ايه الحل فى مشاكل المصريين؟

[moak]

اللى يبص ويتأمل فى حال الشعب المصرى يستعجب... الناس كلها تقريبا بتشتكى... الشعب بيقول الحكومة والحكومة بتقول الشعب والنتيجة واحدة وهى الفشل للأسف.

الشعب المصرى هوالمسئول الأول عن الحالة المزرية اللى وصل ليها مش الحكومة.. دايما احنا بنقول الحكومة هى السبب.. الرئيس هو السبب ولو بصينا فى الأمور بعمق هنلاقى اننا اول المسئولين..احنا ما بنعلمش اولادنا النظام والنظافة فى الأماكن العامة وعايزين نكون دول نظيفة؟ إزاى؟!! احنا مبنحترمش قواعد المرور فى الشوارع و لا بنحاول نغير نفسنا للأحسن بس كل اللى بنعمله اننا ننقد غيرنا و نرمى عليهم مسئولية اللى بيجرالنا والحقيقة غير كدة تماما.. إذا كانت البلد مش نظيفة وانت بترمى الزبالة فى الشارع يبقى انت اللى وسخت مصر كلها!! و إذا كانت قوضتك وبيتك اللى عايش فيه غير منظمة فانت السبب فى حالة الإهمال والتسيب فى البلد كلها.. و إذا كنت انت مابتحضرش المحاضرات فى الجامعة و بتقعد على القهاوى او مع البنات والعكس فانت السبب فى تخلفنا العلمى الكاسح!!

بالطريقة دى المفروض نفكر.. لازم نحاسب نفسنا قبل ما نحاسب اى حد تانى..احنا المسئولين عن الحالة اللى وصلنالها.. احنا اللى رضّعنا اولادنا السلبية و بالتالى اى حد يقعد على كرسى الحكم و يظلم نقوله آمين... آمين بلساننا!

الحقيقة, اللى يتأمل فى حال الثقافة والفكر العام المصرى يجد انه مصاب بشلل من داخله.. فكر مشلول يرمى مسئولياته على أى شىء غيره... فكر مشلول لا بيقدم ولا يأخّر.. والرجالة على القهاوى والستات بيتفرجوا على المسلسلات!

عايزين افكار عملية

[اهـــل الرياض]

شكر على موضوعك لكن مصر بلاد الحضارة والتطور والعلم لكن كثرة السكان اثر على ذلك.

[الدرويش المصري]

المشاركة الأصلية بواسطة moak

احنا ما بنعلمش اولادنا النظام والنظافة فى الأماكن العامة وعايزين نكون دول نظيفة؟

خلاص حل مشكلة جواز الشباب
واوعدك انهم هيعلموا اولادهم النظافة
يا moak هو الشباب لاقيين شغل عشان يتجوزوا ولا يخلفوا

المشاركة الأصلية بواسطة moak

إذا كانت البلد مش نظيفة وانت بترمى الزبالة فى الشارع يبقى انت اللى وسخت مصر كلها!!

لفظ مش في محله

المشاركة الأصلية بواسطة moak

و إذا كانت قوضتك وبيتك اللى عايش فيه غير منظمة فانت السبب فى حالة الإهمال والتسيب فى البلد كلها.. و إذا كنت انت مابتحضرش المحاضرات فى الجامعة و بتقعد على القهاوى او مع البنات والعكس فانت السبب فى تخلفنا العلمى الكاسح!!

ومين السبب في التخلف العلمي انا ولا البلد
انا اللي درست اللغة الانجبليزية 15 سنة
ولما اتصادف اني اكلم اجنبي يقولي
خبيبي ده مش انكليسي


صدقني العيب مش فينا بس
العيب في الظلم السائد في البلد والفساد اللي في كل حتة
العيب اننا بنجري على أكل عيشنا
وده هو هدفهم اللي عايزينه

موضوعك جميل يا moak

[elkbeer]

الحل هو الحبل

[مستكة]

اتفق معك يا moak

في كل اللي قلته

احنا مش ملايكه والحكومه مش مطالب منها انها تعملنا كل حاجه

لا يغير الله مابقوم حتي يغيروا ما بانفسهم

بس برضه احنا عايزين شوية ضمير من الحكومه

عايزين مشاريع حقيقيه

عايزين عدل في توزيع ثروات الدوله

عايزين المشاريع القوميه اللي بتتعمل تتعمل لوجه الله ولخدمة المواطنين مش لخدمة رجال الاعمال اللي كل يوم بيعلو علي حساب كرامتنا وقوتنا وصحتنا

عايزين ضمييييييييييييييييييييييييييييييييييييييير

عايزين كرامه

عايزين ادميه

ببساطه عايزين نعيش



ساعتها الحكومه تعدمنا لو محافظناش علي سلوكيتنا

[أدهم]

نظرة سلبية مش ايجابية .. لأنك بتختزل مأساة البلد فى أفرادها فقط وناسى إنها دولة لها نظام .. النظام الموجود فى البلد هو اللى خطط لك إنك توصل للى إنت وصلتله ده ياعزيزى .. هو اللى خطط من ربع قرن لبناء المبانى المخالفة بدفع الرشاوى على عينك ياتاجر وهو اللى خطط لشبكة طرق وكبارى تزيد الطين بلة .. وياريتك تشوف أخر كارثة أعلنوها عن المحور لمدينة الأشباح 6 أكتوبر

وهو النظام اللى ترك جمع القمامة وتدويرها فى أيد المبدعين والفنانين اللى غاروا من الزبالين .. تحبنى أكلمك عن الرشاوى والفساد وإزاى خلو الناس كلهم راشين ومرتشين ولآ عندك فكرة وعايش معانا فى مصر .

حضرتك عاوز حلول عملية .. إتفضل .. بس خليك عارف إن العصابة مش حتطول حد طرف الخيط

أنا بس ححل مشكلة النظافة ولو عاوزين حلول تانية لأى معضلات تحت أمر الجميع

التعاقد مع أكبر مصانع تدوير القمامة وكافة المخلفات .. لتكن يابانية مثلا .. وإنشاء مايلزمنا بحسب الدراسات ماتشير وتدار بخبرتهم لعدة سنوات محددة نكون أعددنا كوادر لإدارتها ويتم شراء القمامة من جامعيها بسعر مناسب للطن وحتشوف سعادتك البلد دى شكلها إيه ... لو لقيت ذرة تراب .. وحذارى يتسرب إلى الأذهان أى عائق مادى .. تكلفة جمع القمامة حاليا وسياسة النصب العلنى على المجتمع بالكامل تؤكد صحة فكرة الشراء وتركها للعامة وما على مصنع التدوير إلا إستقبال القمامة أو القيام بجمعها .. وياريت مانتكلمش فى إعتمادات وميزانيات علشان شكلنا مايبقاش وحش ونظهر إننا بنتكلم عن حاجة مش شايفينها ولا عارفينها .. وشوف ناس أد إيه رايح تشتغل .. وموضوع الشراء ده لن يكون على طول دى الدخلة الكبيرة .. أو ياسيدى خلى كتائب العمل الوطنى تتحرك ( الجيش مثلا ) الموضوع ده ممكن خلال سنة ونصف يرجع مصر لسنة 36 من حيث النظافة .


وشكرا للموضوع وألف مرحب بموضوعك الأول بالمنتدى الجميل ..