و كأنك مش واخد بالك
خمسة وعشرين سنة فاتت
وانا زعلان من ابويا عشانك
من يوم مااتريقنا
على أستاذ العربى
كان بيقول :
(( المستحيلات ف الدنيا تلاتة
العنقاء
والغول
والخل اللى مابيخونش((
يومها هلكنا من الضحك عليه
ورفعنا إيدينا ف نفس اللحظة
قلناله :
( يابيه ..
المستحيلات إتنين(
فطردنا من الحصة وقال مجانين
بصت لك يومها وخفت
ليكون الأستاذ على حق
واما رجعت ف إيدى ...
جواب الفصل لابويا
زعق فيا وقاللى
( عبيط ....
صاحبى وصاحبك ع القهوة)
وحلف بيمين الله
لوشافنى معاك
ما ح ابات ف البيت
واخدت ف وشى ساعتها
وغبت عن البيت أسبوع
وإمبارح ...
جه على بالى الموضوع
وأنا شايفك ...
عامل نفسك مشغول بالطاولة
وبتهرب للقواشيط
من عينى اللى بتنزف هم
وبتلعن عند الزهر معاك
وكأنك مش واخد بالك
من عند الدنيا معايا
خمسة وعشرين سنة فاتت
وانا مش فاهم
وامبارح بس فهمت
سبتك ع القهوة
ومشيت
وانا باقرا الفاتحة ف سرى
لابويا …..
ولأستاذ العربى !
مواضيع مشابهة
النمط الخطي
