السخريه من مبارك

[Dr.Hammood]

المشاركة الأصلية بواسطة hend

وعليكم السلام يادكتور

انا الحمدلله بخير
كيفك يافندم
اتمنى تكون بالف خير وسلام
دا بس من ذوقك وجميل ان النكت نالت اعجاب حضرتك ودا يكفينى
دكتور فيه فعلا ناس شايفه الريس كويس
منهم ماما
يعنى مش عارفه اقولك انا بشدد معاها ازاى لما الاقيها بتقول وفيها ايه لما جمال يحكم
طبعا بعمل فرح فى البيت يعنى
بس هى مش بتقول كده عن جهل او استسلام بس بتقول دا عن تخوف
مش عاوزه البلد تبقى حريقه
ودا خوف داخلى فى نفس كل مصرى بس ممكن يكون بنسب مختلفه بينا
لكن اننا نمسح للحكومه جوخ فاكيد احنا اللى هنخسر فى النهاية

احب اشكرك على تفاعلك وردك وبجد انت شرفتنى ونورت الموضوع

انا الحمد لله

الام برضو ست كبيره وطبيعي الواحد كل ما يكبر بيحاول يبعد عن المجازفه

عشان المسئوليات والحاجات دي

انما ابقى شاب وخايف دي تبقى كارثه

امال مين بقى اللي هيغير وهيبنى

حتى لو راح كتير في ممنا في داهيه وايه يعني

والله امبارح كنت ب اتكلم مع عضو من المنتدى في موضوع الخوف تراث وطني

الناس في مصر بقى عندها ثقافه عامه اسمها الخوف

وعلى فكره اللي بيمسحوا دول في الصحافه مثلا القط بكرا لما يحصل تغيير

هيكون اول واحد يغير ملته عاش الملك مات الملك

عندك مثلا ام كلثوم الله يرحمها ايام الملك غنت له ولما مات غنت لعبد الناصر


حقيقي اشكرك على مساحة الحريه في الموضوع

كوني بكل الود والخير

[al_copraa]

اكتر شيئ عجبنى فى الموضوع ده الاعتراف بالحق والمبادره بالاعتزار
رغم خطأ الدكتور اللا نى سعيد جدا باعتزاره وسعيد اكتر بمستوى الحوار من جانب هند
تقبلو مرورى

[أوجاع الروح]

السلام عليكم
أختي الفاضلة هند
اخي العزيز ميزو

في البداية أحب أقول اني مش بنت
بعد كده
أخت هند
أتمنى ما تكونيش فهمتي غلط عندما قلت "قلة...و قلة.و قلة...."
أو قصدت أني أسئ لشخصك أو لأي أحد من المشتركين في الموضوع ده حاشا لله
صدقيني ده آخر شيء ممكن أعمله

أما بالنسبة لوجه المعارضة على كلامي
أهلا و سهلا يا سيدي
حقيقي أنا لا أنكر أنني كنت على قدر من الخطأ عندما قرأت الموضوع و رديت عليه
لأني ابتليت بالغربة في الدول الغربية
و صدقيني مافيش كلام من ده بيحصل هناك
أنا بعز بلدي جدا و بغير عليها حتى من الناس اللي فيها اللي عايزين يبوظوا الدنيا
أنا بقابل احترام عظيم لكوني مصري في الفرب
و أنا فقط اشعر اننا بترديد النكات و نشرها على النت و سخرية عليها نكون لا نفعل شيء
و تصدق المقولة الشهيرة "المصري ابن النكتة"
صدقيني ليس اكثر ما يؤلمني هذه الايام إلا هذه المقولة
لأن المصري لم يعد "ابن الصناعة" او "ابن التجارة" او "ابن الزراعة" أو حتى ابن أي حاجة تساهم في تقدم البلد
أنا ألوم نفسي لاني لا املك الكثير من المعلومات السياسية عن بلدنا..و واجهتي الإعلامية الوحيدة نحو "مصري" او "ماي ايجبت" كما أحب أن أقول دائما..هي تافضائية المصرية و منتدانا هذا

لكن صدقيني
أنا لا أقصد الإساءة لأي عضو مهما كانت أو اتهامه بالخيانة او بعدم الوطنية
و لكن احزنني الرد العنيف الذي قرأته من بعد ردي
و ماعرفتش اقول ايه

دعونا لا نلقي باللوم على الحكومة بعد الآن
و لننظر غلى الجوانب الأخرى للأزمة
إلى متى سنتهم الحكومة بالتقصير و نحن أشد المقصرين
نحن الذين لا نعمل يا أختي
نحن اللذين نزرع الوسايط و المحسوبية و الرشاوي في كل نظام في مصر
نحن الذين نملك عادات استهلاكية سيئة تجعل أسعار السلع مرتفعة علينا
نحن اللذين ننفق أكثر من 80 مليار جنيه كل عام على الموبايلات
نحن الذين نجري وراء الربح السريع و لا ننظر إلى الأمام
نحن الذين هدمنا زوقنا الفني و اتجنا إلى القبيح
نحن الذين ارتدينا الملابس التي ليست ملابس
نحن الذين ضيعنا عاداتنا الاجتماعية الأصيلة
نحن الذين رمينا ثقافتنا .. حتى صار القارئ منا شاذا عن غيره...
نحن الذين ارتمينا على العولمة و أخذنا منها مالا يعنينا و تركنا ما يعنينا
كل هذا نحن فعلناه و ليس الحكومة

أنت يا أخي العزيز و يا اختي العزيزة تضربون الامثال بالشعوب الغربية
أي نحن من هذه الشعوب و ثقافتها و حياتها الاجتماعية و احترام الانسان لحق أخيه الانسان
أين نحن من عملها..من زراعتها..من صناعتها...من رغبتها في التقدم و النمو

يكفينا أن نقول الحكومة هي اللي بنت ستين....... و الرئيس هو اللي مش عارف ايه......
أنا معلوماتي السياسية ضعيفة او غير كافية لكي ادخل في النواحي السياسية في الموضوع و الخبط نفسي

لكن إلى متى سنظل نعيب الزمان و العيب فينا...

أما بالنسبة لمحاولات الاقتباس
معلش يا سيدي...مش بعرف أعمل اقتباس

لا أريد أن أسبب ضيقا لأي أحد دخل و استاء مني عن غير قصدي
لكني فقط...يحزنني أن نستسلم لأنفسنا و لتكاسلنا

آسف على الاطالة و كفاية كده علشان أنا عيني مرغرغة و مش شايف

مع السلامة

[M.I.D.O]

بص يا اوجاع الروح
مفيش حد اتهمك بالخيانه ولا حاجه
ولا حد له الحق انه يعمل كده
بس انا هفترض معاك ان التقصير فينا
واننا مش عندنا اخلاق ولا ضمير ولا اى حاجه
واننا لازم نبدا بنفسنا ونخلص فى شغلنا وملناش دعوه بالحكومه خالص
جميل جدا
اشتغلنا يا سيدى واخلصنا وبقى عندنا ضمير
وبعدين صحيت من النوم لقيت سعادة معالى الباشا البيه المحافظ اخد الفلوس اللى سيادتك اشتغلت بيها وطلع على سويسرا..
او لقيت حد قريبك (لا قدر الله) بيموت بسبب المبيدات المسرطنه اللى جابهالك معالى وزير الزراعه..
او لقيت رئيسك فى الشغل اختلس نص مليون جنيه ولما جيت تشتكى اتلفقتلك تهمه واتحبست..
او لقيت مصنعك اللى بتشتغل فيه من عشرين سنه اتباع وصاحبه قالك مع السلامه منجيلكش فى حاجه وحشه..
او خطرت فى دماغك فكره مجنونه وهى انك تتظاهر انت والعمال احتجاجا على تشريدكم من المصنع..فاتمسكت وخدوك قسم الشرطه و...............(انت وحظك بقى)..
او دخلت كلية الطب ولقيت زميلك ابن الدكتور الكبير بيعرف اسئلة الامتحان وانت بتعيد السنه..
او...........
او...........
او.................
(لو مش وراك حاجه ممكن نكمل)

اما بخصوص الاستهزاء بالحكومه..وان ده مش بيحصل فى الدول الغربيه
فده لسبب بسيط جدا..
ان الرئيس لو مش عاجبهم ممكن يغيروه فى اول انتخابات رئاسيه..
يبقى ايه بقى الداعى للنكت والترياه..
تقدر سيادتك تعمل كده فى مصر؟!
اشك



انا على فكره مقدر مشاعرك خصوصا لو كنت فى غربه
بس صدقنى احنا بنهدم السبع الاف سنه حضاره بسكوتنا على الوضع ده..
الوضع اسوا من السيىء..
واوعــــــــــــــــــــــــــــــــــــــــــى تصدق اننا ممكن نخرب البلد..
ابدااااااااااااااااااااااااااااااااااااااااااااااا اااااااااااااااا..

سلام