اقرأ

[Waelgaber333]

إقرأ



(إقرأ بسم ربك الذي خلق * خلق الإنسان من علق * أقرأ وربك الأكرم * الذي علم بالقلم *علم

الإنسان مالم يعلم *)


كانت اول كلمات نزل بيها سيدنا جبريل من السمه على رسول الله

آيات حفظناها كلنا واحنا صغيرين ..

ولما كبرنا بقينا نفخر بيها ونستدل بيها على تقديس دينا للعلم والتعليم

لكن التعليم حييجي ازاي..؟؟

وفي أمتنا ملايين ما بتعرفش تقره وتكتب ..


طموحك في الدنيا ايه ؟!


سؤال لو سألته للناس الي ربنا ماقسملهمش حظ من التعليم من صغرهم


حتجاوبك عليه البنت الي عندها 17 سنه وتقولك ..

نفسي ربنا يكرمني معاك وتعلمني القرايه والكتابه عشان آخد شهادة محو الأميه الي حدخل بيها المدرسه


















نفسي أروح المدرسه ..



















أما الست العجوزه الي قاعده هناك ده ..

لو سألتها ليه بتيجي كل المشوار ده ..وانتي رجليكي يادوب شايلاكي ؟!
حتقولك



نفسي تيجي علية جمعه أقٌره فيها سورة الكهف لوحدي قبل ما اموت



ده كلام الحجه اعتدال ..طالبه في رسالة المهندسين وحتسمع نفس المعنى لو سألت الحجه هانم

الي كانت بتيجي دايما ماسكه حفيدتها في ايديها

أما ياسمين ..فامنية حياتها تعد تذاكر لابنها لما يرجع من المدرسه

بتقول مش عايزه جهلي يبقى سبب في فشله مش عايزاه يطلع زيي عشان كده عايزه اتعلم



كل ده أسباب لطموح واحد جمع بينهم (التعليم)

مش ذمبهم إنهم مالقيوش الي انت لقيته في طفولتك

بس ذمبك لومافكرتش تساعدهم بالي عندك

فكر تديهم ساعتين من وقتك تقربهم من حلمهم واتقرب معاهم


عايز تعرف حتقرب من ايه ؟!




تقرب من رضاك عن نفسك لما تمارس انسانيتك ووظيفتك الأساسيه الي ربنا خلقك عشانها

-الإصلاح في الأرض-

يلا ...صلح وقرب



حتقرب من ايه تاني!!























حتقرب من حبيبك رسول الله وتلاقي حاجه تقولهاله لما تشوفه ...

حتقوله ايه ؟!!!!!!!















حتقوله زي ما امرت الصحابه ان كل واحد فيهم يعلم عشره

أنا كمان جايلك بعشره علمتهم


حتقوله ..وانا بقره في السيره شفتك يوم صلح الحديبيه وانت بتطلب من سيدنا علي انه يشاورلك على

الكلمه الي كنت عايز تمسحها لانك مش عارف تقراها

قلتله (أرنيها يا على ..)

قوله رق قلبي للاميين بأميتك يا رسول الله ..


حتقرب من شكر ربنا الحقيقي على النعم الي عندك

عشان عمر ماكان شكر اللسان لوحده هو البعد عن الجحود
كلنا بنشكر بلساننا بس ربنا قال


(قليلا ما تشكرون)

الشكر على النعمه انك تسخرها في خدمة المحرومين منها استشعار منك ان ده حقهم ونصيبهم في الي عندك ..

لكن ماتاخدش النعمه تطلع تجري..

ماتاخدش عنين ماتشوفش بيها غير نفسك

ماتاخدش ايدين ماتناولش بيها حاجه لغيرك

ماتاخدش رجلين كل وظيفتها انها شايلاك

ماتاخدش علم ينور طريقك لوحدك

ماتجحدش نعمة ربنا ..

وقوم قول الحمد لله على الي عندك

وافتكر

(ولئن شكرتم لأزيدنكم) ]