سألت كبيرنا العم بهلول
ليه انت عايش فى ذهول
رد وقال على طول
بدل مانزرع قمح وفول
ونربى غنم وعجول
بنبنى على أرض الحقول
وأيه كمان ياعم بهلول
القطن اللى كنا مشهورين بيه
ومصانعنا بتغزل وتنسج فيه
والعالم كله بيحسدنا عليه
أصبحنا من مستورديه
ونبيع مصانعه للخواجه والبيه
وأيه كمان ياعم بهلول
كنا بنلبس جلبيه زمان
من تحتها صديرى أو قفطان
من الصوف المحلى أوالكتان
أومن غزولنا مصريه الأقطان
دلوقت بنلبس م الصين وتايوان
وأيه كمان ياعم بهلول
الرزالمصرى بتاع المحشى
وبالشعريه طعمه ماحصلشى
أو نأكل منه طبق كشرى
ومن حلاوته ربيت كرشى
بقى فيه عجز مايتقدرشى
وأيه كمان ياعم بهلول
قصبنا كنا بنعصره ونشربه
ونذوق عسله لما نخمره
ونذوب فى الشاى سكره
بقينا على بره نصدره
ونجيب البنجر بدله نعصره
وأيه كمان ياعم بهلول
كنا بنعمل من الفول طعميه
وجبه فطور ع الصبح شهيه
ونتلم نأكلها ع طاوله أو طبليه
على شكل كور أوأقراص بنيه
بقينا نستورعجينتها من تركيه
وأيه كمان ياعم بهلول
اللبن كان طازه ف بيوتنا
نشربه منه احنا وأخواتنا
ونأخذ منه جبنتنا وقشطتنا
ونعمل منه أكلاتنا وحلويتنا
بقينا نشتريه بودره من بقالتنا
وأيه كمان ياعم بهلول
كنا بنشترى الفراخ واللحمه
ونغليهم وناخذ منهم المرقه
ونشرب أحلى طبق شوربه
مش دلوقتى مكعب بودره
أشى باللحمه أو بالخضره
وأيه كمان ياعم بهلول
والنحل شفت أيه فيه حصل
كنا بنأخذ منه أحلى عسل
لغايه ما رش الطايرات وصل
والنحل من الرش بقى ينقتل
مات النحل وراح العسل
وأيه كمان ياعم بهلول
كنا نرجع من الشغل نأخذ دش
ونتعشى جبنه وبطيخ ومش
وغير صوت الكلاب مانسمعش
دلوقت ركبنا على بيتنا الدش
وبنسهر لحد مايبان للصبح وش
وأيه كمان ياعم بهلول
فلاح وعامل بناه وصب
على القهوه كانت رجليهم بتدب
ولاتسمع كلمه غلط ولاسب
دلوقت بقى أسمها كافى شوب
وبقيت للتسليه وقصص الحب
وأيه كمان ياعم بهلول
فروالتنا الحمره الحلوه الصغيره
كنا بنزرعها بالأسماعليه والقنطره
وكنا نأكلها و نشربها معصره
وعند الفكهانى ف السله منوره
كبرنا حجمها بأسمده مسرطنه
وأيه كمان ياعم بهلول
رد وقال مهما الكلام هيطول
وأيه اللى جرى ومين المسئول
اللى بيحصل فينا شئ مش معقول
وسرح بفكره وسكت عن القول
وفارقنى بيهز رأسه فى ذهول
النمط الخطي
