بسم الله الرحمن الرحيم
السلام عليكم ورحمة الله
في مشاكل عندي مش عرفه السبب من الجهاز والا النت
ان شاء الله هبقي موجوده
اسفه جدا لو مش هعرف ابقي معاكم في الاجتماع
المهم ماعلينا ان شاء الله طالما النيه خير ربنا هيكرمنا باذنه ان شاء
بصوا انا هقول اقتراحاتي وشوفو اذا كانت هتعجبكو والا لا قبل ما الجهاز يفصل تاني
اولا: المفروض ان كل واحد منا يبدأ بنفسه وبيته .
انا عندي كذا اقتراح
1- هنعمل جدول للصلاه والسنن وكذا حاجه تاني زي ده مثلا :
اليوم الاحد الاثنين الثلاثاء
الفجر √
الظهر × √
العصر √
المغرب √ ×
العشاء √
الشفع والوتر √
ركعتين قيام ليل ×
استغفار 100 √
صدقه ×
حفظ وقراءه √
وممكن يظلل الخانه الـ معملهاش باللون الاسود بدل الـ × واخر الاسبوع يشوف صحيفته لونها ايه.
واكيد الـ عنده حاجه تانيه يضيفها عليه ...
2- صندوق الخير
وده عباره عن صندوق صغير هنحطه في البيت عندنا ومثلا كل يوم نضع فيه اي حاجه ولو حتي فكه كانت معانا ومش عيزنها ونقول لكل الـ موجودين معانا في البيت واخر الشهر نشوف في كام ونعطيه لاي حد محتاج علي حسب الـ كان موجود بالصندوق.
3- الـتحفيظ وده بقي عباره عن عمل خير يعني مثلا ممكن نمسك الاطفال بتوع العيله يوم في الاسبوع مثلا الجمعه ونحفظهم ولو ايه واحده وممكن كمان نقرا قصه من قصص الانبياء او سيره او نعلمهم فقه مثلا الصلاه او الوضوء وحاجات كتير ومش لازم اطفال وبس ممكن كمان نقعد احنا واخواتنا او اصدقاءنا ولو ساعه كل اسبوع نتكلم في الدين ونتفق علي طاعه نعملها خلال الاسبوع القادم.
ثانيا: في المنتدي
ومننساش النيه نيه عمل الخير مش نيه ان يتقال علينا ....
1- مع بعض هنا
المفروض اننا نتفق علي حاجه تتعمل كل اسبوع مثلا هنبدأ بركعتين قيام كل يوم ده في الاسبوع الاول والاسبوع التاني مثلا حفظ 5 ايات من القران مع الركعتين والاسبوع الثالث صدقه ولو بأقل حاجه (تبسمك في وجه اخيك صدقه) مع الركعتين والحفظ وهكذا...
2- اعضاء نادي الخير
كل مناسبه المفروض انهم يذكرو الناس وباقي اعضاء المنتدي بيها زي مثلا صيام 3 ايام من كل شهر عربي يعني مثلا يوم 13/14/15 نبعت للأعضاء تحت اسم نادي الخير ونفكرهم انهم يصوموا .
3-موضوع جديد ومفيد
كل اسبوع عضو منا هيتكلم عن موضوع جديد ومفيد زي مثلا الصلاه واخطاءها وانواعها صلاة الفرض / السنه / الحاجه / الاستخاره / الاستسقاء / الجنازه .... وممكن كمان تعليم اي مجال من المجالات وهكذا ومش لازم يكون مواضيع دينيه بس ممكن اي موضوع تاني المهم انه هيساعد الناس واكيد هيفيدهم.
4- ممكن كمان كل عضو منا يمسك حاجه يتكلم فيها زي مثلا العضو الاول يتكلم عن السيره وكل اسبوع يتكلم عن جزء والعضو التاني يتكلم في مواضيع اجتماعيه والثالث مواضيع فقهيه والرابع ثقافيه والخامس علميه وهكذا ... واكيد ده كله هيستفاد منه كتير من الاعضاء داخل المنتدي وخارجه.
انا بقي ده الـ عندي ممكن تشوفو رايكم ايه وباقي اقتراحتكم ونقرر هنعمل ايه وبالذات خارج المنتدي عشان انا هو ده الـ اقدر اعمله بره ومش عرفه اعمل ايه تاني
وطبعا كل ده هنشوفه كل اسبوع وهنشوف كل عضو عمل ايه طول الاسبوع
يعني كل عضو هيعرض الجدول بتاعه وهيقول عمل ايه في كل اقتراح
يعني لو وافقتوا علي اقتراحاتي كل عضو منكم هييجي ويقول عمل ازاي :
1- الجدول
2- الصندوق
3- الحفظ والتحفيظ
4- الاقتراح الـ هنمشي عليه الاسبوع القادم وهل عمل ما تم الاتفاق عليه الاسبوع السابق؟
5- لو في حاجه ذكر بيها الاعضاء يقول عليها وعملها ازاي
6- المجال الـ تحب تضيف فيه وتتكلم وتبقي المسئول عنه كل اسبوع
وكل ده طبعا هيحصل جوه النادي مش في مواضيع خارجيه
ها ايه رايكم انا عرفه اني طولت اوي عليكم بس قولت اكتب كل حاجه مره واحده عشان النت لو فصل تاني
ها عيزه بقي اقتراحاتكم ونشتغل ياجماعه
اه نسيت
ادعو ياجماعه لياسمين ربنا يقومها بالسلامه
هي كلمتني امبارح والحمد الله كويسه
مواضيع مشابهة
النمط الخطي
