حل أزمة مصر الاقتصادية و السياسية و الاخلاقية في أقل من خمسة أعوام

[Tears in Smile]

تحية طيبة على كل أعضاء المنتدى الرائع ابن مصر سواء ابناء مصر أو أبناء الوطن العربي
يمكن البعض يستغرب الموضوع شوية و يمكن البعض الاخر يتمنى انة يتحقق و يمكن نكون احنا شايفيين ان البلد اصبح حالها ميئوس منه

مصر كانت ولا زالت العمود الفقري للوطن العربي بالكامل حتى مع ظهور قوي عربية اخري كالسعودية و ليبيا و هاتفضل دايما مصر هى بوابة لكل العرب فى العلوم و المعرفة و ان كانت قل دورها فى الوقت الحالي لكنه لم ينتهى نظرا لأن مصر دولة بطبعها رائدة للدول العربية في مجالات كتير و مازالت تتميز بكل المقومات الخصبة لتصبح مصر دولة من الدول الرائدة في العالم كله لكن للأسف مصر الان فى وعكة صحية شديدة جدااااااااااااااا و دة طبعا نظرا لدخولها فى غيبوبة عمرها دلواتى حوالى 26 سنة (ربنا يستر علينا و على المنتدى )


طبعا كلنا دلواتى نفسا نعرف ازاى هاتتحل كل مشاكل مصر الاقتصادية و السياسية و الاخلاقية فى خمس سنوات
بكل بساطة مصر دولة مواردها الاقتصادية كتير جدا لكن غير مستغلة بالمرة
موارد المياة الطبيعية ( نيل و بحر احمر و بحر متوسط )
موارد بشرية ( 80 مليون مصري متوسط الشباب من عمر 21 ل 40 حوالى 25 مليون )
مستغل فقط من مساحة مصر 20%
السياحة
قناة السويس
الأقمار الصناعية (نايل سات 1 و 2 )


طبعا مصر دلواتى بتمر بأكتر من أزمة اقتصادية و غزو اقتصادي من الصين و دول شرق أسيا على الرغم من وجود جميع المقومات فيها و بيعانى الجنية المصري من تدهور حالتة الصحية من بعد ما حب يعوم و غرق و يا ريته ما عام لكنه فضل يغنيى ( علمني العوم و النبي يا عاطف ) حد ما عاطف عومة و غرفة ( اصل عاطف ماكانش بيعرف يعوم اصلا ) مع الاعتذار الشديد للأغنية و السيد عاطف عبيد حبيب الشعب (على فكرة حبيب الشعب دة مش اسم جده )

مصر بتخرج سنويا ما يعادل تقريبا حوالي 200000 مهندس و زيهم كيميائيين و خريجي كلية علوم
طبعا الجيش بياخدهم أول ما يتخرجو ما بين سنة و تلات سنين نظرا لأنهم تخصصات نادرة و بعدها يخرجوا من الجيش فى صراع مع الواقع اللى حوليهم فى البحث عن فرصة عمل بدخل كويس و يلاقى الحلم الى كان بيحلمه فى الكلية بمكتب و عربية و سكرتيرة أمورة برة مكتبه و الكلام اللى بنشوفة فى الافلام مش موجود و يلاقى نفسه مصدوم بشغل ماهواش اللى كان بيحلم بيه و تكون النتيجة الاحباط

طبعا أول حاجة لحل كل الازمات دى لابد من زيادة الطلب على الجنية المصري و دة على حد ما سمعت من ناس يقال انهم اقتصاديين لأن الطلب لما بيزيد على شيء بيزيد معاه السعر انما لما بيقل الطلب بيقل السعر
رقم واحد لزيادة الطلب على الجنية المصري :-
السياح لما بيدخلوا مصر بيدفعوا تمن الفيزا و الاقامة لمدة شهر 18 دولار لبعض الدول لو تم تحويل الدفع بدل الدولار للجنية المصري اعتقد ان السياح هايفضلوا انهم يشتروا الجنية المصري و بالتالى هايحصل زيادة في قيمة الجنية المصري و بالتالي هايتحقق نوع من التوازن فى سعر الجنية المصري أمام العملات الأجنبية.

مصر تحتوي على بحرين بالاضافة لمياة النيل ان كان في أزمة فى مياة الشرب العذبة و هى منبعها النيل فمصر عندها بحرين أعتقد ان مصر بتخرج كل سنة 200000 مهندس يعنى لما يطلع منهم مهندسين يشتغلوا فى محطات التحلية و بالطبع هايكون التخصصاات المطلوبة مهندسين الباور و الميكانيكا اكتر حاجة بالاضافة لخريجيين كلية علوم اللى هايكون دورهم هو تحليل المياة من الفيروسات وتنقيتها

طبعا محطات التحلية دى هاتكون فى أماكن صحراوية نظرا لأن المياة هاتكون طريقها فى أماكن صحراوية و هايكون بناءا عليها انه هايتبني مدن جديدة علشان تكون وحدات سكنية للمهندسين و بالتالي هايكون في فرص تانية لإنشاء عماير جديدة و انشاء طرق جديدة ووسائل اتصالات جديدة ومستشفيات جديدة و فروع لشركات جديدة و هايكون فرصة للخروج شوية من القاهرة
و طبعا مش هاننسي الجماعة اللى بيحبوا الترفيه عن الشعب المصري دول أكيد هايجروا جري فى الحاجات دى هما بيحبوها أوي
صدقوني انشاء محطة تحلية واحدة بعرض مصر من البحر الأحمر هايكون ليها أثر كبير جدا في إنشاء مدن كتييييييير أوي على خط المحطة دى و هايبتدي عمل انابيب تغذية زيها زي أنابيب البترول اللى في دول كتير أوي
عارف ان اللى بقولة دة فى نظر البعض أحلام وردية و حاجات لا يمكن انها تتحقق
لكن صدقوني و الله في حاجات كتيييييييير أوي لو الحكومة بتاعتنا دى عملتها هنلاقي الحال فى مصر اتغير تماما
على فكرة أخلاقيات الشعوب دايما طبقا لظروفها الاقتصادية ( تدني الاقتصاد تدنت الاخلاقيات )

يا ريت يكون النقاش فى الموضوع دة جاد و يكون فيه أراء و اقتراحات لعل و عسي يوم من الايام يبدل الله حال مصر من الغيبوبة اللى هى فيها دى لحالة صحية كويسة و ترجع تستعيد مصر مكانتها تانى من أول و جديد

[trialless]

انا مش مصدق
هو البيانات فى الموضوع صحيحة بس اهم شئ مصر تملكة هو فساد الحكم
ودى حلها مقولتوش

[Tears in Smile]

عزيزي trialless

طبعا انا معاك ان فساد الحكم هو أساس فساد كل حاجة بس الحاكم مش هايخلد فيها أكيد هايتغير و صدقني لا يغير الله ما بقوم حتى يغيروا ما بأنفسهم و جور الحكام دايما ما بيكون نتيجة لذنوب المحكومين

[hend]

والله بجد مووضع جميل وياريت يتنفذ

[المحامي zax]

*******مصر كانت ولا زالت العمود الفقري للوطن العربي بالكامل حتى مع ظهور قوي عربية اخري كالسعودية و ليبيا و هاتفضل دايما مصر هى بوابة لكل العرب فى العلوم و المعرفة و ان كانت قل دورها فى الوقت الحالي لكنه لم ينتهى نظرا لأن مصر دولة بطبعها رائدة للدول العربية في مجالات كتير و مازالت تتميز بكل المقومات الخصبة لتصبح مصر دولة من الدول الرائدة في العالم كله لكن للأسف مصر الان فى وعكة صحية شديدة جدااااااااااااااا و دة طبعا نظرا لدخولها فى غيبوبة عمرها دلواتى حوالى 26 سنة (ربنا يستر علينا و على المنتدى )******

موضوع جميل و تقبل مروري

انا شايف ان احد الحلول :.........كما قال عاطف صدقي هو .........

ان تكون قناة السويس بجنيه المصري مش بالدولار

شكراااااااااااااااااااا

[Tears in Smile]

عزيزي Zax

طبعا انا معاك فى ردك لكن فى اعتبارات سياسية تانية لازم تكون فى الحسبان
و طبعا هو في بدل الحل عشرة مليون حل بس للأسف طبعا انت عارف كويس جدا الموضوع دة كله مجرد أحلام تتحقق يوم ما مصر تخلص من الورم اللى طلعلها ( كلنا عارفين الورم دة يبقى اية )
و ييجي لمصر ناس تانية خالص كل تفكيرهم ان مصر دى دولة ماظهرتش علشان فيها بترول و لا غاز لكن ظهرت علشان فيها كل مقومات الدول المتقدمة و اكتر كمان