلح من أنفسنا ... ولازم اصحاب الشركات المخصخصة يعرفوا أن فيه يوم هنقف ونتسأل فيه كلنا أمام الله سبحانه وتعالى ... لو افتكروا اليوم ده مظنش ان حد هيقصر في عمله أبداً
العزاء في عمر مكرم
__________________
وائل جابر حسنين
ابن مصر الصديق لكل مميز فى الحياة
[IMG]  [/IMG]
|
مواضيع مشابهة
النمط الخطي
