قال ايه دكاتره الجامعه بيشتكوا؟

[hend]

بسم الله الرحمن الرحيم
السلام عليكم ورحمة الله وبركاته
شوفتوا امبارح برنامج 90 دقيقه قال ايه دكاتره الجامعه بيشتكوا من قله مرتباتهم.
ياحرام دول كانو بيعملو الكتاب من دول يقطم وسط الطالب واهله لا وايه ينزلوا معاه شيت علشان يعرفوا مين اللي اشترى الكتاب ومين لا.
تصدقوا صعبوا عليا قوي ربنا يكون في عونهم ده ايه الظلم ده
طبعا انتوا عارفين ان مرتب دكتور الجامعه يدوبك 2000 جنيه
يعنى يدوبك بياكلوهم عيش حاف
امال العالم اللي بتاخد 150 جنيه ده لو خدتهم كل شهر وطبعا مزانيه الدوله لاتسمح حسبي الله ونعم الوكيل ولا ايه رايكم

[Dr.Hammood]

اسوأ طائفتين في مجتمعي

سائقي الميكروباصات
و
دكاترة الجامعات

لان الدكاتره بتنسى انها كانت طلبه زي الطلبه دي

طبعا ما عدا الدكاتره ولاد الاصول

الله يخرب بيت اللي خلى التعليم مجاني وجاب لنا مصايب

[محمدحسين]

من علمنى حرفا صرت له عبدا
أذا لم يكن للدكاتره كرامه ومستوى مادى كيف سيعطون
ومن غير المعقول أنسان متفوق وأجتهد طوال حياته طبعا نستثنى الذين يختارون بالوسطه والتلاعب منهم
أن نستكثر عليهم
وكيف نساوى بين من تفوق ومن تكاسل وليس له طموح
أتذكر قصه شاب مصرى ذهب الى أنجلترا للماجستير وبعد وصوله بثلاثه اشهر جاء الكريسماس فجلس فى المعمل يكمل تجاربه وجاء رئيس الكليه لانه نسى شئ بمكتبه وأعتقد ان العمال تركوا نور المعمل فذهب ليطفئه فاذ به يرى الشاب فقال له كيف تترك الأحتفالات
فرد له انى حياتى كلها علم وليس لى فى الاحتفالات فأطلع على نتئجه خلال الثلاثه شهور فانبهر به فساعده على أن يأخذ الماجستير فى وقت قياسى
ياهند حقا الكل مظلوم فى مصر ولكن لابد ان يكون لدكتور الجامعه مستوى مادى واجتماعى يمكنه من أستكمال تفوقه وجعله قادر على العطاء للأجيال التى تخرج من تحت يده

[amr_miza1]

لا هو بصراحة يا هند لازم نكون منصفين !!! الدكاترة مظلومين 2000 جنيه بس لالا
والكتب يا دوب .. كلام فاضى

انا شايف ان المفروض مرتبهم يبقى 7000 جنيه ودا اقل تقدير ليهم طبعا شوفى دلوقتى البيتزا اللارج فى بيترا هت بقت بكام دلوقتى !!

شكرا يا هند موضوعك جميل ..

[طائر غريب]

واللة يا هند حسبي اللة ونعم الوكيل فيهم دول ناس ظلمة واللة العظيم وربنا مش هايبركلهم في فلوسهم دي وهتتقلب عليهم مصايب وهموم يا جماعة انا في كلية هندسة جامعة الاسكندرية وكل الي في جامعة الاسكندرية يعرف الدكتور علي رفعت دة منة للة سقطني في سنة تانية وخلاني ادبلر السنة منة للة مع اني واللة متفوق وشاطر بس حسبي اللة ونعم الوكيل وشكرا ليكي يا هند علشان انتي دوستي علي وتر حساس جوايا وخلتيني اطلع الي جوايا

[نيهال]

مش عارفه اى دكاتره بتتكلمى عنهم يا هند.......
لانى مش شفت منهم اى تعذيب لينا
انا معاكى ان الكتاب كان بالشئ الفلانى..........بس ده حقهم لانهم اجتهدوا فيه
تشتريه مش تشتريه.دى حريه الطالب......ده الطبيعى عندنا
يعنى على مر سنين الكليه ما شفت دكتور شدد على شراء الكتاب وواخد الاسامى بالكشف والكلام اياه الا ممكن دكتور واحد من 60 دكتور مر علينا
بالعكس بقى.ليا قرايب اكاديميين وبعرف ان المبلغ بيكون بسيط قوى
وحتى لو وصل لل2000 جنيه.ازاى نقول ان ده مبلغ كبير بالنسبه لاستاذ فى الجامعه يعتبر من صفوه العلماء فى مصر

قوليلى ايه رايك لما تعرفى ان ورقه امتحانك بتتصحح بجنيه واحد؟
بجد حاجه مقززه قوى



دى الدكاتره المعتمدين.مش المتفرغين واللى بتستضيفهم الكليه
بجد اللى بيكون متفرغ بتكون حالتهم اصعب قوى
يعنى المحاضره بتكون على اللايحه القديمه اللى افتكر انها لم تتعدى ال10 جنيه
قوليلى ده يرضى مين
لما دكتور يبقى عنده سبعين سنه وذو خبره وفى الاخر بياخد مكافئه تابعه لقانون من اكتر من 50 سنه فاتت


معذره لكن الكلام مش شفته لا فى كليتى( الهندسه ولا كليات اخواتى )


مرسيه يا جميل على فتح باب المناقشه فى الموضوع

[Dr-Ayat]

2000جنية ومش عاجب!!!

ده بدل ما يحمدوا ربنا

ده انا بعد ما يضيع عمري بسبع سنين دراسة وسنة تدريب هاشتغل سخرة ,,قال ايه خدمة !!!
وهاخد 150 جنيه ولو ربنا أكرمني هاخد صرف بدلات التفوق العلمي وبدلات الماجستير والدكتوراه زيادة عالمعاش الأساسي اللي هو 150 .... ١٠٠ جنيه للماجستير و٢٠٠ للدكتوراه!!!
فعلا وعجبي!

[omarr]

ارجو ان تهتم الدوله بالمعلمين وتعطيهم الأولويه الماديه و ترفع من مكانتهم الأجتماعيه

واكيد كل ده هايعود عليهم بالخير و الأستقرار النفسى و هايقدر المعلم ( الدكتور / الأستاذ ) انه

يعمل بأقصى طاقه . تحيه وإجلال لجميع اساتذتى اللى ساعدونى بشكل كبير على تكوين شخصيتى و اعطونى جميع التعليمات اللازمه والنصائح الغاليه المجربه التى ساعدتنى كثيرا
فى حياتى و مازالت .

[مستكة]

مش كل الدكاتره والله ياهند

فيه دكاتره قمة في التواضع والتفاني في العمل

وكل مجتمع فيه الحلو والوحش

فيه دكاتره فاتحه مكتبها دايما للطلبه وبتساعدهم في كل شيء

الدكتور ده قدوة كبيره اوي لما يتمتع به من مكانه علميه

ولا ينكر اي منا مدي الانبهار اللي اخدنا في الجامعه لاكتر من شخصية دكتور لما شفناهم واتعاملنا معاهم وعرفنا مكانتهم العلميه والدراسات اللي قامو بيها وخصوصا ان فترة الجامعه دي اللي بنكون فيها اتجاهات كتيره جدا

اظن صعب اوي في مرحلة كلها انبهار علمي ونلاقي الدكتور مبهدل في مظهره وظروفه

ولاتنسي انهم دايما في حالة دراسه وبحث والكلام ده فعلا بيتكلف كتير

والكلام اللي اثير حول الموضوع ده اكيد مش بيتكلم عن حيتان الدكاتره اللي طالعين واكلين ونازلين واكلين

[نيهال]

المشاركة الأصلية بواسطة طائر غريب

واللة يا هند حسبي اللة ونعم الوكيل فيهم دول ناس ظلمة واللة العظيم وربنا مش هايبركلهم في فلوسهم دي
وهتتقلب عليهم مصايب وهموم يا جماعة
انا في كلية هندسة جامعة الاسكندرية وكل الي في جامعة الاسكندرية
يعرف الدكتور علي رفعت دة منة للة سقطني في سنة تانية

ربنا يهون عليك السنه ان شاء الله
وما بتعرف .اكيد ده خير من ربنا...بس اللى عايزه افهمه لانى انا كمان خريجه هندسه اسكندريه السنه اللى فاتت
هوه ايه اللى حصل خلى الدكتور يستقصدك؟؟
كتاب او شيت مش اشتريته؟

لانى انا شلت ماده فى تانيه كنت متفوقه فيها وكان مستحيل اشيلها علشان غلطه دكتور .علملى الشيتات بتاعتى اول واحده.لانى بحب الماده دى قوى
المهم
ومش كان معاه الكشف ودرجاتى ضاعت والحمد لله.مع العلم بان دكتور نفس القسم كان قريبى لكن ما باليد حيله....قدر من عند ربنا....اينعم بهدلت الدنيا لكن مفيش حاجه بتتغير

[Bassem Ammar]

اولا احنا بنتكلم عن المستوي المادي لطائفه من الموظفين
و من بعد كدا ممكن نتكلم عن تاثير الطبقه دي في المجتمع

2000 جنيه ايه الي حضرتك عامله الموضوع عشانه ؟؟

بجد و الله ماهو ياما حضرتك مش عارفه المرتبات كام في السوق او ان اختلاطك بالسوق قليل !!

الفلاح الي كان بيطلع دول الخليج يشتغل في ارض زراعيه كان بيجيب اكتر من المبلغ الي حضرتك

بتتكلمي عنه ؟!

عارفه حضرتك تكلفة الماستر كام ؟

طيب عارفه تكلفة الدكتوراه كام ؟

عارفه حضرتك معني ان الانسان يضيع خمس سنين من حياته العمليه في مقابل انه يكتسب
خبره نظريه دي تساوي قد ايه

ال team-leader الي عنده 25 سنه في شركه مش هقلك متعده الجنسيات لا دا في شركه

limited partnership بياخد حوالي 4000 جنيه !!!

عارفه حضرتك ان ال Fresh graduated ممكن مرتبه يوصل 3000 جنيه

انا مش فاهم هو اي جزء الي مش عاجب حضرتك ؟؟!

دا دكتور جامعه يعني راجل عالم .. اقل حاجه نكافئه بيها ان علي الاقل مرتبه يكون 5000

امال لما حد ينادي بتكريم العلماء دا علي اساس ايه ؟

هم مين العلماء اساسا ؟ و نكرمهم ازاي ؟

اقل حاجه في تكريمهم هو العطاء المادي و الا هيروحوا يطفشوا لدول الخليج علشان ياخدوا

3 اضعاف الي حضرتك معترضه عليه

بالنسبه لتعامل الدكاتره مع الطلبه فمفيش تعميم .. فيه كويس و فيه وحش

امال العالم اللي بتاخد 150 جنيه ده لو خدتهم كل شهر وطبعا مزانيه الدوله لاتسمح حسبي الله ونعم الوكيل ولا ايه رايكم

ياريت حضرتك تذكريلي 3 كادرات وظيفيه بيقبضوا المرتب دا صافي !!

عمال المصانع مش بيقبضوا كدا و لا رئيس ورديه بيقبض كدا !!

عموما حتي لو فيه ناس بتقبض كدا دا موضوع خارج المناقشه لاننا بنتكلم عن دكاترة الجامعات

علي اي حال

شكرا لموضوعك الي بتدافعي فيه عن تكريم العالم !

و بالمناسبه مش معني تكريم العالم اهانة العامل !

[دقه قلب]

السلام عليكم ورحمة الله
انا مع مستكة فى ان مش كل الدكاترة كده
واى مجتمع فيه الحلو والوحش

يعنى الدكاترة فى هندسة مكنش فى اهتمام بموضوع الكتب ده اطلاقا ويمكن المرتب كمان مش بيفرق معاهم الان عندهم شغلهم خارج الكلية واللى بيكسب اضعاف يعنى عندهم بيكون العلم للعلم او للمظهر الاجتماعى دكتور جامعه

انما ده ميمنعش ان فى دكاترة تانيين الكتب عندهم مهمه وانا مع الرأى اللى بيقول انه حقه فى كتبا تعب واجتهد فيه ولكن لازم يراعى ان فى طلبه بيكون سعر الكتاب عالى عليهم اوى


موضوع بقى 2000 جنيه ده يا هند الرقم مش كبير فعلا بالعكس ده متواضع جدا باسعار اليومين دول
لاحظى ان دكتور الجامعه بيبقى خبرة كام سنة؟
يعنى على الاقل فعلا 4000 او 5000 الالاف مش كتير
عشان حتى يقدر يحافظ على مستوى معقول لحياته وكمان مظهر محترم يليق بيه

موضوع يستحق النقاش
تحياتى لك

[hend]

كل الناس اللى اتكلمت دافعت عن الدكاتره ومعتبراهم علماء
ياااااااااااه
كل دول علماء يامصر
طبعا مش كلهم علماء
وانا عمرى ماههاجم علماء
انا كلامى كله عن الناس اللى اخدت دكتوراه وبعدين استغلت سلطاتها فى تعذيبنا
كلنا تقريبا خريجين جامعه واظن كلنا شوفنا الكتب اللى بتتخطى ال 200 جنيه بس مش كلنا اهلنا يستحملوا ده
وكلنا لما دخلنا الجامعه شوفنا قد ايه العلماء دول
بيدونا اكتر مما نستحق
بدليل وزراة الخاريجيه المصريه طلبت الشهر اللى فات موظفين وتقدم لها خريجين من كافة التخصصات وصعقت من نتائج الامتحانات
واشادت بالتعليم الجامعى ومزيد من تقدمه ( طبعا بالنسبة للاخطاء اللغويه او المعلومات العامه او الاجوبه المنطقيه الممتازة )
هناك قله واؤكد انها قلة منهم من يستحق ان اطلق عليه لقب عالم
وهى نفس القله التى ارى انه لابد من تكريمها واحترامها وهى نفس القلة البعيده عن استغلالنا والبعيده عن اعتبار التعليم عملية تجاريه مربحه


لا انكر انه ربما الرقم ولست متاكده من صحته ربما غير كافى لرب اسرة
ولكن فى مقارنه ساخرة مع رب اسرة مرتبه طبقا لاقوال الحكومه
مش كلامى انا
150 جنيه
اقول بقى مش يتظاهر ولا يعتصم
ده يروح يحفر بيهم قبر ليه
انا مش بهاجم الدكاتره _حتى تلك الانماط التى لا تحظى باحترامنا
ولكنى اهاجم نظام غير عادل

[فاطمة عطية]

اشكرك يا هند ع هذا الموضوع الذى اثار الجدل وفتح لنا باب النقاش اولا المشكلة مش مشكلة انه بياخذ راتب قدره هكذا اذا اعطى راتب اعلى من هذا تبقى المشكلة كما هى عليها اكيد الدكتور مش بيقدر يعيش بهذا الراتب لان احتيجاته اعلى كثيرا من هذا الراتب
لكن معظم الدكاترة المعظم والغلب ايضا بيعطى كورسات وشوف الكورس بقى بيدخله منين الطالب بيدفع قد كدا وخصوصا لو كانت المادة صعبة بيكون مستغل يعنى انا فى علوم عندنا طلبة بتاخد كورس رياضة ب 1200 تخيل لما طلبة تاخد كورس بهذا الثمن فاجر الكتور كام
لكن علينا ان نشكر الدكاترة اللى بتراعى ضميرهم ومقتنعين برزقهم
اقول لهؤلاء الدكاترة اتقوا الله شوفوا الموظف الغلبان بيدخله كام فى الشهر وليس له مصدر او دخل تانى يجيبله فلوس وتخيل بقى انه عنده اولاد فى الجامعة يعمل ايه
ربنا يكون فى عون اولياء الامور ويهدى الدكاترة