أولاد الدكاترة

[Dr-Ayat]

السلام عليكم .

عنوان الموضوع غريب شوية صح؟

تفتكروا لو واحد تلميذ ووالده او والدته هم الاساتذة بتوعه من حقهم يغششوه ؟ او يساعدوه جوا قاعة الامتحانات؟

لو طالب بيذاكر ليل نهار وبيحضر كل المحاضرات ومش بيزوغ ومش بيفوت اي حاجة ممكن يستفيد منها بعلمه ويجي بسلامته النونو ابن مامي الاستاذة ...الحلول تجيلو لحد عنده وهو في الامتحان عشان حضرته ما كانش فاضي يذاكر او يحضر المحاضرات كان عنده مشاريع تانية . ما هو طبعا مامي او بابي هايساعدوه , شوية اجابات من هنا و كام درجة زيادة من هناك والواد اسم الله عليه ينجح من غير أي مجهود تفتكروا ساعتها ايه شعور الطالب الي بيذاكر وبيتعب؟.

والمصيبة لو النونو ده كان طالب طب تخيلو طبيب المستقبل اللي هاينجح بالغش . ربنا يكون في عون العيان الي هايوقع تحت ايده.

للأسف ده اللي حصل النهاردة مع اني الحمد لله حليت كويس وعارفة مسبقا اني هانجح بس بردو اتخنقت عشان انا وزمايلي تعبنا وبسلامته هاينجح بلا اي مجهود وطبعا ممنوع الاعتراض حسبنا الله ونعم الوكيل .

يالا ما علينا اشوفكم بعد الامتحانات ان شاء الله.

[BATISTA]

المشاركة الأصلية بواسطة Dr-Ayat

السلام عليكم .

عليكم السلام ورحمة الله

عنوان الموضوع غريب شوية صح؟

هو فعلا غريب بس لما قريت التوبك ماستغربتش لان الموضوع دة ازلى

تفتكروا لو واحد تلميذ ووالده او والدته هم الاساتذة بتوعه من حقهم يغششوه ؟ او يساعدوه جوا قاعة الامتحانات؟

طبعا لا

لو طالب بيذاكر ليل نهار وبيحضر كل المحاضرات ومش بيزوغ ومش بيفوت اي حاجة ممكن يستفيد منها بعلمه ويجي بسلامته النونو ابن مامي الاستاذة ...الحلول تجيلو لحد عنده وهو في الامتحان عشان حضرته ما كانش فاضي يذاكر او يحضر المحاضرات كان عنده مشاريع تانية . ما هو طبعا مامي او بابي هايساعدوه , شوية اجابات من هنا و كام درجة زيادة من هناك والواد اسم الله عليه ينجح من غير أي مجهود تفتكروا ساعتها ايه شعور الطالب الي بيذاكر وبيتعب؟.

طبعا شعورة هيتعقد من التعليم وهيعرف انة مافيش فايدة وهيكبر دماغة بس برضة دة مايمنعش انة يذاكر ويعمل الى علية وكل واحد بيأخد نصيبة على الرغم ان الموضوع دة فى واحد بياخد حق مش من حقة

والمصيبة لو النونو ده كان طالب طب تخيلو طبيب المستقبل اللي هاينجح بالغش . ربنا يكون في عون العيان الي هايوقع تحت ايده.

حصلت كتير جدا وللأسف مش فى مجال الطب فى كل المجالات

للأسف ده اللي حصل النهاردة مع اني الحمد لله حليت كويس وعارفة مسبقا اني هانجح بس بردو اتخنقت عشان انا وزمايلي تعبنا وبسلامته هاينجح بلا اي مجهود وطبعا ممنوع الاعتراض حسبنا الله ونعم الوكيل .


خير الكلام ماقل ودل انتى قلتى السؤال ورديتى على نفسك حسبنا الله ونعم الوكيل

وربنا يسترها معاكى ان شاء الله يادكتورة ربنا يوفقك فى باقى الامتحانات

يالا ما علينا اشوفكم بعد الامتحانات ان شاء الله.

نستودعكى عند من لاتضيع عندة الأمانات

[rosi_smile]

موضوعك رائع يا دكتوره ايه
بس في ناس لسه ضيرها صاحي
في ناس لسه متقبل انها تقتل
لان لو هو مهندش وابوه دكتور يبأه في المستقبل هيهد بيت ويدمر اسره ولو طبيب يبأه هيموت طفل او مريض
اكيد في ناس لسه عندها ضمير
الخير موجود وهيفضل موجود بس قليل اوي
شكرا يا دكتوره وتقبلي مروري

[amr_miza1]

والله يا آيات بجد هى حاجة تحرق الدم .. بس ماتستغربيش

لان فيه واحد صاحبى كان ايام ما كان لسه طالب فى كلية الشرطة .. ومع الاسف واحد صاحبه سرق الموبيل بتاعه .. يعنى تخيلى ان اللى سرق دا هيبقى ظابط !!!

المهم انتى ان شاء الله ربنا مش هيضيع مجهودك طالما بتعملى اللى عليكى

[duha]

اهلا دكتورة ايات
انا ماما دكتورة صيدلانيه واستاذه في الجامعه
تصدقي اني ما قدمت لكليه الصيدله لانها بتدرس في الكليه حتى لا في يوم حدا يقول بنت الدكتورة
ودخلت كليه الهندسه
والحمد لله اتخرجت بتقدير مقبول وكنت قبل الاخيرة في الدفعه
انا فعلا شايفه حالات كالتي وصفتيها بالظبط وهذا هو احد اسباب فشلنا وتاخرنا
ربنا يوفقك
شكرا

[omarr]

يانهارى يا انا يا ماما على دول ناس ... حاجه يعنى بجد تحرق الدم ..الواد الغشاش وامه المغششه
, فعلا حسبى الله , هو بس الكافى فى المسائل المحيره ديه ..
بس انا عايز اعرف الناس ديه طايقه بعضها ازااااااااااااى ؟, عايشين ازاااااااااااااااى مع بعض ؟
وبيقولوا ايه لبعض عشان يبرروا النصب والخداع والغش ؟
نفسى اعرف بجد ؟

[برديس]

يا دكتوره ما هو ده حال الدنيا ياعنى مش حاجه جديده
متزعليش ده فى كل مكان وكل الكليات

[Dr.Hammood]

هو الهم ده عندوكوا انتوا كمان يا ايات

عندنا الاولى امها بتدرس عندنا وابوها كمان عندنا

وبتفهمش حاجه في اي حته

الظاهر كل حاجه في البلد دي ورثاه

[Dr-Ayat]

الف شكر لكل من مر او قرأ او علق عالموضوع . الموضوع كان فضفضة عشان انا كنت خلااااص اتخنقت بس زي ما قلتو الظاهرة ديه فكل الكليات باين.
انا اكتشفت ان الفرخة اذكى من الدكاترة اللي بيغششوا اولادهم. الفرخة اما تبيض كل اللي بتعمله انها تحمي البيضة وتدفيها واما تقرب تفقس بتوقف وبتتفرج ازاي الكتكوت هايشيل القشر ويطلع من البيضة لوحده ومن غير ما هي تساعده يعني ربنا ليه حكمة فكدة ( يعتمد على نفسه ) ديه الفرخة فهمت والدكاترة لسه

[Dr.Hammood]

انا بيطري وفاهم