ان شاء الله هتجوز كمان 15 سنة

[mostafa83]

قعدت امبارح افكر لو حبيت اتجوز ادبر فلوس الجواز ازاى
فقعدت احسبها
سني 24 سنة ومرتبي 650 جنيه . لو حوشت كل شهر 400 مثلا يبقي في السنة 4800
يعني كمان عشر سنيين يبقوا 480000 الكلام ده على فرض اني هقعد 10 سنيين بصرف 250 جنيه شهريا لو مرتبي مزادش وكده كده الزيادة في المرتب بيقابلها زيادة في الاسعار
المهم حسبت لقيت اقل شقة ايجار ب 30000 ايجار قديم ب 300 جنيه في الشهر
غير العفش طبعا يعني لما اجهز نفسي ابقي عندي 35 سنة وابدأ ادور على العروسة
طبعا ساعتها مش اي حد هيرضي بيا - يدوبك ادور على واحدة مطلقة او ارملة ومش من حقي اتشرط حلوة او مش حلوة رومانسية واللا لا - ياللا حسن الختام
عشان كده قررت اني مش هحوش واستنى يمكن كمان عشر سنيين يتغير النظام
ويعملوا زي الهند وتكون البنت عليها كافة تكالييف الجواز شقة وعفش الى اخره

[BATISTA]

أول مشاركة ليك فى المنتدى



ترحب بك أجمل ترحيب
فأهلاً بك في هذا المنتدى المبارك إن شاء الله
ونتمنى لك وقتاً سعيداً مليئاً بالحب كما يحبه الله ويرضاه
وشكـراً لتعطيرك المنتدى بباقتك الرائعة من مشاركات مستقبلية
ونرجوا أن تفيد وتستفيد منـا
تقبل مني أرق التحايا







بخصوص موضوعك دة انا هاقولك احمد ربنا ان مرتبك تعدى ال500 جنية فى عالم بتاخد 250 جنية

وعلشان موضوع الجواز فى مقولة بتقولك الجواز نص الدين مش عارف يعنى لو ماتجوزتش هتموت كافر ولا اية


سيبها لربنا وكبر دمــــــــــــاغك

[mostafa83]

هو الجواز نص الدين بس اللي ميتجوزش ميبقاش كافر مش للدرجة دي
الرسول قال اللي ميتجوزش يصوم

[amr_miza1]

ههههههههههههههه

ايه يا درش انت مش متفائل ليه بس .. ان شاء الله ربنا هيكرمك كدا بس انت بلاش تحسب لها

خلى نيتك خير فى الجواز وان شاء الله هتتجوز , خلى عندك امل فى ربنا

واهلا بيك يا درش ونورت المنتدى

[mostafa83]

الله يخليك ياعم انا متفئل والله وبحسبها في اسوأ الظروف

[omarr]

مصطفى شكرا لموضوعك المهم جدا فى واقعنا الحالى .....

طبعا انا معاك فى اللى انت بتقوله , ومعاك برضه فى انى هناك ضغوط كبيره على الشباب فى
مصر بسبب تدنى المرتبات و غلاء المعيشه .لكن كما تعرف مصطفى , ان فى المجتمع المصرى
معظم الأهالى بيساعدوا ابنائهم ماديا و عائلات كتيره بتكون عامل حساب لليوم ده .
وصدقنى لما تلاقى اللى انت بتدور عليها فى خيالك هاتلاقى نفسك اكثر اصرارا وتصميما على ازاحه جميع العوائق الماديه وغيرها .بكره تتجوز ويبقى ليك شريكه حياتك تتمتعوا سوا فى حياتكم .


خالص يا درش بكره تشوف ..وبكره تلاقى اجمل البنات معاك فى بيتك ان شاء الله قبل 5 سنوات .


تقبل مرورى اخى الكريم ... تقبل منى وافر التحيه والأحترام لموضوعك ولشخصك

[عطر الورد]

موضوع جميل جدا يا مصطفى

ودا فعلا واقع كل واحد بيكون مرتبه هوالمعين الوحيد له في الحياة.

بس يبقى ربنا أكبر معين.
يمكن ربنا يرزقك من حيث لاتحتسب.



تقبل مروري

[لقاء]

كده يا عم مصطفى خلتني أعيط .

ايه التشاؤم ده يا راجل , يا عم انت بس لاقي بنت الحلال وأنا مستعدة أسلفك , وبص ممكن نخلي أعضاء المنتدى يعملوا جمعية ويلا يا باشا هتقبض انت الأول .

بجد بجد , سيبك من التشاؤم وتفاءل وزي ماقلك BATISTA كبر دماغك وخليها على الله , أنا متأكدة انو كلها سنتين هلاقيك بتوزع كرت فرحك في المنتدى بس متنساش بقى تعزمني .

تحياتي ليك ومنور المنتدى .

[mony cat]

ليه بس معقد نفسك كده والله سيبها على ربنا واللى ربنا كتبهولك هو اللى هيحصلك

ابقى اعزمنا على الفرح قريب ان شاء الله

[love_baby]

اهلا مصطفى
زى ما قالوا كل الاعضاء اللى قبلى
سيبها على الله هو ان شاء الله هيكرمك
تحياتى ليك واهلا بيك معانا فى المنتدى....

[mohamedmostafa]

انا من رايى انك تصرف 400 جنية وتخلى الباقى على 100 سنة

[نيهال]

ى هلا بيك معانا
مصطفى........بجدحاول تعيش حياتك افضل
لان مش لازم يكون معاك نص ميون جنيه علشان تقدر تتجوز بعد 15 سنه
احسبهالك انا؟
دلوقتى لو حنقول حتجيب شقه تمليك مش حتقل عن 200 الف.........ولو بعد 15 سنه يا دوبك النص مليون يجيبوا 2 حجره وصاله.......ان شاء الله
ننسى موضوع الشقه.........
تعالى نقول شقه ايجار........حتدفع دلوقتى مبلغ وقول 300 جنيه الايجار
ولو فى المستقبل حنضاعف المبلغ على الاقل 10 مرات لو بنمشى بمعدل الزياده اللى ماشيين بيه هلا

وبعدين حاليا فيه مقدمات بسيطه وايجار كويس مش غالى قوى...
اللى اقصده من الكلام
ان حاليا افضل من الان
وبعدين الانسان بيبدا خطوه خطوه
مش لازم يكون عنده فيلا علشان يرتبط



موضوع جميل
وبدايه موفقه ان شاء الله

[سمكه بلطيه]

ههههههههههههه والله الموضوع ده مش علىا لشاب بس علىا لبنات كمان ربنا يكون فى عون الاهالى ذى ماالشاب عليه طلبات البنت برضه عليها طلبات ...

بس ياريت الاهالى ترحم الشباب يعنى شاب كويس وابن ناس وبيحب بنتى وبنتى عوزاه بس مشكلته انه مش انسان متوسط الدخل يعنى مش مشكله انى اشترى راجل لبنتى طلاما انه هيسعد بنتى , وبرضه انا لو بحب انسان اكيد هقف جنبه واساعده ونكون نفسنا انا اشتغل وهو يشتغل ونكون حياتنا لان فىا لاول وفى الاخر انا هعيش مع انسان مش مع خزنه(( ارحموا من فى الارض يرحمكم من فىا لسماء))

[mamdou7]

مصطفي اولا اهلا بيك في المنتدي وسط اهلك واخواتك

بص يا مصطفي انا هاكلمك من واقع تجربة فعلا ليا ولناس اعرفهم كتير توكل علي الله وخد خطوة ايجابية واستحصر نية انك عاوز تكمل نصف دينك وتفتح بيت وربنا هيكرمك

تكاليف الجواز يا مصطفي مش بتتحسب بالطريقة اللي انت بتقول عليها دي خالص لانها لو بتتحسب كده مكنش حد اتجوز خالص

بجد صدقني يا مصطفي ان ربنا بيبارك ويرزق الانسان اللي بينوي انه يفتح بيت بالحلال وبيفتح له سكك كتير جدا للرزق ومن غير ماتحس هتلاقي نفسك خلاص جبت الشقة ايا كانت بقي ايجار ولا تمليك ولا سلفها حتي وتلاقي نفسك فرشتها وخلاص هتتجوز وساعتها لازم تقعد مع نفسك شوية وتقول انا عملت كل ده ازاي????

مش هتلاقي اجابة لسؤالك غير ان ربنا كريم وهو اللي وقف جنبك وفتح لك ابواب الرزق

انا والله العظيم ساعة ما خطبت كانت ظروفي زي ظروفك كده تقريبا وقررت اني اخطب علشان عارف وواثق جدا ان ربنا هيكرمني لو انا مشيت في الموضوع ده وفعلا احمد ربنا واشكر فضله ودلوقتي حالي احسن بكتير من الاول

مصطفي نصيحة من اخ توكل علي الله واعتزم نية انك عاوز تقتح بيت بالحلال وصلي استخارة وابدأ دور علي بنت الحلال