أشعــــار .. على سلامـــة

[bo7or]

تراب السفر

أنا بان عليا الكبر
واللا تراب السفر
واللا ده شكل الخوف
من غير ونس
ياقمر
أنا بان عليا الزمن
واللا ده رخص التمن
واللا دى غربة روح
وسط الصحاب ياوطن
أنا بان عليا الهوان
واللا ده ايه ده كمان
ودى دموع الفرح
واللا دموع أحزان

[bo7or]

إسمه إيه ده


بالصلاة ع النبى
احناعندنا إسمه إيه ده
أحسن واحد يحلل مباريات
يحط التشكيل
الأساسى والبديل
ويقولك إمتى تلعب براسين حربة
وإمتى تلعب من غير راس
ولو ضميرك مش مرتاح
وعندك إحساس
بلاش تشوط ع الثلاث خشبات
وعندنا إسمه إيه ده
أحسن مهندس خبير
بيرمش بس للبير
يطلع غاز وبترول
وينزل دهب م الحنفيات
وعندنا إسمه إيه ده
أحسن سمكرى
فى الثلاثين سنة الأخيرة
نخش من مجرى العيون على عين الصيرة
هاتعرفه من مناخيره
ومن شكل العربيات
وعندنا إسمه إيه ده
مجرم قانون دولى ودستور
وايده خفيفة أوى فى التعديلات
يشيل من هنا ويحط هنا
جواهرجى ياربى
ملقاط
وعندنا إسمه إيه ده
أحسن واحد يحط الفول ع الطعمية
ويعمل سندويتشات
وعندنا إسمه إيه ده
أحسن دكتور
مسالك وعظام وقلب وغرام
من نظرة عينك يعرف كل الحاجات
ولا روشتة ولا إبرة ولا تحليل
ولا إشاعات
وعندنا إسمه إيه ده
أحسن حنوتى آثار
ولا لو جاله برد
أبو الهول يموت
وتنتحر الأهرامات
وعندنا إسمه إيه ده
أحسن كاتب
وأحسن مخرج رقص
وأحسن جزار كوارع وعكاوى
وحلويات
وعندنا إسمه إيه ده
ملوش حل فى الزراعة
فواكه وحبوب وخضراوات
يقول للأرض قمح
تقوله حاضر
ونخبز ونعمل بسكويت
وفينو بسمسم وبقصمات
وعندنا إسمه إيه ده
صاحب القهوة
كلنا نتيتم ونتشرد
لو بعد الشر
زى الناس مابتموت
مات
ياأخى أنا مش عارف
لما احنا عندنا إسمه إيه ده
وإسمه إيه ده
أمال إسمها إيه دى
مصر
مبتتقدمش ليه
وتعبت
وزهقت
وداخت
ولفت السبع لفات

[Menino]

تسلم ايدك يا بحور ...علي سلامه انا عرفته من فتره بسيطه وقريت له كتاب القراءه وعلي باب سفاره كندا ....لكن اللي انتي جمعتيه ده يدل اننا امام عبقريه تستحق الإشاده والتقدير

أشكرك يا أختي ودمتي بخير

[bo7or]

المشاركة الأصلية بواسطة Menino

تسلم ايدك يا بحور ...علي سلامه انا عرفته من فتره بسيطه وقريت له كتاب القراءه وعلي باب سفاره كندا ....لكن اللي انتي جمعتيه ده يدل اننا امام عبقريه تستحق الإشاده والتقدير

أشكرك يا أختي ودمتي بخير

هييييييييييييى
انا لسه شايفه الرد ده حالا بالصدفة
لولا كدة انا كنت زغرطت و عملت فرح ان لسه الموضوع ده بيتدخل
تسلم يا أخى
انا برضه معرفتوش من فترة طويلة
اول حاجة ليه انا سمعتها مش قرأتها لوجيه عزيز
و بدأت ادور بقى على باقى كلماته لقيته فعلا عبقرى !
كدة ممكن استمر

[True_Face]

أختيار موفق
انا من عشاقى العاميه
لك كل احترامى وتقديرى

[bo7or]

انا جيت اهه اهه ..
كل ما تتمناه واكثر

[bo7or]

لب وسوداني

بقول لها ..

ما تيجي نهزر ..

نجري ونلعب ..

ونكسر كل الحاجات ..

ونجيب م اللي فات ..

يومين حلوين ....

قالتلي والنبي إنت فايق ورايق ..

قولتلها ...

طب وليه نتضايق ..

إحنا لسه صغيرين ..

وأكبر عيالنا ..

يا دوب تسع سنين ..

يعني لو بنحكم مصر ..

تبقي يا دوب لفة ونص ..

مش عشرين ..

- وطي صوتك البت بتذاكر ..

والواد مصدقت إنه نام ...

إنما إيه اللي صحي ف قلبك ..

من تاني الغرام ..
قولتلها جوايا كلمتين غزل ..

قالتلي والنبي إنت عسل ..

بس الظروف ..

- مالها الظروف ..

فاكرة لما كنتي ..

بتحوشي م المصروف ..

جبتيلي ورد ف عيد ميلادي ..

- وجبتلك بلوفر صوف ..

- وجبتيلي بلوفر صوف ..

- فاكر لما بوستني ..

وإحنا لسه مخطوبين وأبويا لاحظ ..

يالهوي كنت هموت م الكسوف

- فاكرةأول مرة قلت لك بحبك ..

وشك إحمر ..

- إنت اللي وشك كان مخطوف ..

- مش إنتي كنتي بترسمي زمان ..

- وإنت كمان كنت بتكتب شعر ..

- هو احنا بطلنا نحس ..

- إحنا بطلنا نشوف ...

وطلعنا اللب والسوداني ..

وفتحنا التليفزيون ..

وسكتنا تاني ..

ولا زال السبب ..

غير معروف ..

غير معروف

[Dr.Hammood]

ايه ده انا ازاي كنت نايم على ودني


شششششششششششككككككككككككككررررررررررررررررررررررراا ااااااااااااااااااااااااا

اشكرك جدا يا دكتوره

يارب تبقي باستير التاني

تبقي باستوره بقى

[bo7or]

المشاركة الأصلية بواسطة Dr.Hammood

ايه ده انا ازاي كنت نايم على ودني


شششششششششششككككككككككككككررررررررررررررررررررررراا ااااااااااااااااااااااااا

اشكرك جدا يا دكتوره

يارب تبقي باستير التاني

تبقي باستوره بقى

متأخر اوىى
العفو يا دكتور ده كلام ؟



المهم المهم ..
باستير ده قبل الفحص و التمحيص و التحليل و التدقيق و النشنشه
كان "برأى احد الزملاء" عالم البسترة الاول ..
قلت لا اكييد حاجه تانيه ..
عملت سيرش "اشبه بسيرشى عن على سلامه
جالى طريقه عمل فطيرة بكريمة الباستير
ما عليييييينا
بم انى مشروع دكتورة اكيد هو ليه علاقه بالمجال ..
بعد التدقيق الادق
اكتشفت انه عالم فرنسى اخترع اول لقاح للجمرة الخبيثة


ده بقى بيدل على ايه ..
احنا اى نعم بناخد تاريخ الصيدلة بس "" العربى""
فبجد مكنش عندى ادنى خلفيه عن الاسم ده
يمكن بيدل على اهميه التعلم
التعلم ... مش التعليم اللى انتهى بنهاية مرحلة ثانوى


ثانكس دكتور على مروروك
و انك خلتنى ااعمل السيرش ده

و خليتنى كمان اتكلم فى موضوع مش موضوعنا تماما
متغيريييييييييش المووووووضوع

[bo7or]

كإننا في حالة حصار

شكلنا الصبح
زي شكلنا آخر النهار

و الدنيا برد
زي الدنيا حر نار

عرفت إيه معنى استعمار
من غير مدفع ولا عسكري

كنت فين يا علي

[bo7or]

كيس البرتقان

ملقتش في الشتا ونيس
غير كيس البرتقان
آخد منه و أقشر
و أضحك أحسن ماكشر
و أصدق روحي و أفشر
و أصدق إني باقدر
أفرح زي زمان

و لما خلص البرتقان
راح م المكان الونس
قربت من التليفون
جايز يرن الجرس
لقيتني أنا و روحي
مش مرتاحين لبعض
قلت مش مشكلة
المرة الجاية بقي
أعمل حسابي في قفص
مليان بالبرتقان

[bo7or]

عرفت قلوب كتير
الطيب واللبط
ده قلب منى طفش
وده قلب في شبط

وبين الفرح والوجع
أنا قلبى ياما اتخبط

لكنى بارجع وأعيش
وأعشق وأحب بعبط

نعيماٌ

[bo7or]

حمص الشام

يعني أنا مثلا
أبقي قاعد في البيت
بتفرج علي التمثيلية
و بقزقز لب
و بشرب حمص شام
أو بشوف الأهلي و الزمالك
في الدوري العام
أو بفتكر أنا و المدام
أيام الغرام
أو بعمل زي الناس
ما بتعمل في الحمام
يدخل عليا حد
من غير إحم و لا دستور
و يقوللي طبقا للدستور
عايزينك
طب بذمتك و دينك
ده اسمه كلام
معلش أنا بستفسر مش أكتر
علشان لما نروح
نروح و نيجي قوام
طب اشرب الحمص !

[omarr]

رقيه


شكر لا ينتهى على تعريفك لى بهذا الشاعر .. انا وقعت فى غرامه ..

شكرا على مجهودك ... شويه اشعار ولا اروع ...

[قلب الكنارى~~~]

بحور
بجد بهنيكى على اختيارك للشاعر وكلماته الاكثر من رائعة

دا غير اسلوبه
حاسه انى بسمع صلاح جاهين
بس لسنة 2000

تسلم ايدك بجد
روعه

تحياتى ليكى