نصائح هااااامة لكل بنت مخطوبة!!!اوعوا تفوتكم

[princess.lilo]

آنستي العزيزة.. لو ربنا فك عقدتك.. واتخطبتي.. فإليكِ نصائحي

حتى تأخذي بخطيبك من مركب الخطوبة إلِّي محدش عارف

هاترسى على إيه.. إلى مثوااااه الأخير في قفص النسانيس


قصدي قفص الزوجية السعيد ..


أجمل ما في الخطوبة العزومات الرومانسية.. على أحلى محلات

أكل في البلد.. واللي عمرك مانتي شايفاها بعد الجواز.. المهم

نصائحي لك عند أي عزومة مع خطيبك.. قلنا رقَّه




*الأول لازم تعرفي إن الشوكة والسكينة بيتمسكوا من إيديهم من

الطرف يعني مش من الوسط ولا من البوز زي الخنجر ولا من فوق

طبعًااا





*العيش أوعي تفضحينا وتقطعيه بسنانك.. ولا الرغيف نصين بإيدك

وكل نص لقمة وتحشري.. أوعي.. العيش بيتقطع بالسكينة في

الطبق.. وبعدين تاخدي لقمة.. لقمة .. بالعافية.. قال يعني نفسك

مسدودة.. اضغطي على أعصابك جدااا وبعدين لما تروَّحي.. إبقي

حِـفِّي زي ماانتِ عايزه

*الشوووربة.. أبوس كعب رجلك.. بند الشوربة ده مهم جدًاااا

الشوربة تتشِرب من غير صوت خالص.. ومن غير ماتقعدي تنفخي

فيها.. زي القهوجي اللي بينفخ في الحجر للزبون.. وطبعًاااااا عايزِك

تنسي تمامًا.. السلطانية اللي بتقيميها على بقك في البيت

وتدلدقي على روحك ..


بالمعلقة وبدون صوت.. سخنة, ولعة , برضه بدون صوت

وتسيبي تلت الطبق ع الأقل.. مش تميليه.. عشان تلهطيها لآخر

نقطة



*الرز طبعاً .. بيتّاكل بالشوكة.. أوعي إيدك تتمد على المعلقة

وتغرفي من طبق الرز وتعبّي.. إوعي.. الرز بالشوكة.. وكإنك

بتبوسيه مش بتاكليه




*المكرونة.. الاسباجتي.. برضه بالشوكة.. تتلف على طرف

الشوكة.. لحد ما تخلص وبعدين تحطيها ف بؤك من سكات.. مش

تشفطي المكرونة عود عود




*السمك.. مشكلة.. شوفي.. بتفصلي اللحم عن الشوك

إزاي..؟؟ تقطعي اللحم من النص.. بالطول وبعدين تفردي اللحم على

الجانبين ولما تخلصي ناحية.. متقلبيش السمكة.. بلاش فلح

شيلي السلسلة بالشوكة والسكينة وحطيها في جنب الطبق

وكملي أكل النص التاني.. وبدل الفيلم الهندي ده.. نصيحة

ماتكليش السمك خالص.. قولي مابحبش السمك وخلصي نفسك




*الجمبري.. -إذا كنتي عارفاه-.. أول ماطبق الجمبري ينزل.. بصيله

بقرف واحتقار شديدين.. آل يعني زهقانة من كتر أكل الجمبري

الجامبو ف بيت بابّااااا.. واتنهّدي جامد وقولي.. برضه..؟؟؟ وتروحي

قاطعة راس الجمبريّاية.. بالشوكة.. أنا ف عرضك إنسي

المصمصة دلوقتي

*البطاطس سواء مسلوقة أو محمرة.. أوعي تهرسيها وتدبيها على

الرز وتدّي ...لا..لآ...لآ...بالشوكة حتة حتة وإنت زي ما تكوني

هاتعيطي من كتر ما البطاطس صعبانة عليكي



*الفاكهة.. لو الفاكهة فيها بذر.. طلعيه من بؤك بالراحة وحطيه في

إيدك وهي مقفولة.. وبعدين في طفاية السجاير اللي ع الترابيزة

أوعي ياحبيبتي من نظام التفتفة للبذر.. إنسي



*ولما تخلّصي أكل تحطي إيدك على بطنك.. -اللي عصافيرها

بتصوصو من العينات اللي كلتيها-.. وتقولي له مش ممكن.. أنا

عمري ما اتفجعت كدة.. أنا قدامي أسبوع.. هابطّل أكل فيه

وبعدين تمسكي الفوطة اللي دايمًا موجودة على التربيزة من غير

لزمة.. وتبوسيها.. آل يعني بتمسحي بؤّك

وبعدين تستأذني منه لإصلاح ماكياجك.. وتخشي التواليت

وتطلعي من شنطة إيديك.. لفة الفول والطعمية اللي جايباها

معاكي.. وبالهنا



منقووووووووووووووووووووووووووووووووول


يللا يا بنات مستنيه ردودكم

[princess.lilo]

فييين الردود يا بنات؟؟؟؟

[rehab89]

ههههههههههههههههههههههههههههههههههههههههههههههه
بجد تحفة جدا انا كنت هموت من الضحك وميرسى عالنصايح هنعمل بيها

[همس المحيط]

ههههههههههه
حلوة اوووووووووووي يا ليلو
موضوع رووووووووووعة ودمه خفيف جدا
ميرسي على الموضوع

[princess.lilo]

المشاركة الأصلية بواسطة rehab89

ههههههههههههههههههههههههههههههههههههههههههههههه
بجد تحفة جدا انا كنت هموت من الضحك وميرسى عالنصايح هنعمل بيها

العفووو يا رحاب انا بس حبيت انصحكم هههههههههههه

شكرا يا حبيبتى على ردك الجميل

[موره هانم]

ههههه
هي بقت كده يعني
من كتر ماحنا مش لاقين حد يتتريق علينا بقينا نتتريق على نفسنا
هو بصراحة عندك حق الولد بيحب البنت الديليكا على رأيهم
بس برضه مهما خبينا حييجي اليوم اللي كل شيجين حاينكشفن ويباااااااان فيه
وربنا يستر على عبيده و على ولاياه بالأخص
عقبال كل البناتيت لما يتخطبو واللي مخطوبين يدخلو قفص النسانيس
مبروك يا عرايس

[princess.lilo]

المشاركة الأصلية بواسطة همس المحيط

ههههههههههه
حلوة اوووووووووووي يا ليلو
موضوع رووووووووووعة ودمه خفيف جدا
ميرسي على الموضوع

ميرسىىىىىى ليكى انتى يا همس المحيط على ردك الجمييل
جزاكى الله خيرا

[princess.lilo]

المشاركة الأصلية بواسطة موره هانم

ههههه
هي بقت كده يعني
من كتر ماحنا مش لاقين حد يتتريق علينا بقينا نتتريق على نفسنا
هو بصراحة عندك حق الولد بيحب البنت الديليكا على رأيهم
بس برضه مهما خبينا حييجي اليوم اللي كل شيجين حاينكشفن ويباااااااان فيه
وربنا يستر على عبيده و على ولاياه بالأخص
عقبال كل البناتيت لما يتخطبو واللي مخطوبين يدخلو قفص النسانيس
مبروك يا عرايس

شكرااا ليكى يا مروة هانم على ردك الجميييل

[موره هانم]

اي خدمة يا برنسس ليلو انتي تؤمري

[رومانسيه جداجدا]

هههههههههههههههههههههههههه جميله جدا عجبتني وبعدين تستأذني منه لإصلاح ماكياجك.. وتخشي التواليت

وتطلعي من شنطة إيديك.. لفة الفول والطعمية اللي جايباها

معاكي.. وبالهنا
شكرا على الموضوع

[princess.lilo]

المشاركة الأصلية بواسطة رومانسيه جداجدا

هههههههههههههههههههههههههه جميله جدا عجبتني وبعدين تستأذني منه لإصلاح ماكياجك.. وتخشي التواليت

وتطلعي من شنطة إيديك.. لفة الفول والطعمية اللي جايباها

معاكي.. وبالهنا
شكرا على الموضوع

شكرا ليكى انتى على ردك

[safffffy2007]

الموضوع رائع بس الموضوع ده مكتوب قبل كده فى المنتدى بس فى قسم تانى

[princess.lilo]

المشاركة الأصلية بواسطة safffffy2007

الموضوع رائع بس الموضوع ده مكتوب قبل كده فى المنتدى بس فى قسم تانى

مكتوب قبل كده؟؟؟انا مشفتهوش فعلا و بجد انا اسفة لانى مشفتهوش لانى جديدة فى المنتدى

و على العموم شكرا لردك و شكرا للمعلومة دى

[حنين مصر]

ههههههههههههههههههههههه
خطيرة

[eme]

هههههههههههههه

ينهار ابيض

دا انا علي كده بهدلت الدنيا

هههههههههه بيبقي حاسس انه مع واحد صاحبه

انت متأكده ان الرز بيتاكل بالشوكه

والعيش والسمك

طيب الكابوريا تتاكل ازاي وانا معاه

بلاش احكيلكم احسن انا عملت ايه في الكابوريه دي بالذات

موضوع دمه تحفه

تسلم ايدك