أشعــــار .. على سلامـــة

[bo7or]

انا اعتقد يا"نصف قلبى لك"
ان دة مكان خطأ لإضافة حضرتك..لأن الموضوع عن الشاعر على سلامة بس!!!!!!!!!!!!!
و يا ريت كمان تزيله تبقى مشكور....

[bo7or]

ماعرفتش أحضنك

ماعرفتش أحضنك
ماعرفش إيه حاشنى
بتوحشنى
بجد بجد بتوحشنى
ماعرفتش أحضنك
يمكن عشان طعم الكلام
يمكن عشان كتر الزحام
مخنوق
وهى الدنيا إمتى كانت بتروق
مخنوق
يمكن عشان خايف أفوق
ماعرفتش أحضنك

[bo7or]

دى بأة تحفة ملهاش حل بجد....
بعشقها فظيعة ..
انتوا بتقرولى انا!!!!!!!!!!!!!! بصوا تحت عالجمال..
بـــراءة

بمنتهى البراءة
سألتنى الصغنتوته نور
فى اربع خمس امور
قالتلى بابا يا بابا
مش انت يا بابا
بتكتب اغانى
وتقول اشعار
انا سمعت الشيخ يا بابا
بيقول انك يا بابا
هتروح النار
زى الناس الوحشين
الحراميين الكفار
قوللى يا بابا
يعنى ايه استعمار
يعنى ايه نيل
يعنى ايه هرم
ومين اللى حط النسر ده
فوق العلم
يعنى ايه يا بابا
استفتاء
ويعنى ايه انتخاب
ويعنى ايه حر
ويعنى ايه نصاب
وايه هو الاغتصاب
ويعنى ايه اختلاس
ويعنى ايه هجاص
ويعنى ايه خصخصة
وايه هو الدستور
يعنى ايه معارضه
ويعنى ايه مظاهرة
وليه النهارده
خدنا اجازة من المدرسة
قوللى يا بابا
يعنى ايه قهر
وفين بيقع خط الفقر
ويعنى ايه حظ
ويعنى ايه زهر
يعنى ايه يا بابا
حريه
يعنى ايه انسان
وايه هو السرطان
يعنى ايه يا بابا
خربوها
ومين دول يا بابا
ولاد القطقوطه
اللى خربوها
وكنت فين يا بابا
لما خربوها
ومين دى
سماره يابابا
وازاى يا بابا
ضاعت من قلبك
يا بابا
بابا
انت معايا
فيه يا بابا ناس
بتقول كفايه
وفيه عساكر
ماسكين عصايه
وبنات متعورين
وتانيين ماشيين بيضحكوا
يابابا .. هما دول اسرائيليين
قولتلها
نور
ممكن اسألك سؤال
قالتلى
اتفضل يا بابا
قلتلها
هيه قناة سبيس تون
رقمها كام
واخدتها....علشان تنام

[bo7or]

بحب البرد


بحب البرد

..ويا سلام

..لو حد هرب م الدوشه

..وراح وجابلى ورد

وأموت م الفرحه والدهشه

..

لو كتبت قصيده

وقولتلى حلوه

..قولها تانى

اتنطط زى العيال الصغيره

..

..وأقولك احلف


..والله العظيم

..بتتكلم بجد

..يمكن علشان ايام الفرح قليله

..سهل تتعد

..عارف

.. رغم ان المخازن

.. كل يوم بتتحرق

ومفيش حساب ولا جرد

..

ورغم وجود السيرك

.. والاراجوز

والتلات ورقات

وجوز وفرد

عمرى ما اتمنيت أكون امير

..

أو ولى عهد

...لكنى بحلم بوطن مفيهوش ولا حاره سد

وطن بيفرح بحاجه

غير وصول الاهلى لليابان

...

وحزنه انبل

...م الدموع البلاستيك

..وعمليات التجميل

.. والشفط والشد

..عارف

..رغم انها

.. بتقع

بتغرق

... بتتنيل بستين نيله

لكن جميله

.. عمرها ما ها تنهد

..عشان كده

..انا لسه بحب حاجه

.. ولسه فى قلبى حد

[amr_miza1]

المشاركة الأصلية بواسطة bo7or

دى بأة تحفة ملهاش حل بجد....
بعشقها فظيعة ..
انتوا بتقرولى انا!!!!!!!!!!!!!! بصوا تحت عالجمال..
بـــراءة

بمنتهى البراءة
سألتنى الصغنتوته نور
فى اربع خمس امور
قالتلى بابا يا بابا
مش انت يا بابا
بتكتب اغانى
وتقول اشعار
انا سمعت الشيخ يا بابا
بيقول انك يا بابا
هتروح النار
زى الناس الوحشين
الحراميين الكفار
قوللى يا بابا
يعنى ايه استعمار
يعنى ايه نيل
يعنى ايه هرم
ومين اللى حط النسر ده
فوق العلم
يعنى ايه يا بابا
استفتاء
ويعنى ايه انتخاب
ويعنى ايه حر
ويعنى ايه نصاب
وايه هو الاغتصاب
ويعنى ايه اختلاس
ويعنى ايه هجاص
ويعنى ايه خصخصة
وايه هو الدستور
يعنى ايه معارضه
ويعنى ايه مظاهرة
وليه النهارده
خدنا اجازة من المدرسة
قوللى يا بابا
يعنى ايه قهر
وفين بيقع خط الفقر
ويعنى ايه حظ
ويعنى ايه زهر
يعنى ايه يا بابا
حريه
يعنى ايه انسان
وايه هو السرطان
يعنى ايه يا بابا
خربوها
ومين دول يا بابا
ولاد القطقوطه
اللى خربوها
وكنت فين يا بابا
لما خربوها
ومين دى
سماره يابابا
وازاى يا بابا
ضاعت من قلبك
يا بابا
بابا
انت معايا
فيه يا بابا ناس
بتقول كفايه
وفيه عساكر
ماسكين عصايه
وبنات متعورين
وتانيين ماشيين بيضحكوا
يابابا .. هما دول اسرائيليين
قولتلها
نور
ممكن اسألك سؤال
قالتلى
اتفضل يا بابا
قلتلها
هيه قناة سبيس تون
رقمها كام
واخدتها....علشان تنام

جميلة يا رقية فعلا

شكرا للاضافات الحلوة دى

[bo7or]

قول كمان

معاك ومعايا
مش فارقة
لا الشعر أصفر
ولا حتي
العيون زرقة
وبنهاتي
وبنطاطي
ولا لسانه عارف ينطق خواجاتي
وإحباطك .. وإحباطي
مدام جينا
وعلي كتفنا تلال الهم والأحزان
نقول كمان
يا طالع الشجرة
هاتلي
معاك إنسان
هاتلي معاك
إسم
تاريخ ميلاد
عنوان
هاتلي معاك
وطن حر
ومواطن مش جبان
وبعدين نبقي ندور
ع اللي ضايع
من زمان

[bo7or]

الْكيِلُوْ تسعينْ


يكُونْ ف عِلْمَكْ...

أنا مُتواضَعْ جِداً....

وِمشْ طالبْ كتيرْ....

يَعنى شَقَة صُغيِرةْ...

ف الكيِِِِِِِِِِِِِِِلُو تِسعينْ...

مَا هى الحَياة مَشَاوِيرْ....

مِشِ شرْط بَقى بتطلْ...

عَلَى جَناين وهَوا وعَصافيرْ...

وبنت حَلالْ ومِش شَرطْ....

زَى اللى ف الكلَيب الأخيِر...

وحِتة مدرسةَ صُغيّرةَ...

أهَى أِلعيال تُفكْ الخَطْ....

ومِش شَرْط لُغات وحرَكاتْ...

وجَغرافيا وتعبيِرْ...

وأدْخلْ القسْم...

أطَلَعْ زِى ماَ دَخَلْتْ...

مُحتْرَم وكبيِرْ....

[bo7or]

لو موصوفلك


لو موصوفلك ترجع.....جوة الهيصة
وعيش

لو موصوفلك ترجع....روح ويارايت
متجيش

لو موصوفلك تضحك......اضحك
على أحزانك

لو موصوفلك تعشق...حب واقف فى
مكانك

لو تختار فى زمانك........أحسن
ماتنقيش

لو موصوفلك تحلم....قضى الليل
بردان

واعمل روحك ترتاح....ناسى انك
انسان

لو موصوفلك ترتاح....نادى وقول
يا جراح

ما يغركش براح ساكت ما بيبكيش......
ساكت ما بيبكيش !

[bo7or]

جاتك القرف
----------------

علي حد علمي
احنا و اسرائيل حبايب
و فيه سلام و ما فيش حرب
طب الظباط و العساكر دول بيعملوا ايه
في ميدان طلعت حرب

ده بنت و ولد نازلين يشوفوا بلوزة تليق ع الايشارب
بيحلموا .. بيغنوا
و احلي ما فـ غناهم انه طالع من القلب

من امتي العشق كان بيموت من الخوف
و منا امتي الحلم كان بيخاف من الضرب

يا كابتن
يا باشا

خليك ابن بلد
هوه انتا ما عندكش اخوات
صبيان
و لابنات

يعني انتوا كل عيلتكوا ظباط
يعني انتوا اصحاب اكاديمية الشرطة
و اصحاب الشوارع
و الميادين
و المحلات
و اصحاب البلد

طيب
طب ان هاخرم من التحرير لدار القضاء العالي
هاكل كشري و اخش سيما
مالك بقي و مالي

معايا بطاقة و خلصت الجيش
بتسمي ده أكل عيش
؟
يبقي عرفتك
طب عريني بقي
فتشني
قطع لي هدومي
و افحصني
و خلصني
لا انت اول و لا اخر واحد

عارف
انا مرة القطر عدي و داسني
و ما متش

عشق الحياة ماهوش ترف
عرفت ايه معني الشرف

جاتك القرق
جاتك القرف

____________________________________________

احنا مين؟؟

مَحَدَّشْ فيِْنا قَامْ الصُبْحْ يتمطَّعْ...
وقالْ نِفسىِ أطْلعْ القَمَر...
ولا حَدْ فيِنْاَ بيْغيِرْ...
منْ العَصَافيرْ الحُرةَّ ع الشَّجَرْ...
ولا حَدْ فِينَاَ إنْدَهَشْ م السُؤالْ والخَبرْ...
عايِشينْ بَسْ كدهْ...
عَاَلة ع البَشَرْ...
هىَّ الَمراكِبْ للْهُرُوبْ ولاَّ السَّفَرْ...
لو عِشْنا نَسْتَنى المَطَرْ...
هَنْمُوتْ أَكيْدْ عَطشانينْ...
هوَ إحْنا مِينْ...


________________________________________

أحب العسل ........

واموت فى الكسل

ووقت الازمه اقول فى العشق حكمه ومثل

وبس خلاص

أهجص الاقى ميت مليون هجاص

افكر...... هس.... ولا صوت ولا ناس

لانى كده ثقافه وعلم يادوب فى الفيلم فى الكراس

وراسى زى اكبر راس

مفيش احلام مفيش احساس

__________________________________________________

بايظه

بايظة بايظة ..
هي بايظة ...
والنهاردة معدش حد…
بيدي جايزة ..
يبقي أحسن .. خللي بالك ..
انسي همك .. ضغط دمك ..
سيبها ماشية .. بدعوة امك ..
مستحيل يقدر يضمك
حضن خايف ...
وأنت شايف ...
ده اللي لاهي ...
واللي ضايع ف الملاهي…
واللي ساكت بس ساهي ...
واللي حاله زي حالك ..
يعني إيه ..
يعني بايظة
هي بايظة ... بايظة .. بايظة


(( لأمانة النقل والحفاظ على حقوق الملكية الفكرية....يمكن اكون افسدت قصيدة هى بايظة...لأنى حذفت جزء من آخرها...يمكن يكون مش لطيف...معروف عن الشعر الساخر انه متعرض لدة ..فياريت تسامحونى))

[bo7or]

الظاهر ان مفيش حد بييجى هنا....



طب دة لسة فى حاجات كتيييييييييييييييييييييير جدا



معرفش بأة انا بنزل لمين دلوقت...بس انا صامدة للنهاية...

[omarr]

انا متابع بحور ...

تعرفى بحور .. انا اول مره اشوف شاعر معظم قصائده حلوه .. المفروض الشاعر
له شويه قصايد او ابيات مشهور بيهم و بس .. الراجل ده حاله خاصه جدا ..

قصيده احنا مين .. بتقولى انه صايع ومثقف ومخضرم و قارىء ومتابع .. صدمنى بجد
هوده اللى بدرو عليه .. هو ده الكلام اللى نفسى اقوله ونفسى اسمعه ..

[ابتسامة الحياة]

ايه ده ايه ده يا بحور

الشاعر ده جمييييييل اوى

انا اول مرة والله اشوف الموضوع دلوقتى

بس استنى ده عاوز قراءة جااااااااااااااااااااااااامدة هرجع اقرأة واحدة واحدة وارجعلك

[bo7or]

المشاركة الأصلية بواسطة omarr

انا متابع بحور ...

تعرفى بحور .. انا اول مره اشوف شاعر معظم قصائده حلوه .. المفروض الشاعر
له شويه قصايد او ابيات مشهور بيهم و بس .. الراجل ده حاله خاصه جدا ..

قصيده احنا مين .. بتقولى انه صايع ومثقف ومخضرم و قارىء ومتابع .. صدمنى بجد
هوده اللى بدرو عليه .. هو ده الكلام اللى نفسى اقوله ونفسى اسمعه ..

انا سعيييييييييييييدة...
مراحب طول الوقت هنا...
هو فعلا حد مالوش حل ابدا...
والبقيه انيل...

[bo7or]

المشاركة الأصلية بواسطة ابتسامة الحياة

ايه ده ايه ده يا بحور

الشاعر ده جمييييييل اوى

انا اول مرة والله اشوف الموضوع دلوقتى

بس استنى ده عاوز قراءة جااااااااااااااااااااااااامدة هرجع اقرأة واحدة واحدة وارجعلك

انتى بتخمى يا سمسم..انا مش لاعب !!!!
فين دة مرجعتيش ولا حاجة..على سلامه دة فعلا يستاهل اكتر بكتير من المكانه اللى واخدها هو فعلا حد تحفه..
كان بودنى حقيقةً انى اجيب معلومات عنه ...بس
جيبت معلومات فطيعه فى الصفحه التانيه ملهاش حل

[bo7or]

استراحه ع الصحراوى

الجو نار
سايق ومحدش معايا
غيري انا والذكريات
وحبه حاجات
ازازه الميه
ونظره عينيا
اللي شايفها في المرايا
بتبص لي من وقت للتاني بغباء
كانها عارفه الحكايه
او واخده بالها من الطريق
مر السفر من غير صديق
اول شمال احود ولف
الغنوه سكتت
والشريط عمال يسف
وازاي تخف
ياالم من غير جراحه
ادي استراحه
دماغي محتاجه الصراحه
وقلبي محتاج الحنان
ازكن هنا
اشرب ياعم قهوتك
ويالاا علشان
نلحق مكان قبل الغروب
واوعي الردار يسحب
ف لحظه غنوتك
معش فاضل في الطريق
ولا استراحه

_______________________________________________

جايز ممكن أحتمال

مش دى .. بطاقتى
وده .. رقمى القومى
ودى .. الحقيقة ..
وده الخيال ....
ومش دي الخريطة ..
ودي المدينة ..
وده المحور ..
وده المترو ..
وكده يمين .. وكده شمال ..
مش ده ظابط .. وده عسكرى ..
وده طبيب .. وده كمسرى ..
وده منجد .. وده بقال ..
مش ده جامع .. ودى مدرسة
وده بيت دعارة ..
وده سمسار ..
وده شيال .....
مش ده فستان .. ودى جلابيه
وده شورت .. وده مفيش ..
وده شال ....
مش ده اتوبيس .. ودى عجلة
ودول حمير ....
ودولا جمال .....
مش ده عمى .. ودى أختى
و دول صحابى ..
وده كمال ....
مش ده شارعنا .. وده بيتنا ..
ودى مراتى ..
ودولا العيال ...
مش ده الوطن .. وده المواطن ...
وده التاريخ .. اللى إتقال ...
أمال ليه .. كل ما اروح فى حته
و أسأل سوأل ....
يقولولي .. جايز ... يمكن .... إحتمال

__________________________________________________

الترابيزة

يا عم قول كلام منطقى
تخبط صباع رجلك ..
ف رجل الترابيزة
وتبكى وتشتكى ..
وتحط مراهم
يفش الورم ..
ويروح شوية الألم
وترجع تتخبط
وترجع تبكى تانى وتشتكى ..
ياعم شوف قلبك ولا ده مش بتاعك
يا عم شوفلك حل
يا تبيع الترابيزة ..
يا تقطع صباعك ..
__________________________________________________ ___

رقية: انا مش بعلق على كلماته عشان انا مبهورة واتكلمت كتير عن اعجابى بالحد دة
__________________________________________________ ___