ايه اللي بيحصل ده؟؟

[MaDo MaN]

ايه اللي بيحصل ده؟؟

ايه اللي بيحصل لنا؟؟

ليه تعامل الناس مع بعضهم يمشي من سيئ إلى أسوأ؟؟

ليه ما بقيناش نطيق بعض؟؟

انزل الشارع و امشى في الزحمة...لو حد خبطك في كتفك...ما تطمعش منه في اعتذار....دقني اهه لو بص لك اساسا..

لو رحت تشتري حاجة من أي محل....غالبا هيعاملك و كأنك بتتسول منه...

و يا سلام لو كانت السلعة اللي انت اشتريتها معيوبه أو ناقصة...ساعتها أحسن لك تلم اخواتك و صحابك و تشمر اكمامك علشان تدخل في مناقشة حامية مع التاجر اللي بدوره مش هيرضى يرجع لك حاجة بعهالك الا لما يشوف العين الحمرة..

بص لتعامل سواقين التاكسي و الميكروباص ((او المشروع عندنا)) و انت تعرف ايه اللي وصلنا له في التعامل مع بعضنا.."إنسى يا عمرو"..

"شكرا...آسف...لو سمحت"...كلمات كتير قلت في الكلام....و شوية شوية هتنقرض.." ياه انت لسه فاكر الكلام ده؟؟ ما قلت لك إنسى"..

و كتير تشوف الواحد من دول داخل مدخل العمارة اللي ساكن فيها و مش بيكلف نفسه يقول "السلام عليكم"..و خايف أحسن لو قالها الناس تنقص من احترامهم له...بس ممكن يقول "مساء الخير" لو كان فايق بس..

قليلة هي المواقف اللي تلاقي فيها شاب بيساعد بنت في شيل شنطة أو يقوم في مواصلة علشان تقعد مكانه ((طبعا من غير مايتمنظر عليها))..

صدقني لو تطوعت وعملت حاجة زي دي..ميت واحد هيبصلك و كأنك ارهابي أو جاي من كوكب تاني.."انت مش من هنا يابني و لا ايه؟؟"...

مستوى الحوار نفسه تدنى..مش بس على مستوى الشارع...كمان على مستوى الاعلام و الفضائيات..

أساتذة الجامعة - اللي المفروض يكونوا أرقى طبقات المجتمع - بتلاقي مستوى حوارهم مع الطلبة في منتهى ((الإحترام))..مطعم بألفاظ في منتهى الأدب..

و محدش يقدر ينسى الــ((شو)) الاسود اللي من غير رباط بتاع - المستشار - مرتضى منصور..و اللي عمل بيه ((شو)) اعلامى رائع في التليفزيون و على الملأ..

كل ده سببه إيه؟؟

يا ترى الافلام؟؟ اللمبي و بوحة و خالتي فرنسا و عودة الندلة.؟؟

مفيش مانع الواحد يبقى دمه خفيف و يقول كام إفيه من الافلام لاصحابه و يضحكهم...بس كمان لازم يحاول يحسن اسلوب التعامل و الحديث..و الرجولة ادب..

و لا رتم الحياه السريع اللي يخلي كل واحد يبص قدامه و ما يلتفتش للي جنبه؟؟

يا ترى البعد عن الدين هو السبب؟؟

و الله مش عارف...بس أكيد ده منحنى خطير داخلين عليه...و اكيد برضه محدش هيحترمنا كعرب و مسلمين إلا لو احترمنا بعضنا الأول..

و دمتم..

[وفاء]

عندك حق فى كل اللى بتقوله
اكيد ده من الهم والحزن والحياة الصعبة
الناس بقت بتحاول توفر لقمة العيش حتى لو على حساب اى شخص تانى المهم هو يكون فى امان
اما بقى بتوع الميكروباص والتاكسى دول موال لوحدهم
شكرا على الموضوع وان شاء الله هرجع تانى

[elektra_2007]

بص طبعا هو الكلام كلوا صح ودة
بسبب البعد عن الدين طبعا الى بعلمنا اولا اسلوب الحوار الراقى
والحسنة فى المعاملة
كمان الحياة الصعبة بقت مش بتخلى حد يستحمل نفسه يبقى هيستحمل غيره
وتحياتى ليك

[MaDo MaN]

وفاء
إلكترا

ألف شكر على المرور و الرد
و مستني عودتك تاني يا وفاء

[Dr.No2a]

عندك حق يا مادو أنا فعلا لفت نظري طريقة التعامل بين الناس لاني كنت عايشة في الخارج وكنت شبه معزولة عن الناس ولما رجعت مصر لقيت التعامل زي ما انت وصفت بالظبط ياريت كل واحد يحاول ياخد باله من تصرفاته ومن تعامله مع الناس علشان حتى يكون محبوب من الناس الي حواليه

شكرا ليك يا مادو على الموضوع الجميل

[همس المحيط]

موضوع جميل جدا يا مادو وفعلا الناس مبقتش طايقة بعض معرفش ليه دة انت لو كلمت حد كلمة بيبقى عايز يقوم يضربك طبعا مش كلهم لكن اكثرهم ودة بيتهيالي بيرجع لمشاكل الحياة والمشغوليات اللي خلت كل واحد مش طايق نفسه
شكرا مرة تانية على الموضوع الرائع دة

[نرجسية]

موضوع مهم مناقشته

فعلا تصرفات الناس تغيرت كثيرا
حتى الألفاظ التى تستخدم صارت مختلفة
أعتقد أن السبب الرئيسى هو البعد عن الدين و عدم احترام القيم و المبادئ
الآن أصبح الناس أكثر عدوانية
فمثلا لو وجهت لأى أحد عتاب على خطأ ما ارتكبه فيقابلك بالجملة الهجومية " و انت مالك انت "
أو لو كنت فى أحد وسائل المواصلات و نبهت الأخ الذى يجلس أمامك أن كرسيه راجع للخلف و يضايقك يرد رد عنيف " و أنا أعمل لك ايه يعنى ؟"
اذن هى حالة عامة .....
سببها عدم الاحساس بالأمان فكل واحد يشعر أنه مهدد من الآخرين لذلك عليه أن يتعامل معاهم بعنف حتى لا يستولى أحد على حقه !

و اعتقد ان التريية هى أهم شئ
فمازال حتى الآن عائلات تربى أبناءها على احترام الآخرين
و لكن هؤلاء قد يجدون صعوبة فى حياتهم تحديدا فى التعامل مع المجتمع الذى لا يحترم فيه كل فرد الآخر
أما عن موضوع الألفاظ
فكما قلت
أفلام اللمبى كان لها تأثير على ألفاظ الشباب

[MaDo MaN]

وفعلا الناس مبقتش طايقة بعض معرفش ليه دة انت لو كلمت حد كلمة بيبقى عايز يقوم يضربك

فمثلا لو وجهت لأى أحد عتاب على خطأ ما ارتكبه فيقابلك بالجملة الهجومية " و انت مالك انت "
أو لو كنت فى أحد وسائل المواصلات و نبهت الأخ الذى يجلس أمامك أن كرسيه راجع للخلف و يضايقك يرد رد عنيف " و أنا أعمل لك ايه يعنى ؟"
اذن هى حالة عامة

الحالة العامة دي اللي هي حالة العدوانية ... و متهيألي إن هي ناتجة عن الضغط اللي واقع على الناس و حالة البلد الإقتصادية
أنا منكرش دلوقتي إني ممكن أنزل الشارع و أنا متحفز للناس

Dr.No2a

همس المحيط

نرجسية

نورتوا الموضوع و مشكورين على الردود

[مرسول الغرام]

موضوع جميل اوى
شكرا على طرحك للقضيه دى
سلامى

[MaDo MaN]

شكرا لك مرسول على الرد