هو دة المصري فى كل مكان وللأسف مصري.....

[Tears in Smile]

طبعا يا جماعة كلنا قاعدين بنفكر فى حال المواطن المصري سواء داخل مصر او خارجها
و بنقول دلواتى ان الحكومة المصرية ما خلتش للمواطن المصري تمن لا في بلدة و لا فى الغربة و دايما بنقول الدول العربية بتكرهنا و الدول العربية بتحقد على مصر و الدول العربية دايما بيعاملوا المصريين معاملة سيئة جدا و بيعاملوا باقى الجنسيات معاملة كويسة و معاملة طيبة و بترحاب و طيبة قلب مالهاش مثيل

طيب سؤال كدة بصراحة يا ريت كل واحد مننا ييسأله لنفسه و يشوف اجابتة اية
دايما لما ييجي أى حد مننا يسافر يلاقى اصدقاءة و اهلة و احبابة و هما بيودعوه يقولوا
( خلي بالك يابنى من المصريين فىالغربة اصلهم وحشييين أوى )
( ماتثقش فى مصري بسهولة يابنى علشان دول غدارين ) كأننا مش مصريين
(خلي بالك ن حاجتك علشان ممكن تلاقى واحد معاك مصري مش كويس )
و الخ الخ................. من الجمل الجميلة فى حق المصريين و خلو بالكم الكلام دة كله بيكون لسه و الشاب ماخرجش من باب بيتهم

لما بيسافر و يقابل الجماعة احبابنا المصريين برة المقابلات بالود و الترحاب و كل واحد خايف من التانى لان اللى برة كمان عنده خلفية ان اللى جاى دة هاياخد منه لقمة العيش اللى هو تعب و سافرلها
و من هنا يبتدى المواطن المصري يرخص نفسة مش الحكومة بس اللى بترخصنا على فكرة يا جماعة احنا كمان بنرخص نفسنا كتيييييييييييييييييييييييييير جدا بدليل ان فى مصريين ناجحين برة مصر بكتييييييير و فى دول عربية و ليهم احترامهم ووضعهم الاجتماعى وسط المجتمعات العربية

انا هاحكيلكم بكل بساطة على حكايات حصلت حقيقية برة مصر و مش هانروح بعيد دة لسة احنا فى الدول العربية بس :-
فى احد الدول العربية مجموعة شباب مصريين بيشتغلوا فى وظائف محترمة فى شركة محترمة و كبيرة و صاحب الشركة واحد من ذوى النفوذ و السلطة فى البلد دى و مجموعة الشباب متقسم ما بينهم الشغل و المرتبات واحدة ومتساوية و فى مساواه فى التعامل و المعاملة بناخدها من اصحاب العمل بكل أحترام و اخلاق و بيطمأنوا علينا كأننا من أهل بلدهم بالظبط و لكن المصريين بأة بينهم و بين بعض (كره - حقد - غل - نميمة - سب )
كلنا نعرف المثل المشهور فى السعودية ( لما المدير يحب يعرف اللى بيحصل فى شركتة يعين اتنين مصريين مع بعض ) المثل دة ماجاش من فراغ دة جة نتيجة اننا كمصريين ما بنحبش بعض و ما بنحبش الخير لبعض
طبعا انا فاتح الموضوع دة للنقاش مع الناس مع العلم انى برة مصر دلواتى و الحمد لله طالما انا بعيد عن اصحابي المصريين بكون مستريح على الأقل نفسيا
يا ريت ناخد الموضوع دة بجدية شوية لان الموضوع دة ماهواش متعلق بشخص واحد مسافر برة دة متعلق بأكتر من مليون مصري عايشين برة مصر

[Honey1900]

الكلام دا صحيح فعلا


بس الحمد لله الواحد بيحاول يبقي حذر بس انما مش خايف

شكرا ع الموضوع

[الورد الجوري]

اولا اهلا بيك معانا في المنتدى
نيجي بقى لموضوع النقاش

المشاركة الأصلية بواسطة Tears in Smile

طبعا يا جماعة كلنا قاعدين بنفكر فى حال المواطن المصري سواء داخل مصر او خارجها
و بنقول دلواتى ان الحكومة المصرية ما خلتش للمواطن المصري تمن لا في بلدة و لا فى الغربة و دايما بنقول الدول العربية بتكرهنا و الدول العربية بتحقد على مصر و الدول العربية دايما بيعاملوا المصريين معاملة سيئة جدا و بيعاملوا باقى الجنسيات معاملة كويسة و معاملة طيبة و بترحاب و طيبة قلب مالهاش مثيل

بالنسبه للنقطه دي
هي حقيقه بس مش ميه في الميه
لان انا عشت طول حياتي من وانا عمري ايام معدوده بره مصر
و شفت ازاي الناس بيحترموا اهلي جدا و ازاي مكانتهم عاليه عند عديد من الجنسيات مش المصريين بس
و انا نفسي كنت بتعامل معامله ممتازه و انا في المدرسه
لكن خلينا نقف على نقطه انه ليه بيعاملوا غيرنا احسن
دي بقى ليها اكتر من معيار
بداية .. احنا اللي عملنا في نفسنا كده
لان جت فتره زاد فيها النزوح للخارج من ذوي الشهادات المتوسطه او اللي مفيش عندهم شهادات اصلا
و دول بقى فكرهم البسيط صورلهم ان اللي بيخطي الحدود المصريه
بيتكافئ و بيغرف من جبال الذهب !!
و ده مخالف للواقع .. و مع الاصطدام بالواقع ضعاف النفوس
اتجهوا للتصرفات اللي مش تمام و على سبيل المثال .. النصب
مع انه كان ممكن يرضى بقليله و يشتغل شيء بسيط
لكن طبعا كل اللي سبقوه و سافروا كانوا بيرجعوا بهيئة الوزراء
فاللي حواليهم يحسبهم من ضمن التشكيل الوزاري للدوله اللي
سافرلها .. حتى و ان كان بيشتغل بما يعادل الساعه بجنيه!!
متبهدل و بيتعب في شغله
بس كله بيقول اهو " الصيت و لا الغنى "
و طبعا اتاخدنا كلنا بذنب الفئه دي
و السيئه كالعاده عندنا احنا العرب جميعا بتعم
مع ان فيه بجد ناس بتعرف تفرق بين الكذاب و بين الصادق
في المقابل بقى اللي من الدول العربيه الاخرى
الطبيب مسافر و عارف انه هيشتغل طبيب
و العامل عارف انه هيشتغل عامل
و مش بيشتغل شغلانه غيرها
احنا المصريين و ده لاحظته كويس جدا لما جيت هنا
عندنا صفه و اخاف تكون بقت جين متوارث .. اللي هي
انه مفيش حد اسمه مش عارف
يبقى واحد مسافر على انه فنـّي اجهزة
ويسألوه تصلح عربيات ؟؟
يرد ايوة " اسفه على اللي هقوله " و اصلح اللي جابوها
ولو سالوه عن السباكه هيقول طبعا بعرف دنا حريف
و لو عن النجاره هيقول دي لعبتي بقى
و هكذا ..... يبقى منين عايزينهم يحترمو صفات كده ؟؟

طيب سؤال كدة بصراحة يا ريت كل واحد مننا ييسأله لنفسه و يشوف اجابتة اية
دايما لما ييجي أى حد مننا يسافر يلاقى اصدقاءة و اهلة و احبابة و هما بيودعوه يقولوا
( خلي بالك يابنى من المصريين فىالغربة اصلهم وحشييين أوى )
( ماتثقش فى مصري بسهولة يابنى علشان دول غدارين ) كأننا مش مصريين
(خلي بالك ن حاجتك علشان ممكن تلاقى واحد معاك مصري مش كويس )
و الخ الخ................. من الجمل الجميلة فى حق المصريين و خلو بالكم الكلام دة كله بيكون لسه و الشاب ماخرجش من باب بيتهم

لما بيسافر و يقابل الجماعة احبابنا المصريين برة المقابلات بالود و الترحاب و كل واحد خايف من التانى لان اللى برة كمان عنده خلفية ان اللى جاى دة هاياخد منه لقمة العيش اللى هو تعب و سافرلها

طيب جميل جدا
هسال نفسي السؤال ده
و لقيت اكتر من اجابه
1- الاهل دائما و ابدا شايفين ابناءهم طيبين و على نياتهم
حتى و ان كان اللي مسافر ده شرير مش طيب
2- المبدأ الراسخ من زمان جدا اللي كان ايام بيت العيله وابناء العمومه .. كانوا بيعلموا الاطفال ساعة الاكل ايه ؟؟
اللي يطول حاجه ياخدها قبل ابن عمه .. صح ؟؟
طبعا ده مش الكل عمل كده .. فيه ناس تانيه كان عندها ايثار
و علمت اولادها صح
3- الفن بتاعنا .. مخلاش فيلم و لا مسلسل و لا حتى حلقات في الراديو.. الا و جاب المشهد الشهير .. عوضين نازل من القطر و هب صاحبه خده بالاحضان و نشل محفظته .. و قيس بقى على القطار اي وسيله اخرى

و من هنا يبتدى المواطن المصري يرخص نفسة مش الحكومة بس اللى بترخصنا على فكرة يا جماعة احنا كمان بنرخص نفسنا كتيييييييييييييييييييييييييير جدا بدليل ان فى مصريين ناجحين برة مصر بكتييييييير و فى دول عربية و ليهم احترامهم ووضعهم الاجتماعى وسط المجتمعات العربية

انا هاحكيلكم بكل بساطة على حكايات حصلت حقيقية برة مصر و مش هانروح بعيد دة لسة احنا فى الدول العربية بس :-
فى احد الدول العربية مجموعة شباب مصريين بيشتغلوا فى وظائف محترمة فى شركة محترمة و كبيرة و صاحب الشركة واحد من ذوى النفوذ و السلطة فى البلد دى و مجموعة الشباب متقسم ما بينهم الشغل و المرتبات واحدة ومتساوية و فى مساواه فى التعامل و المعاملة بناخدها من اصحاب العمل بكل أحترام و اخلاق و بيطمأنوا علينا كأننا من أهل بلدهم بالظبط و لكن المصريين بأة بينهم و بين بعض (كره - حقد - غل - نميمة - سب )

اديك قلت .. بينهم و بين بعض .. بس على فكره كل الجنسيات الاخرى كده بس لانها بتكون بينهم و بين بعض مش بتشوفها انت
" تحسبهم جميعا و قلوبهم شتى "

كلنا نعرف المثل المشهور فى السعودية ( لما المدير يحب يعرف اللى بيحصل فى شركتة يعين اتنين مصريين مع بعض ) المثل دة ماجاش من فراغ دة جة نتيجة اننا كمصريين ما بنحبش بعض و ما بنحبش الخير لبعض

مش اكيد يعني بس يمكن المبدأ المتبع هو فرق تسد
او يمكن لان احنا المصريين بنيجي بالسماع
لما يحبو يعرفوا شيء من فلان عن فلان
يقوله دقال عنك حرامي
يرد بحميه الدفاع ده هو اللي كذا و كذا
فيرد الرئيس طيب اثبت
و تبدأ المعارك الطاحنه
و على فكرهانت عندك حق بردو في جزء كبير من النقطه دي
لان فينا فئات مبتسترش و بتأخذها الحميه و بناكل في بعض زي السمك

طبعا كل الكلام اللي اتقال ده بردو مش بنسب ميه في الميه
لان فعلا من تجربتي الشخصيه فيه مصريين بيحبوا بعض جدا
و بيخافوا على بعض
و بيحترموا نفسهم جدا جدا جدا و مجبرين الاخرين بحسن سلوكهم على احترامهم
مهما كانت الشائعات حوالين المصري المغترب
ميرسي ليك و اسفه على الاطاله في الحديث
و بصراحه مش عارفه ..
احتمال اجي تاني اتناقش مع الردود
ميرسي ليك

[مغازلجية]

صح انا موب مصرية ..

بس فالمدرسة كانت معلماتي مصرياتـ ومدرسين خصوصي مصريين ..غير بعض الجيران..

وانا كنت كل مرة اسال امي ..ليش المصريين مايحبون بعض ولاايتمنون لبعض الخير؟؟

لاني اللي اشوفه مجرد عداوة بين بعض..
المدرسة الفلانية ماتجلس عند الثانية ولاتكلمها غير المخانقة والزعل من الصبح امام كل البنات..

والدرس الخصوصي مانخبر الاستاذ فلاان ان فلاني يدرسنا ..
وجيرانا بيت طابقين ايجار فوق مصري واللي تحت بعد مصري اللي تحت كانوا مضايقين من المصري اللي فوقهم وراحوا لمكان ثاني..


هذي حالة الغالب ..بس المفروض يكونوا اخوة فبلد غربة لاانه محد بينفعهم غير بعضهم..
لاان الواحد اذا ماحترم نفسه واهله محد يحترمه..


تانكيووو

[AL-KING]

الله يكون في عونكم

اذا هذا انتوا تقولوا عن بعض كذا اذن الناس ايش بتقول عنكم !!

بصراحة ربنا

هنا في المملكه في الطيب و فيه الغدار من الاخوان المصريين

يعني يجي في وجهك اهلا يا باشا و هات من الكلام

و تسمع من ناس انه بيشتمك في ظهرك !!

و كمان في شغله من جد هذا بتصير كثير في السعودية هنا

المصري اذا انتهي من حاجته منك يقلب عليك !!!!

يعني ما ( يتمر فيهم الجميل الا قليل جدا ) و اغلب المصاريه العدلين في السعودية والي يجبرك تحترمة يكونوا كبار في السن و السن برضه له دور

هذا الي عندي

و اتمني تتكلموا و تقولوا ايش الحل و ايش السبب في هذا الشي انتوا اهل البلد و انتوا ادري

كل الود

Al-king

[SYSAYED]

السلام عليكم ورحمة الله وبركاته...

يا جماعة أحب أقولكم علي حاجتين مهمين قوي .. وهما ,,

ان اصابع الايدين مش زي بعضها .. وزي ما في مصري وفي ومخلص وامين اكيد برضوا في الخاين والغدار واللي مش كويس .. ودة بيبقي موجود في كل بلدان الدنيا .. فاحنا ليه بنحكم علي الناس من الظاهر بس وبننسي الانسان نفسه من جواه اية ؟؟ ,, مش عشان هو مصري او سوري او سعودي او من اي دولة عربية ..!!!

ودة اللي انا شايفه من ردود الاخوة الاعضاء ..

النقطة التانية ..

وهي ان المصريين بره مصر بيكونوا شكل تاني ووضع مختلف و مش بيحبوا بعض ولا بيخافوا علي بعض .. الكلام ده محدش يقدر ينكره .. بس المشكلة فينا كمصريين دايما إننا بناخد العادات والتقاليد و احكام الناس الكبيرة ( في السن أقصد ) كأنها قاعدة مسلم بيها .. كتير مننا مش بيحب أنه يفكر في الكلام ده ولا انه لما يسافر يشوف الوضع حيكون ازاي وبعدين يبتدي يتعامل ,,

لا طبعا .. هو بيخرج من مصر واحنا محملينه بشحنة أن المصريين بره مش كويسين وان المصريين مالهمش امان ولا تقدر تأمن لهم علي سر .. فبياخد الصورة دي مننا هنا ويبتدي يتعامل بيها ويطبقها برة مصر .. فبيلاقي ردة الفعل اللي اكيد كلكم عارفينها ..

في حاجة أخيرة أحب اقلكم عليها .. وهي إن والدي عاش بره مصر وفي الدول العربية وفي معظمها وكان لما يرجع يتكلم معانا عن المصريين هناك كان دايما يقول ان الناس كلها مش زي بعض ... يعني فيهم وفيهم ... ودة مش برة مصر وبس ... لاء ... جوة مصر كمان ... تلاقي الواحد بيحارب أخوة في شغله وفي منصبة وفي رزقة وفي كل شيء ... ومتهيائلي أن ده شيء طبيعي وموجود وكلنا بنلمسه ...

أخيرا ... احب اهنيك علي الموضوع الجميل ده وفعلا موضوع يحتاج المناقشة وقيم جدا جدا ..


تحياتي Sysayed

[الورد الجوري]

المشاركة الأصلية بواسطة مغازلجية

صح انا موب مصرية
هذي حالة الغالب ..بس المفروض يكونوا اخوة فبلد غربة لاانه محد بينفعهم غير بعضهم..
لاان الواحد اذا ماحترم نفسه واهله محد يحترمه..

المشاركة الأصلية بواسطة AL-KING

الله يكون في عونكم

اذا هذا انتوا تقولوا عن بعض كذا اذن الناس ايش بتقول عنكم !!

بصراحة ربنا

هنا في المملكه في الطيب و فيه الغدار من الاخوان المصريين

يعني يجي في وجهك اهلا يا باشا و هات من الكلام

و تسمع من ناس انه بيشتمك في ظهرك

كل الود

Al-king

مممممممممممممممممم
كنت متأكده اني راجعة للموضوع تاني
صباح الخير للكل
دعواتي القلبيه بموفور الصحه و العافية
اخوتي الكرام
مبدئيا كده .. الشعار
الخلاف في الراي لا يفسد للود قضيه
نتناقش بقى

الاخت مغازلجية
ياترى متعرفيش ليه هو مش عايز يقول لصاحبه انه بيدي درس؟؟
يعني مش الدروس مخالفه اصلا!!!
و ليه بتاخديها انه بيكره المدرس الفلاني ؟؟؟؟؟؟؟
ليه مش بتقولي انه خايف على شغله!!!
و انه اما اوصي و اقول انه متقولوش لصاحبي
ابقى قصدي انه محدش يعرف خالص و لا حتى زميلي
يعني مش شرط انه كارهه و مش عايزله الخير و لا ايه ؟؟؟
ـــــــــــــــــــــــــــــــــ
الاخ Al-king
احنا فعلا الله هيكون في عوننا
لان احنا بنحاول نفكر جميعا في حل لمشكله في مجتمعنا
و ان شاء الله ..الله هيعينا لان يد الله مع يد الجماعة

اما حكاية في المملكه المصرين عندكم نوعين..........
ياترى كل من في المملكه من غير المصريين كاملين اخلاقا ؟؟
اعتقد زمن الانبياء انتهى بنبينا الكريم عليه افضل الصلاه و السلام
ولا يوجد احد من البشر اتصف بالكمال اخلاقا و لا معصوم من الخطأ
مهما كانت الجنسيه و لا اللون و لا اللغة
وكلها متوزعه ده عنده شيء و ناقصه شيء تاني
فالكمال لله وحده

اما حكاية انه من ورا ضهرك تسمع انه بيقول ..........
زعلتني بجد
اعشق السعوديه لتطبيقها حدود الله كما في قرآننا الكريم
و احيي حكومتها لتمسكها بهذا الشرع

تقوم حضرتك تقول كده ؟؟
طيب فين تطبيق الآيه الكريمة
" يا أيها الذين آمنوا إن جاءكم فاسق بنبأ فتبينوا ان تصيبوا قوما بجهالة فتصبحوا على ما فعلتم
نادمين " ( الحجرات 6)
مش كان مفروض تتأكد ؟؟
_____________________
و بعدين يا جماعه خليني معاكم
و كلامكم صح كل المصريين اللي في الخارج سيئين
و قدهم مرتين في الداخل سيئين
بقينا كام ؟؟
نفرض 10 مليون مصري بره مصر و الكل سيئ
مع ان العدد اقل من ده و مع وجود علماء
وعباقره مصريين تفخربهم الدول العربيه جميعها
مش مصر بس
بس خليني معاكم
و 20مليون مصري سيئين جواها
يعني كام ؟؟
30 مليون سيئ مصري؟؟!!!!!!!!
في مقابل كام كويسين؟؟؟
الباقي ايه ؟؟؟
45 مليون كويسين لله الحمد من قبل و من بعد
اعتقد نسبتنا كويسه ربنا يكرم الجميع
___________________
احبتي في الله
عندي سؤال بقى للجميع
امتى هنتخلص من العادة السيئه دي ؟؟؟
امتى هنقدر نتناقش بجد ؟؟؟
اول مينزل موضوع في اي دوله بيتناول مشكلة مجتمع
تنهال الردود مع تحيز كل فرد لبلده
و طبعا في الاخر مش بنوصل لحل او للهدف المرجو من الموضوع المطروح
ليه كده ؟؟
بجد عايزة اعرف امتى هنتخلص من العادات الجاهلية ؟؟؟؟
ياخوانا اتقوا الله
قال تعالى
" يا أيها الناس إنا خلقناكم من ذكر و أثى
و جعلناكم شعوبا و قبائل لتعارفوا إن أكرمكم عند
الله اتقاكم إن الله عليم خبير"
وقال رسول الله صلى الله عليه و سلم
" أربع من أمتي من أمر الجاهلية لا يتركونهن: الفخر في الأحساب، والطعن في الأنساب، والاستسقاء بالنجوم، والنياحة..."

اتمنى من الله ان يهدي الجميع للطريق القويم

[مغازلجية]

[center]الاخت مغازلجية
ياترى متعرفيش ليه هو مش عايز يقول لصاحبه انه بيدي درس؟؟
يعني مش الدروس مخالفه اصلا!!!
و ليه بتاخديها انه بيكره المدرس الفلاني ؟؟؟؟؟؟؟
ليه مش بتقولي انه خايف على شغله!!!
و انه اما اوصي و اقول انه متقولوش لصاحبي
ابقى قصدي انه محدش يعرف خالص و لا حتى زميلي
يعني مش شرط انه كارهه و مش عايزله الخير و لا ايه ؟؟؟


اصلا انا كنت ادرس مع وحدة مصرية اصلا معروفـ المصريين ناس دحيحة سابقاً ..

فكانتـ ام البنتـ تقول للجروبـ لاتخبرون المدرس الفلاني انكم تاخذون درس مع الاستاذ الفلاني لاانه بيزعل لاان زوجته تعطي درووس فبيزعل ليش مايريدون زوجتي؟؟

غير في مدرس ثاني مال عربي قال مين جاي بعدي ؟؟قلنا مدرس الاحياء ..قال طيب خليني اخلص بسرعة لااني ماريد اشوف هالانسانـ وجلس يطلع كلام !!!

امافي ثاني ثانوي كنت ادرس رياضيات بس كان مدرس خايف ع مصلحته يقول لاتخبرين حد انك تاخين درس معاي وانا فعلا ماخبرت حد.

في فرق بين الخايف ع مصلحته واللي كاره الناس..

مثل ماقلتي الدرس الخصوصي مخالفه لكن في ناس عندنا متفنشين من العمل بس جالسين يدرسون خصوصي يعني معرووفين بالاسم وطبعا الدولة مارح تسويلهم اي شئ اكثر من لاتفنيش.. لاانه كسب رزقـ عادي..,


تانكيو

[Tears in Smile]

الاخت العزيزة الورد الجوري
أقل ما يوصف به ردك هو إنه رائع و بجد انا عمري ما كنت متخيل انى هلاقي رد بالقوة دى

أختى المغازلجية و أخي الكينج:-
انا ما بكتبش الموضوع من باب اظهار صورة المصريين سواء فى الخارج او الداخل الموضوع دة انا بكتبه للمناقشة لانى لقيت ان المنتدى هنا فيه ناس كتير و فيه شباب كتير و ان اصلاح السلوك العام لأى مجتمع بيبتدي من الناس نفسها مش من الحكومات او خلافة فالانسان دائما هو لقادر على التغيير من سلوكياتة أى كانت الظروف المحيطة حولية .

بالنسبة ليا أنا شخصيا انا مهندس و بحكم شغلى بروح أكتر من بلد عربي في بلاد بقضي فيها فترة كبيرة و في بلاد بقضى فيها فترة لا تتجاوز الايام
زورت المملكة العربية السعودية في سنة 2003 و قضيت فيها حوالى 5 شهور متواصلة اتعرفت فيها على ناس كتير و اكتسبت خبرة كبيرة فى التعامل مع جنسيات كتير خاصة الهنووووووووود
أجمل ما عجبني فى السعودية و بصراحة و لن اجامل أحد هى صلاة الفجر و رحم الله إمامي المسجد اللى كنت بصلي فيه أحياء أو أموات تا و جعله من أهل الجنة إن شاء الله

طبعا انا مانسيتش رد سي سيد اللى ماقدرش اقول ان فيه اى حاجة بعيدة عن الواقع
و اسمحولى أرد عليكم بمجموعة من الردود و المواقف في أكتر من بلد عربي:-

أولا انا هابتدي بوصف المواطن المصري من سنة 1955 بالأخص حتى سنة 2007
منذ فترات تولي جمال عبد الناصر رئاسة مصر و دعوته الشهيرة للوحدة العربية وانشاء كيان عربي اسمة الاتحاد العربي كان العصر دة مشهور جدا بقوة شخصية عبد الناصر و طبعا كتير مننا عارف قصص عبد الناصر و الزعماء العرب (خاصة الملك حسين و ياسر عرفات ) بدأ يتكون عند الشخصية المصرية سلوك اسمة حب العرب و التمتع بالعروبة و كانت الدول العربية خاصة دول الخليج العربي فى مقتبل العمر و كانت مصر بسبب ظروف الاحتلال فيها نوع من الوعي العلمي الكبير اللى كان مفتقد في كتير من الدول العربية فأصبحت من الوقت دة هجرة المصريين للدول العربية شيء عادى و شيء من باب نشر الوعي في كل الدول العربية من منطلق العروبة و الوحدة العربية و استمر الحال دة الى ان جاء عصر السادات و استمر سفر المصريين و رجوعهم و على هذا الحال الى ان جاءت اتفاقية كامب ديفيد و حدث بعدها الشرخ العربي الكبير و انا اتذكر والدي كان بيقولى ان يوم حرب اكتوبر ان السعودين اصدقاءة احتفلوا معاهم احتفال العرس و الافراح فى السعودية و اتذكر برضة ان فى اكتر من مكان قامت احتفالات و اعراس
بعد كامب ديفيد حصل شرخ فى الجدار العربي بالكامل و حصلت القطيعة الشهيرة لمصر من قبل دول عربية كتير في الفترة دى كان وقت عودة ناس كتير من المصريين فى الخارج لمصر و خروج مجموعة تانية من المصريين للخارج ( و هنا كلامى موجة للكنج لأنه قال ان المصرين كبار السن )
الناس اللى كانوا موجودين فى الدول العربية من قبل الحرب كان سلوكهم من جواهم بدافع اننا عرب و اننا ابناء الدين الواحد و اللغة الواحدة و العرق الواحد
الناس اللى سافرت مع بداية عصر الانفتاح كان الهدف غير كده خالص نظرا لتغير ظروف الدولة من دولة مغلقة الى دولة منفتحة على القوي العظمي فى العالم ( أمريكا ) و اصبح السلوك المصري في مرحلة من الانفتاح و بدأت بعدها مرحلة التغيير و فعلا بدأ معاها اصحاب الشهادات فى ايجاد فرص العمل داخل مصر و بدأ للسفر معدومى الشهادات تماما أو أهل الريف المقفلين تماما و اللى كانت اقصي طموحاتة العمل بالمدينة أو حملة المؤهلات المتوسطة
الناس اللى كانت بتسافر الاول ذوى الخبرات و حملة المؤهلات دلواتى الفرد اللى بيسافر يا إما معدوم المؤهلات العلمية و كلنا عارفين ان العلم ليه دول كبير فى تغيير سلوك الفرد أو انسان قروي بسيط كما ذكرت
بدأ التعامل برة مصر زي ما قالت اختى الورد الجوري فى الوصول لمرحلة تعرف تعمل كذا يا سلام دى لعبتي و دة كله بيتزامن مع دخول جيل جديد من أهالى الدول العربية لسوق العمل فبدأت تتولد عندهم الفكرة السيئة دى عن شعب مصر
طبعا لا نلوم أهالى الدول العربية و شعوبها فالخطأ كله مش عليهم
لكني ألومهم لما ييجوا يتكلموا يقولوا كل المصريين فيهم كذا و كذا و كذا و لو أن المصريين فيهم كذا و كذا لما كان المصريين فكروا بمبدأ العروبة من قبل و مبدأ المساواه فى العلم
و مع دخول فترة المبارك مبارك طبعا كلنا عارفين الانحدار الشديد فى كل شيء من بداية عصرة الى اليوم فبالتالى تحول السلوك المصري كثيرا عن ذي قبل
و للأسف نفسي اكمل كتابة الموضوع دلواتى لكن ان شاء الله راجع تانى لانى عندى شغل و مستنى ردودكم و شكرا ليكم جميعا للمشاركة فى النقاش

[hend]

للاسف هى دى الحقيقه
بس انا اعرف ان ده صحيح فى اى بلد عربى يعنى اذا كنت فلسطينى فالكل وحشين برضه مع بعض فى الغربه
يعنى ده تقريبا طبع العرب كلهم

[Tears in Smile]

هند شكرا لمشاركتك فى الموضوع
طبعا كل مجتمع ليه ايجابياتة و سلبياته لكن هل وصل المصري لان سلبياتة تكون هى المسيطرة على صورتة أمام العالم العربي بالكامل ؟؟

[الورد الجوري]

المشاركة الأصلية بواسطة Tears in Smile

هند شكرا لمشاركتك فى الموضوع
طبعا كل مجتمع ليه ايجابياتة و سلبياته لكن هل وصل المصري لان سلبياتة تكون هى المسيطرة على صورتة أمام العالم العربي بالكامل ؟؟

اهلا اخي الكريم
هو فعلا الكل كده و فعلا السلبيات كتيره
و كلنا عارفينها
و طبعا لان نظرتنا احنا العرب من يومها انه السيئة بتعم
فكلنا بنتاخد بنفس الذنب
بس حضرتك مش ملاحظ شيء !!!
بردو موصلناش لشيء
احنا العرب باسم الله ما شاء الله علينا
لسه بردو مش بنعرف نتناقش
الاخت الفاضلة مغازلجية
لم يلفت نظرها ان المعلم اسدى لها خدمه
بل وعاونها حتى و ان كانت الخدمة مدفوعة الثمن
و انه علمها و لو حرف
ولكن التفتت انه طلب انه محدش يعرف
اما صديقتها و ام صديقتها فلم يسلموا ايضا من الانتقاد
بس كان نفسي اسألها
ياترى بجد سمعتي كلامهم ليه لو انتي مشوفتيش انه ده الصالح ليكي!!!!
و ياترى ليه مكانتش الصديقه اللي بتاخد معاكي الدرس
احدى حبيباتك المماثله لكي في الجنسيه ؟؟؟
ليه مقلتيش لصحباتك اللي بجد ؟؟؟
ياترى بتكرهي ليهم الخير ؟؟!!!!

كان نفسي حد من الاخوة اللي بيشاركونا الانتقاد يدي حل و يشرحهولنا
ده على اساس ان مجتمعهم خالي من الافه اللي بننتقدها احنا في مجتمعنا
اعتقد كلنا عرب و اخوة .. يبقى هاتوا الحلول اللي عندكم و اللي اتبعتوها فمنعت
هذه الظاهره من الظهور عندكم " ده في حالة خلو مجتمعكم منها اصلا " و انصحونا بدل السرد الغير لائق
شكرا اخي Tears in Smile
و شكرا لإطراءك الطيب على ردي