|
مسرحية هزلية لااهلاوى رايح الاسماعيلية.... جمادة موووت
المشد الاول ليل داخلي .. الساعه الخامسه فجرا .. في منزل أحد مشجعي الاهلي .. الزوجة تصحو علي صوت
تحركات في المنزل .. تقوم فجأة وتخرج الي الصاله .. لتجد زوجها يجلس علي الارض وهو يصلي ..
الزوجة متسائله بدهشه : ايه اللي بتعمله دا يا مليجي .. اول مره اشوفك بتصلي .. خير ايه اللي حصل ..
مليجي وهو يلتفت اليها متأففا : ايه يا وليه مالك .. ايوه باصلي .. ماهو انا لازم اصلي النهارده ..
الزوجه متسائله : اشمعني النهارده يعني .. جاتك نايبه .. دا انت عمرك ما ركعتها يا راجل ..
مليجي بنفاد صبر : يا وليه يا أم لسان طويل .. انتي مش عارفه انا رايح فين النهارده ..
الزوجه ساخره وهي تتثائب واضعه يديها علي فمها : رايح فين ياللي جايب الديب من ديله ..
ميلجي وهو ينظر بعينيه حذرا في المكان خشية ان يراه احد .. ثم يميل علي اذن زوجته قائلا بخفوت : رايح اسماعنيه .. النهارده ماتش الاهلي هناك ..
تشهق الزوجة مفزوعه وهي تخبط بيديها علي صدرها : يانهارك مش فايت .. انت اتجننت رايح اسماعنيه .. ورا الاهلي ..
مليجي وهو يضع يديه علي شفتي زوجته : يا وليه قولتلك وطي صوتك الحيطان ليها ودان ..
الزوجه : ان لله وان اليه راجعون ..
مليجي : ياساتر علي فالك علي الصبح .. قومي فزي اعمليلي فنجان قهوه اعدل دماغي ..
الزوجه بسخريه : طبعا عاوزها ساده ..
ثم تهرول مسرعه الي المطبخ ومليجي يقذفها بطبق كان بجواره ..
** المشهد الثاني .. نفس التوقيت .. ونفس المكان ..
الزوجه تخرج من المطبخ تحمل في يديها فنجان القهوه .. لتجد مليجي واقفا يرتدي حله علي رأسه .. ويمسك بيديه مقشه يضرب بها في الهواء يمينا ويسارا ..
الزوجه : ايه دا يا راجل انت اتجننت .. بتعمل ايه ..
مليجي : انتي مش شايفه يا وليه .. بأتدرب ..
الزوجه : بتدرب علي ايه ..
مليجي : باقولك رايح اسماعنيه .. مش فاهمه يعني ايه اسماعنيه ..
الزوجه : واللي رايح اسماعنيه يلبس حله .. ويمسك مقشه اليومين دول في ايده ..
ميلجي وهو مازال يلوح بالمقشه يمينا ويسارا : ماهو العمليه مش مضمونه هناك .. يبقي لازم الواحد يكون مستعد ..
الزوجه متسائله : مستعد لايه بالظبط ..
مليجي وهو يغرز المقشه في كرسي امامه قائلا وهو يصرخ : جيم اوفر .. ثم يلتفت الي زوجته والعرق يتصبب من جبينه مكملا : اصل ناويين النهارده نقلب اسماعنيه..
ويستطرد صائحا بقوة : قومي فزي .. جهزي الهدوم علشان الحق البس ..
الزوجة ناصحه : مابلاش المشوار دا يا مليجي .. قلبي مش مطمن ..
مليجي : بلاش ايه يا وليه .. دا انا مليجي .. فاهمه يعني ايه مليجي ..
الزوجه متمتمه بخفوت : ماهو دا اللي مخوفني ..
** المشهد الثالث .. نفس التوقيت والمكان ..
تذهب الزوجه لتحضر ملابس مليجي .. وتخرج لتخبره بتجهيزها .. لتجده يقفز في الهواء صارخا وهو يركل احد الكراسي بقدميه ..
الزوجه : بتعمل ايه راجل يا ابوعقل ناقص انت .. كسرت الكرسي اللي حيلتنا ..
مليجي وهو يلهث : ابدا كنت باضرب واحد منهم ..
الزوجه وهي تلتفت حولها بدهشه : هو فين دا ؟؟ ..
مليجي وهو يمسح عرق غزير بدأ يتسرب علي ملامحه : ماهو ملقح قدامك اهو مكسور ..
الزوجه وهي تصرخ باعلي صوتها : لا دا انت باين عليك اتجننت رسمي ..
ثم تقذف اليه بالملابس قائله : الهدوم أهي .. ناوي تمشي امتي ..
مليجي : تمام كدا .. هاتي بس ورقه وقلم بسرعه ..
الزوجه : ليه ؟؟
مليجي وعيناه تدمعان : اصلي ناوي اكتب وصيتي ..
الزوجه وهي تنتفض ذعرا : وصيتك ؟؟؟ .. انت اتهبلت يا راجل انت ..
مليجي وهو ينظر اليها محدقا : ايوه العمر مش مضمون .. دا انا رايح اسماعنيه يا وليه ..
الزوجه مندهشه : مش بتقول رايح تقلبوها ..
مليجي : يا وليه قولتلك العمر مش مضمون .. ويوم ليك ويوم عليك .. زي الطاوله بالظبط .. مكن تبقي دش .. وممكن اتزنق في خانة اليك ..
تقوم الزوجه مستسلمه وهي تضرب كفا بكف وتأتي بالورقه والقلم ..
الزوجه : خد يا فالح .. اكتب اللي عاوز تكتبه ..
مليجي يمسك الورقه والقلم ويكتب وصيته ..
ثم يتوقف و يلتفت الي زوجته قائلا : هيه مليجي .. بالكاف .. والا بالقاف ..
الزوجه مستنكره : يالهوي .. طبعا بالكاف ..
مليجي متمتما برضا : مش عارف من غيرك كنت عملت ايه ..
الزوجه بشراسه : اوعي تنسي تحطني فيها .. احسن أخرب بيتك ..
يكتب مليجي وصيته ويقدمها لزوجته .. ثم يرتدي ملابسه ويتخذ طريقه لموقف السيارات ..
** المشهد الرابع .. نهار خارجي .. المكان .. موقف سيارات القاهره المتجه للاسماعيليه ..الزمان .. العاشره والنصف صباحا ..
يلتقي مليجي مع مجموعه من اصدقاؤه .. في انتظار الاتوبيس المقل لهم .. احدهم يمسك متنكرا جريده بالمقلوب ويقرأ فيها ..
والاخر يلبس بالطو طويل وطاقيه صوف ويلف رقبته بكوفيه سوداء .. رغم ان الوقت في شهر اغسطس .. ومعهم شخرم رئيس
رابطه مشجعي الاهلي ..
مليجي متسائلا وهو يعدل من وضع الحله فوق رأسه وموجها حديثه لشخرم : فين عنتبلي يا شخرم .. اتأخر ليه ؟؟ ..
شخرم : عنتبلي بيجهز العلم الاصفر وجاي علي طول ..
مليجي وهو يتنهد مطمئنا : تمام كدا .. العلم دا هو اللي هايدخلنا اسماعيليه .. تسلم افكارك يا شخرم ..
شخرم محذرا : وطي صوتك احسن حد يسمعنا .. العمليه مش مضمونه ..
مليجي : عندك حق ربنا يعدي اليوم دا علي خير .
دقائق ويأتي عنتبلي ممسكا العلم الاصفر بيديه .. وهو يبتسم بثقه ..
يأتي الاتوبيس ويركب جمهور الاهلي .. ويأخذ الاتوبيس طريقه الي الاسماعيليه .. وسط دعوات الجميع بالعوده بالسلامه .. ويقوم
شخرم رئيس الرابطه بالقاء آخر التعليمات علي جمهور الاهلي ..
شخرم : لما ندخل اسماعنيه عارفين هانقول ايه ..
الجميع في نفس واحد مرددين : دراويش ..
شخرم راضيا : تمام .. ولما ندخل المدرجات ..
الجميع في نفس واحد : دراويش ..
شخرم وهو يضغط اسنانه بغيظ ويخبط بيديه علي جبينه بقوة : غلط غلط .. نقول اهلي .. احنا اصلا جايين نشجع مين ..
الجميع في نفس واحد ببلاهه متسائلين : مين ؟؟ ..
شخرم وهو يشد في شعر رأسه : رفعتولي الضغظ .. جايين نشجع الاهلي فاهمين .. أ .. ه .. ل .. ي .. تبقي ايه ؟؟ ..
الجميع ببلاهه وقد تدلت شفاه اغلبهم : ايه ؟؟ ..
شخرم وهو يقطع ملابسه من شدة الغيظ : ااااااااااااااااااااه ..
هنا يقف مليجي متفذلكا مهدئا شخرم : تمام يا شخرم ما تزعلش نفسك .. كلنا فاهمين .. لما ندخل البلد هانقول اهلي .. وجوة الاستاد دراويش .. تمام كدا ..
شخرم وهو يضرب رأسه في باب الاتوبيس : انتوا طلعتولي منين .. مش الضغط بس .. لا والكبد والكلاوي كمان .. ثم يسقط مغشيا عليه ..
** المشهد الخامس .. نهار خارجي .. الساعه الواحده ظهرا .. يصل الاتوبيس الي مدينة الاسماعيليه .. يخرج مليجي من شباك
الاتوبيس رافعا العلم الاصفر وهو يصيح : دراويش دراويش .. وجمهور الاهلي من خلفه يردد صيحاته ..
ثم يلتفت الي الجمهور داخل الاتوبيس قائلا : شوفتوا ضحكنا عليهم ازاي .. هيه دي الافكار .. طول عمرك عظيم يا اهلي ..
** المشهد السادس .. المكان .. استاد الاسماعيليه .. الزمان .. الساعه الرابعه مساء .. المباراة بدأت في شوطها الاول ..
عنتبلي في المدرجات : ايه يا جماعه مش هانبدأ والا ايه ..
شخرم : ايوه .. كله يشتم في الاسماعيني ..
مليجي : نشتم ليه بس .. ما احنا كنا داخلين البلد بنقول دراويش .. نشتم دلوقتي واحنا هنا ..
شخرم : اسكت يا عنتبلي .. احنا دايما اصحاب مبادئ .. مانشتمش الا في وجود الامن .. علشان تبقي العمليه امنيه رسميه نظميه .. ثم يستطرد ضاحكا : طول عمرك عظيم يا اهلي ..
ويستكمل ضحكته مقهقها .. ووراءه باقي الجماهير ..
وتبدأ الشتائم في حماية رجال الامن .. وتبدأ مدرجات الاسماعيلي في الزئير .. اعتراضا وامتعاضا مما يحدث ..
هنا يستشعر مليجي الخطر .. ويبحث عن الحله التي بجواره .. ليرتديها بسرعه .. وهو يقول لشخرم ..
مليجي : كفايه يا شخرم بلاش نستفز الناس ..
شخرم : كفايه ايه دي فرصه مش هاتتعوض ..
مليجي : يا شخرم بلاش .. دا احنا هانخرج بره بعد الماتش ..
شخرم : بعد الماتش نخرج ونرفع العلم الاصفر .. وانتوا عارفين الباقي ..
ثم يقهقه ضاحكا .. ولا يشاركه احد الضحكات هذه المره .. فبينما هو يضحك .. يري مليجي شئيا طائرا في الهواء .. فيسرع بارتداء الحله علي رأسه .. ولكن القدر كان اسرع منه ..
ففجأة تظلم الدنيا امام عيني ميلجي .. ليسقط وسط الاقدام التي دهسته .. وهو يتمتم قبل ان يغيب عن الوعي محتضنا
المقشه : مش قولتلك بلاش يا شخرم ..
** المشهد السابع .. المكان .. مستشفي أم المصريين .. الزمان .. الساعه الحاديه عشر من صباح اليوم التالي .. مليجي يرقد
في غرفة العنايه المركزة ..
وهو يتفوه بالفاظ مبهمه : فين المقشه يا وليه .. بلاش يا شخرم .. اوعي تنسي الحله ..
ثم تدخل زوجته مهروله من باب المستشفي وهي تسأل عنه : هو فين .. عاوزه أشوفه ..
الطبيب : ماتقلقيش يا مدام هو بخير ..
الزوجه بصوت عال : لازم اشوفه .. عاوزه اشوفه ..
هنا يتأثر الطبيب بحالتها ويأمر الممرضين بفتح الباب لها ..
تدخل الزوجه مسرعه : ثم تقف أمام مليجي قائله بغيظ : عملتها يا مليجي .. وماحطتش اسمي في الوصيه ..
ثم فجأة تخرج من بين طيات ملابسها مقشه قصيره .. وتضربه بها بقوة علي رأسه قائله وهي تصرخ بشدة : ابقي خلي الاهلي ينفعك ..
هنا ينتفض مليجي الانتفاضه الاخيره وصوته يتحشرج قائلا : مش قولتلك بلاش يا شخرم
|
النمط الخطي
