يعنى ايه كلمه وطن؟؟!!

[سمكه بلطيه]

مســـاء الخـــــير

موضوع فكرت فيه وانا قاعده كده قولت هعرضه عليكم واشوف تفكيركم ياترى ذى فكرى ولا مخالف له..

يعنى ايه كلمه وطن؟؟؟؟؟؟؟؟؟؟؟ هل هى عباره عن ثلاث حروف فقط؟؟

كتير بنسمع كلمه وطنى بس هل فكرنا يعنى ايه كلمه وطنى؟ وبترمز لايه؟ وياترى هل وطنا بيطلق بس على الارض او الدوله اللى بنعيش فيها؟؟ ولا الوطن كلمه شامله لمعانى كتير؟؟؟

ياريت تتتكلموا بتعمق وبكل صراحه

يلا بااااااااااااااى

[amr_miza1]

ازيك يا سمكة ..

العنوان لفت انتباهى جدا وخصوصا ان احنا فى الايام دى بقى مسطلح الوطن سطحى جدا
هو بصراحة انا مش هقدر اقول يعنى ايه كلمة وطن .. انا عاوز اقول ان كل حاجة حلوة هى الوطن ان لما الاقى مكان اعرف اتنفس فيه يبقى وطن لما الاقى ناس بيتكلموا بلهجتى يبقى وطن .. حاجات كتييييير اوى معناها الوطن وبجد اى مكان بعيد عن الوطن بيبقى موحش جدا والواحد بيحس انه متكتف ,,
مش عاوزين نتكلم عن ظروف بلدنا احنا بنتكلم عن وطننا بشكل عام وعن احساسنا بيه .
الكلمة دى بجد بقت اقرب للشعارات من انها كلمة توحى بالانتماء .
انا بصراحة جوايا كتير اوى لو جيت اتكلم عن تاريخنا وعن شعبنا وعن ارضنا وعن النيل الجميل ..
بس مش هقدر اقول غير ان الوطن بيعنى ليا الحب والانتماء .

قالوا ابن آدم روح و بدنه كفـــــــــــن

قالوا لأ بدن . قالوا لأ ده روح في بدن

رفرف فؤادي مع الرايات في الهــــــوا

أنا قلت لأ روح في بدن في وطــــــــن



شكرا يا سمكة على موضوعك الجميل

[BATISTA]

يعنى اية كلمة وطن فكرتينى بأغنية لمحمد فؤاد


بس تعريفى للوطن هو اهلك وبيتك واصحابك واخواتك وعيلتك الى بيفرحو لفرحك وبيحزنو لحزنك


هو دة الوطن الحقيقى لما تكون وسط الناس الى بتحبهم ويحبوك

[سمكه بلطيه]

انا بخير ياعمرو عامل ايه انت؟؟

عمرو على فكره كلامك مطابق لكلامى الوطن مش بس مكان او دوله الوطن كل حاجه حلوة فى حياتنا اللى احنا يعنى عايشين لها الوطن هو العمل طلاما انى بحب عملى ومقتنعه بيه الوطن هو اهلى اللى بحبهم وبيحبونى الوطن حبيبى او خطيبى او جوزى وفيما بعد اولادى .. اما لو جينا لكلمه وطن اللى هى الارض .. فطبعا مش كل حد يحبنا يدينا لان الحب مش فلوس كفايه اننا عايشين فى ارضه وبناكل من خيره ده الوطن

باتيستا منور الموضوع
برضه كلامك نفس اللى فكرت فيه سبحان الله وعلى فكره انا بحب محمد فؤاد هههههههههههه

[Dr.Hammood]

انا وطني وطني وبطن طن واتباهى بمجدك ياوطن طن

[foash]

السلام عليكم
الوطن فى نظرى با ختصار هوه الشرف والكرامة والارض والاهل الانسان اللى معندوش الحاجات دى مبيبقاش انسان
ahmed

[سمكه بلطيه]

حمود منورنا هنا والله ومشكور على الغنوه دى

فوئش كلامك صح وبرضه ذى كلامنا

[omarr]

وطنى هو مكان مسقط رأس اجدادى وهو مسقط رأس امى وابى وهو مسقط رأسى ومسقط رأس ابنائى .هو بيتى الكبير , اتألم لألامه و افرح لفرحه .وطنى مصر السمرا , يعيش عليها
اقدم شعوب الأرض حضاره و اطيب شعوب الأرض بشرا .وطنى مذكور فى كل كتاب سماوى

من وطنى كانت " هاجر " ام اسماعيل ابو العرب وجد رسولنا الكريم . حضنت يوسف و ابناء يعقوب
وفيها عاش موسى شبابه كله , وفيها تجلى الله لنبيه , وفيها مرت مريم مع ابنها الرضيع

وبعد 7000 سنه اندثرت فيهم شعوب وواطان و امم معموره ما زال وطنى ينبض وشعبه بيدور على الطريق .

وطنى احلى الأوطان .. بنيله و شمسه وببحره و بسواد ارضه وبطيبه شعبه .

[سمكه بلطيه]

عمر نورت موضوعى البسيط وبرضه كلامنا ماخرجشى عن كلامنا كتير

على اسم مصر يكتب التاريخ ماشاء
انا مصر عندى احب واجمل الاشياء

[elkbeer]

أكيد مش بس المكان اللي بنعيش فيه واتولدنا فيه لا وكني هو مكان راحتي وعشقي فيه

[omarr]

سمكه بلطيه الف الف الف شكر على حسن الأستاضفه فى موضوعك

اشكرك اختى الكريمه

[Dr.Hammood]

انا عشت اغلب عمري في السعوديه رجعت لقيت البلد حطام وكل حاجه منهاره والناس بتهرب منها

بحبها طبعا وبحن لها وانا فيها لانها وطني

[سم سم]

جيتي على الجرح يا سمكة اصلي بشتغل في السعودية ووطني لو فيه ايه هتفضل مصر بالنسبالي اجمل بلاد الدنيا

[eshoo4ever]

وطن يعنى مصر

[عاشقة بغداد]

الوطن هو البيت الكبير...........

الي مضيع ذهب بسوق الذهب يلكاه ..........والي مفارق محب يمكن سنه وينساه......بس الي مضيع وطن وين الوطن يلكاه