إقتباس:
المشاركة الأصلية بواسطة نسر مصر
وهكذا سادتى وسيداتى الأفاضل كما ترون فأبواب دورات المياه ليست مجرد حاجزا يستر من يجلس خلفه ... ولكنها متنفسا تستطيع من خلاله جموع الشعب المطحونة ان تعبر عن بعض ما يجيش بصدورها دون خوف من ان يكون هناك مخبر واقف لك ورا الباب.....بكل بساطة هذا الشعب ...وبكل مايتعرض له من ظلم وطحن وسحق الا انه يرفض ان يصمت ....سيتكلم حتى ولو من وراء باب دورة الميه ..
وتستمر الكتابة...وتستمر القراءة
برجاء من السادة القراء ترك القبقاب على باب الدورة لأنه عهدة
|
يا سلام ؟
نتكلم بجد ؟ وما حدش يزعل منى ؟ ها ؟ اتكلم ؟
نتكلم
اولا فى مثل مش فاكر انجليزى ولا انشالله اسبانى المهم المثل ده معناه انك ممكن تتعرف على مقدار تحضر الشعوب من مستوى حماماتهم العامة............. أظن طبقا للمثل كلنا عرفنا مقدار تحضر الشعب المصرى
أولا الكتابة على الابواب العامة والحوائط والكلام ده كله معناه .... عدم تحضر
هتقولى طب مهو مش لاقى مكان تانى يعبر فيه عن رأيه غير باب الحمام اقولك ده دليل على ان الشعب عاجز... شعب مش قادر انه يتكلم الا بالكتابة على باب الحمام يبقى شعب عاجز ومش بيقدر الممتلكات العامة لانه زى ما بيشوه بالكتابة اكيد بيشوه بطريقة تانية ومفيش داعى لذكر امثلة
هتقولى طب ماهو لو اتكلم فى مكان تانى هيروح ورا الشمس هقولك هو السبب فى كده بسبب السلبية والخوف و الانانية شوفت فيلم شىء من الخوف اهو الشعب المصرى عامل زى الدهاشنة فى الفيلم ( على فكرة انا سمعت ان الفيلم ده كان اتمنع فترة فى اول ظهوره لانه فيلم سياسى من الدرجة الاولى لانه فعلا الشعب المصرى كان هو الدهاشنة والحكومة هى عتريس )
تقولى يعنى الحل ايه يا فيلسوف اقولك انا مش بتفلسف والحل كان فى الفيلم .....هو ايه اللى حصل فى الفيلم ...........ثورة على الظلم وكلنا نتحد ونقول لا ........ كلنا نقول جواز عتريس من فؤادة باطل
لا انت الظاهر الافلام لحست عقلك............... يابنى عيش الواقع
والله ده واقع كلنا نتفق وناخد موقف
هتقولى طيب يا عم الامور لحد ما كلنا بقه نتحد ونبقى قوة نعمل ايه اقولك تعمل ايه .............
ابدأ بنفسك اعمل اللى يمليه عليك ضميرك ويرضى ربنا وبس
ابدا بنفسك وربى ولادك على كده انهم يرضوا ربنا ويعملوا اللى يرضى ضميرهم وبس حتى لو كان ده هيوديهم ورا عين الشمس بس ده هيكون فى الدنيا بس . لكن فى الاخرة لهم مالا عين رات ولا اذن سمعت ولا خطر على قلب بشر
ايه يا عم الكلام الكبير ده ؟ هو خلاص ناس ماتت ودخلت الجنة وحاجات كده ولا ايه؟
اه والله هو كده
والتاريخ ادامك اهو مافيش اى اصلاح تم على وجه الارض الا لما كان ليه ضحايا من الناس الشرفا
وادينا اهوه على ارض الواقع وفى مصر هنا ولسه ماحصلش اصلاح ولا أى حاجة وفى ناس فى المعتقلات وفى السجون عشان قالت لا وناس ماتت وناس راحت وماجتش وناس راحت ومعدناش
بنسمع عنها
اللى عايز اقوله ان مافيش حاجة بتيجى ببلاش ومن غير تضحيات لازم يكون فى تضحيات بالمال وبالدم
احنا بقه الحمد لله التضحيات اللى بنقدمها تضحيات على حساب كرامتنا باننا نقول كله تمام يافندم شلوت سعادتك دفعة للامام
ها ؟ ابدا بنفسك واعمل اللى يرضى ربنا وربى ولادك على كده ومتنساش تقول لاولادك لو عاجزين ومش قادرين تعملو حاجة ياريت ما تكتبوش على ابواب الحمامات وسيبوها نضيفة مش يبقى مووت وخراب ديار
مواضيع مشابهة
النمط الخطي
