علشانك يا مصر ...عاوزين شباب يحمي ....إلخ إلخ

[satanic fate]

علشانك يا مصر ...عاوزين شباب يحمي .... يبني .... يعمر

عنوان جميل مقلناش حاجه --- بس --- هما فين الشباب ؟؟؟

واحد هيجعّر دلوقتي ويقول احنا اهوه -- وهو انت ايه

يا ترى من اللي لسه بيتصرف عليه ( بياخد مصروفه من والدته يعني ) لسه من بتوع الجامعه ولا مخلص ؟

لو انت مخلص كلية او دبلوم حتى كمل قراءه -- خلاف كده اقفل الموضوع ولا كإنك شفته

فين الشباب ؟؟ الشباب اللي بيشتغلوا من صباحية ربنا لحد نص الليل علشان 200 او 300 جنيه يا عم خليهم 500 جنيه ؟؟

دلوقت فيه حالة من التضخم الاقتصادي ( الانهياااااااااااار ) كل شئ تمنه ذاد --- ابسط اسره دلوقت بتجيب عشا مش غدا كمان عشا بس باكتر من 10 جنيه ( دا بالميت ) -- كيلو اللحمه هيوصل 40 جنيه قريب ( لا لللحمه )الفراخ الكيلو في بعض المناطق وصل 16 جنيه ( لا للفراخ ) طب السمك برده ( لا للسمك ) -- كلام غريب على اللي انا قلتله متقرأش الموضوع -- انما اللي ايده في النار حاسس انا بقوله ايه -- انجح وانضف واجمل شاب معرض دلوقت ان حتت عيل معاه دبلوم و دخل معهد أمناء شرطة يوقفه و يسحبه من قفاه على القسم ويرنه انجح وانضف واجمل علقه على قفاه --- دا الا اذا لا سمح الله كان الشاب ده جوز اخته صول ولا مخبر مثلا -- الوضع السياسي متفهمش منه حاجه أنا عمري ما شفت بلد كلها قالت ان رئيسها مات حتى الصحف و التليفزيونات و بعدها بشهر يطلع رئيسها عايش ( اللهم إلا اذا كانت ايام الفراعنه او الدوله الفاطمية ايام ما مكنش بيزيع الاخبار غير الراجل اللي بيبقى ماسك طبله وراكب على الحمار بتاع طن ططن طن طن ) -- متفهمش الرئيس عايش ولا ميت ولو عايش هنعمل ايه بخيال مآته لا فيه قمح ولا حتى فيه عصافير --- متعرفش مين رئيسك الحالي ولا مين رئيسك التالي -- متعرفش بتاع الحديد ولا السيراميك ولا التليفونات دول جابوا فلوسهم منين ؟؟؟ --- متعرفش انت اساسا هتعمل ايه بمرتبك --- اللي معهوش فلوس مسعور و اللي معاه مسعور اكتر منه --- اسعار الايجارت بتاعت الشقق بتعدي ال 300 مرتاحه و فمناطق كان الواحد بيقرف يمشي على بعد 2 كيلو منها ---- الله يكون في عوننا --- رغيف العيش هيبقى بربع جنيه --- و الكهرباء فعلا زادت 25% --- و طبعا الميه --- دا حتى أنبوبه البوتاجاز هتتغير بعد كده ب 25 جنيه ان مكنش اكتر --- في الشركة الواحد بتلاقي نفس المؤهل بس واحد ساعي و التاني مدير و كمان ممكن تلاقيهم نفس الدفعه ---- حاجه قلة أدب خالص

على فكره انا مش متشائم و لا بكتب الكلام ده علشان ازعلكم ربنا يعلم انتوا اخواتي بس حتى لو انا قلت و حلفت ان انا مش بعاني من أي حاجه من اللي انا كاتبها دي --- هل معنى كده اني خلاص بقيت مرتاح ؟؟؟ حتى لو الهم مش همي بس على الاقل دا همنا كلنا -- شايفين إيه الحل --- إيه اخرتها --- محمد سعد بقى بياخد 10 مليون جنيه في الفيلم --- محمد سعد ميستاهلش 10 مليون بس انك تضحك حد في الزمن ده يساوي 100 مليون هنضحك ازاي و كل ده واحنا مبصناش بره مصر -- كل ده واحنا مفكرناش لا في العراق ولا في فلسطين و لا في مسلمين ولا حتى في يهود ---

إحنا فين ؟؟؟

شباب ايه اللي عايزينه يحمي و يبني و يعمبر ؟؟؟ مش اما يلاقي ياكل الاول ؟؟ مش اما البنت اللي دلوقتي بتعدي 30 من غير جواز تتجوز ؟؟؟ مش اما الغلابة يلاقوا ياكلو ؟؟؟

الشباب اللي هيحمي --- هيحمي بإية و مين ؟؟ هيحمي مصر ؟؟ طب من مين ؟؟ من اسرائيل و امريكا ؟؟ اذا كانوا هما خلاص مننا شبعانين --- طب هيحموها بإيه ؟؟ بأسلحه امريكية و اسرائيليه طبعا --- ها ها ها ضحكتني واحد بيديك طوبه علشان تضربه بيها طب هو يبقى معاه ايه

الشباب اللي يبني --- هيبني ايه ؟؟ عمارات ولا قصور ؟؟ لا دي بتاعته ولا دي بتاعته ؟؟ طب هيبني بإيه ؟؟ بحديد و اسمنت ؟؟ بتوع مين ؟؟ دول حتى بيغلوا

الشباب اللي هيعمر ( هيعمبر ) --- يعمر ايه ؟؟؟ الصحرا ؟؟ طب و الخضرة يسبها لمين ؟؟؟ و حتى لو عمر بتتسرق منه و ياخدها الناس التانيين --- اللي اشتروا متر الارض في الصحرا بربع جنيه وباعوه للشباب المتر بميه و خمسين ---

معلش كلامي جه في الاخر و بقى عامل زي الشعر بس انا من حزني على الناس ناقص امسك ربابه واغني -- اعزروني تقلت عليكم بس انا مش متشائم برده انا قلتلكم الواقع من حواليه

[احمد نجم]

شجره الدوم دى بتقعد حوالى 50 سنه لغايه ما تطرح اللى بيزرعها ده مش مجنون على فكره لان ولاده هياكلوا منها

احنا كده بنزرع شجره دوم يمكن فى يوم من الايام تجيب خير مش شرط وانت عايش لكن اى حد تانى ولو سمحت متاخدش الموضوع بعند بس
احنا بنحلم ليه مستكتر علينا الحلم ده مش ممكن الحال يتغير
عبدالناصر وصحابه كانوا بيحلموا وحلمهم اتحقق

احنا كمان من حقنا نحلم ان البلدى تكون كويسه بس بدل مانعترض بس بنحاول وباكد بنحاول نلاقى حل يمكن نفشل لكن ع الاقل بنحاول

[وائل المصري]

الشباب موجود والحشيش والبانجوا اهو دخل تهريب من الحدودممكن ننادي محمد واحمد ومصطفي وبطرس ومحمودولو مفيش ممكن يارا وهبه ودلال وايمان وثناء ام مسعودالشباب موجود التكدس السكان معدي الحدودالشباب موجود والفضائيات منها العربي والانجليزي المفتوح والمشفر والمسدودالشباب موجود والازمات الاقتصاديه والتفكك للامه العربيه اكيد مش محدودالشباب موجود حتي بيشجع الاهلي والزمالك وبترول اسيوطالشباب موجود وحسني وسوزان وعلاء وجمال بس انور مش ممكن يعودالشباب موجود .وائل المصري المكبود.تقبل تحياتي

[satanic fate]

المشاركة الأصلية بواسطة احمد نجم

شجره الدوم دى بتقعد حوالى 50 سنه لغايه ما تطرح اللى بيزرعها ده مش مجنون على فكره لان ولاده هياكلوا منها

احنا كده بنزرع شجره دوم يمكن فى يوم من الايام تجيب خير مش شرط وانت عايش لكن اى حد تانى ولو سمحت متاخدش الموضوع بعند بس
احنا بنحلم ليه مستكتر علينا الحلم ده مش ممكن الحال يتغير
عبدالناصر وصحابه كانوا بيحلموا وحلمهم اتحقق

احنا كمان من حقنا نحلم ان البلدى تكون كويسه بس بدل مانعترض بس بنحاول وباكد بنحاول نلاقى حل يمكن نفشل لكن ع الاقل بنحاول

مش معترض على المحاولات بس مين اللي له نفس وسط كل ده علشان يحاول

[satanic fate]

المشاركة الأصلية بواسطة وائل المصري

الشباب موجود والحشيش والبانجوا اهو دخل تهريب من الحدودممكن ننادي محمد واحمد ومصطفي وبطرس ومحمودولو مفيش ممكن يارا وهبه ودلال وايمان وثناء ام مسعودالشباب موجود التكدس السكان معدي الحدودالشباب موجود والفضائيات منها العربي والانجليزي المفتوح والمشفر والمسدودالشباب موجود والازمات الاقتصاديه والتفكك للامه العربيه اكيد مش محدودالشباب موجود حتي بيشجع الاهلي والزمالك وبترول اسيوطالشباب موجود وحسني وسوزان وعلاء وجمال بس انور مش ممكن يعودالشباب موجود .وائل المصري المكبود.تقبل تحياتي

انا مش عارف انور كان كويس ولا وحش لو قلنا كويس هيطلعوا المعتقلين يقولوا زي الزفت ولو قلنا وحش هيطلع رجال الاعمال يقولوا حلو -- معرفش

[Dr.Hammood]

ليه يا عم انا طالب جامعي وبشتغل في سيبري بنحاول اهوه ماتبقاش من قتلة الاحلام سيب الناس تحاول